«Վավերացնում եմ»
Հայաստանի Հանրապետության
Նախագահ Ռ. Քոչարյան
28 նոյեմբերի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

28 նոյեմբերի 2002 թվականի N 1835-Ն

ԵՐԵՎԱՆԻ ՔԱՂԱՔԱՅԻՆ ՎԵՐԳԵՏՆՅԱ ՈՒՂԵՎՈՐԱՏԱՐ ՏՐԱՆՍՊՈՐՏԻ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆՆԵՐԸ ՎԵՐԱԿԱԶՄԱԿԵՐՊԵԼՈՒ ՄԱՍԻՆ

Ղեկավարվելով Հայաստանի Հանրապետության քաղաքացիական օրենսգրքի 116-րդ և «Բաժնետիրական ընկերությունների մասին» Հայաստանի Հանրապետության օրենքի 18-րդ ու 19-րդ հոդվածներով, ինչպես նաև Երևանի քաղաքային վերգետնյա ուղևորատար տրանսպորտի համալիր զարգացման միասնական քաղաքականություն վարելու, շարժակազմի շահագործման արդյունավետությունը բարձրացնելու և ուղևորների սպասարկումը բարելավելու նպատակով Հայաստանի Հանրապետության կառավարությունը որոշում է.

1. Երևանի քաղաքապետարանի «Երևանի էլեկտրատրանսպորտ», «Երևանի թիվ 2983 ավտոշարասյուն» և «Կենտրոնական դիսպետչերական» պետական փակ բաժնետիրական ընկերությունները միաձուլման ձևով վերակազմակերպել «Երևանտրանս» փակ բաժնետիրական ընկերության:

1¹. Բաժնետոմսերի անվանական արժեքի փոքրացմամբ նվազեցնել Երևանի քաղաքապետարանի «Երևանի էլեկտրատրանսպորտ» պետական փակ բաժնետիրական ընկերության կանոնադրական կապիտալը: Նշված ընկերության կանոնադրական կապիտալը սահմանել 465100 դրամ, բաժնետոմսերի անվանական արժեքը՝ 100 դրամ, քանակը՝ 4651 հասարակ (սովորական) բաժնետոմս:

(1¹-ին կետը լրաց. 20.02.03 N 153-Ն)

2. Երևանի քաղաքապետարանի «Երևանտրանս» փակ բաժնետիրական ընկերության կանոնադրական կապիտալը սահմանել՝ 62620000 դրամ, բաժնետոմսերի անվանական արժեքը՝ 10000 դրամ, քանակը՝ 6262 հասարակ (սովորական) բաժնետոմս:

Բաժնետոմսերի փոխարկումը կատարել սահմանված կարգով:

(2-րդ կետը խմբ. 20.02.03 N 153-Ն)

3. «Երևանտրանս» փակ բաժնետիրական ընկերության բաժնետոմսերի կառավարման, ինչպես նաև «Բաժնետիրական ընկերությունների մասին» Հայաստանի Հանրապետության օրենքի 12-րդ հոդվածի 3-րդ կետով սահմանված լիազորությունները վերապահել Երևանի քաղաքապետին:

4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Ա. Մարգարյան
2002 թ. նոյեմբերի 28 Երևան