ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԽՈՐՀՈՒՐԴ

Ո Ր Ո Շ ՈՒ Մ

20 դեկտեմբերի 2017 թվականի

թիվ 94

քաղ. Մոսկվա

ԵՎՐԱՍԻԱԿԱՆ ՏՆՏԵՍԱԿԱՆ ՄԻՈՒԹՅԱՆ ԱՆԴԱՄ ՊԵՏՈՒԹՅՈՒՆՆԵՐԻ ԱԶԳԱՅԻՆ ՏՆՏԵՍՈՒԹՅԱՆ ՃՅՈՒՂԻՆ ԵՎՐԱՍԻԱԿԱՆ ՏՆՏԵՍԱԿԱՆ ՄԻՈՒԹՅԱՆ ՄՅՈՒՍ ԱՆԴԱՄ ՊԵՏՈՒԹՅԱՆ ԿՈՂՄԻՑ ՀԱՏՈՒԿ ՍՈՒԲՍԻԴԻԱ ՏՐԱՄԱԴՐԵԼՈՒ ՀԵՏԵՎԱՆՔՈՎ ՆՅՈՒԹԱԿԱՆ ՎՆԱՍ ՀԱՍՑՆԵԼՈՒ ՎՏԱՆԳԻ ԱՌԿԱՅՈՒԹՅԱՆ ԱՌՈՒՄՈՎ ՎԵՐԼՈՒԾՈՒԹՅՈՒՆ ԱՆՑԿԱՑՆԵԼՈՒ ԿԱՐԳԻ ՄԱՍԻՆ

I. Ընդհանուր դրույթներ

1. Սույն կարգը մշակվել է «Եվրասիական տնտեսական միության անդամ պետությունների կողմից արդյունաբերական ապրանքների նկատմամբ հատուկ սուբսիդիաները Եվրասիական տնտեսական հանձնաժողովի հետ կամավոր համաձայնեցնելու և Եվրասիական տնտեսական միության անդամ պետությունների կողմից հատուկ սուբսիդիաների տրամադրման հետ կապված՝ Եվրասիական տնտեսական հանձնաժողովի կողմից քննություն անցկացնելու կարգի մասին» 2017 թվականի մայիսի 26-ի համաձայնագրի (այսուհետ՝ Համաձայնագիր) 9-րդ հոդվածի 4-րդ և 5-րդ կետերի իրագործումն ապահովելու նպատակով, և դրանով սահմանվում է Եվրասիական տնտեսական միության անդամ պետությունների (այսուհետ՝ համապատասխանաբար Միություն, անդամ պետություն) ազգային տնտեսության ճյուղին մյուս անդամ պետության կողմից հատուկ սուբսիդիա տրամադրելու հետևանքով նյութական վնաս հասցնելու առկայության առումով վերլուծություն (այսուհետ՝ վերլուծություն) անցկացնելու կարգը:

2. Սույն կարգում օգտագործվող հասկացությունները կիրառվում են Համաձայնագրով և «Արդյունաբերական սուբսիդիաներ տրամադրելու միասնական կանոնների մասին» արձանագրությամբ («Եվրասիական տնտեսական միության մասին» 2014 թվականի մայիսի 29–ի պայմանագրի թիվ 28 հավելված) (այսուհետ՝ Արձանագրություն) սահմանված իմաստներով:

3. Վերլուծությունն անցկացվում է հատուկ սուբսիդիայի նկատմամբ, որի՝ Համաձայնագրի II բաժնին համապատասխան համաձայնեցման արդյունքներով պարզվել է, որ այդ սուբսիդիան չի համապատասխանում Համաձայնագրի 10-րդ հոդվածով նախատեսված՝ հատուկ սուբսիդիայի անթույլատրելիության չափանիշներին, և չի համապատասխանում Համաձայնագրի 11-րդ հոդվածով նախատեսված՝ հատուկ սուբսիդիայի թույլատրելիության չափանիշներից ոչ մեկին:

4. Վերլուծություն անցկացնելիս օգտագործվում է.

ա) անդամ պետությունների լիազորված մարմինների կողմից Եվրասիական տնտեսական հանձնաժողով (այսուհետ՝ Հանձնաժողով) ներկայացված տեղեկատվությունը.

բ) անդամ պետությունների նորմատիվ իրավական ակտերի պաշտոնական հրապարակման ազգային աղբյուրներում տեղադրված տեղեկատվությունը.

գ) այլ տեղեկատվություն:

5. Վերլուծությունն անցկացվում է Հանձնաժողովի կառուցվածքային ստորաբաժանման կողմից (այսուհետ՝ դեպարտամենտ), որն ապահովում է Հանձնաժողովի գործունեությունը՝ Միության շրջանակներում արդյունաբերական քաղաքականության և արդյունաբերական սուբսիդիաների ոլորտում:

6. Վերլուծության անցկացումը հիմնվում է հետևյալ հիմնարար սկզբունքների վրա.

ա) անկախության սկզբունք՝ վերլուծության արդյունքները ձևավորվում են Հանձնաժողովի՝ անդամ պետությունների պետական իշխանության մարմիններից անկախ, միջազգային ծառայողների գնահատականների միջոցով.

բ) անկողմնակալության սկզբունք՝ վերլուծության արդյունքներն արտացոլում են հետազոտվող ոլորտում գործերի վիճակը և կախված չեն վերլուծություն անցկացնող անձանց սուբյեկտիվ կարծիքից.

գ) օրինականության սկզբունք՝ վերլուծությունը հիմնվում է սույն կարգի, Համաձայնագրի և Արձանագրության դրույթների վրա:

II. Վերլուծություն անցկացնելու համար տեղեկատվության հավաքագրումը

7. Անդամ պետության լիազորված մարմինը, որը Հանձնաժողովին հայտ (այսուհետ՝ հայտ) է ներկայացրել հատուկ սուբսիդիայի՝ Համաձայնագրի II բաժնին համապատասխան համաձայնեցման մասին, Համաձայնագրի 10-րդ հոդվածով նախատեսված անթույլատրելիության չափանիշներին ինչպես նաև Համաձայնագրի 11-րդ հոդվածով նախատեսված չափանիշներից ոչ մեկին այդպիսի սուբսիդիայի չհամապատասխանելու հարցը Հանձնաժողովի կոլեգիայի նիստի ընթացքում քննարկելուց հետո իրավունք ունի դիմելու Հանձնաժողով՝ վերլուծություն անցկացնելու առաջարկությամբ (այսուհետ՝ դիմում):

Դիմումը լրացվում է անդամ պետության լիազորված մարմնի կողմից՝ սույն կարգին համապատասխան, ռուսերենով, էլեկտրոնային տպիչ սարքերի օգտագործմամբ:

Եթե դիմումի մեջ առկա է գաղտնի տեղեկատվություն, ապա այն ներկայացվում է 2 տարբերակով՝ գաղտնի և ոչ գաղտնի։

Ոչ գաղտնի տարբերակը պետք է լինի բավականին մանրամասն՝ գաղտնի տարբերակով ներկայացված տեղեկատվության էությունը հասկանալու համար։

Դիմումի մեջ շարադրված տեղեկատվությունը պետք է լինի արժանահավատ և ուղեկցվի դրա ստացման աղբյուրին կատարվող հղումով:

8. Դիմումի մեջ նշվում են՝

ա) տեղեկություններ անդամ պետության՝ Հանձնաժողով դիմում ներկայացրած լիազորված մարմնի վերաբերյալ (լիազորված մարմնի անվանումը, լիազորված կոնտակտային անձի Ա.Ա.Հ.-ն, հեռախոսի (ֆաքսի) համարը, էլեկտրոնային փոստի հասցեն).

բ) այն ապրանքի անվանումը և նկարագրությունը, որի համար տրամադրվում է կամ պլանավորվում է տրամադրել հատուկ սուբսիդիա (այդ թվում՝ նշելով Եվրասիական տնտեսական միության արտաքին տնտեսական գործունեության միասնական ապրանքային անվանացանկի ծածկագիրը՝ 10 նիշի մակարդակով, տեղեկություններ ապրանքի արտաքին տեսքի, ֆիզիկական հատկությունների, ապրանքի արտադրության ժամանակ օգտագործվող հումքի և նյութերի, քիմիական կազմերի վերաբերյալ, տեղեկատվություն արտադրական գործընթացի (արտադրության տեխնոլոգիայի), հիմնական սպառողների, ապրանքի նշանակության մասին, տեղեկատվություն՝ այն ստանդարտների նկարագրությամբ, որոնց գործողությունը տարածվում է ապրանքի արտադրության վրա, ինչպես նաև ապրանքի տարատեսակների նկարագրությամբ և ապրանքի ճշգրիտ ու ամբողջական նկարագրության համար անհրաժեշտ այլ տեղեկատվություն).

գ) նորմատիվ իրավական ակտերի կամ նորմատիվ իրավական ակտերի նախագծերի ցանկը, որոնց հիման վրա տրամադրվում է կամ պլանավորվում է տրամադրել հատուկ սուբսիդիա.

դ) տեղեկություններ հատուկ սուբսիդիա տրամադրելու ձևի, չափի, պայմանների, չափանիշների և տրամադրման եղանակի մասին.

ե) տեղեկություններ հատուկ սուբսիդիա ստացողների (հնարավոր ստացողների) մասին.

զ) տեղեկություններ յուրաքանչյուր անդամ պետության տարածք սուբսիդավորվող ապրանքի արտահանման ծավալների մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

է) տեղեկություններ անդամ պետությունների շուկաներում սուբսիդավորվող ապրանքի գների մակարդակի մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ը) տեղեկություններ սուբսիդավորվող ապրանքի ինքնարժեքի մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

թ) տեղեկություններ դիմումատու անդամ պետության շուկայում նույնանման ապրանքի գների մակարդակի մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ժ) տեղեկություններ դիմումատու անդամ պետության տարածք յուրաքանչյուր անդամ պետության տարածքից նույնանման ապրանքի ներմուծման ծավալների մասին՝ դիմումը ներկայացնելու օրվան նախորդող առնվազն 3 տարվա համար.

ժա) տեղեկություններ արտադրողի մոտ առկա սուբսիդավորվող ապրանքի պաշարների մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ժբ) տեղեկություններ արտադրական հզորությունների և դրանց ծանրաբեռնվածության աստիճանի մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ժգ) տեղեկություններ սուբսիդավորվող ապրանքի արտադրության ծավալների մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ժդ) տեղեկություններ դիմումատու անդամ պետության տարածքում սուբսիդավորվող ապրանքի իրացման ծավալների մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ժե) տեղեկություններ դիմումատու անդամ պետությունից սուբսիդավորվող ապրանքը երրորդ երկրներ արտահանելու մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ժզ) հատուկ սուբսիդիա տրամադրելու անհրաժեշտության նկարագրությունը, այդ թվում՝ տեղեկություններ անդամ պետությունների արտադրողների միջև մրցակցության վրա այդպիսի սուբսիդիայի ազդեցության մասին.

ժէ) տեղեկություններ սուբսիդավորվող ապրանքի արտադրությանը և (կամ) իրացմանն ուղղված ներդրումների ծավալի մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ժը) տեղեկություններ սուբսիդավորվող ապրանքի արտադրության գործընթացում զբաղված անձնակազմի աշխատանքի արտադրողականության և թվի մասին (ներառյալ տեղեկություններ անձնակազմի աշխատավարձի մակարդակի մասին)՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում).

ժթ) տեղեկություններ անդամ պետությունների շուկաներում իրացված սուբսիդավորվող ապրանքի արտադրության և վաճառքի շահութաբերության մասին՝ դիմումը ներկայացնելու օրվան նախորդող առնվազն 3 տարվա համար, ինչպես նաև հատուկ սուբսիդիայի գործողության պլանավորված ժամկետի համար՝ բաշխված ըստ տարիների, նաև ըստ սուբսիդիա ստացողների (տեղեկությունների առկայության դեպքում):

9. Դիմումի մեջ ընդգրկված արժեքային ցուցանիշները նշելիս համադրելիության նպատակով կիրառվում է Հանձնաժողովի կողմից՝ անդամ պետությունների արտաքին և փոխադարձ առևտրի վիճակագրություն վարելու համար սահմանված դրամական միավորը։

10. Դիմումի մեջ ընդգրկված տեղեկատվությունը պետք է նույնական լինի հայտում ընդգրկված տեղեկատվությանը (բացառությամբ սույն կարգի 8-րդ կետի «ա», «ե»-«է», «ժգ» և «ժե» ենթակետերով նախատեսված տեղեկատվության, որի մասով թույլ է տրվում չհամընկնում): Դիմումը նաև պետք է պարունակի Հանձնաժողով հայտ ներկայացնելու օրվանից մինչև Հանձնաժողով դիմում ներկայացնելու օրն ընկած ժամանակահատվածի համար թարմացված տեղեկատվություն:

Այն դեպքում, երբ դիմումի մեջ ընդգրկված տեղեկատվությունը նույնական չէ հայտում ընդգրկված տեղեկատվությանը, դեպարտամենտը՝ դիմումը Հանձնաժողովում գրանցելու օրվանից 5 աշխատանքային օրվանից ոչ ուշ դիմումատու անդամ պետության լիազորված մարմնին ծանուցում է վերլուծության անցկացումը մերժելու մասին:

Դիմումը կարող է հետ կանչվել դիմումատու անդամ պետության լիազորված մարմնի կողմից՝ մինչև դեպարտամենտի կողմից վերլուծություն անցկացնելու վերաբերյալ որոշում կայացնելը կամ վերլուծություն անցկացնելու ընթացքում:

11. Դիմումը ներկայացնելու օր է համարվում Հանձնաժողովում դրա գրանցման օրը:

12. Վերլուծություն անցկացնելու նպատակով դեպարտամենտը՝ դիմումը Հանձնաժողովում գրանցելու օրվանից 5 աշխատանքային օրվա ընթացքում ուսումնասիրում է դրանում ներկայացված տեղեկատվության բավարար լինելը: Նշված տեղեկատվությունն ամբողջ ծավալով ներկայացված լինելու դեպքում դեպարտամենտը դիմումն ստանալու վերաբերյալ տեղեկացնում է մյուս անդամ պետությունների լիազորված մարմիններին (կցելով դիմումի պատճենը կամ դիմումի ոչ գաղտնի տարբերակի պատճենը) և նրանց սույն կարգի 13-րդ կետով նախատեսված տեղեկատվության վերաբերյալ հարցում է ուղարկում: Այն ժամանակահատվածը, որի համար ներկայացվում է սույն կարգի 13-րդ կետով նախատեսված տեղեկատվությունը, սահմանվում է դեպարտամենտի կողմից՝ հաշվի առնելով սույն կարգի 22-րդ կետի երկրորդ պարբերության դրույթները:

Դիմումատու անդամ պետության լիազորված մարմնի կողմից սույն կարգի 8-րդ կետով նախատեսված տեղեկատվությունն ամբողջ ծավալով չներկայացվելու դեպքում և (կամ) դիմումատու անդամ պետության լիազորված մարմնի կողմից դիմումի ոչ գաղտնի տարբերակը չներկայացվելու դեպքում դեպարտամենտը՝ դիմումը Հանձնաժողովում գրանցելու օրվանից 5 աշխատանքային օրվանից ոչ ուշ, այդ լիազորված մարմին համապատասխան հարցում է ուղարկում:

Դիմումատու անդամ պետության լիազորված մարմինը ներկայացնում է պակասող տեղեկատվությունը և (կամ) դիմումի ոչ գաղտնի տարբերակը՝ համապատասխան հարցումն ստանալու օրվանից 15 աշխատանքային օրը չգերազանցող ժամկետում:

Դիմումատու անդամ պետության լիազորված մարմնի կողմից նշված ժամկետում պակասող տեղեկատվությունն ամբողջ ծավալով և (կամ) դիմումի ոչ գաղտնի տարբերակը չներկայացվելու դեպքում, դեպարտամենտն այդ ժամկետը լրանալու օրվանից 5 աշխատանքային օրվանից ոչ ուշ այդ լիազորված մարմնին տեղեկացնում է վերլուծությունն անցկացնելը մերժելու մասին:

13. Դեպարտամենտի հարցմամբ անդամ պետությունների լիազորված մարմինները (բացառությամբ դիմումատու անդամ պետության լիազորված մարմնի) ներկայացնում են.

ա) տեղեկություններ նույնանման ապրանքի ազգային արտադրողների վերաբերյալ (իրավաբանական անձի անվանումը, հասցեն, փոստային հասցեն), ինչպես նաև տեղեկություններ նույնանման ապրանքի վերաբերյալ՝ նույնանման ապրանքի արտաքին տեսքի, ֆիզիկական հատկությունների, նույնանման ապրանքի արտադրության ժամանակ օգտագործվող հումքի և նյութերի, քիմիական կազմերի վերաբերյալ, տեղեկատվություն արտադրական գործընթացի (արտադրության տեխնոլոգիայի), հիմնական սպառողների, ապրանքի նշանակության մասին, տեղեկատվություն՝ այն ստանդարտների նկարագրությամբ, որոնց գործողությունը տարածվում է նույնանման ապրանքի արտադրության վրա, նույնանման ապրանքի տարատեսակների նկարագրությամբ և նույնանման ապրանքի ճշգրիտ ու ամբողջական նկարագրության համար անհրաժեշտ այլ տեղեկատվություն, որն այդ թվում նաև ընդգրկում է անդամ պետության ազգային արտադրողների կողմից արտադրվող ապրանքի և սուբսիդավորվող ապրանքի նույնանման լինելու մասին եզրակացությունը.

բ) տեղեկություններ անդամ պետության տարածքում նույնանման ապրանքի արտադրության առկայության և ծավալի վերաբերյալ (քանակական և գնային արտահայտությամբ)՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների): Նշված ժամանակահատվածում անդամ պետության տարածքում նույնանման ապրանքի արտադրության բացակայության դեպքում անհրաժեշտ է ներկայացնել այդպիսի տեղեկատվություն.

գ) տեղեկություններ անդամ պետության տարածքից մյուս անդամ պետությունների տարածքներ նույնանման ապրանքի արտահանման ծավալների վերաբերյալ (քանակական և գնային արտահայտությամբ)՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների).

դ) տեղեկություններ անդամ պետության տարածք սուբսիդավորվող ապրանքի ներմուծման ծավալների վերաբերյալ (քանակական և գնային արտահայտությամբ)՝ դիմումը ներկայացնելու օրվան նախորդող առնվազն 3 տարվա համար.

ե) տեղեկություններ անդամ պետությունների շուկաներում նույնանման ապրանքի ինքնարժեքի և գների մակարդակի վերաբերյալ՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների).

զ) տեղեկություններ անդամ պետությունների շուկաներում նույնանման ապրանքի իրացումից ստացված շահույթի (վնասների) վերաբերյալ՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների):

է) տեղեկություններ նույնանման ապրանքի արտադրությանը և (կամ) իրացմանն ուղղված ներդրումների ծավալի վերաբերյալ՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների).

ը) տեղեկություններ արտադրողների մոտ առկա նույնանման ապրանքի պաշարների վերաբերյալ՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների).

թ) տեղեկություններ արտադրական հզորությունների և արտադրական հզորությունների ծանրաբեռնվածության աստիճանի վերաբերյալ՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների).

ժ) տեղեկություններ նույնանման ապրանքի արտադրության գործընթացում զբաղված անձնակազմի աշխատանքի արտադրողականության և թվի մասին (ներառյալ տեղեկություններ անձնակազմի աշխատավարձի մակարդակի մասին)՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների).

ժա) տեղեկություններ անդամ պետությունների շուկաներում իրացված նույնանման ապրանքի արտադրության և վաճառքի շահութաբերության վերաբերյալ՝ դիմումը ներկայացնելու օրվան նախորդող առնվազն 3 տարվա համար, ինչպես նաև դիմումատու անդամ պետության հատուկ սուբսիդիայի գործողության պլանավորված ժամկետի համար (բաշխված ըստ տարիների).

ժբ) տեղեկություններ այնպիսի գործոնների առկայության մասին, որոնք դեպարտամենտի կողմից՝ սույն կարգի 12-րդ կետի առաջին պարբերությանը համապատասխան սահմանված ժամանակահատվածում կարող են ազդեցություն ունենալ անդամ պետությունների ազգային տնտեսության ճյուղի վրա:

14. Սույն կարգի 13-րդ կետում նշված տեղեկատվությունը անդամ պետությունների լիազորված մարմինները (բացառությամբ դիմումատու անդամ պետության լիազորված մարմնի) ներկայացնում են սույն կարգի 12-րդ կետի առաջին պարբերության մեջ նշված՝ դեպարտամենտի կողմից հարցումն ստանալու օրվանից 30 օրացուցային օրը չգերազանցող ժամկետում: Նշված լիազորված մարմինների՝ գրավոր շարադրված հիմնավորված խնդրանքով, տեղեկատվության ներկայացման ժամկետը դեպարտամենտի կողմից կարող է երկարաձգվել առավելագույնը 15 օրացուցային օրով:

Դեպարտամենտն ուսումնասիրում է ներկայացված տեղեկատվության բավարար լինելը: Նշված տեղեկատվութունն ամբողջ ծավալով ներկայացվելու դեպքում, դեպարտամենտը որոշում է ընդունում վերլուծություն անցկացնելու մասին՝ Հանձնաժողովում այդ տեղեկատվությունը գրանցելու օրվանից 5 աշխատանքային օրվա ընթացքում:

Անդամ պետության լիազորված մարմնի կողմից սույն կարգի 13-րդ կետով նախատեսված տեղեկատվությունն ամբողջ ծավալով չներկայացվելու դեպքում դեպարտամենտն իրավունք ունի այդ լիազորված մարմին համապատասխան հարցում ուղարկելու՝ ոչ ուշ, քան ներկայացված տեղեկատվությունը Հանձնաժողովում գրանցվելու օրվանից հետո 5 աշխատանքային օրվա ընթացքում:

Անդամ պետության լիազորված մարմինը պակաս տեղեկատվությունը ներկայացնում է համապատասխան հարցումն ստանալու օրվանից 15 աշխատանքային օրը չգերազանցող ժամկետում։

Դեպարտամենտի կողմից սույն կետի երրորդ պարբերությանը համապատասխան պակասող տեղեկատվություն ներկայացնելու մասին հարցում ուղարկվելու դեպքում, դեպարտամենտը վերլուծություն անցկացնելու մասին որոշում է ընդունում ոչ ուշ, քան Հանձնաժողովում իր հարցման արդյունքում ներկայացված տեղեկատվությունը գրանցվելու օրվանից հետո 5 աշխատանքային օրվա ընթացքում կամ, այդ տեղեկատվությունը չստացվելու դեպքում՝ ոչ ուշ, քան սույն կետի չորրորդ պարբերությամբ նախատեսված ժամկետը լրանալու օրվանից հետո 5 աշխատանքային օրվա ընթացքում:

15. Վերլուծության անցկացման ժամկետը չպետք է գերազանցի վերլուծություն անցկացնելու մասին որոշում ընդունելու օրվանից հետո 6 ամիսը։

16. Վերլուծություն անցկացնելու ընթացքում դեպարտամենտն իրավունք ունի անդամ պետությունների լիազորված մարմիններ հարցում ուղարկելու այնպիսի լրացուցիչ տեղեկություններ ներկայացնելու վերաբերյալ, որոնք անհրաժեշտ են վերլուծություն անցկացնելու համար:

17. Դեպարտամենտի հարցումները համարվում են անդամ պետությունների լիազորված մարմինների կողմից ստացված՝ հարցումները փոստային կապի օգտագործմամբ ուղարկելու օրվանից հետո 7 օրացուցային օրը լրանալուն պես:

III. Խորհրդակցությունների անցկացումը

18. Վերլուծություն անցկացնելու ընթացքում դեպարտամենտն իրավունք ունի նախաձեռնելու խորհրդակցությունների անցկացում՝Հանձնաժողովի հարթակում ներգրավելով անդամ պետությունների լիազորված մարմիններին, անդամ պետությունների՝ սուբսիդավորվող և (կամ) նույնանման ապրանքի արտադրողներին և (կամ) սպառողներին՝ անդամ պետությունների լիազորված մարմիններին համապատասխան առաջարկություն ուղարկելու միջոցով: Խորհրդակցություններն անցկացվում են նաև սուբսիդավորվող ապրանքի և որպես նույնանման ներկայացված ապրանքների նույնանման լինելու փաստը պարզելու նպատակով:

Դեպարտամենտը խորհրդակցությունների անցկացման մասին տեղեկացնում է անդամ պետությունների լիազորված մարմիններին ոչ ուշ, քան դրանց անցկացման օրվանից 10 օրացուցային օր առաջ:

19. Խորհրդակցությունների ժամանակ դիմումատու անդամ պետության լիազորված մարմնի ներկայացուցչի բացակայության դեպքում խորհրդակցությունները չեն անցկացվում:

Խորհրդակցությունների ժամանակ մյուս անդամ պետությունների լիազորված մարմինների, անդամ պետությունների՝ սուբսիդավորվող և (կամ) նույնանման ապրանք արտադրողների և (կամ) սպառողների՝ խորհրդակցությունների անցկացման օրվա, վայրի և ժամանակի մասին տեղեկացված ներկայացուցիչների բացակայությունը խորհրդակցությունների անցկացման համար խոչընդոտ չէ։

20. Անդամ պետությունների լիազորված մարմինների ներկայացուցիչները, ինչպես նաև անդամ պետությունների՝ սուբսիդավորվող և (կամ) նույնանման ապրանք արտադրողները և (կամ) սպառողները՝ խորհրդակցությունների անցկացման ընթացքում կարող են քննարկվող հարցի վերաբերյալ լրացուցիչ տեղեկատվություն և պարզաբանումներ ներկայացնել:

Անդամ պետության լիազորված մարմնի դիրքորոշումը կցվում է խորհրդակցությունների արձանագրությանը (խորհրդակցությունների անցկացման օրվանից ոչ ուշ, քան 5 աշխատանքային օրվա ընթացքում այն Հանձնաժողով ներկայացնելու դեպքում):

21. Խորհրդակցությունների արձանագրությունը ստորագրվում է դեպարտամենտի ղեկավարի (ղեկավարի տեղակալի) կողմից և խորհրդակցությունների անցկացման օրվանից հետո 7 աշխատանքային օրվա ընթացքում ուղարկվում անդամ պետությունների լիազորված մարմիններ։

IV. Վերլուծություն անցկացնելու կարգը

22. Անդամ պետության ազգային տնտեսության ճյուղին նյութական վնաս հասցնելու վտանգը որոշվում է սուբսիդավորվող ապրանքի ներմուծման (հնարավոր ներմուծման) ծավալի և այդպիսի ներմուծման (հնարավոր ներմուծման)՝ յուրաքանչյուր անդամ պետության շուկայում նույնանման ապրանքի գնի և ազգային տնտեսության ճյուղի վրա ազդեցության վերլուծության արդյունքների հիման վրա:

Տրամադրման համար պլանավորվող հատուկ սուբսիդիայի մասով վերլուծություն անցկացնելու դեպքում՝ անդամ պետության ազգային տնտեսության ճյուղին նյութական վնաս հասցնելու վտանգը որոշվում է սույն կարգի 23-րդ կետում նշված ժամանակահատվածի, ինչպես նաև հատուկ սուբսիդիայի գործողության պլանավորվող ժամանակահատվածի տեղեկությունների վերլուծության արդյունքներով:

Այն դեպքում, երբ սույն կարգի 13-րդ կետի «բ» ենթակետին համապատասխան՝ անդամ պետության լիազորված մարմինը տեղեկատվություն է ներկայացրել իր տարածքում նույնանման ապրանքի արտադրութան բացակայության վերաբերյալ, ապա այդ անդամ պետության ազգային տնտեսությանը նյութական վնաս հասցնելու վտանգը չի որոշվում:

23. Անդամ պետության ազգային տնտեսության ճյուղին հասցված նյութական վնասը որոշելու նպատակով տեղեկությունների վերլուծության ժամանակահատվածը սահմանվում է դեպարտամենտի կողմից և այն չի կարող կազմել դիմումը ներկայացնելու օրվան նախորդող 3 տարուց պակաս ժամանակահատված։

24. Սուբսիդավորվող ապրանքի ներմուծման (հնարավոր ներմուծման) ծավալը վերլուծելիս որոշվում է՝ արդյոք տեղի է ունեցել (տեղի կունենա) սուբսիդավորվող ապրանքի ներմուծման (հնարավոր ներմուծման) զգալի աճ (բացարձակ ցուցանիշներով կամ մյուս անդամ պետություններում նույնանման ապրանքի արտադրության կամ սպառման համեմատությամբ)։

25. Մյուս անդամ պետությունների շուկաներում նույնանման ապրանքի գների վրա սուբսիդավորվող ապրանքի ներմուծման (հնարավոր ներմուծման) ազդեցությունը վերլուծելիս որոշվում է՝

ա) արդյոք սուբսիդավորվող ապրանքի գները զգալիորեն ցածր են մյուս անդամ պետությունների շուկաներում նույնանման ապրանքի գներից.

բ) արդյոք սուբսիդավորվող ապրանքի ներմուծումը (հնարավոր ներմուծումը) հանգեցրել է (կհանգեցնի) մյուս անդամ պետությունների շուկաներում նույնանման ապրանքի գների զգալի իջեցմանը.

գ) արդյոք սուբսիդավորվող ապրանքի ներմուծումը (հնարավոր ներմուծումը) խոչընդոտել է (կխոչընդոտի) մյուս անդամ պետությունների շուկաներում նույնանման ապրանքի գների աճը, որը տեղի կունենար այդ ներմուծման բացակայության դեպքում։

26. Յուրաքանչյուր անդամ պետության ազգային տնտեսության ճյուղի վրա սուբսիդավորվող ապրանքի ներմուծման (հնարավոր ներմուծման) ազդեցության վերլուծությունը ենթադրում է բոլոր այն տնտեսական գործոնների գնահատումը, որոնք առնչություն ունեն ազգային տնտեսության ճյուղի վիճակի հետ, այդ թվում՝ հետևյալներինը՝

ապրանքի արտադրության, վաճառքի, յուրաքանչյուր անդամ պետության ազգային շուկայում ապրանքի մասնաբաժնի, շահույթի, արտադրողականության, ներգրավված ներդրումներից կամ արտադրական հզորությունների օգտագործումից ստացված եկամուտների՝ տեղի ունեցած կամ հետագայում հնարավոր կրճատումը.

մյուս անդամ պետությունների շուկաներում նույնանման ապրանքի գների վրա ազդող գործոնները.

դրամական հոսքերի շարժի, ապրանքի պաշարների, զբաղվածության մակարդակի, աշխատավարձի չափի, արտադրության աճի տեմպերի և ներդրումներ ներգրավելու հնարավորության վրա տեղի ունեցած կամ հնարավոր բացասական ազդեցությունը։

Ընդ որում, նշված գործոնները չեն կարող որոշիչ նշանակություն ունենալ սուբսիդավորվող ապրանքի ներմուծման (հնարավոր ներմուծման) հետևանքով անդամ պետության ազգային տնտեսության ճյուղին նյութական վնաս հասցնելու վտանգը որոշելու համար։

27. Անդամ պետությունների ազգային տնտեսության ճյուղի վրա սուբսիդավորվող ապրանքի ներմուծման (հնարավոր ներմուծման) ազդեցությունը գնահատվում է մյուս անդամ պետություններում նույնանման ապրանքի արտադրության մասով, եթե առկա տվյալները թույլ են տալիս առանձնացնել այդ անդամ պետություններում նույնանման ապրանքի արտադրությունն այնպիսի չափանիշների հիման վրա, ինչպիսիք են արտադրական գործընթացը, ապրանքի վաճառքը դրա արտադրողների կողմից և շահույթը։

Այն դեպքում, երբ առկա տվյալներով հնարավոր չէ առանձնացնել նույնանման ապրանքի արտադրությունը, ապա սուբսիդավորվող ապրանքի ներմուծման (հնարավոր ներմուծման) ազդեցությունը յուրաքանչյուր անդամ պետության ազգային տնտեսության ճյուղի վրա գնահատվում է ապրանքների այն ամենանեղ խմբի արտադրության կամ անվանացանկի մասով, որոնք ներառում են նույնանման ապրանքը, և որոնց վերաբերյալ առկա են անհրաժեշտ տվյալներ։

28. Սուբսիդավորվող ապրանքի ներմուծման (հնարավոր ներմուծման) հետևանքով անդամ պետության ազգային տնտեսության ճյուղին նյութական վնաս հասցնելու վտանգը որոշելիս դեպարտամենտը հաշվի է առնում առկա բոլոր գործոնները, այդ թվում՝ հետևյալ գործոնները՝

սուբսիդիայի բնույթը, չափը և առևտրի վրա դրա հնարավոր ազդեցությունը.

սուբսիդավորվող ապրանքի ներմուծման աճի տեմպերը, որոնք վկայում են այդ ներմուծման ծավալի հետագա ավելացման հնարավորության մասին.

սուբսիդավորող անդամ պետությունում սուբսիդավորվող ապրանք արտադրողների համար մյուս անդամ պետությունների տարածքում սուբսիդավորվող ապրանքի ներմուծման (հնարավոր ներմուծման) ծավալներն ավելացնելու բավարար հնարավորությունների առկայությունը կամ այդ ներմուծման ծավալներն ավելացնելու վտանգը.

սուբսիդավորվող ապրանքի գների մակարդակը, եթե գների այդ մակարդակը կարող է հանգեցնել անդամ պետությունների շուկաներում նույնանման ապրանքի գնի իջեցմանը կամ զսպմանը և սուբսիդավորվող ապրանքի պահանջարկի հետագա աճին.

արտադրողի մոտ սուբսիդավորվող ապրանքի պաշարները։

Ընդ որում, նշված գործոնները չեն կարող որոշիչ նշանակություն ունենալ սուբսիդավորվող ապրանքի ներմուծման հետևանքով անդամ պետության ազգային տնտեսության ճյուղին նյութական վնաս հասցնելու վտանգը որոշելու համար։

29. Անդամ պետության ազգային տնտեսության ճյուղին նյութական վնաս հասցնելու վտանգի առկայության մասին եզրահանգումը կատարվում է այն դեպքում, երբ սույն կարգի 24-28-րդ կետերում նշված գործոնների գնահատման արդյունքների հիման վրա անցկացվող վերլուծության ընթացքում դեպարտամենտը կատարում է եզրահանգում անդամ պետությունների տարածք՝ սուբսիդավորվող ապրանքի ներմուծման անդառնալիության և այդ ներմուծման հետևանքով ցանկացած անդամ պետության ազգային տնտեսության ճյուղին վնաս հասցնելու անխուսափելիության վերաբերյալ։

30. Սուբսիդավորվող ապրանքի ներմուծման և ցանկացած անդամ պետության ազգային տնտեսության ճյուղին նյութական վնաս հասցնելու միջև պատճառահետևանքային կապի առկայության մասին եզրահանգումը պետք է հիմնված լինի վերլուծության հետ կապված և դեպարտամենտի տրամադրության տակ գտնվող բոլոր ապացույցների ու տեղեկությունների գնահատման վրա։

V. Հանձնաժողովի հաշվետվությունը՝ վերլուծության արդյունքների հիման վրա

31. Վերլուծության անցկացման արդյունքների հիման վրա դեպարտամենտը պատրաստում է եզրակացություն, որն ընդգրկում է եզրահանգումներ՝ յուրաքանչյուր անդամ պետության ազգային տնտեսության ճյուղին՝ մյուս անդամ պետության կողմից հատուկ սուբսիդիա տրամադրելու արդյունքում նյութական վնաս հասցնելու վտանգի առկայության կամ բացակայության վերաբերյալ:

32. Սույն կարգի 31-րդ կետում նշված եզրակացությունը ստորագրվում է դեպարտամենտի ղեկավարի (ղեկավարի տեղակալի) կողմից, հաստատվում Հանձնաժողովի կոլեգիայի՝ արդյունաբերության հարցերով իրավասու անդամի կողմից, և ներառվում է Հանձնաժողովի կոլեգիայի նիստում՝ սույն համաձայնագրի 9-րդ հոդվածի 5-րդ կետին համապատասխան հատուկ սուբսիդիայի թույլատրելիության կամ անթույլատրելիության այլ չափանիշների սահմանման նպատակահարմարության վերաբերյալ հարցի ուսումնասիրման համար նախապատրաստված փաստաթղթերի և նյութերի փաթեթում։

Նշված հարցի քննարկման արդյունքներով Հանձնաժողովի կոլեգիան կարող է սահմանված կարգով Եվրասիական միջկառավարական խորհրդի քննարկմանը ներկայացնել հատուկ սուբսիդիայի թույլատրելիության (այն դեպքում, երբ դեպարտամենտը պատրաստել է եզրակացություն յուրաքանչյուր անդամ պետության ազգային տնտեսության ճյուղին՝ մյուս անդամ պետության կողմից հատուկ սուբսիդիա տրամադրելու արդյունքում նյութական վնաս հասցնելու վտանգի բացակայության վերաբերյալ) կամ անթույլատրելիության նոր չափանիշ սահմանելու մասին հարցը:

Պաշտոնական հրապարակման օրը՝ 22 հունիսի 2022 թվական: