ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

4 նոյեմբերի 1993 թ. N 557

Քաղ. Երևան

Հանրապետության գյուղական բնակավայրերի տարածաշրջանային տարաբնակեցման, աշխատուժի տեղաբաշխման նախընտրելի ուղղությունների որոշման, բնական ռեսուրսների արդյունավետ օգտագործման, ծայրամասային, սահմանամերձ բնակավայրերի զարգացման նպատակով Հայաստանի Հանրապետության կառավարությունը որոշում է.

1. Հանրապետությունում գյուղի զարգացման համալիր ծրագրի մշակման պատվիրատու սահմանել Հայաստանի Հանրապետության էկոնոմիկայի նախարարությունը, իսկ գլխավոր մշակող՝ Հայաստանի Հանրապետության ճարտարապետության և քաղաքաշինության պետական վարչությունը։

2. Հաստատել գյուղի զարգացման համալիր ծրագրի նախագիծը մշակողների (համակատարողների) կազմը (կցվում է)։

3. Գլխավոր մշակողին իրավունք վերապահել, անհրաժեշտության դեպքում, նախագծի մշակման գործում ներգրավելու այլ նախարարությունների, կազմակերպությունների։

4. Ծրագրի նախագիծը մինչև 1994 թվականի հոկտեմբերի 1-ը ներկայացնել Հայաստանի Հանրապետության կառավարություն։

5. Հայաստանի Հանրապետության վիճակագրության, պետական ռեգիստրի և վերլուծության պետական վարչությանը, պատգամավորների շրջանային և քաղաքային խորհուրդների գործադիր կոմիտեներին` ապահովել ծրագրի մշակման համար անհրաժեշտ ելակետային տվյալների և նյութերի տրամադրումը, համաձայն Հայաստանի Հանրապետության ճարտարապետության և քաղաքաշինության պետական վարչության կողմից ներկայացվող ձևերի։

6. Հայաստանի Հանրապետության էկոնոմիկայի նախարարությանը, Հայաստանի Հանրապետության ֆինանսների նախարարությանը՝ երկշաբաթյա ժամկետում Հայաստանի Հանրապետության կառավարություն ներկայացնել առաջարկություն ծրագրի նախագծի մշակման համար անհրաժեշտ ֆինանսական միջոցներ հատկացնելու վերաբերյալ։

7. Սույն որոշման հսկողությունը դնել պետնախարար Գ. Շահբազյանի վրա:

Կ Ա Զ Մ

ՀՀ գյուղատնտեսության նախարարություն

ՀՀ կառավարությանն առընթեր «Հայբնակկոմտնտ» ՀՄ

«Հայպետնախագիծ» ինստիտուտ

«Հայպետգյուղնախագիծ» ինստիտուտ

«Հայպետհողշիննախագիծ» ինստիտուտ

«Հայարդնախագիծ» ինստիտուտ

«Հայկոմուննախագիծ» ինստիտուտ

«Հայինժնախագիծ» ինստիտուտ

ՀՀ քաղաքաշինության գիտահետազոտական նախագծային ինստիտուտ