«Վավերացնում եմ»
Հայաստանի Հանրապետության
Նախագահ Ռ. Քոչարյան
13 փետրվարի 2006 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

19 հունվարի 2006 թվականի N 61-Ն

ՏՐԱԿՏՈՐԻՍՏ-ՄԵՔԵՆԱՎԱՐԻ ԳԻՏԵԼԻՔՆԵՐԻ ՍՏՈՒԳՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Գյուղատնտեսական տեխնիկայի շահագործման մասին» Հայաստանի Հանրապետության օրենքի 6-րդ հոդվածի 4-րդ մասի՝ Հայաստանի Հանրապետության կառավարությունը որոշում է.

1. Հաստատել`

ա) տրակտորիստ-մեքենավարի գիտելիքների ստուգման կարգը՝ համաձայն N 1 հավելվածի.

բ) տրակտորիստ-մեքենավարի վկայականի ձևանմուշը՝ համաձայն N 2 հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը։

Կ Ա Ր Գ

ՏՐԱԿՏՈՐԻՍՏ-ՄԵՔԵՆԱՎԱՐԻ ԳԻՏԵԼԻՔՆԵՐԻ ՍՏՈՒԳՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում է Հայաստանի Հանրապետությունում տրակտորիստ-մեքենավարի գիտելիքների ստուգման կազմակերպման, անցկացման և վարման իրավունք տալու գործընթացը՝ «Գյուղատնտեսական տեխնիկայի շահագործման մասին» Հայաստանի Հանրապետության օրենքին (այսուհետ՝ օրենք) համապատասխան:

2. Սույն կարգի նպատակն է Հայաստանի Հանրապետությունում տրակտորիստ-մեքենավարի գիտելիքների ստուգման և տրակտորիստ-մեքենավարի համապատասխան կարգի վարման իրավունքի վկայական տալու միասնական գործընթացի կանոնակարգումը:

3. Տրակտորիստ-մեքենավարի գիտելիքների ստուգումն ու արդյունքների ամփոփումն իրականացնում է օրենքով սահմանված կարգով լիազորված մարմնի կողմից ստեղծված որակավորման հանձնաժողովը (այսուհետ՝ հանձնաժողով), որի կազմում ընդգրկվում են 2 անձ` Հայաստանի Հանրապետության գյուղատնտեսության նախարարությունից և մեկ անձ` համապատասխան կրթական հաստատությունից:

4. Հանձնաժողովի կազմը և կանոնադրությունը հաստատում է Հայաստանի Հանրապետության գյուղատնտեսության նախարարը:

II. ՏՐԱԿՏՈՐԻՍՏ-ՄԵՔԵՆԱՎԱՐԻ ԳԻՏԵԼԻՔՆԵՐԻ ՍՏՈՒԳՄԱՆ ԿԱԶՄԱԿԵՐՊՄԱՆ ԳՈՐԾԸՆԹԱՑԸ

 5. Տրակտորիստ-մեքենավարի գիտելիքների ստուգման և վարման իրավունք տալու գործընթացը կազմակերպում է գյուղատնտեսական տեխնիկայի պետական տեսչությունը:

6. Տրակտորիստ-մեքենավարի վարման իրավունքի վկայականը տրվում է գյուղատնտեսական տեխնիկայի շահագործման, ճանապարհային երթևեկության կանոնների իմացության և գործնական վարման հմտությունների ստուգումից հետո:

7. Հանձնաժողովը չի ստուգում վարորդական վկայական ունեցող դիմումատուի ճանապարհային երթևեկության կանոնների իմացությունը, եթե դիմումատուն դիմել է 3-րդ կարգի տրակտորիստ-մեքենավարի վկայական ստանալու համար:

8. Հանձնաժողովը քննությունն անցկացնում է Հայաստանի Հանրապետության գյուղատնտեսության նախարարի կողմից հաստատված հարցաշարերի միջոցով` յուրաքանչյուր հարցաթերթիկում ընդգրկելով հնգական հարց գյուղատնտեսական տեխնիկայի շահագործման և ճանապարհային երթևեկության կանոնների վերաբերյալ:

9. Տրակտորիստ-մեքենավարի վարման իրավունքի վկայական ստանալու կամ վարման իրավունքի կարգը փոխելու համար դիմող անձը գյուղատնտեսական տեխնիկայի պետական տեսուչին (այսուհետ՝ տեսուչ) ներկայացնում է օրենքով սահմանված հետևյալ փաստաթղթերը՝

ա) դիմում.

բ) անձը հաստատող փաստաթուղթ (անձնագիր).

գ) տրակտորիստ-մեքենավարների դասընթացի ավարտման մասին տրված փաստաթուղթ.

դ) 2 լուսանկար՝ 3x4 սմ չափսի.

ե) պետական տուրքի վճարման անդորրագիր.

զ) տրակտորիստ-մեքենավարի վկայականը՝ վարման իրավունքի կարգը փոխելու դեպքերում:

10. Սույն կարգի 9-րդ կետով նախատեսված փաստաթղթերը ներկայացնելու դեպքում տեսուչը դիմումատուին որակավորման քննությունից առնվազն 15 օր առաջ տրամադրում է հարցաշարը և տեղեկացնում որակավորման քննությունների անցկացման օրվա, վայրի և ժամի մասին:

11. Հանձնաժողովի որոշումներն ընդունվում են հանձնաժողովի նիստերում՝ հանձնաժողովի մասնակից անդամների ձայների պարզ մեծամասնությամբ:

12. Որակավորման քննության արդյունքները յուրաքանչյուր դիմումատուի համար ամփոփվում են, հանձնաժողովը տալիս է եզրակացություն (ձև N 1), որը ստորագրվում է հանձնաժողովի նախագահի և հանձնաժողովի անդամների կողմից: Այն կազմվում է 3 օրինակից, որից մեկը պահվում է տվյալ մարզի տեսուչի մոտ, մեկը տրվում է դիմումատուին, իսկ երրորդը՝ հանձնաժողովը ներկայացնում է գյուղատնտեսական տեխնիկայի պետական տեսչության պետին:

13. Հարցաթերթիկում ընդգրկված յուրաքանչյուր ոլորտի հարցերից երկուսից ավելի հարցերի չպատասխանելու կամ գործնական վարման անբավարար հմտության դեպքում հանձնաժողովը կազմում է բացասական եզրակացություն:

14. Դիմումատուն կարող է կրկին մասնակցել քննություններին ոչ շուտ, քան հանձնաժողովի հաջորդ նիստին:

15. Որակավորման քննությունների դրական եզրակացության հիման վրա տեսչության կողմից տվյալ անձին տրվում է տրակտորիստ-մեքենավարի վարման իրավունքի վկայական (74 x 105 մմ չափսերի), որում համապատասխան կարգի տողում դրվում է «թույլատրվում է» նշանը:

16. Տրակտորիստ-մեքենավարի վարման իրավունքի վկայականի տվյալները գրանցվում են տրակտորիստ-մեքենավարի վարման իրավունքի վկայականների գրանցամատյանում (ձև N 2):