ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԽՈՐՀՈՒՐԴ

Ո Ր Ո Շ ՈՒ Մ

24 նոյեմբերի 2023 թվականի

թիվ 134

քաղ. Մոսկվա

ԷԼԵԿՏՐԱԿԱՆ ՇԱՐԺԻՉՆԵՐՈՎ ՇԱՐԺԻՉԱՅԻՆ ՏՐԱՆՍՊՈՐՏԱՅԻՆ ՄԻՋՈՑՆԵՐԻ ԱՌԱՆՁԻՆ ՏԵՍԱԿՆԵՐԻ ՎԵՐԱԲԵՐՅԱԼ ՄԱՔՍԱՅԻՆ ՄԻՈՒԹՅԱՆ ՀԱՆՁՆԱԺՈՂՈՎԻ ԵՎ ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԽՈՐՀՐԴԻ ՈՐՈՇ ՈՐՈՇՈՒՄՆԵՐՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

«Եվրասիական տնտեսական միության մասին» 2014 թվականի մայիսի 29-ի պայմանագրի 43-րդ և 45-րդ հոդվածներին, «Եվրասիական տնտեսական հանձնաժողովի մասին» հիմնադրույթի («Եվրասիական տնտեսական միության մասին» 2014 թվականի մայիսի 29-ի պայմանագրի թիվ 1 հավելված) 16-րդ կետին, Եվրասիական տնտեսական բարձրագույն խորհրդի 2014 թվականի դեկտեմբերի 23-ի թիվ 98 որոշմամբ հաստատված՝ Եվրասիական տնտեսական հանձնաժողովի աշխատանքի կանոնակարգի թիվ 1 հավելվածի 7-րդ և 16-րդ կետերին, Եվրասիական տնտեսական միության մաքսային օրենսգրքի 266-րդ հոդվածի 8-րդ կետին համապատասխան՝ Եվրասիական տնտեսական հանձնաժողովի խորհուրդը որոշեց.

1. Մաքսային միության հանձնաժողովի 2009 թվականի նոյեմբերի 27-ի «Եվրասիական տնտեսական միության միասնական մաքսասակագնային կարգավորման մասին» թիվ 130 որոշման 7-րդ կետի 7.1.38 ենթակետում կատարել հետևյալ փոփոխությունները՝

ա) առաջին պարբերությունը շարադրել հետևյալ խմբագրությամբ՝

«7.1.38. Էլեկտրական շարժիչներով շարժիչային տրանսպորտային միջոցներ, որոնք դասակարգվում են ԵԱՏՄ ԱՏԳ ԱԱ 8703 80 000 2 ծածկագրով և Հայաստանի Հանրապետություն ներմուծվում են հետևյալ քանակով՝ 7 հազար հատ՝ 2022 թվականին, 8 հազար հատ՝ 2023 թվականին, 8 հազար հատ՝ 2024 թվականին և 8 հազար հատ՝ 2025 թվականին, Բելառուսի Հանրապետություն՝ 10 հազար հատ՝ 2022 թվականին, 15 հազար հատ՝ 2023 թվականին, 15 հազար հատ՝ 2024 թվականին և 15 հազար հատ՝ 2025 թվականին, Ղազախստանի Հանրապետություն՝ 10 հազար հատ՝ 2022 թվականին, 15 հազար հատ՝ 2023 թվականին, 15 հազար հատ՝ 2024 թվականին և 15 հազար հատ՝ 2025 թվականին, Ղրղզստանի Հանրապետություն՝ 5 հազար հատ՝ 2022 թվականին, 10 հազար հատ՝ 2023 թվականին, 10 հազար հատ՝ 2024 թվականին և 10 հազար հատ՝ 2025 թվականին։».

բ) չորրորդ պարբերության մեջ «2023 թվականի դեկտեմբերի 31-ը» բառերը փոխարինել «2025 թվականի դեկտեմբերի 31-ը» բառերով.

2. Եվրասիական տնտեսական հանձնաժողովի խորհրդի 2017 թվականի դեկտեմբերի 20-ի «Անձնական օգտագործման ապրանքների հետ կապված առանձին հարցերի մասին» թիվ 107 որոշման 3-րդ հավելվածի 9-րդ կետի առաջին պարբերության մեջ կատարել հետևյալ փոփոխությունները՝

ա) «2023 թվականի դեկտեմբերի 31-ը» բառերը փոխարինել «2025 թվականի դեկտեմբերի 31-ը» բառերով.

բ) «Եվրասիական տնտեսական հանձնաժողովի խորհրդի 2022 թվականի մարտի 17-ի թիվ 39 որոշմամբ» բառերը փոխարինել «Մաքսային միության 2009 թվականի նոյեմբերի 27-ի թիվ 130 որոշման 7-րդ կետի 7.1.38 ենթակետով» բառերով։

3. Էլեկտրական շարժիչներով շարժիչային տրանսպորտային միջոցների համար, որոնք դասակարգվում են ԵԱՏՄ ԱՏԳ ԱԱ 8703 80 000 2 ծածկագրով և ներմուծվել են Մաքսային միության հանձնաժողովի 2009 թվականի նոյեմբերի 27-ի «Եվրասիական տնտեսական միության միասնական մաքսասակագնային կարգավորման մասին» թիվ 130 որոշման 7-րդ կետի 7.1.38 ենթակետով նախատեսված սակագնային արտոնությունների կիրառմամբ կամ Եվրասիական տնտեսական հանձնաժողովի խորհրդի 2017 թվականի դեկտեմբերի 20-ի «Անձնական օգտագործման ապրանքների հետ կապված առանձին հարցերի մասին» թիվ 107 որոշման 3-րդ հավելվածի 9-րդ կետին համապատասխան մաքսատուրքերի, հարկերի վճարումից ազատմամբ, ձևակերպվում է տրանսպորտային միջոցի էլեկտրոնային անձնագիր, նշելով «Լրացուցիչ տեղեկատվություն» վանդակում հետևյալ տեղեկատվությունը՝ «Մաքսային միության հանձնաժողովի 2009 թվականի նոյեմբերի 27-ի թիվ 130 որոշման 7-րդ կետի 7.1.38 ենթակետով սահմանվել են սահմանափակումներ» կամ «Եվրասիական տնտեսական հանձնաժողովի խորհրդի 2017 թվականի դեկտեմբերի 20-ի թիվ 107 որոշման 3-րդ հավելվածի 9-րդ կետով սահմանվել են սահմանափակումներ» համապատասխանաբար։

4. Եվրասիական տնտեսական հանձնաժողովի խորհրդի 2022 թվականի մարտի 17-ի թիվ 39 որոշումն ուժը կորցրած ճանաչել։

5. Սույն որոշումն ուժի մեջ է մտնում դրա պաշտոնական հրապարակման օրվանից 10 օրացուցային օրը լրանալուց հետո։

Եվրասիական տնտեսական հանձնաժողովի խորհրդի անդամներ`

Պաշտոնական հրապարակման օրը՝ 10 սեպտեմբերի 2024 թվական: