ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԿՈԼԵԳԻԱ

Ո Ր Ո Շ ՈՒ Մ

30 մայիսի 2017 թվականի

թիվ 60

քաղ. Մոսկվա

«Եվրասիական տնտեսական միության մասին» 2014 թվականի մայիսի 29-ի պայմանագրի 58-րդ հոդվածի 2-րդ կետին և Եվրասիական տնտեսական բարձրագույն խորհրդի՝ 2014 թվականի դեկտեմբերի 23-ի թիվ 98 որոշմամբ հաստատված`Եվրասիական տնտեսական հանձնաժողովի աշխատանքի կանոնակարգի թիվ 2 հավելվածի 22-րդ կետին համապատասխան` Եվրասիական տնտեսական հանձնաժողովի կոլեգիան որոշեց.

1. Մաքսային միության հանձնաժողովի՝ 2010 թվականի հունիսի 18-ի թիվ 317 որոշմամբ հաստատված՝ Անասնաբուժական հսկողության (վերահսկողության) ենթակա ապրանքներին ներկայացվող միասնական անասնաբուժական (անասնաբուժասանիտարական) պահանջներում կատարել փոփոխություններ՝ համաձայն հավելվածի:

2. Սույն որոշումն ուժի մեջ է մտնում դրա պաշտոնական հրապարակման օրվանից 30 օրացուցային օրը լրանալուց հետո:

Եվրասիական տնտեսական հանձնաժողովի կոլեգիայի նախագահ`

Տ. Սարգսյան

ՀԱՎԵԼՎԱԾ Եվրասիական տնտեսական հանձնաժողովի կոլեգիայի 2017 թվականի մայիսի 30-ի թիվ 60 որոշման

Լրացնել հետևյալ բովանդակությամբ 45–րդ գլխով՝

«Գլուխ 45

Թույլատրվում է Եվրասիական տնտեսական միության մաքսային տարածք ներմուծել և (կամ) անդամ պետությունների միջև տեղափոխել այն վայրերում առողջ կենդանիներից ստացված՝ որձ շների սերմնահեղուկ, որտեղ կան պայմաններ սերմնահեղուկը վերցնելու, այն հետազոտելու, մշակելու, կոնսերվացնելու և պահելու համար:

Սերմնահեղուկի դոնոր որձ շները (այսուհետ՝ դոնոր որձ շներ) ծագում են պահման վայրերից, որոնք զերծ են կենդանիների հետևյալ վարակիչ հիվանդություններից՝

կատաղություն՝ վերջին 6 ամիսների ընթացքում (դոնոր որձ շների մոտ սերմնահեղուկը վերցնելուց հետո 15 օրվա ընթացքում չեն դրսևորվել կատաղության հայտանիշներ).

տուբերկուլյոզ՝ վերջին 6 ամիսների ընթացքում:

Դոնոր որձ շները սերմնահեղուկը վերցնելուց առնվազն 20 օր առաջ պետք է պատվաստված լինեն, եթե դրանք վերջին 12 ամիսների ընթացքում չեն պատվաստվել կատաղության, մսակերների ժանտախտի, պարվովիրուսային և ադենովիրուսային վարակի, լեպտոսպիրոզի դեմ:

Դոնոր որձ շները սերմնահեղուկը վերցնելուց ոչ ուշ, քան 14 օր առաջ պետք է հետազոտության ենթարկվեն հավատարմագրված լաբորատորիայում (անասնաբուժական սերտիֆիկատում պետք է նշվեն լաբորատորիայի անվանումը, հետազոտության ամսաթիվը և մեթոդը), որի արդյունքում պետք է գրանցվեն բացասական արդյունքներ լեպտոսպիրոզի (եթե դրանք չեն պատվաստվել կամ կանխարգելիչ նպատակով չեն մշակվել դեհիդրոստրեպտոմիցինով կամ համարժեք ազդեցության՝ արտահանող երկրում գրանցված այլ նյութով) և բրուցելյոզի մասով:

Դոնոր որձ շները սերմնահեղուկը վերցնելուց առնվազն 14 օր առաջ չեն օգտագործվում բնական սերմնավորման համար և գտնվում են դրա հնարավորությունը բացառող պայմաններում:

Դոնոր որձ շները սերմնահեղուկը վերցնելուց ոչ ուշ, քան 10 օր առաջ պետք է մշակվեն հակահելմինտային պատրաստուկներով:

Առողջ լինելը հաստատելու համար դոնոր որձ շները սերմնահեղուկը վերցնելուց առաջ պետք է ենթարկվեն պարտադիր ջերմաչափմամբ կլինիկական զննման:

Դոնոր որձ շների սերմնահեղուկում չպետք է պարունակվեն ախտածին և թունածին միկրոօրգանիզմներ։

Սերմնահեղուկը պետք է ընտրվի, պահվի և տրանսպորտային եղանակով տեղափոխվի՝ ՄԱԲ–ի Կանոնների առաջարկներին համապատասխան։

Պաշտոնական հրապարակման օրը՝ 22 հունիսի 2022 թվական: