ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

28 հունվարի 1994 թ. N 53

քաղ. Երևան

ԿՈՏԱՅՔԻ ՇՐՋԱՆԻ ՈՂՋԱԲԵՐԴ ԳՅՈՒՂԸ ՆՈՐ ՏԱՐԱԾՔ ՏԵՂԱՓՈԽԵԼՈՒ ՄԱՍԻՆ

Սողանքային երևույթների ակտիվանալու հետևանքով Կոտայքի շրջանի Ողջաբերդ գյուղը նոր տարածք տեղափոխելու նպատակով Հայաստանի Հանրապետության կառավարությունը որոշում է.

1. Ողջաբերդ գյուղի նոր բնակավայրի շինարարության նախագծանախահաշվային փաստաթղթերի կազմման և կառուցապատման աշխատանքների գլխավոր պատվիրատու սահմանել Հայաստանի Հանրապետության գյուղատնտեսության նախարարությունը:

2. Հայաստանի Հանրապետության գյուղատնտեսության նախարարությանը, հաշվի առնելով Հայաստանի Հանրապետության արտակարգ իրավիճակների պետական վարչության կարծիքը`

ա) 4-ամսյա ժամկետում Հայաստանի Հանրապետության կառավարություն ներկայացնել Ողջաբերդ գյուղի նոր բնակավայրի գլխավոր հատակագծի նախագիծը և կառուցապատման հիմնական տեխնիկատնտեսական ցուցանիշները` ըստ վերաբնակեցման հերթականության.

բ) Ողջաբերդ գյուղի տարածքով անցնող Երևան-Գեղարդ ավտոմոբիլային ճանապարհի անվտանգ շահագործման և գյուղի բնակչության վերաբնակեցման ժամանակաշրջանում նրանց անվտանգության ապահովման նպատակով նախկին բնակավայրի տարածքում շարունակել հակասողանքային միջոցառումների իրականացումը:

3. Հայաստանի Հանրապետության ճարտարապետության և քաղաքաշինության պետական վարչությանը` 10-օրյա ժամկետում գլխավոր պատվիրատուին ներկայացնել Ողջաբերդ գյուղը նոր տարածք տեղափոխելու կապակցությամբ իրականացվող հակասողանքային միջոցառումների ժամանակացանկը:

4. Պատգամավորների Կոտայքի շրջխորհրդի գործկոմին` կարճ ժամկետում մարել հակասողանքային միջոցառումների ծրագրով նախատեսված` փաստացի կատարված նախագծաշինարարական աշխատանքների գծով պարտքերը` ըստ կապալառուների ներկայացրած ակտերի:

5. Հայաստանի Հանրապետության էկոնոմիկայի նախարարությանը` գլխավոր պատվիրատուի կողմից ներկայացված նախագծանախահաշվային փաստաթղթերի հիման վրա 1994 թվականից սկսած Ողջաբերդ գյուղի նոր բնակավայրի գծով իրականացվող նախագծաշինարարական աշխատանքների ֆինանսավորման համար անհրաժեշտ կապիտալ ներդրումներն ընդգրկել Հայաստանի Հանրապետության սոցիալ-տնտեսական զարգացման տարեկան ծրագրերում:

6. Հայաստանի Հանրապետության ֆինանսների նախարարությանը` Ողջաբերդ գյուղում հակասողանքային միջոցառումների իրականացումը շարունակելու և գյուղի նոր բնակավայրի նախագծաշինարարական աշխատանքների կատարման համար, գլխավոր պատվիրատուի ներկայացրած տիտղոսացուցակների հիման վրա, 1994 թվականից սկսած, հատկացնել համապատասխան միջոցներ:

7. Սահմանել, որ`

ա) կենտրոնացված կապիտալ ներդրումների հաշվին իրականացվում են Ողջաբերդ գյուղի նոր բնակավայրի գծով նախագծաինժեներահետախուզական, ինչպես նաև կրթական, առողջապահական, վարչական, կոմունալ-կենցաղային, էներգետիկ օբյեկտների, արտաքին ինժեներական ցանցերի և քանդման ենթակա տների թվին համապատասխան նոր տների զրոյական նիշից ցածր մասերի շինարարական բոլոր աշխատանքները.

բ) Ողջաբերդ գյուղի բնակչությունը հատկացվող վարկի և սեփական միջոցների հաշվին սահմանված կարգով կատարում է նոր տների զրոյական նիշից բարձր մասերի, օժանդակ շինությունների, դրանց ինժեներական ցանցերին միացման շինարարական աշխատանքները:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ