ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԿՈԼԵԳԻԱ

ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԵՎ ԿՈՐԵԱՅԻ ՀԱՆՐԱՊԵՏՈՒԹՅԱՆ՝ ՊԵՏԱԿԱՆ ԳՆՈՒՄՆԵՐԻ ՀԱՐՑԵՐՈՎ ԾԱՌԱՅՈՒԹՅԱՆ ՄԻՋԵՎ ՓՈԽԸՄԲՌՆՄԱՆ ՀՈՒՇԱԳՐԻ ՆԱԽԱԳԾԻ ՄԱՍԻՆ

1. Հավանություն տալ Եվրասիական տնտեսական հանձնաժողովի և Կորեայի Հանրապետության` պետական գնումների հարցերով ծառայության միջև փոխըմբռնման հուշագրի նախագծին (կից ներկայացվում է):

Հանձնարարել Եվրասիական տնտեսական հանձնաժողովի՝ Մրցակցության և հակամենաշնորհային կարգավորման հարցերով կոլեգիայի անդամ (նախարար) Ն.Շ. Ալդաբերգենովին ստորագրել նշված Հուշագիրը՝ թույլատրելով այն ստորագրելու մասին բանակցությունների ընթացքում կից ներկայացվող նախագծում կատարել սկզբունքային բնույթ չունեցող փոփոխություններ։

2. Սույն Կարգադրությունն ուժի մեջ է մտնում դրա ընդունման օրվանից։

Նախագիծ

ՀՈՒՇԱԳԻՐ

Եվրասիական տնտեսական հանձնաժողովի և Կորեայի Հանրապետության՝ պետական գնումների հարցերով ծառայության միջև փոխըմբռնման մասին

Եվրասիական տնտեսական հանձնաժողովը և Կորեայի Հանրապետության՝ պետական գնումների հարցերով ծառայությունը, այսուհետ՝ Կողմեր,

մտադրություն ունենալով զարգացնել համագործակցությունը պետական գնումների կարգավորման բնագավառում,

ձգտելով ստեղծել կողմերի միջև փոխհարաբերությունների զարգացման համար բարենպաստ պայմաններ,

հիմնվելով հավասարության և փոխադարձ շահի սկզբունքների վրա,

համաձայնություն տալով մրցակցության զարգացման և պետական գնումների թափանցիկության ապահովման կարևորությանը՝ Եվրասիական տնտեսական միության անդամ պետությունների և Կորեայի Հանրապետության տնտեսությունների զարգացման նպատակով,

համաձայնեցին հետևյալի մասին.

1. Կողմերը մտադիր են փոխգործակցություն իրականացնել և զարգացնել համագործակցությունը՝ Եվրասիական տնտեսական միության անդամ պետությունների և Կորեայի Հանրապետության տարածքներում կատարվող պետական գնումների (այդ թվում՝ էլեկտրոնային պետական գնումների) վարչարարության գործընթացների կատարելագործմանն աջակցելու նպատակով:

2. Սույն Հուշագրի իրականացման շրջանակներում Կողմերի փոխգործակցությունը կիրագործվի Եվրասիական տնտեսական միության իրավունքի մաս կազմող միջազգային պայմանագրերով ու ակտերով և Կորեայի Հանրապետության օրենսդրությամբ սահմանված իրավասությունների շրջանակներում հետևյալ եղանակով.

տեղեկությունների և փորձի փոխանակում՝ պետական գնումների կարգավորման և պետական գնումների շուկաների գործունեության բնագավառում, ներառյալ համապատասխան բնագավառներում լավագույն վարչարարական գործելակերպերի վերաբերյալ տեղեկությունների փոխանակումը,

իրավական կարգավորման, էլեկտրոնային պետական գնումների համակարգերի ապահովման տեխնոլոգիաների և կատարելագործման հարցերով խորհրդակցությունների անցկացում,

համատեղ մոնիթորինգի և պետական գնումների բնագավառում այլ հետազոտությունների անցկացում,

այցելությունների, սեմինարների և համաժողովների անցկացում,

մասնակցություն Կողմերի կողմից կազմակերպվող ցուցահանդեսներին, կրթական, ստաժավորման ծրագրերին, այդ թվում՝ որակավորման բարձրացման ծրագրերին, դասընթացներին և պետական գնումների բնագավառի հարցերին առնչվող այլ միջոցառումներին,

փոխգործակցության այլ ձևեր՝ ըստ կողմերի համաձայնության:

3. Կողմերի փոխադարձ համաձայնությամբ սույն Հուշագրում կարող են կատարվել փոփոխություններ՝ համապատասխան արձանագրություն ստորագրելու միջոցով։

4. Սույն հուշագրի իրականացման և կիրառման հետ կապված հարցերը կլուծվեն Կողմերի միջև խորհրդակցությունների և բանակցությունների միջոցով:

5. Սույն Հուշագիրը միջազգային պայմանագիր չէ, չի առաջացնում միջազգային իրավունքով կարգավորվող իրավունքներ ու պարտավորություններ և Կողմերի վրա ֆինանսական պարտավորություններ չի դնում։

6. Սույն Հուշագիրը կիրառվում է դրա ստորագրման օրվանից։

7. Կողմերից յուրաքանչյուրն իրավունք ունի դադարեցնելու սույն Հուշագրի կիրառումը մյուս Կողմին համապատասխան գրավոր ծանուցում ուղարկելու միջոցով։ Սույն Հուշագրի կիրառումը դադարեցվում է մյուս Կողմի կողմից այդպիսի ծանուցում ստանալու օրվանից։

Ստորագրված է քաղաքում 2015 թվականի « »-ին, երկու օրինակից՝ յուրաքանչյուրը ռուսերենով, անգլերենով և կորեերենով:

Տարաձայնությունների դեպքում գերակայում է անգլերեն լեզվով տեքստը։