«Վավերացնում եմ»
Հայաստանի Հանրապետության
Նախագահ Ռ. Քոչարյան
15 մարտի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

5 օգոստոսի 2004 թվականի N 229-Ա
                                                                                
«ՇԻՆԱՐԱՐՈՒԹՅՈՒՆ, ԲԱՐԵԿԱՐԳՈՒՄ» ՊԵՏԱԿԱՆ ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆԻՑ ԳՈՒՅՔ ԱՌԱՆՁՆԱՑՆԵԼՈՒ ԵՎ ՄԱՍՆԱՎՈՐԵՑՆԵԼՈՒ ՄԱՍԻՆ

Ղեկավարվելով «Պետական գույքի մասնավորեցման (սեփականաշնորհման) մասին» Հայաստանի Հանրապետության օրենքի 3-րդ և 23-րդ հոդվածներով` Հայաստանի Հանրապետության կառավարությունը որոշում է.

1. «Շինարարություն, բարեկարգում» պետական փակ բաժնետիրական ընկերության գույքի կազմից Հայաստանի Հանրապետության օրենսդրությամբ սահմանված կարգով առանձնացնել Թբիլիսյան խճուղու և Քանաքեռ ՀԷԿ-ի ջրամբարի միջև գտնվող` 6.5 հեկտար մակերես ունեցող հողատարածքի վրա տեղակայված` 866773 դրամ (այդ թվում` ավելացված արժեքի հարկը) հաշվեկշռային արժեք ունեցող «Մանկական ավտոքաղաք» անավարտ շինարարության օբյեկտը (այսուհետ` օբյեկտ):

2. Սույն որոշման 1-ին կետով առանձնացված և Հայաստանի Հանրապետության կառավարության 1998 թվականի մարտի 27-ի N 209 որոշմամբ սահմանված կարգով 86276 հազ. դրամ գնահատված արժեք ունեցող օբյեկտն ուղղակի վաճառքի ձևով մասնավորեցնել «Վեմ» բարեգործական հասարակական կազմակերպությանը (այսուհետ` գնորդ):

3. Սահմանել մասնավորեցվող օբյեկտի գինը` մեկ ԱՄՆ-ի դոլարին համարժեք դրամ:

4. Սահմանել, որ գնորդը պարտավոր է`

ա) «Վեմ» մարդասիրական կենտրոն» ծրագրով մինչև 2009 թվականի վերջը կատարել 2533 հազ. ԱՄՆ-ի դոլարին համարժեք դրամի չափով ներդրում, այդ թվում`

նախագծային, արտաքին կոմունիկացիաների տեխնիկական պայմանների ապահովման, փորձաքննական և այլ աշխատանքներ` 108 հազ. ԱՄՆ-ի դոլար,

առանձնատնային լուծումներով մանկատան համալիրի կառուցում` նախատեսված դպրոցական տարիքի 100 երեխայի համար` 625 հազ. ԱՄՆ-ի դոլար,

արտադրական միավորներից բաղկացած` հաշմանդամների վերականգնողական կենտրոնի համալիրի կառուցում` 500 հազ. ԱՄՆ-ի դոլար,

բնակարանատիպ ծերանոցային համալիրի կառուցում` նախատեսված 100 ծերի համար` 750 հազ. ԱՄՆ-ի դոլար,

ինժեներական ենթակառուցվածքներ` ջրամատակարարում, ոռոգման ցանց, կաթսայատուն և ջեռուցման համակարգ, գազամատակարարում, էլեկտրամատակարարում, կապ, բարեկարգում, ցանկապատում և այլ աշխատանքներ` 550 հազ. ԱՄՆ-ի դոլար.

բ) իր միջոցների հաշվին վճարել անշարժ գույքի մասնավորեցումից ծագող գույքային իրավունքների պետական գրանցման հետ կապված վճարներն ու տուրքերը:

5. Գնորդի կողմից պայմանագրով ստանձնած պարտավորությունների կատարումն ապահովելու նպատակով սահմանել, որ մասնավորեցման օբյեկտը համարվում է գրավադրված և գնորդի կողմից ստանձնվող պարտավորությունների չկատարման դեպքում վերադարձվում է Հայաստանի Հանրապետությանը` առանց կատարված ծախսերի հատուցման:

6. Հայաստանի Հանրապետության կառավարությանն առընթեր պետական գույքի կառավարման վարչության պետին` սույն որոշման 3-րդ կետով սահմանված վճարման կատարումից հետո մեկամսյա ժամկետում գնորդի հետ կնքել գույքի մասնավորեցման և մասնավորեցման օբյեկտի գրավադրման մասին պայմանագրեր:

Գույքի մասնավորեցման պայմանագրում ամրագրել պայմանագրի դադարեցման պահանջ` սույն որոշման 4-րդ կետի «ա» ենթակետով նախատեսված ներդրումային պարտականությունները չկատարելու դեպքում:

7. Երևանի քաղաքապետին` սույն որոշման 6-րդ կետով սահմանված պայմանագրերի կնքումից հետո գնորդի հետ կնքել 6.5 հեկտար հողատարածքի անհատույց օգտագործման պայմանագիր: