ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

14 հուլիսի 1994 թվականի N 319

քաղ. Երևան

ԶԻՆԾԱՌԱՅՈՂՆԵՐԻ ԵՎ ՆՐԱՆՑ ԸՆՏԱՆԻՔՆԵՐԻ ԱՆԴԱՄՆԵՐԻ ՍՈՑԻԱԼԱԿԱՆ ԱՊԱՀՈՎՈՒԹՅԱՆ ԲԱՐԵԼԱՎՄԱՆ ՄԻՋՈՑԱՌՈՒՄՆԵՐԻ ՄԱՍԻՆ

Զինծառայողների և նրանց ընտանիքների անդամների սոցիալական վիճակի բարելավման նպատակով Հայաստանի Հանրապետության կառավարությունը որոշում է`

1. Հայաստանի Հանրապետության նախարարություններին, պետական վարչություններին, գերատեսչություններին, պատգամավորների տեղական խորհուրդների գործադիր կոմիտեներին, ձեռնարկություններին, հիմնարկներին, կազմակերպություններին (անկախ սեփականության ձևից և կազմակերպական-իրավական տեսակից)` ապահովել զոհված (մահացած) զինծառայողների ընտանիքների աշխատունակ գործազուրկ անդամների աշխատանքի ընդունումը նախապատվության կարգով:

2. Սահմանել, որ բնակարանային պայմանների բարելավման կարիք ունեցող 5 և ավելի տարվա զինվորական ծառայության ստաժ ունեցող պայմանագրային զինծառայողների բնակելի տարածությունները հատկացվում են առաջնահերթության կարգով:

3. Պատգամավորների տեղական խորհուրդների գործադիր կոմիտեներին` 2 և ավելի տարվա զինվորական ստաժ ունեցող պայմանագրային զինծառայողներին բնակելի տան շինարարության համար կամ տնամերձ հողամասերը հատկացնել արտահերթ:

4. Հայաստանի Հանրապետության կառավարության 1994 թվականի հունիսի 13-ի «Հայաստանի Հանրապետության պետական բարձրագույն ուսումնական հաստատությունների 1994 թվականի ընդունելության քննությունների կանոնները հաստատելու մասին» N 271 որոշմամբ հաստատված կանոններում կատարել հետևյալ լրացումները`

ա) 6-րդ կետը «հաջորդականությամբ» բառից հետո լրացնել «իսկ միավորների գումարի, այդ թվում նաև բուհերի կողմից հաստատված հաջորդականությամբ առաջին առարկայի գնահատականի հավասարության դեպքում առավելությունը տրվում է սահմանված կարգով պահեստազոր արձակված ժամկետային զինծառայողներին` զորամասի հրամանատարության կողմից տրված դրական բնութագիր-երաշխավորագրի առկայության դեպքում» բառերով.

բ) 8-րդ կետի «ա» ենթակետը «հակացուցված չէ» բառերից հետո լրացնել «իսկ 1-ին և 2-րդ խմբի հաշմանդամ դարձած զինծառայողները ներկայացնում են նաև հրամանատարության կողմից տրված դրական բնութագիր-երաշխավորագիր» բառերը.

գ) 8-րդ կետի «բ» ենթակետը «տրված» բառից հետո լրացնել «դրական բնութագիր-երաշխավորագրի հիման վրա» բառերով և հանել «վկայականների» բառը:

5. Հայաստանի Հանրապետության կառավարության 1992 թվականի օգոստոսի 28-ի «Հայաստանի Հանրապետության պաշտպանության ժամանակ մարտական գործողությունների մասնակցած, այդ պատճառով հաշմանդամ դարձած զինծառայողների և ազատամարտիկների, զոհվածների ընտանիքների սոցիալական պաշտպանվածության լրացուցիչ միջոցառումների մասին» N 450 որոշման 2-րդ կետի «բ» ենթակետը «պարագաների» բառից հետո լրացնել «արտահերթ և» բառերով:

6. Հայաստանի Հանրապետության կառավարության 1993 թվականի մայիսի 26-ի «Զինծառայողների և նրանց ընտանիքների անդամների կենսաթոշակների նշանակման կարգի և նրանց սոցիալական ապահովության ու արտոնությունների մասին» N 277 որոշման 8-դ կետը «անհրաժեշտ» բառից հետո լրացնել «և արտահերթ» բառերով:

7. Սահմանել, որ Հայաստանի Հանրապետության պաշտպանության նախարարության, Հայաստանի Հանրապետության ներքին գործերի նախարարության, Հայաստանի Հանրապետության ազգային անվտանգության պետական վարչության, Հայաստանի Հանրապետության արտակարգ իրավիճակների պետական վարչության բարձրագույն ուսումնական հաստատությունների գիտական աստիճան ունեցող զինծառայողների վարձատրությունը կատարվում է Հայաստանի Հանրապետության գործող օրենսդրությամբ սահմանված կարգով: