«ԳՐԱՆՑՎԱԾ Է»

ՀՀ ԱՐԴԱՐԱԴԱՏՈՒԹՅԱՆ

ՆԱԽԱՐԱՐՈՒԹՅԱՆ ԿՈՂՄԻՑ

19 հուլիսի 2004 թ.

ՊԵՏԱԿԱՆ ԳՐԱՆՑՄԱՆ ԹԻՎ 10204185

Հ Ր Ա Մ Ա Ն

ՔՐԵԱԿԱՏԱՐՈՂԱԿԱՆ ԾԱՌԱՅՈՂԻ ԵՐԴՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Քրեակատարողական ծառայության մասին» Հայաստանի Հանրապետության օրենքի 17-րդ հոդվածի դրույթների իրականացումն ապահովելու նպատակով.

ՀՐԱՄԱՅՈՒՄ ԵՄ`

1. Հաստատել քրեակատարողական ծառայողի երդման կարգը (կցվում է):

2. Հայաստանի Հանրապետության արդարադատության նախարարության քրեակատարողական վարչության պետին` սույն հրամանն ուժի մեջ մտնելու պահից վեց ամսվա ընթացքում ապահովել մինչև սույն հրամանն ուժի մեջ մտնելը Հայաստանի Հանրապետության արդարադատության նախարարության քրեակատարողական ծառայությունում պաշտոնի նշանակված քրեակատարողական ծառայողների երդման արարողությունների կազմակերպումը:

Դ. Հարությունյան

Հաստատված է Հայաստանի Հանրապետության արդարադատության նախարարի 2004 թվականի հուլիսի 12-ի թիվ 101-Ն հրամանով

Կ Ա Ր Գ

ՔՐԵԱԿԱՏԱՐՈՂԱԿԱՆ ԾԱՌԱՅՈՂԻ ԵՐԴՄԱՆ

1. Հայաստանի Հանրապետության արդարադատության նախարարության քրեակատարողական ծառայությունում (այսուհետ` քրեակատարողական ծառայություն) առաջին անգամ որպես քրեակատարողական ծառայող պաշտոնի նշանակված անձը փորձաշրջանն անցնելու օրվանից երկու ամսվա ընթացքում տալիս է երդում:

2. Քրեակատարողական ծառայողի երդման արարողությունը քրեակատարողական հիմնարկում կամ կենտրոնացված կարգով` քրեակատարողական ծառայության կենտրոնական մարմնում կազմակերպում և իրականացնում է քրեակատարողական ծառայության կենտրոնական մարմինը:

3. Երդման արարողության անցկացման ժամանակը սահմանում է քրեակատարողական ծառայության կենտրոնական մարմնի ղեկավարը: Քրեակատարողական ծառայողը երդման արարողության ժամանակի մասին տեղեկացվում է երդման արարողությունից առնվազն երեք օր առաջ:

4. Քրեակատարողական ծառայողը երդումը տալիս է մեկ անգամ` անհատական կարգով` երդման տեքստն ընթերցելու միջոցով: Այնուհետև` քրեակատարողական ծառայողը ստորագրում է երդման տեքստը, որը պահպանվում է նրա անձնական գործում:

5. Երդման արարողությունն անցկացվում է հանդիսավոր պայմաններում` Հայաստանի Հանրապետության պետական դրոշի առջև: Քրեակատարողական ծառայողը երդման արարողության ընթացքում պարտադիր կրում է իր ծառայողական համազգեստը:

6. Երդում տվող քրեակատարողական ծառայողը մոտենում է Հայաստանի Հանրապետության պետական դրոշին, բարձրաձայն ընթերցում է երդման տեքստը (հավելված) և ստորագրում իր ազգանվան դիմաց:

7. Քրեակատարողական ծառայության կենտրոնական մարմնի` երդման արարողությունն անցկացնող պաշտոնատար անձը շնորհավորում է երդում տված քրեակատարողական ծառայողին:

8. Երդման արարողությունն ավարտելուց հետո հնչեցվում է Հայաստանի Հանրապետության օրհներգը:

ՀԱՎԵԼՎԱԾ Քրեակատարողական ծառայողի երդման կարգի

Ք Ր Ե Ա Կ Ա Տ Ա Ր Ո Ղ Ա Կ Ա Ն  Ծ Ա Ռ Ա Յ Ո Ղ Ի

Ե Ր Դ ՈՒ Մ

Ես` _______________________________________, Հայաստանի Հանրապետության

(անուն, հայրանուն, ազգանուն)

արդարադատության նախարարության քրեակատարողական ծառայությունում պաշտոն ստանձնելով`

Ե Ր Դ Վ ՈՒ Մ  Ե Մ`

հավատարմորեն ծառայել Հայաստանի Հանրապետության ժողովրդին, խստագույնս պահպանել Հայաստանի Հանրապետության Սահմանադրությունը և օրենքները, մարդու և քաղաքացու իրավունքներն ու ազատությունները, աջակցել սահմանադրական կարգի պահպանմանը, անվերապահորեն և բարեխղճորեն կատարել պարտականություններս:

___ ______________ _____ թ.	___________________________
	(երդվողի ստորագրությունը)