«ՎԱՎԵՐԱՑՆՈՒՄ ԵՄ» Հայաստանի Հանրապետության Նախագահ Լ. Տեր-Պետրոսյան 15 հունվարի 1996 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

9 փետրվարի 1996 թվականի N 36

քաղ. Երևան

Հայաստանի Հանրապետությունում բժշկական ԵՎ դեղագործական գործունեության պետական մասնագիտական լիցենզավորման մասին

Հայաստանի Հանրապետությունում բժշկական և դեղագործական գործունեության բարելավման և կանոնակարգման նպատակով Հայաստանի Հանրապետության կառավարությունը որոշում է.

1. Սահմանել, որ Հայաստանի Հանրապետությունում բժշկական և դեղագործական գործունեությունը ենթակա է պետական մասնագիտական լիցենզավորման:

Պետական մասնագիտական լիցենզավորումը բժշկական և դեղագործական գործունեության որոշակի տեսակներով զբաղվելու իրավունքի հավաստումն է, որն ամրագրվում է սահմանված կարգով տրված լիցենզիայով:

2. Պետական մասնագիտական լիցենզավորման ենթակա են բժշկական և դեղագործական գործունեություն իրականացնող ձեռնարկությունները, հիմնարկները և կազմակերպությունները (անկախ սեփականության ձևից, կազմակերպական-իրավական տեսակից, գերատեսչական ենթակայությունից), ինչպես նաև ֆիզիկական անձինք` բժիշկները, պրովիզորները, միջին բուժաշխատողները և դեղագործները:

3. Հայաստանի Հանրապետությունում բժշկական և դեղագործական գործունեության պետական մասնագիտական լիցենզավորումն իրականացնում է Հայաստանի Հանրապետության առողջապահության նախարարությունը Հայաստանի Հանրապետության կառավարության կողմից սահմանված կարգով:

Հայաստանի Հանրապետության առողջապահության նախարարության համակարգում ստեղծված պետական մասնագիտական լիցենզավորման կենտրոնական հանձնաժողովի որոշումները հաստատում է Հայաստանի Հանրապետության առողջապահության նախարարը:

Լիցենզավորման ենթակա բժշկական և դեղագործական գործունեության տեսակները և ծավալները, լիցենզավորման չափանիշները, կարգն ու պայմանները սահմանում է Հայաստանի Հանրապետության առողջապահության նախարարությունը:

(3-րդ կետը փոփ. 24.06.96 N 188)

4. Սահմանել, որ լիցենզիան տրվում է մինչև 5 տարի ժամկետով:

Լիցենզիայի գործողության ժամկետը լրանալու, լիցենզիայի գործողությունը կասեցնելու կամ այն անվավեր ճանաչելու դեպքերում սահմանված կարգով տրվում է նոր լիցենզիա:

5. Իրավաբանական և ֆիզիկական անձի կողմից իրականացվող լիցենզավորող գործունեության տեսակների քանակը չի սահմանափակվում:

6. Իրավաբանական և ֆիզիկական անձինք իրավունք ունեն իրականացնելու բժշկական և դեղագործական գործունեություն միայն տրված լիցենզիայով սահմանված շրջանակներում:

7. Լիցենզիայի տրման համար Հայաստանի Հանրապետության օրենսդրությամբ սահմանված կարգով ու չափով գանձվում է վճար և մուծվում պետական բյուջե:

8. Լիցենզիայի տրման մերժումը, ինչպես նաև դրա գործողության կասեցումը կամ անվավեր ճանաչումը կարող է գանգատարկվել դատական կարգով:

9. Լիցենզիայի տրման անհիմն մերժման կամ դրա տրման սահմանված ժամկետի խախտման հետևանքով իրավաբանական և ֆիզիկական անձանց պատճառված վնասը ենթակա է հատուցման Հայաստանի Հանրապետության քաղաքացիական օրենսդրությամբ սահմանված կարգով:

10. Իրավաբանական և ֆիզիկական անձանց կողմից առանց համապատասխան լիցենզիայի կամ լիցենզիայով չսահմանված բժշկական ու դեղագործական գործունեությամբ զբաղվելն առաջացնում է պատասխանատվություն` Հայաստանի Հանրապետության օրենսդրությամբ սահմանված կարգով:

11. Մինչև սույն որոշման կիրարկումը սահմանված կարգով բժշկական և դեղագործական գործունեություն իրականացնող ֆիզիկական անձինք ենթակա են լիցենզավորման մինչև 2000 թվականի դեկտեմբերի 31-ը, իսկ իրավաբանական անձինք` մինչև 2001 թվականի դեկտեմբերի 31-ը:

Մինչև նշված ժամկետների ավարտը պետական մասնագիտական լիցենզավորման գործընթացն իրականացվում է Հայաստանի Հանրապետության առողջապահության նախարարության հաստատած ժամանակացանկին համապատասխան:

(11-րդ կետը փոփ. 01.04.97 N 59, խմբ. 31.03.98 N 212, փոփ. 30.05.00 N 277)

12. Հայաստանի Հանրապետության` առողջապահության նախարարությանը`

ա) եռամսյա ժամկետում ընդունել սույն որոշման 3-րդ կետի կիրարկումն ապահովող համապատասխան ակտեր.

բ) Հայաստանի Հանրապետության արդարադատության նախարարության հետ համատեղ եռամսյա ժամկետում Հայաստանի Հանրապետության կառավարություն ներկայացնել սույն որոշման 10-րդ կետից բխող` Հայաստանի Հանրապետության գործող օրենսդրության մեջ համապատասխան փոփոխություններ և լրացումներ կատարելու մասին առաջարկություն:

13. Սույն որոշումն ուժի մեջ է մտնում 1996 թվականի հունվարի 15-ից:

Հայաստանի Հանրապետության վարչապետ

Հ. ԲԱԳՐԱՏյան