ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 հունիսի 1992 թվականի N 329

քաղ. Երևան

Հայաստանի Հանրապետության կառավարության 1992 թվականի մայիսի 2-ի N 168 կարգադրությամբ ստեղծված հանձնաժողովի կողմից կատարված ուսումնասիրության արդյունքներով Հայաստանի Հանրապետության կառավարությանն առընթեր ավիացիայի գլխավոր վարչության աշխատանքներում բացահայտվել են լուրջ թերություններ: Բավարար մակարդակով չի ապահովվում թռիչքների անվտանգությունը և անհրաժեշտ կարգապահությունը, խոչընդոտներ են ծագում քաղաքացիական ավիացիայի այլընտրանքային ավիաձեռնարկությունների ստեղծման և շուկայական հարաբերությունների զարգացման բնագավառում:

Նման վիճակը հետևանք է նաև քաղաքացիական ավիացիայի գործունեությունը կարգավորող իրավական բազայի բացակայության, հանրապետությունում ստեղծված ծանր սոցիալ-տնտեսական իրավիճակի, տնտեսական շրջափակումների, ինչպես նաև վառելիքային ճգնաժամի:

Լուրջ վերակառուցման կարիք ունի հանրապետության քաղաքացիական ավիացիայի գործող կառուցվածքը:

Հանրապետության քաղաքացիական ավիացիայի բնագավառում ստեղծված իրավիճակը կարգավորելու և նրա հետագա զարգացման համար պայմաններ ստեղծելու նպատակով Հայաստանի Հանրապետության կառավարությունը որոշում է`

1. Հավանություն տալ Հայաստանի Հանրապետության քաղաքացիական ավիացիայի բնագավառում բարեփոխումների ու նրա կառուցվածքի կատարելագործման վերաբերյալ Հայաստանի Հանրապետության կառավարությանն առընթեր ավիացիայի գլխավոր վարչության կողմից ներկայացված հայեցակարգին (կոնցեպցիային):

Նշված հայեցակարգի իրականացման նպատակով ստեղծել աշխատանքային խումբ, համաձայն հավելվածի:

2. Աշխատանքային խմբին` 1992 թվականի հուլիսի 10-ին շահագրգիռ կազմակերպությունների հետ համաձայնեցված Հայաստանի Հանրապետության կառավարություն ներկայացնել հանրապետության քաղաքացիական ավիացիայի նոր կառուցվածքի, օդանավի հրամանատարի և անձնակազմի կարգավիճակի վերաբերյալ իրավական ակտերի փաթեթը և նրա կանոնադրությունը:

3. Հանձնարարել Հայաստանի Հանրապետության կառավարությանն առընթեր ավիացիայի գլխավոր վարչությանը` միջոցներ ձեռնարկել Հայաստանի Հանրապետության կառավարության 1992 թվականի մայիսի 2-ի N 168 կարգադրությամբ ստեղծված հանձնաժողովի կողմից ներկայացված տեղեկանքում նշված ֆինանսատնտեսական գործունեության, ուղևորների փոխադրման աշխատանքների կազմակերպման, ավիատոմսերի վաճառքի, բեռնափոխադրումների կազմակերպման, ռազմականացված պահպանության ծառայության գործունեության, թռիչքների անվտանգության ապահովման և այլ հարցերի վերաբերյալ թերություններն ու բացթողումները վերացնելու համար ու 20-օրյա ժամկետում արդյունքների մասին զեկուցել Հայաստանի Հանրապետության կառավարությանը:

 Հայաստանի Հանրապետության կառավարությանն առընթեր ավիացիայի գլխավոր վարչության ուշադրությունը հրավիրել ինքնաթիռային պարկի համալրման և սարքինության, արտասահմանյան չվերթների կազմակերպման, ինչպես նաև կանխիկ գումարների գանձումը կարգավորելու հարցերի վրա:

4. Հանձնարարել Հայաստանի Հանրապետության ներքին գործերի նախարարությանը, ազգային անվտանգության պետական վարչությանը, Հայաստանի Հանրապետությանն առընթեր ավիացիայի գլխավոր վարչությանը` մինչև նոր կառուցվածքի անցնելը, ապահովել թռիչքների անվտանգությունը` գործող կանոններին համապատասխան:

5. Հայաստանի Հանրապետության արդարադատության նախարարությանը` մինչև 1992 թվականի հունիսի 15-ը Հայաստանի Հանրապետության կառավարություն ներկայացնել առաջարկություն տրանսպորտային օրենսդրության կատարելագործման, մասնավորապես, օդային տրանսպորտում իրավախախտումների համար քաղաքացիների և պաշտոնատար անձանց պատասխանատվության բարձրացման մասին:

6. Հայաստանի Հանրապետության աշխատանքի և սոցիալական ապահովության նախարարությանը` Հայաստանի Հանրապետության կառավարություն ներկայացնել առաջարկություն Հայաստանի Հանրապետության կառավարությանն առընթեր ավիացիայի գլխավոր վարչության առանձին կատեգորիայի աշխատողների երկարամյա ծառայության համար աշխատանքային կենսաթոշակի իրավունք տվող աշխատանքային գործունեության տեսակների ցանկում համապատասխան փոփոխություններ կատարելու վերաբերյալ:

7. Հայաստանի Հանրապետության արտաքին գործերի նախարարությանը` ապահովել Հայաստանի Հանրապետության կառավարությանն առընթեր ավիացիայի գլխավոր վարչության անդամակցությունը ԱՊՀ-ի միջպետական ավիացիայի կոմիտեին և մինչև 1992 թվականի հունիսի 15-ը Հայաստանի Հանրապետության կառավարություն ներկայացնել առաջարկություն:

8. Հայաստանի Հանրապետության կառավարությանն առընթեր ավիացիայի գլխավոր վարչությանը` մինչև Հայաստանի Հանրապետության համապատասխան իրավական ակտերի ընդունումը, ղեկավարվել Հայաստանի Հանրապետության տարածքում օդանավի անձնակազմի և հրամանատարի կարգավիճակի մասին նախկին ԽՍՀՄ օրենսդրությամբ:

9. Հանձնարարել Հայաստանի Հանրապետության կառավարության գործերի կառավարչությանը` հաստատել այն անձանց ցուցակը, ովքեր կարող են օգտվել պաշտոնական պատվիրակությունների ընդունման դահլիճի ծառայություններից:

10. Հանձնարարել Հայաստանի Հանրապետության մաքսային վարչությանը` ուժեղացնել մաքսային ծառայությունների գործունեությունը հանրապետության օդանավակայաններում: 

ՀԱՅԱՍՏԱՆի հանրապետության փոխնախագահ, վարչապետ

Գ. ՀԱՐՈՒԹՅՈՒՆՅԱՆ

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՔՈԹԱՆՅԱՆ

Հավելված ՀՀ կառավարության 1992 թվականի հունիսի 3-ի N 329 որոշման

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻԱԿԱՆ ԱՎԻԱՑԻԱՅԻ ԲՆԱԳԱՎԱՌՈՒՄ ԲԱՐԵՓՈԽՈՒՄՆԵՐԻ ԵՎ ՆՐԱ ԿԱՌՈՒՑՎԱԾՔԻ ԿԱՏԱՐԵԼԱԳՈՐԾՄԱՆ ՎԵՐԱԲԵՐՅԱԼ ՀԱՅԵՑԱԿԱՐԳԻ ԻՐԱԿԱՆԱՑՄԱՆ ՆՊԱՏԱԿՈՎ ՍՏԵՂԾՎՈՂ ԱՇԽԱՏԱՆՔԱՅԻՆ ԽՄԲԻ ԿԱԶՄԸ

Մ. Շիշմանյան		- ՀՀ էկոնոմիկայի նախարարի տեղակալ (ղեկավար)
Գ. Մարգարյան		- Հայաստանի տրանսպորտային ներքին գործերի վարչության պետ
Ս. Հակոբյան		- ՀՀ ֆինանսների նախարարության բաժնի պետ
Վ. Նազարյան		- ՀՀ կառավարությանն առընթեր ավիացիայի գլխավոր վարչության պետ
Հ. Միրիջանյան		- օդանավի հրամանատար
Ա. Պետրոսյան		- ՀՀ կառավարությանն առընթեր ավիացիայի գլխավոր վարչության պետի տեղակալ
Ա. Հարությունյան		- ՀՀ կառավարությանն առընթեր ավիացիայի գլխավոր վարչության պետի օգնական
Վ. Պողոսյան		- երկրորդ օդաչու

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՔՈԹԱՆՅԱՆ