«Գրանցված է»
ՀՀ արդարադատության
նախարարության կողմից
11 մայիսի 2004 թ.
Պետական գրանցման թիվ 10504112

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԲՆԱՊԱՀՊԱՆՈՒԹՅԱՆ ՆԱԽԱՐԱՐ

3 մայիսի 2004 թ.  ք. Երևան

N 112-Ն

Հ Ր Ա Մ Ա Ն

ԳԵՏԱՈՂՈՂԱՏԱՅԻՆ ՏԻՊԻ ՀԱՆՔԱՎԱՅՐԵՐՈՒՄ ԱՎԱԶԻ ԵՎ ԱՎԱԶԱԿՈՊՃԱՅԻՆ ԽԱՌՆՈՒՐԴԻ ՎԵՐԱԿԱՆԳՆՎՈՂ ՊԱՇԱՐՆԵՐԻ ԳՆԱՀԱՏՄԱՆ ՄԵԹՈԴԱԿԱՆ ՑՈՒՑՈՒՄՆԵՐԸ ՀԱՍՏԱՏԵԼՈՒ ՄԱՍԻՆ

Ղեկավարվելով Հայաստանի Հանրապետության «Ընդերքի մասին» օրենսգրքի 27-րդ հոդվածի 1-ին կետի պահանջներով և գետաողողատային տիպի հանքավայրերի հետախուզման աշխատանքները մեթոդական հենքով ապահովելու նպատակով

Հրամայում եմ`

Հաստատել «Գետաողողատային տիպի հանքավայրերում ավազի (ավազակոպճային, ավազակոպճագլաքարային խառնուրդների) վերականգնվող պաշարների գնահատման մեթոդական ցուցումները» համաձայն հավելվածի:

Նախարար

Վ. Այվազյան

Հավելված   Հաստատված է Հայաստանի Հանրապետության բնապահպանության նախարարի 2004 թվականի մայիսի 3 N 112-Ն հրամանով

ԳԵՏԱՈՂՈՂԱՏԱՅԻՆ ՏԻՊԻ ՀԱՆՔԱՎԱՅՐԵՐՈՒՄ ԱՎԱԶԻ (ԱՎԱԶԱԿՈՊՃԱՅԻՆ, ԱՎԱԶԱԿՈՊՃԱԳԼԱՔԱՐԱՅԻՆ ԽԱՌՆՈՒՐԴՆԵՐԻ) ՎԵՐԱԿԱՆԳՆՎՈՂ ՊԱՇԱՐՆԵՐԻ ԳՆԱՀԱՏՄԱՆ ՄԵԹՈԴԱԿԱՆ ՑՈՒՑՈՒՄՆԵՐ

1. Սույն կարգը տարածվում է գետերի ողողատներում գտնվող հանքավայրերի (ողողատային տիպի հանքավայրեր) վրա, որոնց պաշարները պարբերաբար ընթացող վարարումների արդյունքում այս կամ այն չափով վերականգնվում են:

2. Ողողատային տիպի հանքավայրերի վերականգնվող պաշարները, դասվում են C₁ կարգի և, որպես կանոն, գնահատվում ու հաստատվում են երկու փուլով՝ երկրաբանահետախուզական աշխատանքների և արդյունահանման գործընթացն ուղեկցող դիտարկումների արդյունքներով:

3. Ողողատային տիպի հանքավայրերում երկրաբանահետախուզական աշխատանքներն իրականացվում են ստատիկ պաշարներով բնութագրվող դարավանդային հանքավայրերի հետախուզման համար կիրառվող մեթոդներով ու միջոցներով:

4. Ողողատային տիպի հանքավայրերի վերականգնվող պաշարների գնահատականը տրվում է դրանց ընդհանուր և տեսակարար ստատիկ պաշարների (համապատասխանաբար Q_ս, հազ. մ³ և q_ս, հազ. մ³/հա) ու վերջիններիս վերականգնման գործակցի (K_վ անգամ/տարի) արտադրյալով՝ Q_վ = Q_ս x K_վ հազ. մ³/տարի, q_վ = q_ս x K_վ, հազ. մ³/հա x տարի:

5. Տեսակարար ստատիկ պաշարները որոշվում են ընդհանուր ստատիկ պաշարների և հանքավայրի մակերեսի (S, հա) հարաբերությամբ՝ q_ս= Q_ս: S, հազ. մ³/հա:

6. Երկրաբանահետախուզական աշխատանքների արդյունքներով վերականգնվող պաշարների գնահատման (1-ին փուլ) համար դրանց վերականգնման գործակիցն ընդունվում է տվյալ գետում տարվա ընթացքում տեղի ունեցող վարարումների թվին հավասար, ինչը համապատասխանում է պաշարների վերականգնման առավելագույն հնարավոր ինտենսիվությանը: Նշված ձևով գնահատված պաշարները դասվում են C₁ կարգի:

7. Ողողատային տիպի հանքավայրերի պաշարների հաշվարկման նյութերը ձևակերպվում և Հայաստանի Հանրապետության բնապահպանության նախարարության աշխատակազմի Օգտակար հանածոների պաշարների գործակալության (այսուհետ՝ ՀՀ ՕՀՊԳ) դիտարկմանն են ներկայացվում նույն կարգով, որը սահմանված է ստատիկ պաշարներով բնութագրվող պինդ օգտակար հանածոների հանքավայրերի համանման նյութերի համար: Ի տարբերություն վերջիններիս, այդ նյութերը պետք է պարունակեն նաև պաշարների վերականգնման դինամիկայի գնահատականին նվիրված բաժին:

8. Երկրաբանահետախուզական աշխատանքների արդյունքներով ՀՀ ՕՀՊԳ-ում հաստատված վերականգնվող պաշարները, ընդերքօգտագործողի ցանկությամբ ու նախաձեռնությամբ, կարող են վերահաշվարկվել և վերահաստատվել (2-րդ փուլ):

9. Պաշարների վերահաշվարկն ու վերահաստատումն իրականացվում են առնվազն երեք տարվա ընթացքում պետական երկրաբանամարկշեյդերական վերահսկողության ներքո կատարված դիտարկումների արդյունքում՝ պաշարների վերականգնման ճշգրտված գործակցի կիրառմամբ:

10. Պաշարների վերահաստատման փուլում ՀՀ ՕՀՊԳ-ին ներկայացվող նյութերը պետք է պարունակեն 1-ին փուլում ներկայացված նյութերի համառոտագիրը և համալրվեն պաշարների վերականգնման գործակցի ճշգրտված մեծությունը հիմնավորող առաջնային երկրաբանամարկշեյդերական փաստագրման նյութերի կրկնօրինակներով ու վերականգնվող պաշարների ճշգրտված հաշվարկով: Այս նյութերը հավելվում են հանքավայրի պաշարների վերահաստատման վերաբերյալ ՀՀ ՕՀՊԳ-ի որոշմանը:

11. Սույն կարգի 10-րդ կետի պահանջներին համապատասխան կազմված և ՀՀ ՕՀՊԳ-ի դիտարկմանը ներկայացված նյութերի փորձաքննության տևողությունը, որպես կանոն, չի գերազանցում երկշաբաթյա ժամկետը: