ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

6 հուլիսի 1995 թվականի N 502

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԳՈՐԾՈՂ ՁԵՌՆԱՐԿՈՒԹՅՈՒՆՆԵՐԻ, ՀԻՄՆԱՐԿՆԵՐԻ ՈՒ ԿԱԶՄԱԿԵՐՊՈՒԹՅՈՒՆՆԵՐԻ ՀԱՄԱՐ ՇԱՀՈՒԹԱՀԱՐԿԻ ՀԱՐԿԻ ԿԱՆԽԱՎՃԱՐՆԵՐԻ ՀԱՇՎԱՐԿՄԱՆ ՆՈՐ ԿԱՐԳ ՍԱՀՄԱՆԵԼՈՒ ՄԱՍԻՆ

(վերնագիրը փոփ. 24.07.97 N 295)

Նկատի ունենալով, որ շահութահարկի կանխավճարների հաշվարկման գործող կարգն առանձին դեպքերում չի նպաստում հարկ վճարողների կայուն ֆինանսական դրության ապահովմանը, ղեկավարվելով «Շահութահարկի մասին» Հայաստանի Հանրապետության օրենքի 18 հոդվածի պահանջներով` մինչև նշված օրենքում համապատասխան փոփոխությունների կատարումը, ինչպես նաև հաշվի առնելով Հայաստանի Հանրապետության Գերագույն խորհրդի ֆինանսավարկային և բյուջետային հարցերի մշտական հանձնաժողովի համաձայնությունը, Հայաստանի Հանրապետության կառավարությունը որոշում է`

(նախաբանը փոփ. 24.07.97 N 295)

1. Սահմանել, որ «Շահութահարկի մասին» Հայաստանի Հանրապետության օրենքին համապատասխան կանխավճարային մուծումներ իրականացնող ձեռնարկությունների, հիմնարկների ու կազմակերպությունների շահութահարկի և ավելացված արժեքի հարկի կանխավճարները հաշվարկվում են միայն գործունեության իրականացման դեպքում` ելնելով նախորդ հաշվետու ժամանակաշրջանի փաստացի հարկի գումարների 50 տոկոսից:

Ընթացիկ հաշվետու ժամանակաշրջանում գործունեության իրականացում (իրացման շրջանառություն, եկամուտներ) չնախատեսելու դեպքում հարկ վճարողները նախապես` մինչև հաշվետու եռամսյակի առաջին ամսվա 15-ը, պարտավոր են այդ մասին գրավոր տեղեկացնել հարկային մարմիններին:

Սույն որոշման 1-ին կետը կիրարկել`

ա) (ենթակետը հանվել է. 24.07.97 N 295)

բ) շահութահարկի կանխավճարի համար` 1995 թվականի հուլիսի 1-ից:

(1-ին կետը փոփ. 24.07.97 N 295)

2. Սահմանել, որ «Շահութահարկի մասին» Հայաստանի Հանրապետության օրենքում, ինչպես նաև սույն որոշման 1-ին կետում նշված կարգով և ժամկետներում կանխավճարային մուծումներ չկատարելու դեպքում հարկային մարմիններն այդ կանխավճարային գումարների (և դրանց գծով հաշվարկված տույժերի) վերաբերյալ պահանջներ են ներկայացնում օրենսդրությամբ սահմանված կարգով:

Փաստացի հարկի գումարները հայտնի դառնալուց հետո հարկային մարմինների կողմից կատարվում է կանխավճարային գումարների և դրանց գծով հաշվարկված տույժերի ճշտման վերահաշվարկ: Ընդ որում, եթե հաշվետու եռամսյակի հարկի փաստացի գումարները պակաս են կանխավճարային գումարներից, ապա դրանց տարբերությունը և դրա նկատմամբ հաշվարկված ու պետական բյուջե վճարված (գանձված) տույժերի գումարները ենթակա են սահմանված կարգով վերադարձման, իսկ նշված տարբերությունը և դրա նկատմամբ հաշվարկված տույժերի գումարները պետական բյուջե վճարված (գանձված) չլինելու դեպքում ենթակա չեն վճարման (գանձման):

Այն դեպքում, երբ տվյալ հաշվետու եռամսյակի հարկի փաստացի գումարները գերազանցում են հաշվարկված կանխավճարային մուծումների գումարները, ապա վերահաշվարկ է կատարվում միայն հարկի գծով և առաջացած տարբերությունը լրացուցիչ գանձվում է պետական բյուջե` առանց կանխավճարների գծով տույժերի հաշվարկման:

(2-րդ կետը փոփ. 24.07.97 N 295)

3. Սահմանել, որ մինչև սույն որոշման 1-ին կետում նշված ժամկետները նախկին կարգով (հարկի գումարի 100 տոկոսի չափով) 1995 թվականի համար հաշվարկված կանխավճարների (և դրանց գծով հաշվարկված տույժերի) գումարները ենթակա են վերահաշվարկման սույն որոշման 2-րդ կետի երկրորդ և երրորդ պարբերություններում նշված կարգով:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ս. ՄԱՆԱՍԱՐՅԱՆ