Հ Ա Մ Ա Ձ Ա Յ Ն Ա Գ Ի Ր

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՌՈՒՍԱՍՏԱՆԻ ԴԱՇՆՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԱՐԶԵՐԻ ՎԱՐՉԱԿԱԶՄԵՐԻ ԵՎ ՌՈՒՍԱՍՏԱՆԻ ԴԱՇՆՈՒԹՅԱՆ ՍՈՒԲՅԵԿՏՆԵՐԻ ՎԱՐՉԱԿԱԶՄԵՐԻ (ԿԱՌԱՎԱՐՈՒԹՅՈՒՆՆԵՐԻ) ՄԻՋԵՎ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության կառավարությունը և Ռուսաստանի Դաշնության կառավարությունը, այնուհետ` Կողմեր,

ելնելով իրավահավասար գործընկերության հարաբերությունների հետագա զարգացման անհրաժեշտությունից,

երկու պետությունների միջև գործող` տարբեր բնագավառներում համագործակցության զարգացմանը նպաստող միջազգային պայմանագրերին համապատասխան,

հաշվի առնելով Հայաստանի Հանրապետության մարզերի վարչակազմերի և Ռուսաստանի Դաշնության սուբյեկտների վարչակազմերի (կառավարությունների) միջև արդեն հաստատված բարեկամական հարաբերությունները,

նպատակ ունենալով ամրապնդել Հայաստանի Հանրապետության մարզերի վարչակազմերի և Ռուսաստանի Դաշնության սուբյեկտների վարչակազմերի (կառավարությունների) միջև փոխըմբռնումը,

համաձայնեցին ներքոհիշյալի մասին

Հոդված 1

Սույն Համաձայնագրում օգտագործվող հասկացությունները նշանակում են հետևյալը՝

«Հայաստանի Հանրապետության մարզերի վարչակազմեր» - Հայաստանի Հանրապետության մարզերի և Երևան քաղաքի վարչակազմեր,

«Ռուսաստանի Դաշնության սուբյեկտների վարչակազմեր (կառավարություններ)» - Ռուսաստանի Դաշնության հանրապետությունների, երկրամասերի, մարզերի, դաշնային նշանակության քաղաքների, ինքնավար մարզերի, ինքնավար երկրամասերի պետական իշխանության բարձրագույն գործադիր մարմիններ,

«իրավասու մարմիններ» - հայկական Կողմի համար` Հայաստանի Հանրապետության արտաքին գործերի նախարարություն, ռուսական Կողմի համար՝ Ռուսաստանի Դաշնության արտաքին գործերի նախարարություն:

Հոդված 2

Կողմերը կնպաստեն Հայաստանի Հանրապետության մարզերի վարչակազմերի և Ռուսաստան Դաշնության սուբյեկտների վարչակազմերի (կառավարությունների) միջև երկկողմ համագործակցության զարգացմանը:

Հոդված 3

1. Հայաստանի Հանրապետության մարզերի վարչակազմերը և Ռուսաստանի Դաշնության սուբյեկտների վարչակազմերը (կառավարությունները) իրենց իրավասության մեջ մտնող հարցերով կարող են կարող են համաձայնագրեր կնքել: Այդ համաձայնագրերը միջազգային պայմանգրեր չեն, դրանց կնքման կարգը չպետք է հակասի Հայաստանի Հանրապետության և Ռուսաստանի Դաշնության ազգային օրենսդրությանը և միջազգային պայմանագրերին:

2. Հայաստանի Հանրապետության մարզերի վարչակազմերը և Ռուսաստանի Դաշնության սուբյեկտների վարչակազմերը (կառավարությունները) կկատարեն իրենց միջև կնքված համաձայնագրերը` համաձայն իրենց պետությունների ազգային օրենսդրության:

Հոդված 4

Հայաստանի Հանրապետության մարզերի վարչակազմերի և Ռուսաստանի Դաշնության սուբյեկտների վարչակազմերի (կառավարությունների) միջև համաձայնագրերը կատարելիս ծագող վեճերը կլուծվեն խորհրդակցությունների և բանակցությունների ճանապարհով, իսկ  համաձայնության չհասնելու դեպքում՝ դատական կարգով՝ կնքված համաձայնագրերի դրույթներին համապատասխան:

Հոդված 5

1. Հայաստանի Հանրապետության մարզերի վարչակազմերի և Ռուսաստանի Դաշնության սուբյեկտների վարչակազմերի (կառավարությունների) միջև համաձայնագրերի առարկա չեն կարող լինել արտաքին քաղաքականության, պաշտպանության, օդային հաղորդակցության բնագավառներին վերաբերող հարցերը և այլ հարցեր, որոնք գտնվում են Հայաստանի Հանրապետության և Ռուսաստանի Դաշնության տնօրինության ներքո և շոշափում են նրանց պետական ինքնիշխանությունը և տարածքային ամբողջականությունը:

 2. Հայաստանի Հանրապետության մարզերի վարչակազմերը և Ռուսաստանի Դաշնության սուբյեկտների վարչակազմերը (կառավարությունները) իրավունք չունեն կատարել փոփոխություններ Հայաստանի Հանրապետության և Ռուսաստանի Դաշնության միջազգային պայմանագրերում (միջպետական, միջկառավարական պայմանագրերում և միջգերատեսչական բնույթի պայմանագրերում) կամ արտահայտել դրանց վերաբերյալ հատուկ կարծիք:

Հոդված 6

Սույն Համաձայնագրի ուժի մեջ մտնելուց հետո Կողմերի իրավասու մարմինները տեղեկացնում են միմյանց Հայաստանի Հանրապետության մարզերի վարչակազմերի և Ռուսաստանի Դաշնության սուբյեկտների վարչակազմերի (կառավարությունների) միջև կնքված համաձայնագրերի մասին:

Հոդված 7

Սույն Համաձայնագրում Կողմերի փոխադարձ համաձայնությամբ կարող են կատարվել փոփոխություններ և լրացումներ, որոնք կձևակերպվեն առանձին արձանագրություններով:

Հոդված 8

Սույն Համաձայնագրի կիրառման կամ մեկնաբանման հետ կապված վիճելի հարցերը Կողմերի միջև կլուծվեն խորհրդակցությունների և բանակցությունների միջոցով:

Հոդված 9

Սույն Համաձայնագիրն ուժի մեջ է մտնում Համաձայնագրի ուժի մեջ մտնելու համար անհրաժեշտ ներպետական ընթացակարգերը Կողմերի կատարելու մասին վերջին գրավոր ծանուցման օրվանից: Այն ուժի մեջ կմնա մինչև վեց ամիս լրանալը Կողմերից մեկի՝ Համաձայնագրի գործողությունը դադարեցնելու մտադրության մասին մյուս Կողմին գրավոր ծանուցելու օրվանից:

Կատարված է Երևան քաղաքում 2001 թվականի սեպտեմբերի 15-ին՝ երկու բնօրինակով, յուրաքանչյուրը՝ հայերեն և ռուսերեն, ընդ որում երկու տեքստն էլ հավասարազոր են:

Համաձայնագիրն ուժի մեջ է մտել 2002 թվականի հունվարի 9-ից:

Ծ Ր Ա Գ Ի Ր

Մինչև 2010 թվականի Հայաստանի Հանրապետության և Ռուսաստանի Դաշնության երկարաժամկետ տնտեսական համագործակցության մասին

Հայաստանի Հանրապետության և Ռուսաստանի Դաշնության միջև (այսուհետ՝ Կողմեր) տնտեսական հարաբերությունների զարգացումը պայմանավորված է պատմականորեն ձևավորված սերտ և բազմակողմ արտադրական և գիտատեխնիկական կապերով, համատեղ ռազմավարական շահերով:

Հայաստանի Հանրապետության և Ռուսաստանի Դաշնության միջև մինչև 2010 թվականի երկարաժամկետ տնտեսական համագործակցության Ծրագիրը (այսուհետև՝ Ծրագիր) մշակված է՝ ելնելով 1997 թվականի օգոստոսի 29-ի «Հայաստանի Հանրապետության և Ռուսաստանի Դաշնության միջև բարեկամության, համագործակցության և փոխօգնության մասին» Պայմանագրի և 2000 թվականի սեպտեմբերի 26-ի «Հայաստանի Հանրապետության և Ռուսաստանի Դաշնության միջև 21-րդ դար ուղղված դաշնակցային փոխգործակցության մասին» Հռչակագրի դրույթներից:

1. Ծրագրի հիմնական նպատակները և խնդիրները

Ծրագիրը մշակված է Կողմերի տնտեսավարող սուբյեկտների փոխգործողության հաստատման և խորացման նպատակով, դրա հիման վրա Կողմերի միջև առևտրատնտեսական հարաբերություններում նկատելի առաջընթացի և ապրանքաշրջանառության աճի ապահովման համար:

Ծրագրում նախանշված նպատակները իրագործվում են հետևյալ ճանապարհներով.

երկու երկրների տնտեսության կառուցվածքային վերակառուցման նկատմամբ հայեցակարգային մոտեցումների մերձեցում,

Կողմերի տնտեսավարող սուբյեկտների գործունեության հավասար հնարավորությունների և երաշխիքների ստեղծման համար ինստիտուցիոնալ վերափոխումների համակարգում,

համագործակցության հաստատում անօրինական ճանապարհով ստացված եկամուտների լեգալիզացմանը (լվացման) հակազդելու բնագավառում,

միջպետական և տարածաշրջանային համագործակցության զարգացման առաջնային ուղղությունների հստակեցում, այդ ուղղություններով դրանց պետական աջակցության համակարգի ստեղծում,

նպատակային միջպետական նախագծերի և տնտեսական համագործակցության ծրագրերի, ինչպես նաև դրանց իրականացման համար ինտեգրացված ենթակառուցվածքների ձևավորում,

ձեռնարկությունների արտադրական կոոպերացիայի հետագա զարգացում,

արտաքին առևտրի քաղաքականության և երրորդ երկրների շուկաներում արտաքին առևտրային գործունեության համակարգման մեխանիզմի ստեղծում,

չվճարումների և փոխադարձ պարտքերի մարման խնդրի լուծում, առևտրավճարային հարաբերությունների ներդաշնակեցման ապահովում,

մաքսային գործունեության տարբեր ոլորտներում մաքսային գերատեսչությունների համագործակցության հստակ ձևերի սահմանում,

բարեխիղճ մրցակցության չափանիշների համաձայնեցում, անբարեխիղճ գործողությունների դադարեցման և վնասի փոխհատուցման պահանջների ներկայացման կարգի սահմանում,

համագործակցություն ֆոնդային շուկաների և ապահովագրական ծառայությունների շուկայի զարգացման բնագավառում:

2. Տնտեսական և ֆինանսական համագործակցության զարգացում

Ծրագրով նախատեսվում է առաջնահերթ միջոցների շարքում իրականացնել նորմատիվաիրավական դաշտի ներդաշնակեցում և միասնականացում փոխադարձ հետաքրքրություն ներկայացնող հարցերում Կողմերի տնտեսավարող սուբյեկտների փոխգործողության համար նպաստավոր պայմանների ստեղծման նպատակով:

Հիմնական ուշադրություն է դարձվելու օրենսդրության ներդաշնակեցմանը այն ոլորտներում, որոնք կանոնակարգում են վարկային կազմակերպությունների գործունեությունը, ֆինանսական ինստիտուտների համագործակցության զարգացումը, համատեղ ձեռնարկությունների ստեղծումը, գնային քաղաքականության կանոնակարգումը, փոխադարձ ներդրումների և արտադրական կոոպերացիայի պաշտպանության պայմանները, առևտրային վեճերի լուծման միասնական կանոնների ձևավորումը, սպառողական ապրանքների և ծառայությունների շուկայի իրավիճակի համատեղ տեղեկատվական համակարգի ստեղծումը:

Նախատեսվում է իրականացնել միջոցառումներ արտաքին առևտրի մաքսային վիճակագրության ոլորտում տեղեկատվական փոխգործունեության ընդլայնման և մեթոդաբանության համաձայնեցման, մաքսային ընթացակարգերի կատարելագործման, ստանդարտացման, չափումների միասնականության ապահովման, արտադրանքների և ծառայությունների նորմատիվ պահանջներին համապատասխանության հաստատման նպատակով:

Նախատեսվում է առանձնացնել համագործակցության առաջնային ուղղությունները գործունեության առանձին ոլորտներում, այդ թվում՝ փոխշահավետ միջճյուղային համագործակցություն վառելիքաէներգետիկ և ռազմաարդյունաբերական համալիրների, գունավոր մետալուրգիայի, շինարարության, կապի և տեղեկատվության, թեթև արդյունաբերության բնագավառներում:

3. Ծրագրի իրագործման ղեկավարումը

Ծրագրի իրագործման նպատակով Հայաստանի Հանրապետության և Ռուսաստանի Դաշնության միջև տնտեսական հարցերով միջկառավարական հանձնաժողովը, որը կազմավորվել է «Հայաստանի Հանրապետության կառավարության և Ռուսաստանի Դաշնության կառավարության միջև 1995-1996թթ. առևտրատնտեսական համագործակցության մասին» 1996 թվականի մայիսի 28-ի Համաձայնագրի 7-րդ հոդվածին համապատասխան (այսուհետ՝ Միջկառավարական հանձնաժողով), կհաստատի Ծրագրին կից միջոցառումները (այսուհետ՝ Միջոցառումներ):

Միջոցառումները պարունակում են առաջարկների մշակումներ Հայաստանի Հանրապետության և Ռուսաստանի Դաշնության երկարաժամկետ համագործակցության հեռանկարային նախագծերի և հարցերի, այդ թվում՝ Կողմերի տնտեսավարող սուբյեկտների փոխգործողության բնագավառում:

Միջկառավարական հանձնաժողովը իր նիստերի ընթացքում իրականացնում է Ծրագրի և Միջոցառումների կատարման ուսումնասիրություն:

Միջկառավարական հանձնաժողովը.

համակարգում է Ծրագիրը և Միջոցառումները իրականացնող պետական մարմինների գործունեությունը, հսկում է միջոցառումների կատարումը,

անհրաժեշտության դեպքում Ծրագրում և Միջոցառումներում առաջարկում է համապատասխան փոփոխություններ կատարել,

կազմակերպում է Ծրագրի և Միջոցառումների իրականացման հետ կապված միջկառավարական համաձայնագրերի նախագծերի նախապատրաստումը, իրականացնում է հսկողություն փոխադարձ համագործակցության հեռանկարային ուղղություններում համատեղ նախագծերի և ծրագրերի իրագործման նկատմամբ:

Ծրագրով և Միջոցառումներով նախանշված համագործակցության հարցերի և նախագծերի մշակման համար Միջկառավարական հանձնաժողովը կարող է ստեղծել մշտական կամ ժամանակավոր բնույթի աշխատանքային խմբեր:

Աշխատանքային խմբերը Ծրագրի և Միջոցառումների իրագործումը իրականացնում են հետևյալ ճանապարհներով.

Ծրագրի և Միջոցառումների համապատասխան բաժինների իրագործման համակարգում և մոնիտորինգ՝ աշխատանքային խմբերի ազգային մասերի մակարդակով,

Ծրագրի և Միջոցառումների բաժինների կատարման արդյունքների հիման վրա համաձայնեցված առաջարկների ձևավորում՝ անհրաժեշտության դեպքում միջկառավարական մակարդակով քննարկելու և որոշում ընդունելու համար,

Ծրագրի և Միջոցառումների կատարման իրագործման և համակարգման հարցերին առնչվող միջկառավարական և միջգերատեսչական պայմանագրերի և համաձայնագրերի նախագծերի նախապատրաստման կազմակերպում,

Միջկառավարական հանձնաժողովի նիստի ժամանակ համագործակցության իրավիճակի մասին ամենամյա զեկույցների նախապատրաստում՝ դրա հետագա զարգացման և կատարելագործման առաջարկներով:

Ծրագրի և Միջոցառումների իրականացման հետ կապված ծախսերի ֆինանսավորումը կատարվում է Կողմերի շահագրգիռ տնտեսավարող սուբյեկտների հաշվին: