ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ Ո Ւ Մ

10 ապրիլի 2020 թվականի N 536-Լ

ԿՈՐՈՆԱՎԻՐՈՒՍԻ ՏԱՐԱԾՄԱՆ ՀԵՏԵՎԱՆՔՈՎ ԱՌԱՋԱՑԱԾ ԴԺՎԱՐՈՒԹՅՈՒՆՆԵՐԻ ԱՐԴՅՈՒՆՔՈՒՄ ՍՈՑԻԱԼԱԿԱՆ ԽՆԴԻՐՆԵՐԻ ԱՌՋԵՎ ԿԱՆԳՆԱԾ՝ ՄԻՆՉԵՎ 18 ՏԱՐԵԿԱՆ ԵՐԵԽԱՆԵՐ ՈՒՆԵՑՈՂ ԸՆՏԱՆԻՔՆԵՐԻՆ ՄԻԱՆՎԱԳ ԱՋԱԿՑՈՒԹՅՈՒՆ ՏՐԱՄԱԴՐԵԼՈՒ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2020 ԹՎԱԿԱՆԻ ԱՊՐԻԼԻ 2-Ի N 427-Լ ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հիմք ընդունելով Հայաստանի Հանրապետության Սահմանադրության 146-րդ հոդվածի 4-րդ մասը, «Նորմատիվ իրավական ակտերի մասին» Հայաստանի Հանրապետության օրենքի 33-րդ և 34-րդ հոդվածները և Հայաստանի Հանրապետության կառավարության 2020 թվականի ապրիլի 2-ի N 427-Լ որոշումը՝ Հայաստանի Հանրապետության կառավարությունը որոշում է.

1. Հաստատել կորոնավիրուսի տարածման հետևանքով առաջացած դժվարությունների արդյունքում սոցիալական խնդիրների առջև կանգնած՝ մինչև 18 տարեկան երեխաներ ունեցող ընտանիքներին միանվագ աջակցություն տրամադրելու կարգը՝ համաձայն հավելվածի։

2. Հայաստանի Հանրապետության ազգային անվտանգության ծառայության պետին՝ միջոցներ ձեռնարկել սույն որոշմամբ հաստատված կարգի 22-րդ կետի իրականացումն ապահովելու ուղղությամբ։

3. Հայաստանի Հանրապետության կառավարության 2020 թվականի ապրիլի 2-ի «Կորոնավիրուսի տնտեսական հետևանքների չեզոքացման իններորդ միջոցառումը հաստատելու մասին» N 427-Լ որոշման հավելվածի 7-րդ կետի 2-րդ ենթակետում «կամ ընտանիքի անապահովության միավորը բարձր է 28.01-ից» բառերը փոխարինել «և ընտանիքի անապահովության միավորը բարձր է 28.00-ից» բառերով:

4. Սույն կարգի կիրառությունը, բացառությամբ 25-րդ կետի 2-րդ ենթակետի, 25.1-ին, 27-րդ, 28-րդ և 29-րդ կետերի, դադարեցվում է 2020 թվականի նոյեմբերի 1-ից, իսկ 29-րդ կետն ուժը կորցնում է 2021 թվականի փետրվարի 1-ից:

(4-րդ կետը լրաց. 03.09.20 N 1464-Լ)

Հայաստանի Հանրապետության վարչապետ	Ն. Փաշինյան
2020 թ. ապրիլի 10 Երևան

Հավելված ՀՀ կառավարության 2020 թվականի ապրիլի 10-ի N 536-Լ որոշման

Կ Ա Ր Գ

(սույն կարգի կիրառությունը, բացառությամբ 25-րդ կետի 2-րդ ենթակետի, 25.1-ին, 27-րդ, 28-րդ և 29-րդ կետերի, դադարեցվում է 2020 թվականի նոյեմբերի 1-ից)

ԿՈՐՈՆԱՎԻՐՈՒՍԻ ՏԱՐԱԾՄԱՆ ՀԵՏԵՎԱՆՔՈՎ ԱՌԱՋԱՑԱԾ ԴԺՎԱՐՈՒԹՅՈՒՆՆԵՐԻ ԱՐԴՅՈՒՆՔՈՒՄ ՍՈՑԻԱԼԱԿԱՆ ԽՆԴԻՐՆԵՐԻ ԱՌՋԵՎ ԿԱՆԳՆԱԾ՝ ՄԻՆՉԵՎ 18 ՏԱՐԵԿԱՆ ԵՐԵԽԱՆԵՐ ՈՒՆԵՑՈՂ ԸՆՏԱՆԻՔՆԵՐԻՆ ՄԻԱՆՎԱԳ ԱՋԱԿՑՈՒԹՅՈՒՆ ՏՐԱՄԱԴՐԵԼՈՒ

1. Սույն կարգով կարգավորվում են կորոնավիրուսի տարածման հետևանքով առաջացած դժվարությունների արդյունքում սոցիալական խնդիրների առջև կանգնած՝ մինչև 18 տարեկան երեխաներ ունեցող ընտանիքներին Հայաստանի Հանրապետության կառավարության 2020 թվականի ապրիլի 2-ի N 427-Լ որոշման հիման վրա միանվագ աջակցություն նշանակելուն և վճարելուն առնչվող հարաբերությունները: Հայաստանի Հանրապետության կառավարության 2020 թվականի ապրիլի 2-ի N 427-Լ որոշման և սույն կարգի իմաստով քաղաքացիաիրավական պայմանագրի հիման վրա կատարվող աշխատանքը և մատուցված ծառայությունը չեն համարվում հիմնական, մշտական կամ ժամանակավոր աշխատանք, իսկ այդ պայմանագրի հիման վրա ստացած եկամուտը՝ աշխատավարձի և դրան հավասարեցված այլ վճարումներում չի հաշվառվում։

2. Միանվագ աջակցությունը նշանակում և վճարում է Հայաստանի Հանրապետության աշխատանքի և սոցիալական հարցերի նախարարության սոցիալական ապահովության ծառայությունը (այսուհետ՝ Ծառայություն)՝ հիմնվելով online.ssa.am կայքէջի միջոցով էլեկտրոնային դիմումով ներկայացված տվյալների (տեղեկատվության) վրա։

3. Էլեկտրոնային դիմումը ներկայացնելու համար դիմող ծնողը կամ խնամակալը online.ssa.am կայքէջից մուտք է գործում համապատասխան ծրագրային միջավայր և, մինչև 2020 թվականի հոկտեմբերի 1-ը (ներառյալ), Ծառայություն է ներկայացնում՝

1) (ենթակետն ուժը կորցրել է 21.04.20 N 584-Լ)

2) եթե երեխայի ծննդի պետական գրանցումն իրականացվել է Հայաստանի Հանրապետությունում, ապա դիմող ծնողի անունը, ազգանունը, անձը հաստատող փաստաթղթի սերիան ու համարը.

3) եթե երեխայի ծննդյան պետական գրանցումն իրականացվել է օտարերկրյա պետությունում, կամ միանվագ աջակցության համար դիմում է երեխայի խնամակալը, կամ նախորդ դիմումը մերժվել է սույն կարգի 9-րդ կետի 5-րդ ենթակետի հիման վրա, ապա ծնողների (հոր և մոր) կամ խնամակալի անունը, ազգանունը, անձը հաստատող փաստաթղթի սերիան ու համարը, երեխայի անունը, ազգանունը, ծննդյան վկայականի սերիան ու համարը.

4) եթե երեխայի ծննդյան պետական գրանցումն իրականացվել է օտարերկրյա պետությունում, կամ նախորդ դիմումը մերժվել է սույն կարգի 9-րդ կետի 5-րդ ենթակետի հիման վրա, և երեխան միայնակ մոր երեխա է, նրա ծնողներից մեկը մահացած է, ճանաչվել է մահացած կամ անհայտ բացակայող, ապա նշում այդ մասին, ինչպես նաև եթե միանվագ աջակցության համար դիմում է երեխայի խնամակալը, ապա նշում այդ մասին.

5) եթե երեխայի ծննդյան պետական գրանցումն իրականացվել է օտարերկրյա պետությունում, կամ նախորդ դիմումը մերժվել է սույն կարգի 9-րդ կետի 5-րդ ենթակետի հիման վրա, և երեխայի ծնողներից մեկը Հայաստանի Հանրապետությունում չբնակվող օտարերկրյա քաղաքացի է, ապա նշում այդ մասին.

6) հետադարձ կապի բջջային հեռախոսահամարը և էլեկտրոնային փոստի հասցեն.

7) շահառուի քարտային հաշվին կցված վճարային քարտի 16-նիշանոց համարը (եթե շահառուն ցանկանում է գումարն ստանալ քարտային հաշվին փոխանցելու միջոցով), կամ բանկի անվանումը, որի միջոցով շահառուն ցանկանում է ստանալ աջակցության գումարը (եթե շահառուն չի ներկայացնում քարտային հաշվին կցված վճարային քարտի 16-նիշանոց համարը):

(3-րդ կետը խմբ. 14.04.20 N 555-Լ, լրաց., փոփ., խմբ. 21.04.20 N 584-Լ, լրաց. 03.09.20 N 1464-Լ)

4. (կետն ուժը կորցրել է 21.04.20 N 584-Լ)

5. Սույն կարգի 3-րդ կետի 3-րդ ենթակետում նշված դեպքերում դիմումին կից ներկայացվում է նաև երեխայի ծննդյան վկայականի էլեկտրոնային լուսապատճենը (անկախ երեխայի ծննդյան տարեթվից), ամուսնության վկայականի էլեկտրոնային լուսապատճենը կամ հայրություն ճանաչելու վկայականի կամ երեխաների նկատմամբ խնամակալություն սահմանելու (խնամակալ ճանաչելու) մասին փաստաթղթի էլեկտրոնային լուսապատճենը։ Եթե սույն կետում նշված փաստաթղթերը տրված են օտարերկրյա կազմակերպությունների (հաստատությունների) կողմից, ապա դրանք ներկայացվում են նաև նոտարական կարգով վավերացված հայերեն թարգմանությամբ` բացառությամբ Հայաստանի Հանրապետության միջազգային պայմանագրերով սահմանված դեպքերի (երբ լրացված են ռուսերեն):

(5-րդ կետը փոփ., լրաց. 21.04.20 N 584-Լ, լրաց. 03.09.20 N 1464-Լ)

6. Եթե երեխայի ծննդի պետական գրանցումն իրականացվել է Հայաստանի Հանրապետությունում, ապա Ծառայությունը, առցանց ռեժիմում ճշտում է դիմումով ներկայացված տվյալների հավաստիությունը (համապատասխանությունը բնակչության պետական ռեգիստրում առկա տվյալներին) և բնակչության պետական ռեգիստրի տվյալների հիման վրա նույնականացնում է դիմող ծնողին կամ խնամակալին՝ հաշվառելով կամ մերժելով էլեկտրոնային դիմումը։

(6-րդ կետը փոփ. 21.04.20 N 584-Լ)

7. Ծառայությունը մերժում է էլեկտրոնային դիմումը, եթե՝

1) դիմող ծնողը կամ խնամակալը բնակչության պետական ռեգիստրի տվյալների հիման վրա չեն նույնականացվում.

2) (ենթակետն ուժը կորցրել է 21.04.20 N 584-Լ)

(7-րդ կետը փոփ. 21.04.20 N 584-Լ)

8. Եթե դիմումը սույն կարգի 6-րդ կետի հիման վրա հաշվառվում է, ապա Ծառայությունն անմիջապես՝

1) ճշտում է երեխայի ծնողների (սույն կարգի 3-րդ կետի 4-րդ և 5-րդ ենթակետերում նշված դեպքերում՝ դիմող ծնողի կամ խնամակալի) վերաբերյալ տեղեկատվության առկայությունը Հայաստանի Հանրապետության կառավարության 2012 թվականի դեկտեմբերի 20-ի N 1676-Ն որոշմամբ հարկային մարմնից ստացված վարձու աշխատողների և անհատ ձեռնարկատերերի վերաբերյալ տվյալներում.

2) ճշտում է երեխայի և ծնողների (սույն կարգի 3-րդ կետի 4-րդ և 5-րդ ենթակետերում նշված դեպքերում՝ դիմող ծնողի կամ խնամակալի) վերաբերյալ տեղեկատվության առկայությունը ընտանիքների անապահովության գնահատման համակարգում հաշվառված ընտանիքների վերաբերյալ տվյալներում.

3) ճշտում է երեխայի և դիմող ծնողի վերաբերյալ տեղեկատվության առկայությունը ՔԿԱԳ մարմիններից ստացված՝ երեխաների և նրանց ծնողների վերաբերյալ, ինչպես նաև մահվան ակտերի վերաբերյալ տվյալներում.

4) ճշտում է երեխայի վերաբերյալ տեղեկատվության առկայությունը առանց ծնողական խնամքի մնացած երեխաների հաշվառման տվյալներում.

5) հաշվի առնելով սույն կետի 1-4-րդ ենթակետերում նշված ճշտումների արդյունքները՝ որոշում է կայացնում երեխայի տվյալները վճարման ցուցակ ներառելու կամ դիմումը մերժելու մասին.

(8-րդ կետը լրաց., խմբ. 21.04.20 N 584-Լ)

8.1. Սույն կարգի 8-րդ կետի 3-րդ ենթակետում նշված՝ երեխաների և նրանց ծնողների վերաբերյալ, ինչպես նաև մահվան ակտերի վերաբերյալ տվյալները, ինչպես նաև տրամադրված տվյալների փոփոխությունները ՔԿԱԳ մարմինները Ծառայության հետ փոխհամաձայնեցված տարբերակով՝ էլեկտրոնային եղանակով տրամադրում են շաբաթական պարբերությամբ՝ հիմք ընդունելով ներկայացնելու օրվա դրությամբ առկա տվյալները:

(8.1-ին կետը լրաց. 03.09.20 N 1464-Լ)

9. Սույն կարգի 8-րդ կետի 5-րդ ենթակետում նշված դեպքում դիմումը մերժվում է, եթե՝

1) երեխան և (կամ) ծնողներից մեկը (սույն կարգի 3-րդ կետի 4-րդ և 5-րդ ենթակետերում նշված դեպքերում՝ դիմող ծնողը կամ խնամակալը) ընտանիքների անապահովության գնահատման համակարգում հաշվառված են ընտանեկան և սոցիալական նպաստի՝ 2020 թվականի մարտ ամսվա վճարման ցուցակներում ընդգրկված և 2020 թվականի մարտ ամսվա համար ընտանեկան կամ սոցիալական նպաստ ստանալու իրավունք ունեցող ընտանիքի կազմում՝ որպես ընտանիքի ներկա անդամ, կամ.

2) երեխայի ծնողներից մեկը (սույն կարգի 3-րդ կետի 4-րդ և 5-րդ ենթակետերում նշված դեպքերում՝ դիմող ծնողը կամ խնամակալը)՝

ա. 2020 թվականի մարտի 12-ից (ներառյալ) մինչև 2020 թվականի մարտի 30-ը (ներառյալ) ժամանակահատվածում որևէ օր հանդիսացել է վարձու աշխատող (բացառությամբ այն դեպքի, երբ վարձու աշխատող ծնողը 2020 թվականի մարտի 12-ի դրությամբ գտնվել է մինչև 3 տարեկան երեխայի խնամքի արձակուրդում), կամ

բ. 2020 թվականի մարտի 31-ի դրությամբ հանդիսացել է անհատ ձեռնարկատեր (բացառությամբ այն անհատ ձեռնարկատերերի, որոնք գրանցվել են 2020 թվականի հունվարի 1-ից հետո, ինչպես նաև այն անհատ ձեռնարկատերերի ում 2019 թվականի 4-րդ եռամսյակի շրջանառությունը կազմում է 0 դրամ՝ համաձայն Պետական եկամուտների կոմիտե ներկայացված հաշվետվության), ում գործունեությունը նույն ամսաթվի դրությամբ Հայաստանի Հանրապետության օրենսդրությամբ սահմանված կարգով դադարեցված չի եղել, կամ

գ. 2020 թվականի հունվարի 1-ից մինչև 2020 թվականի մարտի 1-ն ընկած ժամանակահատվածում որևէ օր հանդիսացել է վարձու աշխատող, և այդ ժամանակահատվածում ծնողների միջին ամսական աշխատավարձի հանրագումարի կամ ծնողներից մեկի միջին ամսական աշխատավարձի չափը գերազանցել է 500 000 դրամը.

3) երեխան կամ դիմող ծնողը ՔԿԱԳ մարմիններից ստացված տվյալների համաձայն՝ մահացած են.

4) երեխան ունի առանց ծնողական խնամքի մնացած երեխայի կարգավիճակ (բացառությամբ այն դեպքի, երբ միանվագ աջակցության համար դիմում է երեխայի խնամակալը).

5) երեխայի ծննդի պետական գրանցումն իրականացվել է Հայաստանի Հանրապետությունում, սակայն երեխան և դիմող ծնողը քաղաքացիական կացության ակտերի գրանցման մարմիններից ստացված՝ երեխաների և նրանց ծնողների վերաբերյալ տվյալների հիման վրա չեն նույնականացվում։ Այս դեպքում միանվագ աջակցությունը նշանակվում և վճարվում է սույն կարգի 5-րդ կետով սահմանված կարգով ներկայացված դիմումի հիման վրա։

6) եթե երեխայի ծնողների մշտական բնակության վայրը հաշվառված չէ Հայաստանի Հանրապետությունում կամ եթե երեխայի ծնողները Հայաստանի Հանրապետությունում մշտական բնակության վայրի հաշվառում չունեն և միաժամանակ նրանց մշտական բնակության վերջին հաշվառման վայրը չի եղել Հայաստանի Հանրապետությունը.

7) երեխայի ծնողները կամ միայնակ ծնողը կամ խնամակալը Հայաստանի Հանրապետության քաղաքացի չեն:

(9-րդ կետը լրաց. 14.04.20 N 555-Լ, 16.04.20 N 558-Լ, 21.04.20 N 584-Լ, փոփ., լրաց. 18.05.20 N 759-Լ, լրաց. 03.09.20 N 1464-Լ)

9.1. Սույն կարգի իմաստով աշխատանք չունենալու փաստը հաստատվում է Պետական եկամուտների կոմիտեի տեղեկատվական շտեմարանում 2020 թվականի ապրիլի 10-ի դրությամբ առկա տվյալների միջոցով, այդ թվում՝ Հայաստանի Հանրապետության օրենսդրությամբ սահմանված կարգով Պետական եկամուտների կոմիտե ներկայացված աշխատանքից ազատման վերաբերյալ տեղեկատվության հիման վրա:

(9.1-ին կետը լրաց. 18.05.20 N 759-Լ)

10. Սույն կարգի 9-րդ կետի 2-րդ ենթակետի «գ» պարբերությունում նշված դեպքում միջին ամսական աշխատավարձի չափը հաշվարկվում է 2020 թվականի հունվար և փետրվար ամիսների համար ծնողին վճարված (վճարման ենթակա) աշխատավարձի և դրան հավասարեցված այլ վճարումների հանրագումարը երկուսի բաժանելու միջոցով։ Աշխատավարձի և դրան հավասարեցված այլ վճարումների չափում չեն ներառվում վճարվող հարկերը և այլ պարտադիր վճարները։

11. (կետն ուժը կորցրել է 21.04.20 N 584-Լ)

12. (կետն ուժը կորցրել է 21.04.20 N 584-Լ)

13. (կետն ուժը կորցրել է 21.04.20 N 584-Լ)

14. Դիմումը մերժելու մասին որոշում կայացվում է, եթե՝

1) Ցանկում ներառված՝ բնակչության պետական ռեգիստրի հիման վրա նույնականացված ծնողներին վերաբերող տեղեկատվությունը չի համապատասխանում երեխայի ծննդյան ակտի գրառման տվյալներին,

2) մյուս ծնողը ծննդյան ակտի գրառման տվյալներով նույնականացվում է բնակչության պետական ռեգիստրում, և առկա է դիմումը մերժելու համար սույն կարգի 9-րդ կետի 1-ին և 2-րդ ենթակետերում նշված հիմքերից որևէ մեկը.

3) (ենթակետն ուժը կորցրել է 14.04.20 N 555-Լ)

(14-րդ կետը փոփ. 14.04.20 N 555-Լ)

15. (կետն ուժը կորցրել է 21.04.20 N 584-Լ)

16. (կետն ուժը կորցրել է 21.04.20 N 584-Լ)

17. (կետն ուժը կորցրել է 21.04.20 N 584-Լ)

18. Եթե ծննդի պետական գրանցումը կատարել է օտարերկրյա պետության իրավասու մարմինը կամ միանվագ աջակցության համար դիմում է երեխայի խնամակալը, կամ դիմումը մերժվել է սույն կարգի 9-րդ կետի 5-րդ ենթակետի հիման վրա, ապա երեխայի տվյալները վճարման ցուցակ ներառելու կամ դիմումը մերժելու մասին որոշումը կայացվում է էլեկտրոնային դիմումի հիման վրա ներկայացված տեղեկատվության (այդ թվում՝ փաստաթղթերի լուսապատճենների) հիման վրա։

(18-րդ կետը լրաց., փոփ. 21.04.20 N 584-Լ)

19. Վճարման ցուցակը ձևավորվում է սույն կարգի 8-րդ և 18-րդ կետերի հիման վրա։

(19-րդ կետը փոփ. 21.04.20 N 584-Լ)

20. Վճարման ցուցակում ներառվում են բանկի անվանումը, ինչպես նաև՝

1) դիմող ծնողի կամ խնամակալի անունը, ազգանունը, անձը հաստատող փաստաթղթի սերիան ու համարը, հանրային ծառայությունների համարանիշը.

2) երեխայի (երեխաների) անունը, ազգանունը, անձը հաստատող փաստաթղթի սերիան ու համարը, հանրային ծառայությունների համարանիշը.

3) վճարման ենթակա գումարը։

(20-րդ կետը լրաց. 21.04.20 N 584-Լ)

21. Ծառայությունը, օրական պարբերականությամբ վճարման ցուցակում ներառված տեղեկատվությունը տրամադրում է Հայաստանի Հանրապետության ազգային անվտանգության ծառայությանը։

22. Հայաստանի Հանրապետության ազգային անվտանգության ծառայությունը, հաշվի առնելով Հայաստանի Հանրապետության կառավարության 2020 թվականի ապրիլի 2-ի N 427-Լ որոշման 6-րդ կետի դրույթները, վճարման ցուցակում ներառված տվյալները համադրում է Հայաստանի Հանրապետության կառավարության 2006 թվականի հունիսի 22-ի N 884-Ն որոշմամբ սահմանված՝ Սահմանային էլեկտրոնային կառավարման տեղեկատվական (ՍԷԿՏ) համակարգում առկա տվյալների հետ և Ծառայությանն է տրամադրում տեղեկատվություն՝ երեխայի և դիմող ծնողի՝ 2020 թվականի մարտի 31-ի դրությամբ Հայաստանի Հանրապետությունում գտնվելու վերաբերյալ։

23. Երեխայի տվյալները վճարման ցուցակից հանվում են (վճարումը դադարեցվում է), եթե ՍԷԿՏ համակարգում առկա տեղեկատվության համաձայն՝ 2020 թվականի մարտի 31-ի դրությամբ երեխան կամ դիմող ծնողը կամ խնամակալը չեն գտնվում Հայաստանի Հանրապետությունում։ Այս դեպքում դիմումը մերժվում է։

(23-րդ կետը լրաց. 21.04.20 N 584-Լ)

24. Ծառայությունը, սույն կարգով նախատեսված՝ դիմումը մերժելու դեպքերում այդ մասին հետադարձ կապի էլեկտրոնային փոստի հասցեին է ուղարկում համապատասխան էլեկտրոնային հաղորդագրություն։ Սույն կետում նշված էլեկտրոնային հաղորդագրությունը ներառում է դիմումով ներկայացված տեղեկատվությունը, ինչպես նաև մերժման պատճառը՝ ըստ սույն կարգի։

25. Աջակցության գումարը վճարվում է անկանխիկ եղանակով՝

1) շահառուի քարտային հաշվին փոխանցելու միջոցով, եթե շահառուն ներկայացրել է իր վճարային քարտի 16-նիշանոց համարը, կամ

2) Հայաստանի Հանրապետության կառավարության 2014 թվականի մարտի 6-ի N 275-Ն որոշման N 3 հավելվածի 2-րդ կետի 1.1-ին ենթակետով երեխայի ծննդյան միանվագ նպաստը վճարելու համար սահմանված կարգով՝ այդ հավելվածի 18-րդ կետում նշված համաձայնագիր կնքած բանկերի միջոցով՝ եթե շահառուն չի ներկայացրել իր վճարային քարտի 16-նիշանոց համարը կամ ներկայացված 16-նիշանոց համարը սխալ է կամ որևէ այլ պատճառով հնարավոր չէ գումարը փոխանցել շահառուի քարտային հաշվին։ Ընդ որում, սույն ենթակետում նշված դեպքում, բանկը միանվագ աջակցության գումարը վճարում է բանկին գումարն ստանալու պահանջ ներկայացրած՝ դիմող ծնողին կամ խնամակալին կամ նրանց տված՝ նոտարական կարգով վավերացված լիազորագիրը ներկայացրած անձին, անձը հաստատող փաստաթղթի հիման վրա, իսկ եթե միանվագ աջակցության գումարը բանկին փոխանցելու ամսվան հաջորդող 3 ամսվա ընթացքում բանկին չի ներկայացվում գումարն ստանալու պահանջ, ապա գումարը վերադարձվում է Հայաստանի Հանրապետության պետական բյուջե։

(25-րդ կետը խմբ. 14.04.20 N 555-Լ, փոփ. 21.04.20 N 584-Լ)

25.1. Եթե սույն կարգի 6-րդ, 8-րդ, 9.1-ին և 22-րդ կետերով սահմանված կարգով պետական մարմինների կողմից տրամադրված կամ շտեմարանում առկա տվյալներում կատարվում է փոփոխություն և տրամադրված նոր տվյալներով կամ կատարված լրացուցիչ ուսումնասիրության արդյունքում պարզվում է, որ անձին չի կարող նշանակվել և վճարվել միանվագ աջակցություն, ապա Ծառայությունը դրա մասին տեղեկացնում է բանկին և պահանջում գումարը վերադարձնել Հայաստանի Հանրապետության պետական բյուջե: Բանկը`

1) գումարը շահառուի քարտային հաշվին փոխանցված լինելու դեպքում, շահառուի համաձայնությամբ, նրա բանկային հաշվից հետ է գանձում գումարը (բավարար միջոցներ չլինելու դեպքում` բանկային հաշվում առկա հասանելի մնացորդի չափով) և ոչ ուշ, քան հաջորդ աշխատանքային օրը փոխանցում Հայաստանի Հանրապետության պետական բյուջե` դրա մասին տեղեկացնելով Ծառայությանը: Եթե գումարը Հայաստանի Հանրապետության պետական բյուջե վերադարձնելու պահանջն ստանալու օրվա դրությամբ շահառուի քարտային հաշվի մնացորդը 0 դրամ է, դրա մասին ևս բանկը տեղեկացնում է Ծառայությանը.

2) գումարն առանց շահառուի քարտային հաշվի փոխանցված լինելու դեպքում, եթե գումարը դեռևս չի կանխիկացվել, ոչ ուշ, քան տեղեկատվությունն ստանալու հաջորդ աշխատանքային օրը գումարը փոխանցում է Հայաստանի Հանրապետության պետական բյուջե՝ դրա մասին տեղեկացնելով Ծառայությանը: Եթե գումարն արդեն կանխիկացվել է, դրա մասին ևս բանկը տեղեկացնում է Ծառայությանը:

Սույն կետում նշված դեպքում, եթե գումարը Հայաստանի Հանրապետության պետական բյուջե վերադարձնելու պահանջը բանկի կողմից ստանալու օրվա դրությամբ շահառուի քարտային հաշվի մնացորդը 0 դրամ է (գումարը շահառուի քարտային հաշվին փոխանցված լինելու դեպքում) կամ գումարն արդեն կանխիկացվել է (գումարն առանց շահառուի քարտային հաշվի փոխանցված լինելու դեպքում), ապա գումարը Հայաստանի Հանրապետության պետական բյուջե չի վերադարձվում:

(25.1-ին կետը լրաց. 03.09.20 N 1464-Լ)

26. Վճարման ցուցակը և տվյալ բանկի միջոցով շահառուներին վճարման ենթակա գումարները, ոչ ուշ, քան ձևավորվելու հաջորդ օրը Ծառայությունը փոխանցվում է բանկին՝ այդ մասին էլեկտրոնային հաղորդագրություն ուղարկելով հետադարձ կապի բջջային հեռախոսահամարին կամ էլեկտրոնային փոստի հասցեին։

(26-րդ կետը փոփ. 03.09.20 N 1464-Լ)

27. Աջակցության գումարը չի կարող արգելադրվել (դրվել արգելանքի տակ), բռնագանձվել կամ հաշվանցվել հաճախորդի պարտավորությունների դիմաց:

28. Աջակցության գումարը ընտանիքի անապահովությունը գնահատելիս ընտանիքի ամբողջական եկամտի հաշվարկի մեջ չի մտնում։

29. (կետն ուժը կորցրել է սույն որոշման 4-րդ կետի համաձայն)

(հավելվածը խմբ., լրաց., փոփ. 14.04.20 N 555-Լ, լրաց. 16.04.20 N 558-Լ, լրաց., փոփ., խմբ. 21.04.20 N 584-Լ, փոփ., լրաց. 18.05.20 N 759-Լ, 03.09.20 N 1464-Լ)

Հայաստանի Հանրապետության վարչապետի աշխատակազմի ղեկավար

Է. Աղաջանյան