ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ՔԱՂԱՔԱՑԻԱԿԱՆ ԿԱՑՈՒԹՅԱՆ ԱԿՏԵՐԻ ԳՐԱՆՑՄԱՆ ՎԱՐՉՈՒԹՅԱՆ ՔԱՂԱՔԱՑԻԱԿԱՆ ԿԱՑՈՒԹՅԱՆ ԱԿՏԵՐԻ ԳՐԱՆՑՄԱՆ ՀԱՆՐԱՊԵՏԱԿԱՆ ԱՐԽԻՎԻ ՄԱՍԻՆ

Ղեկավարվելով Հայաստանի Հանրապետության վարչապետի 1997 թվականի նոյեմբերի 14-ի «Հայաստանի Հանրապետության արդարադատության նախարարության կանոնադրությունը և կենտրոնական ապարատի կառուցվածքը հաստատելու մասին» N 532 որոշմամբ հրամայում եմ.

1. Հայաստանի Հանրապետության արդարադատության նախարարության քաղաքացիական կացության ակտերի գրանցման վարչության կազմում ստեղծել քաղաքացիական կացության ակտերի գրանցման հանրապետական արխիվ` բաժնի կարգավիճակով:

2. Հաստատել Հայաստանի Հանրապետության արդարադատության նախարարության քաղաքացիական կացության ակտերի գրանցման վարչության քաղաքացիական կացության ակտերի գրանցման հանրապետական արխիվի կանոնադրությունը (կցվում է):

3. Հայաստանի Հանրապետության արդարադատության նախարարության քաղաքացիական կացության ակտերի գրանցման վարչության քաղաքացիական կացության ակտերի գրանցման հանրապետական արխիվի հաստիքային միավորները սահմանել` ըստ Հայաստանի Հանրապետության արդարադատության նախարարության հաստիքացուցակի:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ՔԱՂԱՔԱՑԻԱԿԱՆ ԿԱՑՈՒԹՅԱՆ ԱԿՏԵՐԻ ԳՐԱՆՑՄԱՆ ՎԱՐՉՈՒԹՅԱՆ ՔԱՂԱՔԱՑԻԱԿԱՆ ԿԱՑՈՒԹՅԱՆ ԱԿՏԵՐԻ ԳՐԱՆՑՄԱՆ ՀԱՆՐԱՊԵՏԱԿԱՆ ԱՐԽԻՎԻ

Կ Ա Ն Ո Ն Ա Դ Ր ՈՒ Թ Յ ՈՒ Ն

I. ԸՆԴՀԱՆՈՒՐ ԴՐՈՒՅԹՆԵՐ

1. Հայաստանի Հանրապետության արդարադատության նախարարության քաղաքացիական կացության ակտերի գրանցման վարչության (այսուհետ` Վարչության) քաղաքացիական կացության ակտերի գրանցման հանրապետական արխիվը (այսուհետ` Արխիվ) Վարչության ներքին կառուցվածքային ստորաբաժանում է:

2. Արխիվն իր գործունեության ընթացքում ղեկավարվում է Հայաստանի Հանրապետության օրենքներով, այլ իրավական ակտերով, Հայաստանի Հանրապետության արդարադատության նախարարության և Վարչության կանոնադրություններով, սույն կանոնադրությամբ, Հայաստանի Հանրապետության արդարադատության նախարարի հրամաններով:

3. Արխիվի կանոնադրությունը և հաստիքացուցակը հաստատում և փոփոխում է Հայաստանի Հանրապետության արդարադատության նախարարը:

4. Արխիվն ունի Հայաստանի Հանրապետության զինանշանի պատկերով և իր անվանմամբ կնիք, ինչպես նաև ձևաթուղթ և դրոշմակնիք:

II. ԱՐԽԻՎԻ ԽՆԴԻՐՆԵՐԸ ԵՎ ԼԻԱԶՈՐՈՒԹՅՈՒՆՆԵՐԸ

5. Արխիվի հիմնական խնդիրն է` իր իրավասության շրջանակներում քաղաքացիական կացության ակտերի գրանցումների հետ կապված արխիվային գործի լիարժեք և արդյունավետ իրականացումը, ինչպես նաև Հայաստանի Հանրապետության օրենսդրությամբ նախատեսված այլ խնդիրներ:

6. Արխիվն իր առջև դրված խնդիրների լուծման նպատակով.

- «Հայաստանի ազգային արխիվային ֆոնդի մասին» Հայաստանի Հանրապետության օրենքի պահանջներին համապատասխան համալրում է Հայաստանի Հանրապետության արդարադատության նախարարության քաղաքացիական կացության ակտերի գրանցման (այսուհետ` ՔԿԱԳ) տարածքային բաժինների գործունեությամբ առաջացած փաստաթղթերը, համակարգում և վերահսկում է քաղաքացիական կացության ակտերի գրանցման հետ կապված արխիվային գործը.

- սահմանված կարգով ապահովում է արխիվ հանձնված փաստաթղթերի հաշվառումը և սահմանված ժամկետում պահպանումը, կատարում է արխիվային փաստաթղթերի փորձագիտական արժեքավորումը, ստեղծում և կատարելագործում է արխիվի գիտատեղեկատու համակարգը, վարում է արխիվային ֆոնդի, գործերի և փաստաթղթերի հաշվառումը.

- սահմանված կարգով արխիվային փաստաթղթերը տրամադրում է ժամանակավոր օգտագործման.

- արխիվային փաստաթղթերի վերաբերյալ կատարում է վերլուծական աշխատանք, Հայաստանի Հանրապետության արդարադատության նախարարի, նրա տեղակալի, Վարչության պետի հանձնարարությամբ` ՔԿԱԳ տարածքային բաժինների ղեկավարներին և աշխատողներին տեղեկացնում է այդ փաստաթղթերի կազմի և բովանդակության մասին, դրանց վերաբերյալ պատրաստում վերլուծական և տեղեկատվական նյութեր.

- Հայաստանի Հանրապետության արդարադատության նախարարի, նրա տեղակալի, Վարչության պետի հանձնարարությամբ Հայաստանի Հանրապետության պետական և գերատեսչական արխիվներից ստանում է անհրաժեշտ արխիվային փաստաթղթերի պատճեններ և տեղեկանքներ.

- Հայաստանի Հանրապետության արդարադատության նախարարի, նրա տեղակալի հանձնարարությամբ մասնակցում է քաղաքացիական կացության ակտերի գրանցումների հետ կապված արխիվային փաստաթղթերի հրապարակմանը.

- պահպանում է պետական, ծառայողական և անձնական գաղտնիք հանդիսացող տեղեկություններ պարունակող փաստաթղթերի պահպանության և օգտագործման հատուկ ռեժիմը.

- սահմանված կարգով առաջարկություններ է ներկայացնում արխիվային փաստաթղթերի գաղտնազերծման վերաբերյալ.

- մեթոդական և գործնական օգնություն է ցույց տալիս ՔԿԱԳ տարածքային բաժիններին` ընթացիկ գործավարության և արխիվ հանձնման ենթակա փաստաթղթերի հետ տարվող աշխատանքներում.

- իրականացնում է Հայաստանի Հանրապետության օրենսդրությամբ սահմանված այլ լիազորություններ:

7. Արխիվում քաղաքացիական կացության ակտերը և դրանց հետ կապված այլ փաստաթղթերը պահպանվում են 75 տարի ժամկետով: Այս ժամկետը հաշվվում է փաստաթղթերը գործավարությամբ ավարտելու տարվան հաջորդող տարվա հունվարի 1-ից: Արխիվում պահպանվող փաստաթղթերի ժամանակավոր պահպանության ժամկետը լրանալուց հետո դրանք սահմանված կարգով տեղափոխվում և հանձնվում են մշտական պահպանության:

III. ԱՐԽԻՎԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ ԵՎ ՂԵԿԱՎԱՐՈՒՄԸ

8. Արխիվի վարիչն անմիջականորեն ենթարկվում է Վարչության պետին:

9. Արխիվի վարիչը պաշտոնի է նշանակվում և պաշտոնից ազատվում է Հայաստանի Հանրապետության արդարադատության նախարարի հրամանով:

10. Արխիվի վարիչը`

- իրականացնում է Արխիվի գործունեության անմիջական ղեկավարումը.

- ապահովում է Արխիվի աշխատանքի պատշաճ կազմակերպումը, աշխատողների միջև բաշխում է պարտականությունները.

- իր իրավասության շրջանակներում Արխիվի աշխատողներին տալիս է ցուցումներ.

- ստորագրում և կնքում է Արխիվի անունից պատրաստվող փաստաթղթերը.

- իր իրավասության շրջանակներում ապահովում է Արխիվի և այլ մարմինների փոխհարաբերությունները.

- կատարում է Հայաստանի Հանրապետության արդարադատության նախարարի, նրա տեղակալի, Վարչության պետի հանձնարարականները.

- Հայաստանի Հանրապետության արդարադատության նախարարի, նրա տեղակալի, Վարչության պետի գիտությամբ, իր իրավասության շրջանակներում, այլ մարմիններից, պաշտոնատար անձանցից ստանում է Արխիվի գործունեությանն առնչվող անհրաժեշտ տեղեկատվություն և նյութեր.

- պատասխանատվություն է կրում Արխիվի առջև դրված խնդիրների լուծման համար.

- իրականացնում է իրեն վերապահված այլ լիազորություններ:

Գրանցված է
Հայաստանի Հանրապետության
արդարադատության նախարարության կողմից
20 օգոստոսի 1999 թ.
Պետական գրանցման թիվ 102990138