«ՎԱՎԵՐԱՑՆՈՒՄ ԵՄ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՆԱԽԱԳԱՀ Ռ. ՔՈՉԱՐՅԱՆ

19 սեպտեմբերի 2001 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

19 սեպտեմբերի 2001 թվականի N 882

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 1998 ԹՎԱԿԱՆԻ ԴԵԿՏԵՄԲԵՐԻ 21-Ի N 812 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 1998 թվականի դեկտեմբերի 21-ի «Բնակելի, հասարակական, արտադրական շենքերի ու շինությունների նախագծերի մշակման, փորձաքննության, համաձայնեցման, հաստատման և փոփոխման կարգը սահմանելու մասին» N 812 որոշման մեջ (Հայաստանի Հանրապետության կառավարության 2000 թվականի դեկտեմբերի 16-ի N 826 որոշման խմբագրությամբ) կատարել հետևյալ փոփոխությունները`

որոշմամբ հաստատված կարգի 3-րդ կետը շարադրել նոր խմբագրությամբ.

«3. Պատվիրատուն նախագծային աշխատանքների ավարտից հետո նախագիծը ներկայացնում է փորձաքննության, որն իրականացվում է պատվիրատուի և փորձաքննություն կատարողի միջև կնքվող պայմանագրի համաձայն: Ընդ որում, սահմանված կարգով հաստատված հատուկ և կարևորագույն նշանակության օբյեկտների ցանկում չընդգրկված և օբյեկտի փորձաքննության վերաբերյալ Հայաստանի Հանրապետության օրենսդրությամբ սահմանված պահանջներին չհակասելու դեպքում` օբյեկտի զրոյական նիշից 10 մետր բարձրությունն ու 500 քառակուսի մետր ընդհանուր մակերեսը չգերազանցող քաղաքացիական օբյեկտների փորձաքննությունը կարող է փոխարինվել նախագծային աշխատանքների կապալառուի` Հայաստանի Հանրապետության օրենսդրության և նորմատիվ-տեխնիկական փաստաթղթերի պահանջներին նախագծի համապատասխանության վերաբերյալ գրավոր երաշխավորագրով:

Պարտադիր համալիր փորձաքննության ենթակա են`

ա) Հայաստանի Հանրապետության պետական բյուջեի միջոցների (այդ թվում` վարկային) հաշվին կամ դրանց ներգրավմամբ, պետական նպատակային ծրագրերի շրջանակներում, ինչպես նաև Հայաստանի Հանրապետության կառավարության որոշումների համաձայն իրականացվող օբյեկտների նախագծային փաստաթղթերը.

բ) հանրապետական նշանակության պատմության և մշակույթի անշարժ հուշարձանների` սահմանված կարգով հաստատված ցանկում ընդգրկված օբյեկտների նախագծային փաստաթղթերը.

գ) փորձարարական, բազային և բազմակի օգտագործման օբյեկտների նախագծային փաստաթղթերը.

դ) հատուկ օբյեկտների և կարևորագույն նշանակություն ունեցող օբյեկտների նախագծային փաստաթղթերը` համաձայն NN 1 և 2 հավելվածների»:

2. Սույն որոշումն ուժի մեջ է մտնում 2001 թվականի սեպտեմբերի 19-ից:

Ց Ա Ն Կ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՀԱՏՈՒԿ ՕԲՅԵԿՏՆԵՐԻ

Հայաստանի Հանրապետության տարածքում հատուկ օբյեկտներ են համարվում`

1. Հատուկ նշանակության տարածքներում իրականացվող օբյեկտները`

Հայաստանի Հանրապետության զինված ուժերի և այլ զորքերի, դրանց կազմավորումների և մարմինների, պաշտպանական, ռազմական ենթակառուցվածքի տարածքներում, այդ թվում` զինվորական բնակավայրերում իրականացվող բնակելի, հասարակական, արտադրական, ինչպես նաև այլ նշանակության շենքերը և շինությունները,

Հայաստանի Հանրապետության օրենսդրությամբ ամրագրված սահմանային գոտում իրականացվող շենքերը և շինությունները,

օրենքով պաշտպանվող շենքերը և շինությունները:

2. Հայաստանի Հանրապետության օրենսդրության համաձայն պետական գաղտնիք պարունակող նախագծային և շինարարական աշխատանքների միջոցով իրականացվող շենքերը և շինությունները:

3. Հայաստանի Հանրապետության օրենսդրության պահանջներին համապատասխան որպես քաղաքաշինական գործունեության հատուկ կարգավորման օբյեկտ առանձնացված տարածքներում իրականացվող շենքերը և շինությունները:

4. Բնության հատուկ պահպանվող տարածքներում իրականացվող շենքերը և շինությունները:

Ց Ա Ն Կ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԿԱՐեվՈՐԱԳՈՒՅՆ ՆՇԱՆԱԿՈՒԹՅՈՒՆ ՈՒՆԵՑՈՂ ՕԲՅԵԿՏՆԵՐԻ

1. Հասարակական շենքեր և շինություններ`

ուսումնական և կրթական հաստատություններ, այդ թվում` դպրոցներ, արտադպրոցական կազմակերպություններ, մանկատներ, ուսումնարաններ, ինստիտուտներ և այլն` 300 և ավելի աշակերտով (երեխա, ուսանող),

մանկատներ, ծերանոցներ, հաշմանդամների տուն-ինտերնատներ` 100 և ավելի տեղով,

գիտական, գիտահետազոտական, նախագծային բյուրոներ, բանկեր, գրասենյակներ, վարչական օբյեկտներ և այլն` 300 և ավելի աշխատատեղով,

դատարաններ` 4 և ավելի դատավորներով,

հանրային սննդի օբյեկտներ` ռեստորաններ, սրճարաններ և այլն` 100 և ավելի տեղով,

առևտրի կենտրոններ, հանրախանութներ և տոնավաճառներ` 1000 քառ. մ և ավելի մակերեսով,

առողջապահական օբյեկտներ, հիվանդանոցներ` 200 և ավելի մահճակալով,

առողջարաններ, հանգստի և տուրիզմի օբյեկտներ` 300 և ավելի տեղով,

հյուրանոցներ, մոթելներ և այլն` 300 և ավելի տեղով,

մարզադաշտեր` 5000 և ավելի նստատեղով,

ունիվերսալ մարզադահլիճներ, փակ լողավազաններ,

մշակույթի կենտրոններ, թատրոններ, կրկեսներ, կինոթատրոններ` 300 և ավելի նստատեղով,

թանգարաններ, պատկերասրահներ, ցուցահանդեսային շենքեր` 1000 քառ. մ և ավելի մակերեսով,

գրադարաններ, արխիվներ, ավանդապահոցներ` 1 մլն և ավելի միավոր,

դիվանագիտական ներկայացուցչությունների օբյեկտներ,

երկաթուղային կայարաններ,

ավտոկայաններ` 50 հազ. և ավելի բնակիչ ունեցող քաղաքների համար,

օդանավակայաններ,

բազմահարկ ավտոկանգառներ, այդ թվում` ստորգետնյա` 100 և ավելի ավտոմեքենայի համար,

տրանսպորտային կայանատեղեր` վերանորոգման արհեստանոցներով` 50 և ավելի միավոր,

հրշեջ կայաններ` 3 և ավելի մեքենայով,

հեռուստառադիոկենտրոններ, հեռուստաաշտարակներ,

դիակիզարաններ,

համաքաղաքային հասարակական կենտրոններ, քաղաքաշինական համալիրներ, որոնք իրենց կազմում ունեն սույն ցանկում ընդգրկված օբյեկտներ.

2. Արդյունաբերական, ընդերքօգտագործման, գյուղատնտեսական և այլ արտադրական նշանակության, ինչպես նաև կոմունալ, պահեստային, էներգետիկայի, կապի, ինժեներական և տրանսպորտային ենթակառուցվածքների կարևորագույն օբյեկտներն ընդունել` համաձայն Հայաստանի Հանրապետության կառավարության 1999 թվականի մարտի 30-ի «Շրջակա միջավայրի վրա ազդեցության փորձաքննության ենթակա նախատեսվող գործունեությունների սահմանային չափերի մասին» N 193 որոշման.

3. Բազմաբնակարան բնակելի շենքեր, բնակելի շենքերի խմբեր կամ թաղամասեր` 500 և ավելի բնակչով.

4. 5 և ավելի հարկայնության օբյեկտներ.

5. Ելնելով «Շրջակա միջավայրի առնչությամբ տեղեկության, որոշումներ ընդունելուն հասարակության մասնակցության և արդարադատության մատչելիության մասին» կոնվենցիայի դրույթներից` կարևորագույն օբյեկտներ համարել նաև նշված կոնվենցիայի N 1 հավելվածի ցանկում ընդգրկված օբյեկտները: