ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

13 նոյեմբերի 2008 թվականի N 1440-Ն

ԲՈՒՍԱԿԱՆ ԱՇԽԱՐՀԻ ՊԵՏԱԿԱՆ ԿԱԴԱՍՏՐԻ ՎԱՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Բուսական աշխարհի մասին» Հայաստանի Հանրապետության օրենքի 5-րդ հոդվածի «զ» կետը` Հայաստանի Հանրապետության կառավարությունը որոշում է.

1. Հաստատել բուսական աշխարհի պետական կադաստրի վարման կարգը` համաձայն հավելվածի:

2. Բուսական աշխարհի պետական կադաստրի վարման լիազորությունները վերապահել Հայաստանի Հանրապետության շրջակա միջավայրի նախարարությանը:

(2-րդ կետը փոփ. 10.10.19 N 1442-Ն)

3. Հայաստանի Հանրապետության բնապահպանության նախարարին` վեցամսյա ժամկետում`

1) սահմանված կարգով Հայաստանի Հանրապետության կառավարության հաստատմանը ներկայացնել`

ա. Հայաստանի Հանրապետության բուսական աշխարհի պետական կադաստրի զարգացման 2010-2015 թվականների համալիր ծրագիրը,

բ. բուսական աշխարհի պետական կադաստրի տվյալների տրամադրման կարգը.

2) հաստատել բուսական աշխարհի պետական կադաստրի վարման մեթոդական ուղեցույցը։

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Տ. Սարգսյան
2008 թ. դեկտեմբերի 11 Երևան

Հավելված ՀՀ կառավարության 2008 թվականի նոյեմբերի 13-ի N 1440-Ն որոշման

Կ Ա Ր Գ

ԲՈՒՍԱԿԱՆ ԱՇԽԱՐՀԻ ՊԵՏԱԿԱՆ ԿԱԴԱՍՏՐԻ ՎԱՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետության տարածքի բուսական աշխարհի պետական կադաստրի վարման կարգը:

2. Բուսական աշխարհի պետական կադաստրը (այսուհետ` պետական կադաստր) բուսական աշխարհի օբյեկտների իրավական ռեժիմի քանակական ու որակական բնութագրերի, վիճակի, բնապահպանական, մշակութային և տնտեսական արժեքների, հանրապետական ու մարզային տարածվածության, պաշարների և օգտագործման մասին տեղեկությունների ու փաստաթղթերի համակարգ է:

3. Պետական կադաստրի վարումը նպատակ ունի բացահայտելու բուսական տեսակների և համակեցությունների, դրանց աճելավայրերի քանակական և որակական փոփոխությունները:

4. (կետն ուժը կորցրել է 10.10.19 N 1442-Ն) 

5. Պետական կադաստրի վարման համար կարող են օգտագործվել գիտական ուսումնասիրությունների, պետական հաշվառման և մոնիթորինգի, բուսական պաշարների օգտագործման մասին պայմանագրերի և այլ տվյալներ:

6. Պետական կադաստրը վարվում է Հայաստանի Հանրապետության պետական բյուջեի միջոցների և Հայաստանի Հանրապետության օրենսդրությամբ չարգելված այլ ֆինանսական միջոցների հաշվին:

7. Պետական կադաստրը կազմված է հետևյալ բաժիններից`

1) Հայաստանի Հանրապետության տարածքի վայրի բույսերի տեսակային բազմազանություն (ստորակարգ, բարձրակարգ բույսեր և սնկեր).

2) բուսական աշխարհի օգտագործում.

3) բուսական աշխարհի պահպանություն, վերարտադրություն։

8. Սույն կարգի 7-րդ կետով սահմանված պետական կադաստրի բաժինները ներառում են բուսական տեսակի մասին հետևյալ տեղեկատվությունը`

1) կարգաբանական պատկանելությունը և գիտական անվանումը (հայերեն, լատիներեն), կարգավիճակը` Հայաստանի Հանրապետության կարմիր գրքի և Բնության պահպանության միջազգային միության (IUCN) դասակարգումը.

2) բուսատեսակի տարածվածությունը` աշխարհագրական և վարչատարածքային.

3) աճելավայրը` տվյալ բուսատեսակի աճելավայրի էկոհամակարգային նկարագիրը և բնորոշ ուղեկցող բուսատեսակները.

4) արժեքները` բուսատեսակի բնապահպանական, գիտական, մշակութային և տնտեսական արժեքները.

5) պաշարը` աշխարհագրական որոշակի տարածքում օգտագործման ենթակա քանակությունը.

6) քաղաքացիներին և իրավաբանական անձանց օգտագործման տրված վայրի բույսերը (օգտագործման իրավունքի և տեսակի, թույլատրված ու փաստացի).

7) պոպուլյացիայի վիճակը, սպառնալիքները.

8) տեսակի պահպանության ու կայուն օգտագործման միջոցառումները` առկա և նախատեսվող.

9) տեղեկատվության սկզբնաղբյուրը:

II. ՊԵՏԱԿԱՆ ԿԱԴԱՍՏՐԻ ՎԱՐՄԱՆ ԿԱՐԳԸ

9. Պետական կադաստրի վարման տարեկան ծրագրերն օրենքով սահմանված կարգով մշակում է լիազոր մարմինը:

10. Պետական կադաստրի տվյալները գրանցվում են գրանցամատյանում, որի օրինակելի ձևը հաստատվում է լիազոր մարմնի կողմից:

11. Պետական կադաստրում տվյալների գրանցումը մշտապես իրականացվող գործընթաց է, որն ապահովում է տվյալների համալրումը, դասակարգումը, պահպանումը և փոփոխությունների օպերատիվ մուտքագրումը:

12. Պետական կադաստրի վարման գրանցամատյաններում ներառվում են նաև բուսական աշխարհի պետական հաշվառման տվյալները: Բուսական աշխարհի պետական հաշվառումն իրականացվում է պարբերաբար` ոչ ուշ, քան յուրաքանչյուր տասը տարին մեկ անգամ:

13. Պետական կադաստրի վարման գրանցամատյանները վարվում են ինչպես փաստաթղթային, այնպես էլ էլեկտրոնային ձևով, որոնց վարման ժամանակ պետք է ապահովվի դրանց համադրելիությունը: Փաստաթղթային և էլեկտրոնային կրիչների միջև տվյալների տարբերության դեպքում հիմք է ընդունվում փաստաթղթային տարբերակը:

14. Պետական կադաստրի վարման գրանցամատյաններում տվյալների մուտքագրումը և փոփոխությունն իրականացվում են դրանք ներկայացվելու օրվանից մեկ ամսվա ընթացքում:

15. Պետական կադաստր վարող լիազոր մարմինը ճշգրիտ մուտքագրում է բուսական աշխարհի հաշվառում և ուսումնասիրություններ իրականացնողների ներկայացրած փաստաթղթային և էլեկտրոնային տվյալները:

16. Սույն կարգի 8-րդ կետում նշված պետական կադաստրի ամփոփ տվյալները համարվում են պաշտոնական և կարող են հիմք հանդիսանալ պետական կառավարման ու տեղական ինքնակառավարման մարմինների համար` իրենց լիազորությունների սահմաններում որոշումներ ընդունելիս:

17. Պետական կադաստրի տվյալները կարող են տրամադրվել տեղեկանքների, հաշվետվությունների, գրաֆիկական և այլ նյութերի տեսքով:

18. Իրավաբանական անձինք և քաղաքացիները պետական կադաստրի մասին տեղեկատվություն ստանալու նպատակով դիմում են լիազոր մարմին:

(հավելվածը փոփ. 10.10.19 N 1442-Ն)

Հայաստանի Հանրապետության կառավարության աշխատակազմի ղեկավար

Դ. Սարգսյան