«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
12 օգոստոսի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

12 օգոստոսի 2000 թվականի N 471
քաղ. Երևան

ՊԱՐԶԵՑՎԱԾ ՀԱՐԿ ՎՃԱՐՈՂՆԵՐԻ ԿՈՂՄԻՑ ԵԿԱՄՈՒՏՆԵՐԻ ԵՎ ԾԱԽՍԵՐԻ ՀԱՇՎԱՌՄԱՆ ԿԱՐԳԻ ՄԱՍԻՆ

«Պարզեցված հարկի մասին» Հայաստանի Հանրապետության օրենքի 15 հոդվածի 8-րդ կետին համապատասխան` Հայաստանի Հանրապետության կառավարությունը որոշում է.

1. Հաստատել պարզեցված հարկ վճարողների կողմից եկամուտների և ծախսերի հաշվառման կարգը (կցվում է):

2. Սահմանել, որ`

ա) պարզեցված հարկ վճարողներն այդպիսին համարվելու հաշվետու ժամանակաշրջանում պարզեցված հարկով հարկվող գործունեության մասով կարող են չվարել`

հաշվապահական հաշվառում,

Հայաստանի Հանրապետության կառավարության 1997 թվականի հուլիսի 31-ի «Հայաստանի Հանրապետության տարածքում առաքվող կամ տրամադրվող կամ տեղափոխվող արտադրանքի, ապրանքների գրանցման (հաշվառման) մասին» N 314 որոշմամբ սահմանված առաքվող, տեղափոխվող ապրանքների գրանցման (հաշվառման) գրքեր.

Հայաստանի Հանրապետության կառավարության 1997 թվականի հուլիսի 31-ի «Հայաստանի Հանրապետության տարածքում վաճառվող արտադրանքի, ապրանքների և դրանց գների (հասույթի) գրանցման (հաշվառման) մասին» N 315 որոշմամբ սահմանված արտադրանքի, ապրանքների և դրանց գների (հասույթի) գրանցման (հաշվառման) գրքեր.

բ) բացառապես պարզեցված հարկ վճարող հանդիսացող իրավաբանական անձինք և անհատ ձեռնարկատերերը, ինչպես նաև նոտարները հարկային մարմիններ ֆինանսական (հաշվապահական) հաշվետվություններ կարող են չներկայացնել.

գ) պարզեցված հարկ վճարողները վարում են դրամարկղային գրքեր` Հայաստանի Հանրապետության օրենսդրությամբ սահմանված դեպքերում և կարգով:

(2-րդ կետը լրաց. 31.10.02 N 1726-Ն)

3. Պարզեցված հարկ վճարողների վրա տարածվում են Հայաստանի Հանրապետության կառավարության 1998 թվականի օգոստոսի 25-ի «Ծախսերը հիմնավորող փաստաթղթերի նկատմամբ ներկայացվող պահանջները սահմանելու և այդ փաստաթղթերի կազմման կարգը հաստատելու մասին» N 525 որոշման դրույթները:

4. Սույն որոշմամբ հաստատված կարգի վերաբերյալ գերատեսչական նորմատիվ ակտերը սահմանված կարգով հաստատում է Հայաստանի Հանրապետության պետական եկամուտների նախարարությունը` համաձայնեցնելով Հայաստանի Հանրապետության ֆինանսների և էկոնոմիկայի նախարարության հետ:

5. Սույն որոշմամբ հաստատված կարգի պահանջների կատարման նկատմամբ վերահսկողությունը Հայաստանի Հանրապետության օրենսդրությանը համապատասխան իրականացնում է Հայաստանի Հանրապետության պետական եկամուտների նախարարությունը:

6. Սույն որոշումն ուժի մեջ է մտնում պաշտոնական հրապարակման պահից:

Հայաստանի Հանրապետության վարչապետ

Ա. Մարգարյան

Հաստատված է ՀՀ կառավարության 2000 թվականի օգոստոսի 12-ի N 471 որոշմամբ

Կ Ա Ր Գ

պարզեցված հարկ վճարողների կողմից եկամուտների եվ ծախսերի հաշվառման

I. Ընդհանուր դրույթներ

1. Սույն կարգը կարգավորում է «Պարզեցված հարկի մասին» Հայաստանի Հանրապետության օրենքի 15 հոդվածի 8-րդ կետին համապատասխան պարզեցված հարկ վճարողների կողմից եկամուտների և ծախսերի հաշվառման հետ կապված հարցերը:

Սույն կարգի 3-13-րդ կետերի դրույթները չեն տարածվում պարզեցված հարկ վճարող հանդիսացող նոտարների վրա:

(1-ին կետը լրաց. 31.10.02 N 1726-Ն)

2. Պարզեցված հարկ վճարող հանդիսացող իրավաբանական անձինք և անհատ ձեռնարկատերերն այդպիսին համարվելու հաշվետու ժամանակաշրջանում գործունեության այդ մասով վարում են եկամուտների և ծախսերի հաշվառման գիրք (այսուհետև` հաշվառման գիրք, էջի ձևը կցվում է), իսկ պարզեցված հարկ վճարող հանդիսացող նոտարներն այդպիսին համարվելու հաշվետու ժամանակաշրջանում գործունեության այդ մասով վարում են Հայաստանի Հանրապետության արդարադատության նախարարության կողմից սահմանված և Հայաստանի Հանրապետության պետական եկամուտների նախարարության հետ համաձայնեցված նոտարական գործողությունների գրանցման գրանցամատյան, որը եկամուտների և ծախսերի հաշվառման գրքի ամփոփ ձևն է:

(2-րդ կետը լրաց. 31.10.02 N 1726-Ն)

3. Հաշվառման գրքի էջերը համարակալվում, կարվում և կազմվում են, որից հետո հաշվառման գիրքը ներկայացվում է պարզեցված հարկ վճարողի հաշվառման վայրի հարկային մարմին` կնքման: Կնքված և համարակալված հաշվառման գիրքը խիստ հաշվառման փաստաթուղթ է և հերթական համարով հաշվառվում է հարկային մարմնում: Հարկային մարմինը պարտավոր է կնքել և վերադարձնել հաշվառման գիրքը մեկ օրացուցային օրվա ընթացքում:

Հաշվառման գրքի կազմի վրա նշվում է պարզեցված հարկ վճարողի լրիվ անվանումը, կազմակերպական-իրավական տեսակը, հարկ վճարողի հաշվառման համարը (ՀՎՀՀ), գտնվելու (բնակության) վայրի հասցեն և գրքի հերթական համարը: Գործունեության վայրի հասցեն պարզեցված հարկ վճարողի գտնվելու (բնակության) վայրի հասցեից տարբերվելու դեպքում նշվում է նաև այդ վայրի հասցեն:

4. Պարզեցված հարկով հարկվող գործունեության յուրաքանչյուր տեսակի (խանութների, կրպակների (տաղավարների) միջոցով առևտրական գործունեություն և այլ գործունեություն) համար վարվում է առանձին հաշվառման գիրք:

(4-րդ կետը փոփ. 31.10.02 N 1726-Ն)

5. Լրացված ավարտված հաշվառման գրքերը պահվում են պարզեցված հարկ վճարողի մոտ` մինչև` այդ գրքում ամենավերջին գրանցման օրվանից սկսած 3 տարին լրանալը:

Հաշվառման գրքի լրանալուց ավարտվելուց հետո պարզեցված հարկ վճարողը սույն կարգի 3-րդ կետում նշված կարգով նոր հաշվառման գիրք է ներկայացնում հարկային մարմին` կնքման և համարակալման համար:

II. Եկամուտների եվ ծախսերի գրանցման կարգը

6. Հաշվառման գրքերում գրանցման (հաշվառման) ենթակա են պարզեցված հարկ վճարողի կողմից կատարված ցանկացած տնտեսական գործառնությունը` ժամանակագրական կարգով:

(6-րդ կետը փոփ. 31.10.02 N 1726-Ն)

7. Հաշվառման գրքերում կատարվող գրանցումների համար հիմք է հանդիսանում տնտեսական գործառնության կատարման փաստը, որը հիմնավորվում է սկզբնական հաշվառման փաստաթղթերով:

Սկզբնական փաստաթղթերը հաշվառվում են մինչև գործառնության կատարման օրվա վերջը:

Չի թույլատրվում սկզբնական փաստաթղթերում կատարել չծանուցված ուղղումներ: Սխալի ուղղումը պետք է հաստատված լինի տվյալ փաստաթուղթն ստորագրելու իրավունք ունեցող անձի ստորագրությամբ և պետք է նշվի ուղղման ամսաթիվը:

8. Հաշվառման գրքում հերթական համարով նշվում են տնտեսական գործառնության կատարման ամիսը և ամսաթիվը, բովանդակությունը, սկզբնական փաստաթղթի անվանումն ու հերթական համարը, ինչպես նաև կատարված (հաշվարկված) ուղղակի և ընդհանուր տնտեսական ծախսերն ու հաշվարկված եկամուտները (իրացման շրջանառությունից և այլն):

Պարզեցված հարկի հաշվարկման առումով`

ուղղակի տնտեսական ծախսեր են համարվում ապրանքների մատակարարման, աշխատանքների կատարման և ծառայությունների մատուցման հետ անմիջականորեն կապված ծախսերը.

ընդհանուր տնտեսական ծախսեր են համարվում հարկատուի գործունեության հետ կապված վարչական և ուղղակի տնտեսական ծախսերին չվերաբերվող այլ ծախսերը:

9. Ընդհանուր տնտեսական ծախսերը պարզեցված հարկ վճարողների կողմից գրանցվում են հաշվառման գրքում` բացառապես պարզեցված հարկով հարկվող գործունեության իրականացման դեպքում: Ընդ որում, պարզեցված հարկով հարկվող գործունեության տարբեր տեսակների (խանութների, կրպակների (տաղավարների) միջոցով առևտրական գործունեություն և այլ գործունեություն) իրականացման դեպքում կատարված ընդհանուր տնտեսական ծախսերը գրանցվում են հաշվառման գրքերից որևէ մեկում` հարկատուի հայեցողությամբ:

(9-րդ կետը փոփ. 31.10.02 N 1726-Ն)

10. Մատակարարված ապրանքների, կատարված աշխատանքների և մատուցված ծառայությունների (որոնց գծով առաջանում է իրացման շրջանառություն) դիմաց հաշվարկված եկամուտների գրանցումը ներառում է հաշվառման գրքի 2-4-րդ և 7-րդ սյունակների լրացումը: Հաշվարկված այլ եկամուտների գրանցումը ներառում է հաշվառման գրքի 2-4-րդ և 8-րդ սյունակների լրացումը:

Կատարված (հաշվարկված) ուղղակի ծախսերի գրանցումը ներառում է հաշվառման գրքի 2-5-րդ սյունակների լրացումը: Կատարված (հաշվարկված) ընդհանուր տնտեսական ծախսերի գրանցումը ներառում է 2-4-րդ և 6-րդ սյունակների լրացումը:

Այն տնտեսական գործառնության համար, որի գծով չեն հաշվառվում եկամուտներ և (կամ) ծախսեր, լրացվում են միայն հաշվառման գրքի 2-4-րդ սյունակները (5-6-րդ և (կամ) 7-8-րդ սյունակները չեն լրացվում):

11. Հաշվառման գրքում սխալ թույլ տալու դեպքում տողի վրա գիծ է քաշվում այնպես, որ հնարավոր լինի կարդալ նախկին գրառումը, և հերթական ազատ տողում կատարվում է ճիշտ գրանցումը` նշելով սխալ գրանցված տողի համարը: Ջնջված տողի կողքին կատարվում է համապատասխան նշագրում սխալ գրառման մասին:

12. Պարզեցված հարկ վճարողները հաշվառման տվյալների արժանահավատությունն ապահովելու նպատակով կարող են անցկացնել գույքի և պարտավորությունների գույքագրում, որի արդյունքները ներառվում են հաշվառման գրքում:

13. Սկզբնական հաշվառման փաստաթղթերը իրավաբանական անձանց և անհատ ձեռնարկատերերի կողմից պահպանվում են Հայաստանի Հանրապետության օրենսդրությամբ սահմանված կարգով ու ժամկետներում, բայց առնվազն 3 տարի:

III. Պատասխանատվությունը սույն կարգի պահանջների խախտման համար

14. Սույն կարգի պահանջների խախտումն առաջացնում է պատասխանատվություն` Հայաստանի Հանրապետության օրենսդրությամբ սահմանված կարգով:

15. Հայաստանի Հանրապետության հարկային մարմինների կողմից սույն կարգի պահանջների խախտումներ հայտնաբերվելու դեպքում պարզեցված հարկ վճարողը ճշգրտումներ (գրանցումներ) է կատարում հաշվառման գրքում և հաշվառմանը վերաբերող այլ փաստաթղթերում:

Եկամուտների եվ ծախսերի հաշվառման գրքի էջ

NN ը/կ	Ամիսը, ամսաթիվը	Գործարքի (գործառնության) բովանդակությունը	Սկզբնական փաստաթղթի անվանումը և հերթական համարը	Կատարված (հաշվարկված) ուղղակի ծախսերը (հազ. դրամ)	Կատարված (հաշվարկված) ընդհանուր տնտեսական ծախսերը (հազ. դրամ)	Հաշվարկված եկամուտները իրացման շրջանառությունից (հազ. դրամ)	Հաշվարկված այլ եկամուտներ (հազ. դրամ)
1	2	3	4	5	6	7	8
1.
2.
3.
4.
5.
6.
7.
8.
9.
10.
11.
12.
13.
14.
15.
16.
17.
18.
19.
20.

(կարգը փոփ. 31.10.02 N 1726-Ն)