301.0015.23.03.01

ԳՐԱՆՑՎԱԾ է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
28 սեպտեմբերի 2001 Թ.
ՊԵՏԱԿԱՆ ԳՐԱՆՑՄԱՆ ԹԻՎ 30101155

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐՏՈՆԱԳՐԱՅԻՆ ՎԱՐՉՈՒԹՅՈՒՆ

Հ Ր Ա Մ Ա Ն

23 մարտի 2001 թ. ք. Երևան

N 15

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏՈՆԱԳՐԱՅԻՆ ՎԱՐՉՈՒԹՅԱՆ ԲՈՂՈՔԱՐԿՄԱՆ ԽՈՐՀՐԴԻ ԿԱՆՈՆԱԴՐՈՒԹՅՈՒՆԸ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏՈՆԱԳՐԱՅԻՆ ՎԱՐՉՈՒԹՅԱՆ ԲՈՂՈՔԱՐԿՄԱՆ ԽՈՐՀՈՒՐԴ ԲՈՂՈՔՆԵՐԻ ԵՎ ԴԻՄՈՒՄՆԵՐԻ ՆԵՐԿԱՅԱՑՄԱՆ ԵՎ ՔՆՆԱՐԿՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Արտոնագրերի մասին» ՀՀ օրենքի 3-րդ հոդվածի համաձայն և «Ապրանքային նշանը Հայաստանի Հանրապետությունում հանրահայտ ճանաչելու մասին» կարգը գործողության մեջ մտնելու կապակցությամբ հրամայում եմ`

1. Հաստատել Հայաստանի Հանրապետության արտոնագրային վարչության բողոքարկման խորհրդի կանոնադրությունը

2. Հաստատել Հայաստանի Հանրապետության արտոնագրային վարչության բողոքարկման խորհուրդ բողոքների և դիմումների ներկայացման և քննարկման կարգը

3. Ուժը կորցրած ճանաչել Հայարտոնագրի պետի 1997 թ. նոյեմբերի 12-ի N 45 հրամանով հաստատված «ՀՀ արտոնագրային վարչության գանգատարկման խորհրդի կանոնադրությունը» և «Հայարտոնագրի գանգատարկման խորհուրդ գանգատների ներկայացման և դրանց քննարկման կարգը» (հաստատված են ՀՀ արդարադատության նախարարության կողմից 1998 թ. փետրվարի 24-ին, N 36980085):

Վարչության պետ

Ս. Ղանթարջյան

Հաստատված է Հայարտոնագրի պետի 2001 թ. մարտի 23-ի N 15 հրամանով

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏՈՆԱԳՐԱՅԻՆ ՎԱՐՉՈՒԹՅԱՆ ԲՈՂՈՔԱՐԿՄԱՆ ԽՈՐՀՐԴԻ

1. Ընդհանուր դրույթներ

1.1. Հայաստանի Հանրապետության արտոնագրային վարչության (այսուհետ` Հայարտոնագիր) բողոքարկման խորհուրդը (այսուհետ` բողոքարկման խորհուրդ) ստեղծվել է Հայարտոնագրի պետի 1993թ. հոկտեմբերի 14-ի N Կ 41 հրամանով, «Արտոնագրերի մասին «ՀՀ օրենքի 3 հոդվածին համապատասխան:

1.2. Իր գործունեության ընթացքում բողոքարկման խորհուրդը ղեկավարվում է ՀՀ օրենքներով և ենթաօրենսդրական ակտերով, արդյունաբերական սեփականության օբյեկտների պահպանությանը վերաբերող միջազգային պայմանագրերով, որոնց մասնակիցն է Հայաստանի Հանրապետությունը, և սույն կանոնադրությամբ:

1.3. Բողոքարկման խորհուրդը քննարկում և սահմանված կարգով որոշումներ է կայացնում արդյունաբերական սեփականության օբյեկտների իրավական պահպանության հետ կապված վիճելի հարցերի վերաբերյալ: Բողոքարկման խորհուրդը քննարկում է նաև ապրանքային նշանները ՀՀ-ում հանրահայտ ճանաչելու մասին դրանց սեփականատերերի դիմումները (այսուհետ` նաև դիմում):

Բողոքարկման խորհուրդ բողոքների ու դիմումների ներկայացման և դրանց քննարկման կարգը սահմանում է Հայարտոնագիրը:

2. Բողոքարկման խորհրդի խնդիրները

2.1. Ապահովել հայտատուների, արտոնագրատերերի, ապրանքային և սպասարկման նշանների (այսուհետ` ապրանքային նշան), ֆիրմային անվանումների սեփականատերերի և ապրանքի ծագման տեղանունների օգտագործման իրավունքի վկայականների սեփականատերերի` օրենքով վերապահված իրավունքները, ինչպես նաև այլ ֆիզիկական և իրավաբանական անձանց շահերը, գյուտի, օգտակար մոդելի, արդյունաբերական նմուշի, ապրանքային նշանի, ֆիրմային անվանման և ապրանքի ծագման տեղանվան հայտերով փորձաքննության որոշումների, ինչպես նաև արդյունաբերական սեփականության նշված օբյեկտների պահպանական փաստաթուղթ տալու կամ գրանցման գործողության դեմ բողոքների քննարկման ընթացքում:

2.2. Իր իրավասության շրջանակներում լուծել ՀՀ-ում արդյունաբերական սեփականության օբյեկտների իրավական պահպանության հետ կապված վիճելի հարցերը, այդ թվում` ապրանքային նշանները հանրահայտ ճանաչելու հետ կապված հարցերը:

2.3. Կատարելագործել բողոքների քննարկման ընթացակարգը, մասնակցել արտոնագրային փորձաքննության անցկացման գործընթացների իրավական հիմքերի կատարելագործմանը:

3. Բողոքարկման խորհրդի գործառույթները

Հիմնական խնդիրներին համապատասխան բողոքարկման խորհուրդն ունի հետևյալ պարտականությունները`

3.1. Քննարկել գյուտի, օգտակար մոդելի և արդյունաբերական նմուշի արտոնագիր տալը մերժելու, ինչպես նաև ապրանքային նշանները, ֆիրմային անվանումները, ապրանքի ծագման տեղանունների գրանցումը մերժելու և (կամ) ապրանքի ծագման տեղանվան օգտագործման իրավունքի վկայական տալը մերժելու մասին փորձաքննության որոշումների վերաբերյալ հայտատուների բողոքները:

3.2. Քննարկել գյուտի, օգտակար մոդելի և արդյունաբերական նմուշի արտոնագիր տալու դեմ, ինչպես նաև ապրանքային նշանը, ապրանքի ծագման տեղանունը գրանցելու և (կամ) ապրանքի ծագման տեղանվան օգտագործման իրավունքի վկայական տալու դեմ երրորդ անձանց բողոքները:

3.3. Քննարկել հայտատուների դիմումները իրենց պատկանող ապրանքային նշանները, Արդյունաբերական սեփականության պահպանության մասին Փարիզյան կոնվենցիայի 6 bis հոդվածի 1-ին կետին համապատասխան Հայաստանի Հանրապետությունում հանրահայտ ճանաչելու վերաբերյալ:

3.4. Ապահովել բողոքների և դիմումների քննարկման գաղտնիությունը բողոքարկման խորհրդում:

3.5. Ընդհանրացնել իր իրավասությանը վերաբերող օրենսդրական պրակտիկան և դրա հիման վրա մշակել և սահմանված կարգով Հայարտոնագրի խորհրդի քննարկմանը ներկայացնել դրանց կատարելագործման մասին առաջարկություններ:

3.6. Բողոքարկման խորհուրդը պատասխանատու է սույն կանոնադրությամբ իր վրա դրված խնդիրների և պարտականությունների կատարման համար:

4. Բողոքարկման խորհրդի իրավունքները

4.1. Բողոքների և սույն կանոնադրության 3.3 կետում նշված դիմումների քննարկման արդյունքում բողոքարկման խորհուրդը իրավասու է ընդունել հետևյալ որոշումները`

ա) բողոքը բավարարելու և փորձաքննության որոշումը չեղյալ ճանաչելու մասին.

բ) բողոքը մերժելու և փորձաքննության որոշումն օրինական ճանաչելու մասին.

գ) բողոքը բավարարելու և պահպանական փաստաթուղթն ամբողջովին կամ մասնակիորեն անվավեր ճանաչելու մասին.

դ) բողոքը մերժելու և պահպանական փաստաթուղթն ուժի մեջ թողնելու մասին.

ե) դիմումը բավարարելու և ապրանքային նշանը ՀՀ-ում հանրահայտ ճանաչելու մասին.

զ) դիմումը մերժելու մասին:

Բողոքի վերաբերյալ բողոքարկման խորհրդի որոշումները պարտադիր են Հայարտոնագրի արդյունաբերական սեփականության օբյեկտների հայտերի փորձաքննություն իրականացնող ստորաբաժանումների համար:

4.2. Իր իրավասության շրջանակներում նամակագրություն վարել նախարարությունների, վարչությունների, կազմակերպությունների, հայտատուների, արտոնագրատերերի (ապրանքային նշանների, ֆիրմային անվանումների սեփականատերերի և ապրանքի ծագման տեղանունների օգտագործման իրավունքի վկայականների սեփականատերերի) և այլ իրավաբանական ու ֆիզիկական անձանց հետ, նրանցից ստանալ բոլոր այն փաստաթղթերը, որոնք անհրաժեշտ են բողոքների վերաբերյալ որոշումներ ընդունելու համար:

4.3. Իր ընդունած որոշումների մասին սահմանված կարգով տեղեկություններ ներկայացնել Հայարտոնագրի պաշտոնական տեղեկագրում հրապարակելու համար:

4.4. Անհրաժեշտության դեպքում իր նիստերին հրավիրել քննարկվող հարցերին առնչվող հայտատուների, հեղինակների, արտոնագրատերերի (ապրանքային նշանների, ֆիրմային անվանումների սեփականատերերի և ապրանքի ծագման տեղանունների օգտագործման իրավունքի վկայականների սեփականատերերի) այլ իրավատերերի կամ նրանց ներկայացուցիչների, Հայարտոնագրի փորձագետների և այլ անձանց:

4.5. Անհրաժեշտության դեպքում ներգրավել բարձրորակ մասնագետների և գիտնականների` հայտերի փորձաքննության հետ կապված հարցերի քննարկման համար:

4.6. Մասնակցել Հայարտոնագրի միջազգային համագործակցությանը օտարերկրյա պետությունների արտոնագրային գերատեսչությունների կամ բողոքների քննարկման այլ իրավասու մարմինների փորձի ուսումնասիրման և օգտագործման հետ կապված հարցերում:

5. Բողոքարկման խորհրդի անդամների անկախությունը

Բողոքները և դիմումները քննարկելիս, բողոքարկման խորհրդի որոշումներ ընդունելիս բողոքարկման խորհրդի անդամները (այսուհետև` խորհրդի անդամները) անկախ են և առաջնորդվում են միայն ՀՀ օրենքներով:

Խորհրդի անդամները որոշումներ ընդունման ժամանակ առաջնորդվում են միայն օրենսդրությամբ, որևէ ազդեցության բացառման պայմաններում:

6. Բողոքարկման խորհրդի կազմը ԵՎ կառուցվածքը

6.1. Բողոքարկման խորհուրդը ստեղծված է Հայարտոնագրի պետի հրամանով և ունի հետևյալ կազմը` բողոքարկման խորհրդի նախագահ, նրա տեղակալ (Հայարտոնագրի բաժնի վարիչի կարգավիճակով) և խորհրդի անդամներ:

6.2. Բողոքարկման խորհրդի նախագահն ի պաշտոնե Հայարտոնագրի պետն է:

6.3. Բողոքարկման խորհրդի նախագահը ղեկավարում է բողոքարկման խորհրդի գործունեությունը և կազմակերպում է նրա աշխատանքը, բաշխում է պարտականությունները իր տեղակալի և խորհրդի անդամների միջև, լուծում է խորհրդի գործունեության հետ կապված այլ հարցեր:

6.4. Բողոքարկման խորհրդի նախագահի տեղակալը նշանակվում ու ազատվում է պաշտոնից Հայարտոնագրի պետի հրամանով:

6.5. Բողոքարկման խորհրդի անդամների կազմը հաստատում է Հայարտոնագրի պետը:

7. Բողոքարկման խորհրդի կոլեգիան

7.1. Քննարկման ընդունված բողոքները քննարկվում են կոլեգիալ կարգով` բողոքարկման խորհրդի առնվազն երեք անդամներից բաղկացած կազմով, որը ձևավորում է խորհրդի նախագահը կամ նրա տեղակալը:

Խորհրդի նախագահը և նրա տեղակալը կարող են ընդգրկվել կոլեգիայի կազմում և լինել դրա ղեկավարը:

7.2. Կոլեգիայի կազմում չպետք է ընդգրկվեն վիճարկվող որոշում ընդունած փորձագետի կամ բողոք ներկայացնող անձի հետ ազգակցական կապեր ունեցող անձինք, ինչպես նաև փորձաքննության վիճարկվող որոշման ընդունմանը ուղղակի կամ անուղղակի մասնակցած անձինք:

Նշված պարագաներից ցանկացածի առկայության դեպքում կոլեգիայի կազմում ընդգրկված խորհրդի անդամը պարտավոր է ինքնաբացարկ հայտարարել: Այդ դեպքում նշանակվում է կոլեգիայի նոր կազմ:

7.3. Սույն կանոնադրության 3.3 կետում նշված դիմումները քննարկվում են Բողոքարկման խորհրդի կոլեգիայի ընդլայնված կազմով, որի մեջ կարող են ընդգրկվել ինչպես Հայարտոնագրի խորհրդի անդամները, այնպես էլ գործի էությունից ելնելով` համապատասխան նախարարությունների, գերատեսչությունների և կազմակերպությունների ներկայացուցիչները: Բողոքարկման խորհրդի ընդլայնված կոլեգիայի կազմը ձևավորվում է խորհրդի նախագահի կողմից:

Հաստատված է Հայարտոնագրի պետի 2001 թ. մարտի 23-ի N 15 հրամանով

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏՈՆԱԳՐԱՅԻՆ ՎԱՐՉՈՒԹՅԱՆ ԲՈՂՈՔԱՐԿՄԱՆ ԽՈՐՀՈՒՐԴ ԲՈՂՈՔՆԵՐԻ ԵՎ ԴԻՄՈՒՄՆԵՐԻ ՆԵՐԿԱՅԱՑՄԱՆ ԵՎ ԴՐԱՆՑ ՔՆՆԱՐԿՄԱՆ

Կ Ա Ր Գ

1. Ընդհանուր դրույթներ

Սույն կարգը սահմանված է Հայարտոնագրի բողոքարկման խորհրդի կանոնադրության 1.3 կետին համապատասխան և նախատեսված է կարգավորել արդյունաբերական սեփականության օբյեկտների իրավական պահպանության հետ կապված բողոքների և դիմումների ներկայացման և քննարկման հետ կապված հարցերը:

2. Բողոքարկման խորհուրդ ներկայացվող բողոքները ԵՎ դիմումները

Հայարտոնագրի բողոքարկման խորհուրդ (այսուհետ` նաև խորհուրդ) կարող են ներկայացվել հետևյալ բողոքները և դիմումները:

2.1. Գյուտի արտոնագիր չտալու մասին կրկնական նախնական փորձաքննության որոշման վերաբերյալ:

2.2. Օգտակար մոդելի և արդյունաբերական նմուշի արտոնագիր չտալու մասին կրկնական փորձաքննության որոշման վերաբերյալ:

2.3. Ապրանքային կամ սպասարկման նշանի (այսուհետ` ապրանքային նշան) գրանցման, ապրանքի ծագման տեղանվան գրանցման և (կամ) օգտագործման իրավունքի վկայական ստանալու հայտը քննարկման չընդունելու մասին նախնական փորձաքննության որոշման վերաբերյալ:

2.4. Առարկության քննարկման արդյունքում գյուտի նախնական արտոնագիր չտալու մասին կրկնական փորձաքննության որոշման վերաբերյալ:

2.5. Գյուտի հիմնական արտոնագիր չտալու մասին գերատեսչության որոշման վերաբերյալ:

2.6. Ապրանքային նշանի գրանցումը մերժելու մասին հայտարկվող նշանի փորձաքննության որոշման վերաբերյալ, այդ թվում` նշանը չգրանցելու մասին վերջնական մերժումները, որոնք ընդունվել են հայտարկվող նշանի փորձաքննության արդյունքում` Մադրիդյան համաձայնագրի 5 հոդվածի 1-ին, 2-րդ և 5-րդ կետերին համապատասխան:

2.7. Ապրանքի ծագման տեղանվան գրանցումը մերժելու և (կամ) դրա օգտագործման իրավունք չտալու մասին հայտարկվող տեղանվան փորձաքննության որոշման վերաբերյալ:

2.8. Ֆիրմային անվանման գրանցումը մերժելու մասին փորձաքննության որոշման վերաբերյալ:

2.9. Ապրանքային նշանը գրանցելու մասին հայտարկվող նշանի փորձաքննության որոշման վերաբերյալ, այդ թվում`

ա) ապրանքային նշանի մեկ կամ մի քանի տարրերը փորձաքննության կողմից պաշտպանությունից հանելու դեպքում.

բ) ապրանքային նշանի գրանցման ընթացքում հայտատուի ներկայացրած ապրանքների ցանկը փորձաքննության կողմից փոփոխվելու դեպքում:

2.10. Գյուտի, օգտակար մոդելի, արդյունաբերական նմուշի արտոնագիր տալու դեմ:

2.11. Ապրանքային նշանի գրանցման դեմ, այդ թվում` Մադրիդյան համաձայնագրի 5 հոդվածի 6-րդ կետին համապատասխան:

2.12. Ապրանքի ծագման տեղանվան գրանցման և (կամ) տեղանվան օգտագործման իրավունքի վկայական տալու դեմ:

2.13. Ապրանքային նշանը Արդյունաբերական սեփականության պահպանության մասին Փարիզյան կոնվենցիայի 6 bis հոդվածի 1-ին կետին համապատասխան Հայաստանի Հանրապետությունում հանրահայտ ճանաչելու վերաբերյալ:

3. Բողոքների ԵՎ դիմումների ներկայացման պայմանները

3.1. Սույն կարգի 2.1-2.9 կետերին համապատասխան բողոքը ներկայացվում է հայտատուի կողմից անմիջականորեն կամ նրա ներկայացուցչի միջոցով:

Սույն կարգի 2.10-2.12 կետերին համապատասխան բողոքը ներկայացվում է ցանկացած անձի կողմից անմիջականորեն կամ նրա ներկայացուցչի միջոցով:

Բողոքի (դիմումի) գործերը վարելու և դրա քննարկման ընթացքում իր շահերը ներկայացնելու համար, հայտատուն կարող է նշանակել ներկայացուցիչ` նրան տալով սահմանված պահանջներին համապատասխան ձևակերպված լիազորագիր:

Հայաստանի Հանրապետությունից դուրս ապրող ֆիզիկական անձինք և օտարերկրյա իրավաբանական անձինք կամ նրանց արտոնագրային հավատարմատարները բողոքների և դիմումների ներկայացման հետ կապված գործերը վարում են Հայարտոնագրում գրանցված արտոնագրային հավատարմատարների միջոցով:

Նշված լիազորագիրը կարող է ներկայացվել բողոքի (դիմումի) հետ կամ գործավարության ընթացքում:

3.2. Սույն կարգի 2.13 կետին համապատասխան դիմումը ներկայացվում է այն անձի կամ նրա ներկայացուցչի միջոցով, որը իր ապրանքային նշանը համարում է հանրահայտ (այսուհետ` հայտատու):

3.3. Բողոքում նշվում են` գյուտի, օգտակար մոդելի, արդյունաբերական նմուշի, ապրանքային նշանի, ֆիրմային անվանման, ապրանքի ծագման տեղանվան հայտի համարը, իսկ պահպանական փաստաթղթի վիճարկման դեպքում արտոնագրի և (կամ) գրանցման վկայականի համարը, բողոքարկողի ազգանունը, անունը, հայրանունը կամ իրավաբանական անձի լրիվ անվանումը և նամակագրության հասցեն:

3.4. Սույն կարգի 2.1 - 2.2 և 2.4 - 2.5 կետերին համապատասխան բողոքը ներկայացվում է հայտատուի կողմից որոշումն ստանալու օրվանից երկամսյա ժամկետում:

Սույն կարգի 2.3, 2.6, 2.7 և 2.9 կետերին համապատասխան բողոքը ներկայացվում է հայտատուի կողմից որոշումն ստանալու օրվանից եռամսյա ժամկետում:

Սույն կարգի 2.8 կետին համապատասխան բողոքը ներկայացվում է հայտատուի կողմից որոշումն ստանալու օրվանից մեկամսյա ժամկետում:

3.5. Սույն կարգի 2.10 կետին համապատասխան բողոքը ներկայացվում է արտոնագրի գործողության ամբողջ ժամկետում:

Սույն կարգի 2.11 կետին համապատասխան, ապրանքային նշանի գրանցման դեմ բողոքը ներկայացվում է ապրանքային նշանի գրանցման գործողության ամբողջ ժամկետում` «Ապրանքային և սպասարկման նշանների, ապրանքների ծագման տեղանունների» մասին ՀՀ օրենքի (այսուհետ` Ապրանքային նշանների մասին օրենք) 3 և 11 հոդվածներով սահմանված պահանջների խախտման դեպքում և ապրանքային նշանի գրանցման մասին տեղեկությունները պաշտոնական տեղեկագրում հրապարակելու օրվանից 5 տարվա ընթացքում` նույն օրենքի 12 հոդվածի համաձայն:

3.6. Բողոքին (դիմումին) կցվում է սահմանված չափով պետական տուրքի վճարման անդորրագիրը:

Առանց սահմանված տուրքի վճարման անդորրագրի բողոքը (դիմումը) քննարկման չի ընդունվում:

3.7. Սույն կարգի 3.4 կետով սահմանված ժամկետները խախտելու դեպքում բողոքը կարող է քննարկման ընդունվել բաց թողած ժամկետների վերականգնման մասին խնդրագրի առկայության դեպքում: Խնդրագիրը ներկայացվում է բողոքի հետ միաժամանակ, որպես դրա բաղկացուցիչ մաս կամ բողոքին կից հավելվածի տեսքով:

Գյուտի, օգտակար մոդելի, արդյունաբերական նմուշի հայտով փորձաքննության որոշմանը վերաբերող բողոքի ներկայացման բաց թողած ժամկետների վերականգնման մասին խնդրագիրը ներկայացվում է ժամկետի ավարտման օրվանից ոչ ավելի, քան վեց ամսվա, իսկ ապրանքային նշանին վերաբերող խնդրագիրը` երեք ամսվա ընթացքում:

Այս դեպքում բողոքի և խնդրագրի հետ միասին պետք է ներկայացվի բաց թողած ժամկետների վերականգնման համար սահմանված տուրքի վճարման անդորրագիրը:

Առանց բաց թողած ժամկետների վերականգնման համար սահմանված տուրքի վճարման անդորրագրի բողոքը քննարկման չի ընդունվում:

3.8. Այն դեպքում, երբ վճարված տուրքի գումարը գերազանցում է օրենքով սահմանված չափերը, ապա հայտատուի դիմումի համաձայն այն կարող է օգտագործվել մեկ այլ գործողության կամ արդյունաբերական սեփականության մեկ այլ օբյեկտի իրավական պահպանության հետ կապված գործողության համար: Հակառակ դեպքում, հայտատուի դիմումի համաձայն, ավել վճարված գումարը օրենքով սահմանված կարգով վերադարձվում է հայտատուին:

3.9. Սույն կարգի 2.1-2.9 կետերին համապատասխան բողոքը պետք է պարունակի փորձաքննության որոշման անճշտությունը հաստատող փաստարկներ, վերաբերի գյուտի, օգտակար մոդելի, արդյունաբերական նմուշի, ապրանքային նշանի, ապրանքի ծագման տեղանվան մեկ հայտի և ներկայացվի երկու օրինակից:

3.10. Սույն կարգի 2.10-2.12 կետերին համապատասխան բողոքը պետք է պարունակի պահպանական փաստաթուղթը և (կամ) գրանցումը ամբողջովին կամ մասնակիորեն անվավեր ճանաչելու հիմքերի առկայությունը հաստատող փաստարկներ, վերաբերի մեկ պահպանական փաստաթղթի և (կամ) մեկ գրանցման ու ներկայացվի երկու օրինակից:

3.11. Սույն կարգի 2.10 կետին համապատասխան բողոքը պետք է պարունակի «Արտոնագրերի մասին» ՀՀ օրենքի 34 հոդվածի 1-ին կետի 1-ին, 2-րդ և (կամ) 3-րդ ենթակետերով սահմանված հիմքերի առկայությունը հաստատող փաստարկներ:

3.12. Սույն կարգի 2.11 և 2.12 կետերին համապատասխան բողոքը պետք է պարունակի Ապրանքային նշանների մասին օրենքի 28 և 43 հոդվածներով սահմանված հիմքերի առկայությունը հաստատող փաստարկներ:

3.13. Սույն կարգի 2.13 կետին համապատասխան դիմումը պետք է պարունակի ապրանքային նշանի հանրահայտ լինելը հաստատող փաստացի տեղեկություններ:

4. Բողոքի (դիմումի) ընդունումը ԵՎ գրանցումը

4.1. Որպես բողոք քննարկման է ընդունվում սույն կարգի 2.1-2.12, 3.1, 3.3-3.5 և 3.9-3.12 կետերով սահմանված պահանջներին բավարարող գրավոր խնդրագիրը:

4.2. Խորհուրդ ներկայացված բողոքը (դիմումը) գրանցվում է, և դրան տրվում է մտից համար:

4.3. Բողոքի (դիմումի) ստացման օրվանից մեկամսյա ժամկետում բողոքարկողին (դիմողին) ուղարկվում է ծանուցագիր բողոքը (դիմումը) քննարկման ընդունելու մասին, որի մեջ նշվում է խորհրդի կոլեգիայի նիստում բողոքի (դիմումի) քննարկման թվականը:

Սույն կարգի 2.10-2.12 կետերին համապատասխան բողոքը քննարկման ընդունելու մասին ծանուցագիր է ուղարկվում նաև վիճարկվող պահպանական փաստաթղթի սեփականատիրոջը` կցելով դրան բողոքի պատճենը` վիճարկման վերաբերյալ իր նկատառումները ներկայացնելու առաջարկությամբ, ինչը կարող է արվել ոչ ուշ, քան կոլեգիայի նիստի անցկացման օրվանից 10 օր առաջ:

Ապրանքային նշանի սեփականատիրոջը, որի նշանը գրանցվել է նշանների միջազգային գրանցման Մադրիդյան համաձայնագրի համաձայն, վերը նշված ծանուցագիրը ուղարկվում է անմիջականորեն նշանի սեփականատիրոջը: Ընդ որում, նշվում է, որ վիճարկվող գրանցման գործողության վերաբերյալ նա կարող է ներկայացնել իր նկատառումները, բողոքի քննարկման հետ կապված գործերը վարելով Հայարտոնագրում գրանցված արտոնագրային հավատարմատարների միջոցով:

Կոլեգիայի բոլոր ծրագրված նիստերի անցկացման ժամկետների մասին խորհուրդը տեղեկացնում է Հայարտոնագրի համապատասխան փորձաքննական ստորաբաժանմանը (այսուհետ` փորձաքննության բաժին):

4.4. Այն դեպքում, երբ խորհուրդ ներկայացված խնդրագիրը չի համապատասխանում սույն կարգի 3.1, 3.3-3.4 կետերով սահմանված պահանջներին, բացառությամբ 3.1 կետի 3-րդ մասով նախատեսված լիազորագրի ձևակերպմանը վերաբերող պահանջների, դրա ստացման օրվանից ոչ ուշ, քան մեկամսյա ժամկետում բողոքարկողին ծանուցագիր է ուղարկվում այն մասին, որ ստացված խնդրագիրը որպես բողոք քննարկման ենթակա չէ:

Այն դեպքում, երբ խնդրագիրը չի համապատասխանում սույն կարգի 3.9-3.12 կետերով, 3.1 կետի 3-րդ պարբերությամբ նախատեսված պահանջներին, խնդրագրի ստացման օրվանից մեկամսյա ժամկետում բողոքարկողին ուղարկվում է հարցում` այն ստանալու օրվանից եռամսյա ժամկետում խնդրագիրը որպես բողոք քննարկելու համար անհրաժեշտ տեղեկություններ ներկայացնելու առաջարկությամբ:

Պահանջված տեղեկությունները ժամանակին ներկայացնելու դեպքում, բողոքի ստացման թվական է համարվում խորհրդի կողմից դրանցից վերջինի ստացման թվականը, ընդ որում սույն կարգի 4.3 կետի համաձայն, մեկ ամսվա ընթացքում բողոքարկողին ուղարկվում է ծանուցագիր` բողոքը քննարկման ընդունելու մասին:

Նշված եռամսյա ժամկետում պահանջված տեղեկությունները չներկայացնելու դեպքում, խնդրագիրը որպես բողոք քննարկման չի ընդունվում, ինչի մասին խորհուրդը, հարցումն ուղարկելու օրվանից հինգ ամիսը լրանալուն պես, ծանուցում է բողոքարկողին:

4.5. Սույն կարգի 4.3 և 4.4 կետերում նշված ծանուցումները և հարցումներն ստորագրում է խորհրդի նախագահը կամ նրա տեղակալը:

4.6. Հայտատուի խնդրանքով բողոքը (դիմումը) կարող է հետ կանչվել դրա քննարկման ցանկացած փուլում մինչև Բողոքարկման խորհրդի կոլեգիայի նիստում խորհրդի որոշման հրապարակումը: Այս դեպքում բողոքի կամ դիմումի քննարկումը և դրանցով վարվող գործավարությունը դադարեցվում է:

Եթե բողոքի (դիմումի) հետ կանչման մասին խնդրագիրը Բողոքարկման խորհուրդ է ներկայացվել մինչև սույն կարգի 4.3. կետով նախատեսված` բողոքը (դիմումը) քննարկման ընդունելու մասին ծանուցագրի առաքումը հայտատուին, ապա վերջինիս խնդրագրի հիման վրա վճարված պետական տուրքի գումարը կարող է վերադարձվել կամ սահմանված կարգով օգտագործվել այլ տուրքերի վճարման համար: Հակառակ դեպքում վճարված պետական տուրքի գումարը վերադարձման ենթակա չէ:

5. Բողոքի (դիմումի) քննարկման ժամկետները

5.1. Սույն կարգի 2.1 - 2.2, 2.4, 2.5 կետերին համապատասխան բողոքը քննարկվում է դրա ստացման օրվանից երկամսյա ժամկետում:

Սույն կարգի 2.3, 2.6 - 2.9 և 2.11-2.12 կետերին համապատասխան բողոքը քննարկվում է դրա ստացման օրվանից եռամսյա ժամկետում:

Սույն կարգի 2.10 կետին համապատասխան բողոքը քննարկվում է դրա ստացման օրվանից 6-ամսյա ժամկետում:

Սույն կարգի 2.13 կետին համապատասխան դիմումը քննարկվում է դրա ստացման օրվանից եռամսյա ժամկետում:

5.2. Ցանկացած անձ, որին ուղարկվել է բողոքը քննարկման ընդունելու մասին ծանուցագիր, սույն կարգի 4.3 կետի համաձայն, կարող է դիմել խորհուրդ` կոլեգիայի նիստի անցկացման ժամկետների տեղափոխման խնդրանքով, սույն կարգի 4.1 կետին համապատասխան ժամկետների սահմաններում:

Դիմումը ներկայացվում է գրավոր, և դրա բավարարման դեպքում նշանակվում է կոլեգիայի նիստի անցկացման նոր թվական, ինչի մասին ծանուցվում են գանգատի քննարկման բոլոր մասնակիցները:

Կողմերից մեկի խնդրանքով և քննարկման բոլոր մասնակիցների համաձայնությամբ, գանգատի քննարկման սկիզբը կարող է հետաձգվել ոչ ավելի, քան վեց ամսով, սկսած սույն կարգի 5.1 կետով սահմանված ժամկետի ավարտի օրվանից:

5.3. Սույն կարգի 5.1 կետով սահմանված ժամկետները կարող են երկարաձգել նաև Բողոքարկման խորհրդի նախաձեռնությամբ` բողոքի (դիմումի) սպառիչ լրիվությամբ և անշահախնդիր քննարկումն ապահովելու նպատակով, ոչ ավելի քան վեց ամսով:

Եթե հարցվել են բողոքի կամ դիմումի քննարկման համար անհրաժեշտ լրացուցիչ նյութեր, ապա մինչև դրանց ստացումը նշված ժամկետների ընթացքը կասեցվում է:

6. Բողոքի քննարկումը խորհրդի կոլեգիայի նիստում

6.1. Բողոքը կամ դիմումը քննարկվում է խորհրդի կոլեգիայի նիստում, քննարկմանը մասնակցող անձանց պարտադիր ներկայությամբ: Կոլեգիայի կազմում չպետք է ընդգրկվեն բողոքի կամ փորձաքննության բաժնի վիճարկվող որոշում ընդունած փորձագետի հետ ազգակցական կապեր ունեցող անձինք, ինչպես նաև փորձաքննության վիճարկվող որոշման ընդունմանը ուղղակի կամ անուղղակի մասնակցած անձինք:

6.2. Բողոքի (դիմումի) քննարկմանը կարող են մասնակցել` բողոքարկողը (դիմողը), պահպանական փաստաթղթի սեփականատերը և (կամ) նրանց լիազորած ներկայացուցիչը և փորձաքննության բաժնի ներկայացուցիչները:

Հայարտոնագրի աշխատակիցները չեն կարող լինել նշված անձանց ներկայացուցիչներ:

6.3. Ցանկացած մասնակից, անհրաժեշտության դեպքում, կարող է այլ մասնագետներ հրավիրել բողոքի քննարկմանը մասնակցելու համար: Այն հայտերով, որոնց մասին դեռևս տեղեկությունները չեն հրապարակվել, այլ մասնագետների հրավիրումը հնարավոր է միայն հայտատուի համաձայնության դեպքում:

6.4. Քննարկման մասնակիցները իրավունք ունեն նախօրոք ծանոթանալ գործի նյութերին, դրանցից քաղվածքներ և պատճեններ անել, իսկ քննարկման ընթացքում` հարցեր տալ մյուս մասնակիցներին և կոլեգիայի անդամներին, խնդրագրեր ներկայացնել, տալ բանավոր և (կամ) գրավոր պարզաբանումներ քննարկվող հարցի էության վերաբերյալ, որոնք կցվում են կոլեգիայի նիստի արձանագրությանը:

6.5. Կոլեգիայի նիստի անցկացման տեղի և թվականի մասին ծանուցում ստացած մասնակցի նիստին չներկայանալը չի խոչընդոտում բողոքի (դիմումի) քննարկմանը: Սակայն կոլեգիան իրավասու է մասնակիցներից որևէ մեկի չներկայանալու դեպքում հետաձգել նիստը, անհնար համարելով բողոքի (դիմումի) քննարկումը տվյալ նիստի ընթացքում:

6.6. Կոլեգիայի նիստը հետաձգելու կամ այն կրկին անգամ անցկացնելու անհրաժեշտության դեպքում նիստի անցկացման նոր ժամկետը կարող է նշանակվել ոչ շուտ, քան առաջինից մեկ ամիս անց, հետաձգելով նաև բողոքի քննարկման ժամկետը, ինչը պետք է համաձայնեցվի բողոքարկողի (դիմողի) հետ:

6.7. Նիստը ղեկավարում է կոլեգիայի նախագահը, ապահովելով բողոքի (դիմումի) ամբողջական, բազմակողմանի և անկողմնակալ քննարկումը: Նախագահողը բացում է կոլեգիայի նիստը, ներկայացնում է կոլեգիայի անդամներին և քննարկմանը մասնակցող անձանց:

6.8. Քննարկման յուրաքանչյուր մասնակից կարող է բացարկ հայտարարել կոլեգիայի ցանկացած անդամի (անդամների)` սույն կարգի 6.1. կետում նշված պատճառների հիման վրա: Բացարկը պետք է լինի պատճառաբանված և հայտարարվի գործի ըստ էության քննարկումից առաջ:

Բացարկը քննարկվում է կոլեգիայի անդամների կողմից, և այն բավարարելու դեպքում նշանակվում է կոլեգիայի նոր կազմ, որը որոշում է բողոքի (դիմումի) քննարկման նոր ժամկետը:

6.9. Բողոքի (դիմումի) ըստ էության քննարկումն սկսվում է նախագահողի կամ կոլեգիայի անդամներից մեկի զեկուցումով: Գործի հետագա քննարկումը կատարվում է հետևյալ հաջորդականությամբ`

ա) բողոքարկողի (դիմողի) և (կամ) նրա ներկայացուցչի ելույթը.

բ) փորձաքննության բաժնի ներկայացուցչի ելույթը.

գ) արտոնագրատիրոջ (ապրանքային նշանի սեփականատիրոջ) ելույթը պահպանական փաստաթղթի վիճարկման դեպքում.

դ) կողմերի պատասխանները կոլեգիայի անդամների հարցերին:

6.10. Գործի էության քննարկման ընթացքում կոլեգիան սահմանափակվում է փորձաքննության ընթացքում քննարկված նյութերով և լրացուցիչ որոնումներ չի կատարում:

6.11. Նոր ներկայացված տեղեկությունների վերաբերյալ ավելի մանրամասն հետազոտություններ կատարելու անհրաժեշտության դեպքում, կոլեգիայի որոշմամբ նիստը կարող է հետաձգվել սույն կարգի 6.6 կետի դրույթներին համապատասխան:

6.12. Կոլեգիայի նիստի ընթացքը արձանագրվում է, իսկ անհրաժեշտության դեպքում նաև ձայնագրվում մագնիսական ժապավենի վրա, ինչի մասին տեղեկացվում են բոլոր մասնակիցները:

Արձանագրությունը կցվում է գործին:

6.13. Կոլեգիայի նիստի արձանագրությունը վարում է կոլեգիայի քարտուղարը, որը նշանակվում է նախագահողի կողմից` կոլեգիայի անդամներից:

6.14. Արձանագրության մեջ նշվում են`

նիստի անցկացման թվականը.

կոլեգիայի անդամների և նիստի մասնակիցների ազգանունը, անունը, հայրանունը.

նրանց առնչությունը քննարկվող հարցին.

քննարկվող հայտի, արտոնագրի և (կամ) նշանի վկայականի համարը և օբյեկտի անվանումը (նշանի պատկերը) (սույն կարգի 2.13 կետով նախատեսված դիմումի քննարկման դեպքում բերվում է ապրանքային նշանի նկարագրությունը).

գործի գրանցման համարը.

տեղեկություններ նիստի մասնակիցների մասին.

բողոքում (դիմումում) կամ փորձաքննության որոշման մեջ բացակայող փաստարկների, խնդրագրերի կամ պարզաբանումների վերաբերյալ մասնակիցների դիմումների համառոտ շարադրանքը.

կոլեգիայի որոշման բանաձևային մասը:

6.15. Քննարկմանը մասնակցող անձինք և կոլեգիայի անդամները կարող են արձանագրության մեջ մտցնել իրենց հատուկ կարծիքը կամ այն գրավոր ներկայացնել եռօրյա ժամկետում: Վերջինս գրանցվում և կցվում է կոլեգիայի նիստի արձանագրությանը:

6.16. Արձանագրությունը հրապարակում է նախագահողը, և այն տրվում է կոլեգիայի անդամներին` ստորագրության:

7. Բողոքարկման խորհրդի որոշումները

7.1. Սույն կարգի 2.1-2.3 կետերին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, կրկնական նախնական փորձաքննության որոշումը չեղյալ ճանաչելու և գյուտի հայտով գործավարությունը շարունակելու մասին.

բ) բողոքը բավարարելու, կրկնական փորձաքննության որոշումը չեղյալ ճանաչելու և օգտակար մոդելի կամ արդյունաբերական նմուշի արտոնագիր տալու մասին.

գ) բողոքը բավարարելու, նախնական փորձաքննության որոշումը չեղյալ ճանաչելու և ապրանքային նշանի, ապրանքի ծագման տեղանվան գրանցման և (կամ) օգտագործման իրավունքի հայտը քննարկման ընդունելու մասին.

դ) բողոքը մերժելու և նախնական փորձաքննության որոշումն ուժի մեջ թողնելու մասին:

7.2. Սույն կարգի 2.4 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, կրկնական փորձաքննության որոշումը չեղյալ ճանաչելու և գյուտի նախնական արտոնագիր տալու մասին.

բ) բողոքը մերժելու և կրկնական փորձաքննության որոշումն ուժի մեջ թողնելու մասին:

7.3. Սույն կարգի 2.5 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, գերատեսչության որոշումը չեղյալ ճանաչելու և գյուտի հիմնական արտոնագիր տալու մասին.

բ) բողոքը մերժելու և գերատեսչության որոշումն ուժի մեջ թողնելու մասին:

7.4. Սույն կարգի 2.6 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, հայտարկվող նշանի փորձաքննության որոշումը չեղյալ ճանաչելու և ապրանքային նշանը գրանցելու մասին.

բ) բողոքը մերժելու և փորձաքննության որոշումն ուժի մեջ թողնելու մասին:

7.5. Սույն կարգի 2.7 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, հայտարկվող տեղանվան փորձաքննության որոշումը չեղյալ ճանաչելու, ապրանքի ծագման տեղանունը գրանցելու և դրա օգտագործման իրավունք ընձեռելու մասին.

բ) բողոքը մերժելու և փորձաքննության որոշումն ուժի մեջ թողնելու մասին:

7.6. Սույն կարգի 2.8 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, փորձաքննության որոշումը չեղյալ ճանաչելու և հայտարկվող ֆիրմային անվանումը գրանցելու մասին.

բ) բողոքը մերժելու և փորձաքննության որոշումն ուժի մեջ թողնելու մասին:

7.7. Սույն կարգի 2.9 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, փորձաքննության որոշումը փոփոխելու և բողոքով նախատեսված փոփոխություններով` հայտարկվող նշանը գրանցելու մասին.

բ) բողոքը բավարարելու և հայտարկվող նշանի գրանցումը մերժելու մասին փորձաքննության որոշումը չեղյալ ճանաչելու մասին.

գ) բողոքը մերժելու և փորձաքննության որոշումն ուժի մեջ թողնելու մասին:

7.8. Սույն կարգի 2.10 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքն ամբողջովին կամ մասնակիորեն բավարարելու, արտոնագիր տալու մասին փորձաքննության որոշումը չեղյալ ճանաչելու կամ որոշումը փոփոխելու և պահպանական փաստաթուղթն ամբողջովին կամ մասնակիորեն անվավեր ճանաչելու մասին.

բ) բողոքը մերժելու և պահպանական փաստաթուղթն ուժի մեջ թողնելու մասին:

7.9. Սույն կարգի 2.11 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, ապրանքային նշանը գրանցելու մասին փորձաքննության որոշումը չեղյալ ճանաչելու կամ փոփոխելու և (կամ) նշանի գրանցումն ամբողջովին կամ մասնակիորեն անվավեր ճանաչելու մասին.

բ) բողոքը մերժելու և նշանի գրանցումն ուժի մեջ թողնելու մասին:

7.10. Սույն կարգի 2.12 կետին համապատասխան բողոքի քննարկման արդյունքում ընդունվում են հետևյալ որոշումները`

ա) բողոքը բավարարելու, ապրանքի ծագման տեղանվան գրանցման և (կամ) դրա օգտագործման իրավունք ընձեռելու մասին փորձաքննության որոշումը չեղյալ ճանաչելու և գրանցման և (կամ) ապրանքի ծագման տեղանվան օգտագործելու իրավունքի վկայականը անվավեր ճանաչելու մասին.

բ) բողոքը մերժելու և տեղանվան գրանցումը և (կամ) վկայականը ուժի մեջ թողնելու մասին:

7.11. Սույն կարգի 2.13 կետին համապատասխան դիմումի քննարկման արդյունքում ընդունվում են հետևյալ որոշումները`

ա) դիմումը ամբողջովին կամ մասնակիորեն բավարարելու և ապրանքային նշանը ՀՀ-ում հանրահայտ ճանաչելու մասին.

բ) ապրանքային նշանը ՀՀ-ում հանրահայտ ճանաչելու մասին դիմումը մերժելու մասին:

8. Բողոքարկման խորհրդի որոշման ուժի մեջ մտնելը

8.1. Բողոքի (դիմումի) քննարկումը կոլեգիայի նիստում (նիստերում) ավարտելու և արձանագրությունը ստորագրելու օրվանից մեկ ամսվա ընթացքում կոլեգիան խորհրդի անունից բողոքի (դիմումի) վերաբերյալ ընդունում է հիմնավորված որոշում:

8.2. Կոլեգիան որոշումներ է ընդունում ձայների պարզ մեծամասնությամբ: Ձայների հավասարության դեպքում կոլեգիայի ղեկավարի ձայնը վճռորոշ է:

8.3. Սահմանված ձևով կազմված որոշումն ստորագրում է բողոքարկման խորհրդի նախագահը: Կոլեգիայի ցանկացած անդամի հատուկ կարծիքը գրանցվում է որոշման հավելվածում:

8.4. Խորհրդի որոշումը կցվում է գործին, իսկ դրա պատճենը` ոչ ուշ, քան որոշումն ընդունելուց 15 օր հետո ուղարկվում է բողոքարկողին (դիմողին), իսկ պահպանական փաստաթղթի վիճարկման դեպքում` նաև դրա սեփականատիրոջը:

8.5. Խորհրդի որոշումն ուժի մեջ է մտնում այդ որոշումը սույն կարգի 8.4 կետում նշված անձանց ուղարկելու օրվանից:

8.6. Խորհրդի որոշմանը չհամաձայնելու դեպքում կողմերից յուրաքանչյուրը կարող է դիմել դատարան:

9. Հետագա գործավարությունը

9.1. Գործի նյութերը վերադարձվում են փորձաքննության բաժին` ընդունված որոշմանը համապատասխան հետագա գործավարության համար:

9.2. Խորհրդի որոշումն ստանալու օրվանից մեկ ամսվա ընթացքում փորձաքննության բաժինը ընդունում է նոր, խորհրդի որոշմանը համապատասխան որոշում:

9.3. Գործը կոլեգիայի նիստի արձանագրության և խորհրդի որոշման պատճենի հետ միասին պահվում է խորհրդում, մինչև արդյունաբերական սեփականության օբյեկտների մասին ՀՀ համապատասխան օրենքով խորհրդի որոշումները դատարանում բողոքարկելու համար բոլոր սահմանված ժամկետների ավարտը: