ԵՐԵՎԱՆ ՔԱՂԱՔԻ ԱՎԱԳԱՆՈՒ

Ո Ր Ո Շ ՈՒ Մ

ԵՐԵՎԱՆ ՔԱՂԱՔԻ ԸՆԴՀԱՆՈՒՐ ՕԳՏԱԳՈՐԾՄԱՆ ԿԱՆԱՉ ՏԱՐԱԾՔՆԵՐԻ ՊԱՀՊԱՆՄԱՆ ԵՎ ՕԳՏԱԳՈՐԾՄԱՆ ԿԱՆՈՆՆԵՐԸ ՀԱՍՏԱՏԵԼՈՒ ՄԱՍԻՆ

«Երևան քաղաքում տեղական ինքնակառավարման մասին» Հայաստանի Հանրապետության օրենքի 12-րդ հոդվածի 1-ին մասի 30-րդ կետին համապատասխան՝

Երևան քաղաքի ավագանին որոշում է.

1. Հաստատել Երևան քաղաքի ընդհանուր օգտագործման կանաչ տարածքների պահպանման և օգտագործման կանոնները՝ համաձայն հավելվածի։

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը։

Կ Ա Ն Ո Ն Ն Ե Ր

ԵՐԵՎԱՆ ՔԱՂԱՔԻ ԸՆԴՀԱՆՈՒՐ ՕԳՏԱԳՈՐԾՄԱՆ ԿԱՆԱՉ ՏԱՐԱԾՔՆԵՐԻ ՊԱՀՊԱՆՄԱՆ ԵՎ ՕԳՏԱԳՈՐԾՄԱՆ

1. Ընդհանուր դրույթներ

Սույն կանոններով սահմանվում են Երևան քաղաքի կանաչ տնկարկներով և բուսածածկով զբաղեցված ընդհանուր օգտագործման տարածքների (այսուհետ՝ կանաչ տարածքներ) պահպանման և վերարտադրության հետ կապված հարաբերությունները։

Ընդհանուր օգտագործման կանաչ տարածքներ են հանդիսանում քաղաքի զբոսայգիները, անտառպուրակները, պուրակները, այգիները, ծառուղիները, սիզամարգերը և մայթեզրերի բուսածածկ տարածքները։

Կանաչ տարածքներում կանաչ տնկարկների պահպանումն ու վերարտադրությունը ներառում է դրանց հաշվառումը, գույքագրումը, գնահատումը, պահպանումը, խնամքը, տեղափոխումը և վերականգնումը նոր համարժեք կանաչ տարածքների ստեղծման միջոցով։

Կանաչ տարածքների թույլատրված օգտագործումը իրականացվում է Հայաստանի Հանրապետության օրենսդրությամբ սահմանված՝ դրանց նպատակային և գործառնական նշանակությամբ (ներառյալ իրավունքները և սահմանափակումները)` բնապահպանական փորձաքննության դրական եզրակացության հիման վրա։

2. Սույն կանոնների նկատմամբ հսկողություն իրականացնող լիազորված մարմինը

Սույն կանոնների նկատմամբ հսկողություն իրականացնող լիազորված մարմինը սահմանվում է Երևանի քաղաքապետի կողմից (այսուհետ՝ լիազորված մարմին):

3. Կանաչ տարածքների պահպանման հիմնական սկզբունքները

Երևանի կանաչ տարածքների ամբողջ համակարգը ենթակա է պարտադիր պահպանման, բացառությամբ անտառային գոտիների, որոնց պահպանումը իրականացվում է համաձայն ՀՀ անտառային օրենսգրքի, համապատասխան մարմինների կողմից։

Կանաչ տարածքներում քաղաքաշինական և ձեռնարկատիրական գործունեությունը պետք է համապատասխանի դրանց պահպանման պահանջներին։

Կանաչ տարածքների օգտագործումն արգելվում է, եթե այն չի ապահովում կանաչ տարածքների բնականոն կենսագործունեությունը։

Կանաչ տարածքների ստեղծումը, ավելացումը և պահպանումը կատարվում է Երևան քաղաքի զարգացման ծրագրին համապատասխան։

4. Ծառերի, թփերի հատումը և բուսաշերտի տեղահանումը

Ծառերի, թփերի հատումը և բուսաշերտի տեղահանումը թույլատրվում է հետևյալ դեպքերում`

- քաղաքի զարգացման ծրագրին համապատասխան մշակված, քաղաքաշինական փաստաթղթերով նախատեսված նախագծի իրականացման և օրենսդրությամբ սահմանված կարգով բնապահպանական փորձաքննության դրական եզրակացության առկայության.

- քաղաքի գլխավոր դենդրոլոգի հետ համաձայնեցնելուց հետո սանիտարական հատումների իրականացման և կանաչ գոտու վերաձևավորման և փոփոխության ենթարկման.

- սանիտարական և հակահամաճարակային հսկողություն իրականացնող մարմինների եզրակացության հիման վրա՝ բնակելի և ոչ բնակելի նորմատիվային լուսավորության ռեժիմի վերականգնման.

- վթարային արտակարգ իրավիճակների վերացման, այդ թվում՝ կապիտալ շինությունների և ստորգետնյա կոմունիկացիաների վերանորոգման (հետագա վերականգնման պայմանով)։

Ծառերի ու թփերի հատումը, ինչպես նաև բուսաշերտի տեղահանումն իրականացվում է լիազորված մարմնի կողմից տրված թույլտվության առկայության դեպքում։

5. Փոխհատուցվող կանաչապատում

Փոխհատուցվող կանաչապատումը պարտադիր գործողություն է վնասված կամ ոչնչացված կանաչ տնկարկների վերարտադրման և վերականգնման գործընթացում։

Կանաչ տարածքների ոչնչացման դեպքում փոխհատուցվող կանաչապատումը կատարվում է նույն հողատարածքում կամ լիազորված մարմնի կողմից առաջարկված մեկ այլ տարածքում հաստատված կանաչապատման նախագծի համաձայն։

Վերականգնվող կանաչ գոտու ծավալներն ու տեսականին սահմանվում են քաղաքի գլխավոր դենդրոլոգի կողմից և ամրագրվում են կանաչապատման նախագծում։

Փոխհատուցվող կանաչապատումն իրականացվում է կանաչ գոտուն վնաս հասցրած սուբյեկտի միջոցների հաշվին։

6. Կանաչ տարածքների օգտագործման պայմանները

Կանաչ տարածքներում արգելվում է՝

- կանաչ տնկարկների վնասումը կամ ոչնչացումը.

- տերևների, չոր խոտի այրումը և այլ հրդեհավտանգ իրավիճակ ստեղծող գործողությունների իրականացումը.

- ավտոտրանսպորտային և այլ տեխնիկայի երթևեկությունը և կանգառը.

- տարբեր բեռների և շինությունների պահեստավորումը, ինչպես նաև թափոնների կուտակումը,

- ավտոտրանսպորտային միջոցների լվացումը, նորոգումը, հեղուկների և այլ վնասակար նյութերի թափումը,

- կանաչ տարածքներին վնաս հասցնող, իրավական ակտերով արգելված այլ գործողություննեի կատարումը։

Կանաչ տարածքների վարձակալները ստանձնում են դրանց պահպանությունն ու խնամքը, ինչն ամրագրվում է համապատասխան պայմանագրով։

7. Ձեռնարկատիրական գործունեություն իրականացնելու ընթացքում կանաչ տարածքների պահպանումը

Կանաչ տարածքներում ձեռնարկատիրական գործունեությունն իրականացվում է կանաչ տարածքների պահպանման պահանջներին համապատասխան:

Կանաչ տարածքներում ձեռնարկատիրական գործունեություն իրականացվում է միայն լիազորված մարմնի կողմից տրված թույլտվությունից հետո։

Կանաչ տարածքներում ձեռնարկատիրական գործունեության ընթացքում արգելվում է պայթյունավտանգ, հրդեհավտանգ և թունավոր նյութերի օգտագործում, տարածքի աղտոտում և այլ գործողություններ, որոնք կարող են հանգեցնել կանաչ տարածքների վնասմանը և ոչնչացմանը։

8. Վնասների հատուցում

Կանաչ տարածքներին հասցված վնասը ենթակա է հատուցման՝ բացառությամբ սույն կարգի 4-րդ կետով նախատեսված դեպքերի:

Վնասի հատուցման չափը որոշվում է ՀՀ օրենսդրությամբ սահմանված կարգով՝ ելնելով կանաչ տարածքի փոխհատուցվող արժեքից։

Բոլոր տեսակի վնասակար գործողություններից հասցված վնասի գնահատումը կատարվում է՝

- կանաչ տարածքի անօրինական վնասման կամ ոչնչացման դեպքում.

- ծառերի և թփերի օրինական (թույլատրված) հատման և հողաբուսաշերտերի պինդ ծածկույթով փոխարինման դեպքում։

Փոխհատուցումը կատարվում է գումարային կամ կանաչ տարածքը վերականգնելու ձևով:

Վնասի փոխհատուցումը կանաչ տարածքը վերականգնելու ձևով իրականացվում է վնաս հասցրած սուբյեկտի և լիազոր մարմնի միջև կանաչապատման աշխատանքների իրականացման վերաբերյալ պայմանագրի կնքման հիման վրա։

Վնասը համարվում է ամբողջությամբ հատուցված՝ լիազորված մարմնի կողմից կատարված աշխատանքների ընդունումից հետո։

9. Չհատուցվող վնաս

Կանաչ տարածքներին հասցված վնասը ենթակա չէ հատուցման հետևյալ դեպքերում՝

- սանիտարական հատումների և կանաչ տնկարկների վերաձևավորման,

- սանիտարական և հակահամաճարակային հսկողություն իրականացնող մարմինների եզրակացությամբ՝ բնակելի և ոչ բնակելի տարածքների նորմատիվային լուսավորության ռեժիմի վերականգնման,

- բնական աղետների (փոթորիկ, երկրաշարժ և այլն) հետևանքներով առաջացած ավերածությունների,

- չորացած կամ տապալման ենթակա ծառերի և թփերի հեռացման։