ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

13 հունիսի 2013 թվականի N 748-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2005 ԹՎԱԿԱՆԻ ՓԵՏՐՎԱՐԻ 3-Ի N 123-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

«Աուդիտորական գործունեության մասին» Հայաստանի Հանրապետության օրենքի 21-րդ հոդվածի 1-ին և 3-րդ մասերին, «Լիցենզավորման մասին» Հայաստանի Հանրապետության օրենքի 13-րդ հոդվածի 1-ին մասին համապատասխան՝ Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2005 թվականի փետրվարի 3-ի «Աուդիտորական որակավորման քննությունների անցկացման կարգը և քննությունների ծրագիրը հաստատելու մասին» N 123-Ն որոշման մեջ կատարել հետևյալ փոփոխությունները և լրացումը`

1) ուժը կորցրած ճանաչել 1-ին կետը.

2) 1.1-ին կետից հանել «մինչև նրանց հավատարմագրումը» բառերը.

3) 1.3-րդ կետում «1-ին կետի «ա» ենթակետով հաստատված կարգով» բառերը փոխարինել «1.4-րդ կետի «ա» ենթակետով սահմանված դրույթներով» բառերով.

4) լրացնել հետևյալ բովանդակությամբ նոր` 1.4-րդ կետով.

«1.4 Սահմանել, որ`

ա) աուդիտորների որակավորման քննություններն անցկացնում է Հայաստանի Հանրապետության կառավարության կողմից հավատարմագրված մասնագիտացված կառույցը (այսուհետ` մասնագիտացված կառույց): Քննությունների արդյունքների համաձայն աուդիտորի որակավորման վկայականները շնորհում է լիազորված մարմինը` քննությունների արդյունքների մասին տեղեկություններն ստանալու օրվան հաջորդող հինգ աշխատանքային օրվա ընթացքում.

բ) աուդիտորների որակավորման քննություններն անցկացվում են Հաշվապահների միջազգային դաշնության (այսուհետ` ՀՄԴ) կրթական ստանդարտներին համապատասխան կազմված ծրագրով (այսուհետ` որակավորման քննությունների ծրագիր), որը պետք է ներառի հետևյալ բաժինները`

Ֆինանսական հաշվառման հիմունքներ

Ֆինանսական տեղեկատվություն կառավարման համար

Իրավագիտության հիմունքներ

Հայաստանի Հանրապետության հարկային օրենսդրություն

Ֆինանսական կառավարում և վերահսկողություն

Ֆինանսական հաշվետվությունների պատրաստում

Աուդիտ և ներքին վերահսկողություն:»:

2. Մինչև սույն որոշումն ուժի մեջ մտնելն աուդիտորների որակավորման քննությանը մասնակցելու համար լիազորված մարմին դիմած դիմողների քննություններն անցկացվում են Հայաստանի Հանրապետության կառավարության 2005 թվականի փետրվարի 3-ի N 123-Ն որոշմամբ հաստատված` լիազորված մարմնի կողմից աուդիտորների որակավորման քննությունների անցկացման կարգին համապատասխան:

3. Սույն որոշումն աուդիտորի որակավորման վկայական ունեցող և վերջին երեք տարվա ընթացքում առնվազն մեկ տարի որևէ աուդիտորական ընկերությունում որպես աուդիտոր աշխատած անձանց վրա տարածվում է սույն որոշումն ուժի մեջ մտնելուց հետո 30 ամիս հետո: Գործող վկայականների ժամկետը լրանալու դեպքում դրանց գործողության ժամկետը երկարաձգվում է մինչև սույն կետում նշված երեսունամսյա ժամանակահատվածը լրանալը:

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Տ. Սարգսյան
2013 թ. հուլիսի 22 Երևան