ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ՀԱՆՁՆԱԺՈՂՈՎ

Ո Ր Ո Շ ՈՒ Մ

Հեռուստատեսության և ռադիոյի հանձնաժողովը (այսուհետ` Հանձնաժողով) 2025 թվականի մարտի 24-ի նիստում քննարկեց լսողական մեդիածառայություն մատուցող «ՏԱՎՈՒՇ ՄԵԴԻԱ» ՍՊ ընկերության (այսուհետ նաև` Հեռարձակող) լիցենզիայի գործողության դադարեցման հարցը:

Հանձնաժողովն արձանագրեց հետևյալը.

Հանձնաժողովը «ՏԱՎՈՒՇ ՄԵԴԻԱ» ՍՊ ընկերությանը տրամադրել է լսողական մեդիա ծառայություն մատուցողի գործունեության լիցենզիա՝ 18.04.2023 թվականից առ 18.04.2030 թվականը (սփռման տարածքը՝ ՀՀ Տավուշի մարզ՝ ք. Նոյեմբերյան՝ 98.7 ՄՀց, ք. Իջևան՝ 94.3 ՄՀց, ք. Բերդ՝ 99.7 ՄՀց):

Հանձնաժողովը, հիմք ընդունելով «Տեսալսողական մեդիայի մասին» օրենքի (այսուհետ՝ Օրենք) 58-րդ հոդվածի 1-ին մասի 4-րդ կետով ամրագրված պահանջը և ղեկավարվելով «Վարչարարության հիմունքների և վարչական վարույթի մասին» օրենքի 30-րդ հոդվածի 1-ին մասի «բ» կետով, 2025 թվականի փետրվարի 24-ին Հեռարձակողի նկատմամբ հարուցել է վարչական վարույթ:

Հանձնաժողովը վարչական վարույթի բազմակողմանի, լրիվ և օբյեկտիվ քննության, ձեռք բերված ապացույցների ուսումնասիրության և գնահատման արդյունքում հաստատված է համարել այն փաստը, որ Հեռարձակողն առանց որևէ հիմնավոր պատճառի 24 ժամ շարունակ չի ապահովել լսողական հաղորդումների հեռարձակումը, որն էլ լիցենզիայի գործողության կասեցման և խախտումը չվերացնելու դեպքում նաև լիցենզիայի դադարեցման հիմք է։

Հանձնաժողովը 2025 թվականի մարտի 14-ի ««ՏԱՎՈՒՇ ՄԵԴԻԱ» ՍՊ ընկերության նկատմամբ վարչական տույժ կիրառելու մասին» թիվ 21-Ա որոշմամբ Հեռարձակողի նկատմամբ կիրառել է վարչական տույժ՝ կասեցնելով վերջինիս լիցենզիայի գործողությունը 5 (հինգ) օր ժամկետով:

2025 թվականի մարտի 14-ի թիվ 21-Ա որոշումն ուժի մեջ է մտել այն Հեռարձակողին պատշաճ ձևով հանձնելու օրվան հաջորդող օրվանից, իսկ լիցենզիայի գործողությունը կասեցվել է որոշումն ուժի մեջ մտնելու պահից՝ 2025 թվականի մարտի 18-ից: Այսպիսով, կասեցման ժամկետն է 18.03.2025 թ. ժամը 00։00-ից - 22.03.2025 թ. ժամը 24։00-ը։

Համաձայն «Լիցենզավորման մասին» օրենքի 34-րդ հոդվածի 7-րդ մասի՝ Հեռարձակողի լիցենզիայի գործողության կասեցումը վերացված է համարվում կասեցման ժամկետը լրանալու օրվան հաջորդող օրվանից՝ 2025 թվականի մարտի 23-ից։

Հեռարձակողը 2025 թվականի մարտի 24-ի դրությամբ չի վերացրել լիցենզիայի գործողության կասեցման հիմքերը, ինչպես նաև հարուցված վարչական վարույթի վերաբերյալ որևէ դիտարկում, դիրքորոշում կամ բացատրություն չի ներկայացրել։

Հանձնաժողովի հիմնավորումները (պատճառաբանությունը) և եզրահանգումը.

Հանձնաժողովի 2025 թվականի մարտի 14-ի թիվ 21-Ա որոշմամբ Հեռարձակողի նկատմամբ կիրառված վարչական տույժը՝ լիցենզիայի գործողության կասեցումը, կիրառվել է 5 (հինգ) օր ժամկետով, որը լրացել է 2025 թվականի մարտի 22-ին։

Համաձայն Հանձնաժողովի ծրագրերի մոնիտորինգի և վերահսկողության վարչության մարտի 24-ի զեկուցագրի` 2025 թվականի փետրվարի 20-ից առ 2025 թվականի մարտի 24-ը «ՏԱՎՈՒՇ ՄԵԴԻԱ» ՍՊ ընկերությունը «ՏԱՎՈՒՇ ԷՖԷՄ» լսողական ծրագրի հեռարձակում չի իրականացրել։

Օրենքի 58-րդ հոդվածի 2-րդ մասի համաձայն՝ հեղինակազորման կամ լիցենզիայի գործողությունը կասեցնելուց հետո կարգավորող պետական մարմնի նշած ժամկետում սույն հոդվածի 1-ին մասում նշված խախտումները վերացնելու դեպքում կարգավորող պետական մարմինը վերացնում է կասեցումը:

Օրենքի 58-րդ հոդվածի 3-րդ մասի 4-րդ կետը սահմանում է.

«3. Հեղինակազորումը կամ լիցենզիայի գործողությունը դադարեցվում է, եթե՝

4) սույն հոդվածի 2-րդ մասով սահմանված խախտումը չի վերացվել.»։

Վերը նշված փաստական և իրավական հիմնավորումներից ակնհայտ է, որ Հանձնաժողովի 2025 թվականի մարտի 14-ի թիվ 21-Ա որոշմամբ լիցենզիայի գործողությունը կասեցվել է 5 (հինգ) օր ժամկետով, սակայն Հեռարձակողի կողմից չի վերացվել արձանագրված իրավախախտումը, ինչը հիմք է հանդիսանում «ՏԱՎՈՒՇ ՄԵԴԻԱ» ՍՊ ընկերության լիցենզիայի (սերիան, համարը՝ ԵՀ N 350) գործողության դադարեցման:

Օրենքի 32-րդ հոդվածի 1-ին մասի 11-րդ կետի համաձայն՝ կարգավորող պետական մարմինը` Օրենքի խախտման կամ իր որոշումները չկատարելու դեպքում կիրառում է պատասխանատվության միջոցներ։

Օրենքի 55-րդ հոդվածի 1-ին մասի համաձայն՝ կարգավորող պետական մարմնի կողմից տեսալսողական մեդիայի բնագավառը կարգավորող օրենսդրության պահանջների խախտման դեպքեր հայտնաբերվելու, ինչպես նաև պետական այլ մարմինների կողմից իրենց իրավասությունների շրջանակում տեսալսողական մեդիայի բնագավառը կարգավորող օրենսդրության պահանջների խախտման դեպքեր հայտնաբերվելու և դրանց մասին կարգավորող պետական մարմնին գրավոր տեղեկացվելու դեպքում կարգավորող պետական մարմինը կիրառում է հետևյալ վարչական տույժերը.

1) գրավոր նախազգուշացում.

2) տուգանք.

3) հեղինակազորման կամ լիցենզիայի գործողության կասեցում.

4) հեղինակազորման կամ լիցենզիայի գործողության դադարեցում:

Ելնելով վերոգրյալից, հիմք ընդունելով Հանձնաժողովի ծրագրերի մոնիտորինգի և վերահսկողության վարչության 2025 թվականի մարտի 24-ի զեկուցագիրը և ղեկավարվելով «Տեսալսողական մեդիայի մասին» օրենքի 55-րդ հոդվածի 1-ին մասի 4-րդ կետով, 58-րդ հոդվածի 2-րդ մասով և 58-րդ հոդվածի 3-րդ մասի 4-րդ կետով, Լիցենզավորման մասին» օրենքի 34-րդ հոդվածի 7-րդ մասով` Հեռուստատեսության և ռադիոյի հանձնաժողովը

1. Դադարեցնել «ՏԱՎՈՒՇ ՄԵԴԻԱ» ՍՊ ընկերության 2023 թվականի ապրիլի 17-ի ԵՀ N 350 լսողական մեդիա ծառայություն մատուցողի գործունեության լիցենզիայի գործողությունը։

2. Սույն որոշումն ուժի մեջ է մտնում այն «ՏԱՎՈՒՇ ՄԵԴԻԱ» ՍՊ ընկերությանը պատշաճ ձևով հանձնելու օրվան հաջորդող օրվանից։

3. Սույն որոշումը կարող է բողոքարկվել ՀՀ վարչական դատարան` ուժի մեջ մտնելու օրվանից երկամսյա ժամկետում: