«Գրանցված է»
ՀՀ արդարադատության
նախարարության կողմից
31 հունվարի 2007 թ.
Պետական գրանցման թիվ 11007026

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐ

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ «ՊԵՏԱԿԱՆ ՀԱՆՐԱԿՐԹԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆ ԽՈՐՀՐԴԻ ԸՆՏՐՈՒԹՅԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐԻ 2000 Թ. ԴԵԿՏԵՄԲԵՐԻ 22-Ի N 421-Մ ՀՐԱՄԱՆԸ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Ի կատարումն Հայաստանի Հանրապետության կառավարության 2002 թ. հուլիսի 25-ի N 1392-Ն որոշմամբ հաստատված օրինակելի կանոնադրության 43-47-րդ կետերի և 2002 թ. դեկտեմբերի 26-ի N 2126-Ն որոշման 2-րդ կետի «Պետական ոչ առևտրային կազմակերպության  մասին» Հայաստանի Հանրապետության օրենքի 12, 14, 15, 18, 19 և 21-րդ հոդվածների պահանջների.

Հրամայում եմ`

1. Հաստատել Հայաստանի Հանրապետության «Պետական հանրակրթական ուսումնական հաստատություն» պետական ոչ առևտրային  կազմակերպության  խորհրդի ընտրության կարգը (համաձայն հավելվածի):

*2. Ուժը կորցրած ճանաչել Հայաստանի Հանրապետության  կրթության և գիտության նախարարի 2000 թվականի դեկտեմբերի 22-ի «Հանրակրթական համակարգի բարեփոխումների փորձնական ծրագրում ընդգրկված հաստատության խորհրդի ընտրության կարգը հաստատելու մասին» թիվ 421-Մ հրամանը:

3. Նախարարության հանրակրթության  վարչությանը (պետ` Ն. Հովհաննիսյան) և օրենսդրության և իրավաբանական վարչությանը (պետ` Մ. Գրիգորյան) փաստաթուղթը սահմանված կարգով ներկայացնել Հայաստանի Հանրապետության արդարադատության նախարարություն՝ պետական գրանցման:

4. Հրամանի կատարման վերահսկողությունը վերապահել նախարարի տեղակալ Բ. Եսայանին:

             Կ Ա Ր Գ

Հայաստանի Հանրապետության «Պետական հանրակրթական ուսումնական հաստատություն» պետական ոչ առեվտրային կազմակերպության խորհրդի ընտրության

1. Տարածքային կառավարման և տեղական ինքնակառավարման մարմինների ղեկավարները (Հայաստանի Հանրապետության մարզպետը, Երևանի քաղաքապետը, թաղապետը (համայնքապետը) և Հայաստանի Հանրապետության կրթության և գիտության նախարարը, հաստատության նոր խորհուրդ ստեղծելու վերաբերյալ որոշում ընդունելուց հետո (30 օրվա ընթացքում) սույն կարգի համաձայն կազմակերպում և ապահովում են խորհրդի անդամների ընտրության գարծընթացը:

2. Խորհուրդը կազմված է 7 անդամից, որոնց առաջադրում են.

2-1 հաստատության մանկավարժական խորհուրդը (մինչև 40 ուսուցիչների դեպքում` մանկավարժական կոլեկտիվը), որը գաղտնի քվեարկությամբ տվյալ հաստատությունում առնվազն 3 տարվա աշխատանքային ստաժ ունեցող  ուսուցիչներից ընտրում է խորհրդի 2 անդամներին: Նրանց  լիազորությունները դադարեցվում են  աշխատանքից ազատվելու, Հայաստանի Հանրապետության օրենսդրությամբ և հաստատության կանոնադրությամբ նախատեսված դեպքերում.

2-2 հաստատության ծնողական խորհուրդը, որը գաղտնի քվեարկությամբ որոշում է հաստատության խորհրդի 2 անդամներին: Ծնողական խորհրդի կողմից առաջադրված թեկնածուները պետք է ունենան տվյալ հանրակրթական ուսումնական հաստատությունում սովորող երեխա.

2-3 մանկավարժական և ծնողական խորհուրդների նիստերի մասնակից յուրաքանչյուր քվեարկող կարող է քվեարկել միայն առաջադրված թեկնածուներից մեկի օգտին:

3. Տարածքային կառավարման մարմինը առաջադրում է խորհրդի 3 անդամ:

3-1 Տարածքային կառավարման մարմնի 3 անդամների առաջադրումը կատարվում է հետևյալ սկզբունքով.

ա) Հայաստանի Հանրապետության մարզերում 2 անդամ առաջադրում են  մարզպետները.

բ) 1 անդամ` համայնքի ղեկավարը` ավագանու համաձայնությամբ: Այդ անդամի առաջադրումը նույնպես վերապահվում է մարզպետին, եթե համայնքի ղեկավարը նշված լիազորությունը 7-օրյա ժամկետում չի իրականացնում.

գ) Երևան քաղաքում 1 անդամ առաջադրում է Երևանի քաղաքապետը.

դ) 2 անդամ` թաղաjին համայնքի ղեկավարը` ավագանու համաձայնությամբ:

Այդ  անդամի առաջադրումը նույնպես վերապահվում է Երևանի քաղաքապետին, եթե թաղային համայնքի ղեկավարը նշված լիազորությունը 7-օրյա ժամկետում չի իրականացնում.

ե) Հայաստանի Հանրապետության կրթության և գիտության նախարարության ենթակայության հաստատությունների խորհուրդներում նախարարը առաջադրում է 3 անդամ:

4. Կրթահամալիրի խորհրդի կազմը ձևավորվում է համաձայն իր Կանոնադրության:

5. Հաստատության խորհրդում առաջադրված թեկնածուների համար միջին մասնագիտական կամ բարձրագույն կրթություն ունենալը պարտադիր է:

6. Խորհրդի անդամի լիազորությունները դադարեցվում են Հայաստանի Հանրապետության օրենսդրությամբ, հաստատության կանոնադրությամբ նախատեսված, ինչպես նաև տվյալ հաստատությունում այլևս սովորող երեխա չունենալու դեպքերում:

7. Հաստատության տնօրենը չի կարող լինել տվյալ հաստատության խորհրդի կազմում:

7-1. Նույն անձը չի կարող ընդգրկվել մեկից ավելի խորհուրդների կազմում:

8. Տարածքային կառավարման մարմինը (ըստ ենթակայության` մարզպետը, Երևանի քաղաքապետը, Հայաստանի Հանրապետության կրթության և գիտության նախարարը), հիմք ընդունելով հաստատության մանկավարժական, ծնողական խորհուրդների որոշումները և համայնքի ղեկավարի առաջարկությունը, 7 օրվա ընթացքում հաստատում է խորհրդի անվանական կազմը, կամ սույն կարգի խախտմամբ առաջադրված լինելու դեպքում մերժում է անվանական կազմում առաջարկված անձի կամ անձանց թեկնածությունը:

9. Խորհրդի լիազորության ժամկետը  սահմանվում է հաստատության կանոնադրությամբ:

10. Խորհրդի առաջին նիստը վարում է տարիքով ավագը:

10-1 Խորհուրդը գաղտնի  քվեարկությամբ ընտրում է խորհրդի նախագահ:

10-2 Ընտրության չկայանալու դեպքում տասնօրյա ժամկետում անցկացվում է կրկնակի քվեարկություն:

Ընտրությունը նորից չկայանալու դեպքում խորհրդի անդամներից մեկը` վիճակահանությամբ, նշանակվում է նախագահ:

11. Խորհրդի անդամի լիազորությունների դադարեցման դեպքում նրան առաջադրող մարմինը 20-օրյա ժամկետում  տարածքային  կառավարման մարմնի հաստատմանն է ներկայացնում նոր թեկնածու` համաձայն սույն կարգի:

12. Խորհրդի անդամի լիազորությունները չեն կարող դադարեցվել, եթե հայտարարվել է  գործադիր տնօրենի ընտրության մրցույթ` բացառությամբ Հայաստանի Հանրապետության օրենսդրությամբ նախատեսված դեպքերի: