ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

7 օգոստոսի 2014 թվականի N 884-Ն

ՕՏԱՐԵՐԿՐՅԱ ՊԵՏՈՒԹՅՈՒՆՆԵՐԻ ԵՎ ՄԻՋԱԶԳԱՅԻՆ ՎԱՐԿԱՏՈՒ ԿԱԶՄԱԿԵՐՊՈՒԹՅՈՒՆՆԵՐԻ ԿՈՂՄԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆԸ ՏՐԱՄԱԴՐՎՈՂ ՎԱՐԿԱՅԻՆ ԵՎ ԴՐԱՄԱՇՆՈՐՀԱՅԻՆ ՄԻՋՈՑՆԵՐԻ ՀԱՇՎԻՆ ԻՐԱԿԱՆԱՑՎՈՂ ԾՐԱԳՐԵՐԻ ՄԱՍԻՆ ՏԵՂԵԿԱՏՎՈՒԹՅՈՒՆ ԵՎ ՀԱՇՎԵՏՎՈՒԹՅՈՒՆՆԵՐ ՆԵՐԿԱՅԱՑՆԵԼՈՒ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 1998 ԹՎԱԿԱՆԻ ՀՈՒԼԻՍԻ 9-Ի N 429 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Միջազգային ֆինանսավորող կազմակերպությունների կողմից ֆինանսավորվող վարկային և դրամաշնորհային ծրագրերի արդյունավետ իրականացման նպատակով Հայաստանի Հանրապետության կառավարությունը որոշում է.

1. Հաստատել օտարերկրյա պետությունների և միջազգային վարկատու կազմակերպությունների կողմից Հայաստանի Հանրապետությանը տրամադրվող վարկային և դրամաշնորհային միջոցների հաշվին իրականացվող ծրագրերի մասին տեղեկատվություն և հաշվետվություններ ներկայացնելու կարգը՝ համաձայն հավելվածի:

2. Հանձնարարել հանրապետական գործադիր և տարածքային կառավարման մարմինների ղեկավարներին, ինչպես նաև առաջարկել Հայաստանի Հանրապետության կենտրոնական բանկի նախագահին և համայնքների ղեկավարներին (Հայաստանի Հանրապետության պետական բյուջեի համար պայմանական պարտավորություններ առաջացնող ծրագրերի դեպքում) (այսուհետ` ծրագրեր իրականացնող մարմիններ) օտարերկրյա պետությունների և միջազգային վարկատու կազմակերպությունների ֆինանսավորմամբ վարկային կամ դրամաշնորհային ծրագրեր իրականացնելու նախաձեռնություն ցուցաբերելուց առաջ կամ առաջարկություն ստանալու դեպքում, ինչպես նաև համապատասխան ծրագրերի իրականացման ընթացքում Հայաստանի Հանրապետության կառավարության աշխատակազմ ներկայացնել տեղեկատվություն և հաշվետվություններ՝ սույն որոշման 1-ին կետով հաստատված կարգին համապատասխան:

3. Սահմանել որ՝

1) սույն որոշման 1-ին կետով հաստատված կարգի 2-րդ կետում նշված փաստաթղթերը հանրապետական գործադիր և տարածքային կառավարման մարմինների, ինչպես նաև Հայաստանի Հանրապետության կենտրոնական բանկի (համաձայնությամբ) և համայնքի ղեկավարի (համաձայնությամբ) կողմից Հայաստանի Հանրապետության կառավարության աշխատակազմ են ներկայացվում նաև այն ծրագրերի համար, որոնց մասով բանակցություններն սկսվել են մինչև սույն որոշումն ուժի մեջ մտնելը և չեն ավարտվել.

2) ծրագրեր իրականացնող մարմինները սույն որոշման 1-ին կետով հաստատված կարգի 8-րդ կետով նախատեսված տեղեկատվությունը Հայաստանի Հանրապետության կառավարության աշխատակազմ են ներկայացնում գործող և դեռևս չավարտված, ինչպես նաև այն ծրագրերի համար, որոնց մասով բանակցություններն սկսվել են մինչև սույն որոշումն ուժի մեջ մտնելը, և նոր նախաձեռնությունների համար, 7-րդ և 9-րդ կետերով նախատեսված հաշվետվությունը և տեղեկատվությունը՝ միայն գործող և դեռևս չավարտված ծրագրերի համար, իսկ 10-րդ կետով նախատեսված հաշվետվությունը ներկայացվում է նոր նախաձեռնությունների, ինչպես նաև այն ծրագրերի համար, որոնց մասով բանակցություններն սկսվել են մինչև սույն որոշումն ուժի մեջ մտնելը և չեն ավարտվել:

4. Հայաստանի Հանրապետության կառավարության աշխատակազմի ղեկավար-նախարարին՝ սույն որոշումն ուժի մեջ մտնելուց հետո մեկշաբաթյա ժամկետում մշակել և Հայաստանի Հանրապետության վարչապետի հաստատմանը ներկայացնել սույն որոշման 1-ին կետով հաստատված կարգի 7-րդ, 8-րդ, 9-րդ և 10-րդ կետերով նախատեսված հաշվետվություններն ու տեղեկատվությունները ներկայացնելու ձևերը:

5. Հայաստանի Հանրապետության կառավարության 1998 թվականի հուլիսի 9-ի «Վարկային ծրագրերի իրականացման գրասենյակների կողմից վարկային միջոցների օգտագործման վերաբերյալ հաշվետվությունների ներկայացման կարգի մասին» N 429 որոշման 1-ին կետից հանել «Հայաստանի Հանրապետության կառավարության աշխատակազմ և» բառերը:

6. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Կ Ա Ր Գ

ՕՏԱՐԵՐԿՐՅԱ ՊԵՏՈՒԹՅՈՒՆՆԵՐԻ ԵՎ ՄԻՋԱԶԳԱՅԻՆ ՎԱՐԿԱՏՈՒ ԿԱԶՄԱԿԵՐՊՈՒԹՅՈՒՆՆԵՐԻ ԿՈՂՄԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆԸ ՏՐԱՄԱԴՐՎՈՂ ՎԱՐԿԱՅԻՆ ԵՎ ԴՐԱՄԱՇՆՈՐՀԱՅԻՆ ՄԻՋՈՑՆԵՐԻ ՀԱՇՎԻՆ ԻՐԱԿԱՆԱՑՎՈՂ ԾՐԱԳՐԵՐԻ ՄԱՍԻՆ ՏԵՂԵԿԱՏՎՈՒԹՅՈՒՆ ԵՎ ՀԱՇՎԵՏՎՈՒԹՅՈՒՆ ՆԵՐԿԱՅԱՑՆԵԼՈՒ

1. Սույն կարգով կարգավորվում են օտարերկրյա պետությունների և միջազգային վարկատու կազմակերպությունների կողմից Հայաստանի Հանրապետությանը տրամադրվող վարկային և դրամաշնորհային միջոցների հաշվին իրականացվող կամ իրականացվելիք ծրագրերի (այսուհետ՝ ծրագիր) մասին տեղեկատվություն ներկայացնելու, գործող ծրագրերի հաշվետվողականության կարգի հետ կապված հարաբերությունները:

2. Հանրապետական գործադիր, տարածքային կառավարման մարմինները, համաձայնության դեպքում նաև Հայաստանի Հանրապետության կենտրոնական բանկը և համայնքները (այսուհետ` ծրագրեր իրականացնող մարմիններ) օտարերկրյա պետությունների և միջազգային վարկատու կազմակերպությունների ֆինանսավորմամբ վարկային և դրամաշնորհային ծրագրեր իրականացնելու նախաձեռնություն ցուցաբերելուց առաջ կամ նման ծրագրին մասնակցելու վերաբերյալ առաջարկություն ստանալու դեպքում դրա մասին տեղեկացնում են Հայաստանի Հանրապետության կառավարության աշխատակազմին՝ ներկայացնելով՝

1) վարկային և (կամ) դրամաշնորհային ծրագրի մանրամասն նկարագրությունը.

2) ֆինանսավորման նախատեսվող պայմանները (այդ թվում՝ ժամկետների և նախատեսվող տոկոսադրույքի վերաբերյալ).

3) դրա շրջանակներում իրականացվող միջոցառումների պլան-ժամանակացույցը.

4) տեղեկատվություն ծրագրի իրականացման եղանակների մասին.

5) տեղեկատվություն ծրագրից ակնկալվող արդյունքների մասին.

6) տեղեկատվություն բանակցային և ծրագրի հետագա իրականացման փուլում առկա կամ հնարավոր ռիսկերի մասին.

7) վարկային ծրագրի դեպքում՝ վարկի մարման համար անհրաժեշտ ֆինանսական աղբյուրների և Հայաստանի Հանրապետության պետական բյուջեի ծախսերի վրա վարկի ազդեցության մասին տեղեկատվությունը.

8) այլ անհրաժեշտ տեղեկատվություն (դիմողի հայեցողությամբ):

3. Սույն կարգի 2-րդ կետում նշված փաստաթղթերը Հայաստանի Հանրապետության կառավարության աշխատակազմում մուտքագրվելու օրվան հաջորդող 3 աշխատանքային օրվա ընթացքում, Հայաստանի Հանրապետության վարչապետի հանձնարարությամբ, ներկայացվում են Հայաստանի Հանրապետության ֆինանսների նախարարություն ու Հայաստանի Հանրապետության էկոնոմիկայի նախարարություն, իսկ անհրաժեշտության դեպքում՝ նաև ծրագրով նախատեսված ոլորտը համակարգող պետական մարմին` կարծիքի:

4. Հայաստանի Հանրապետության ֆինանսների նախարարությունը և Հայաստանի Հանրապետության էկոնոմիկայի նախարարությունը, իսկ այլ մարմին ներկայացված լինելու դեպքում՝ նաև ծրագրով նախատեսված ոլորտը համակարգող պետական մարմինը 5 աշխատանքային օրվա ընթացքում ուսումնասիրում են սույն կարգի 2-րդ կետում նշված փաստաթղթերը և կարծիքը ներկայացնում Հայաստանի Հանրապետության կառավարության աշխատակազմ:

5. Հայաստանի Հանրապետության կառավարության աշխատակազմը կարծիքներն ստանալուց հետո ամփոփում է դրանք և ներկայացնում Հայաստանի Հանրապետության վարչապետին, ով հանձնարարականներ է տալիս ներկայացված ծրագրին մասնակցելու գործընթացը շարունակելու, որոշակի պայմաններով շարունակելու կամ դադարեցնելու մասին:

6. Ներկայացված ծրագրին մասնակցելու գործընթացը շարունակելու կամ որոշակի պայմաններով շարունակելու վերաբերյալ Հայաստանի Հանրապետության վարչապետի հանձնարարականն ստանալու դեպքում՝ դիմող պետական մարմինը կարող է սկսել բանակցությունները՝ դրանց ընթացքում սույն կարգի 2-րդ կետով սահմանված տվյալներում էական փոփոխությունների կատարման դեպքում դրա մասին տեղեկատվությունը ներկայացնելով Հայաստանի Հանրապետության կառավարության աշխատակազմ: Բանակցությունները վարելու նպատակով Հայաստանի Հանրապետության վարչապետի որոշմամբ կարող է ստեղծվել աշխատանքային խումբ:

7. Ծրագիրը (համաձայնագրերը, պայմանագրերը) սահմանված կարգով հաստատվելուց կամ վավերացվելուց հետո ծրագիր իրականացնող մարմինը յուրաքանչյուր ամիս՝ մինչև հաշվետու ամսվան հաջորդող ամսվա 15-ը, Հայաստանի Հանրապետության կառավարության աշխատակազմ է ներկայացնում հաշվետվություն օտարերկրյա պետությունների և միջազգային վարկատու կազմակերպությունների կողմից Հայաստանի Հանրապետությանը տրամադրվող վարկային և դրամաշնորհային միջոցների հաշվին իրականացվող վարկային և դրամաշնորհային ծրագրերի կատարման ընթացքի մասին՝ համաձայն Հայաստանի Հանրապետության վարչապետի կողմից հաստատված ձևի:

8. Ծրագրեր իրականացնող մարմինը յուրաքանչյուր ամիս՝ մինչև հաշվետու ամսվան հաջորդող ամսվա 15-ը, Հայաստանի Հանրապետության կառավարության աշխատակազմ է ներկայացնում տեղեկատվություն օտարերկրյա պետությունների և միջազգային վարկատու կազմակերպությունների կողմից Հայաստանի Հանրապետությանը տրամադրվող վարկային և դրամաշնորհային միջոցների հաշվին իրականացվող (նախատեսվող, բանակցային փուլում գտնվող և գործող) ծրագրերի մասին՝ համաձայն Հայաստանի Հանրապետության վարչապետի կողմից հաստատված ձևի:

9. Ծրագրեր իրականացնող մարմինը յուրաքանչյուր եռամսյակի ավարտից հետո՝ մինչև հաշվետու ժամանակաշրջանին հաջորդող ամսվա 15-ը, Հայաստանի Հանրապետության կառավարության աշխատակազմ է ներկայացնում տեղեկատվություն օտարերկրյա պետությունների և միջազգային վարկատու կազմակերպությունների կողմից Հայաստանի Հանրապետությանը տրամադրվող վարկային և դրամաշնորհային միջոցների հաշվին իրականացվող վարկային և դրամաշնորհային ծրագրերի շրջանակներում հաշվետու տարում կատարված կամ ընթացքում գտնվող, ինչպես նաև կատարվելիք (նախատեսվող) գնումների մասին՝ համաձայն Հայաստանի Հանրապետության վարչապետի կողմից հաստատված ձևի:

10. Ծրագրեր իրականացնող մարմինը յուրաքանչյուր ամիս՝ մինչև հաշվետու ամսվան հաջորդող ամսվա 15-ը, Հայաստանի Հանրապետության կառավարության աշխատակազմ է ներկայացնում հաշվետվություն սույն կարգի 2-րդ կետի 3-րդ ենթակետով սահմանված պլան-ժամանակացույցով նախատեսված միջոցառումների կատարման ընթացքի մասին՝ համաձայն Հայաստանի Հանրապետության վարչապետի կողմից հաստատված ձևի:

11. Հայաստանի Հանրապետության կառավարության աշխատակազմը յուրաքանչյուր ամիս՝ սույն կարգի 7-րդ, 8-րդ և 10-րդ կետերում նշված հաշվետվությունն ու տեղեկատվությունը, իսկ 9-րդ կետում նշված տեղեկատվությունը՝ յուրաքանչյուր եռամսյակը մեկ անգամ, բոլոր մարմիններից ստանալուց հետո 10-օրյա ժամկետում ամփոփում է և ներկայացնում Հայաստանի Հանրապետության փոխվարչապետ, Հայաստանի Հանրապետության տարածքային կառավարման նախարարին:

12. Հայաստանի Հանրապետության փոխվարչապետ, Հայաստանի Հանրապետության տարածքային կառավարման նախարարի մոտ յուրաքանչյուր ամիս տեղի են ունենում քննարկումներ ծրագրերի կատարման ընթացքի վերաբերյալ, որոնց մասնակցում են Հայաստանի Հանրապետության ֆինանսների նախարարության և Հայաստանի Հանրապետության էկոնոմիկայի նախարարության ներկայացուցիչներ, ինչպես նաև կարող են մասնակցել ծրագրերն իրականացնող գրասենյակների (կազմակերպությունների) ղեկավարները (համաձայնությամբ):

13. Հայաստանի Հանրապետության փոխվարչապետ, Հայաստանի Հանրապետության տարածքային կառավարման նախարարն ամփոփում է քննարկման արդյունքները և դրանք ներկայացնում Հայաստանի Հանրապետության վարչապետին: Հայաստանի Հանրապետության վարչապետը կարող է տալ հանձնարարականներ ներկայացված ծրագրերի իրականացման վերաբերյալ: