«Վավերացնում եմ»
Հայաստանի Հանրապետության
Նախագահ Ռ. Քոչարյան
23 հոկտեմբերի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

23 հոկտեմբերի 2000 թվականի N 674
քաղ. Երևան

ՊԵՏԱԿԱՆ ՍԵՓԱԿԱՆՈՒԹՅՈՒՆ ՀԱՄԱՐՎՈՂ ԲՆԱԿԱՐԱՆՆԵՐԸ ՈՐՊԵՍ ՊԱՇՏՈՆԵԱԿԱՆ (ԾԱՌԱՅՈՂԱԿԱՆ) ԲՆԱԿԱՐԱՆՆԵՐ ՀԱՏԿԱՑՆԵԼՈՒ ԿԱՐԳԻ ԵՎ ՊԱՅՄԱՆՆԵՐԻ ՄԱՍԻՆ

«Պետական բնակարանային ֆոնդի բնակարանների անհատույց մասնավորեցման մասին» Հայաստանի Հանրապետության օրենքի 2 հոդվածին համապատասխան` Հայաստանի Հանրապետության կառավարությունը որոշում է.

1. Հաստատել պետական սեփականություն համարվող բնակարանները որպես պաշտոնեական (ծառայողական) բնակարաններ հատկացնելու կարգը (կցվում է):

2. Սահմանել, որ`

ա) պաշտոնեական (ծառայողական) բնակարանները նախատեսվում են այն անձանց բնակեցման համար, ովքեր, ելնելով իրենց աշխատանքային հարաբերությունների բնույթից, պետք է բնակվեն աշխատավայրի գտնվելու տարածքում կամ դրա մոտակայքում և ովքեր տվյալ բնակավայրում չունեն այլ բնակելի տարածություն.

բ) պաշտոնեական (ծառայողական) բնակարանները կարող են հատկացվել միայն պետական հիմնարկներում աշխատող անձանց` նրանց աշխատանքային հարաբերությունների իրականացման կապակցությամբ` այդ աշխատանքային հարաբերությունների իրականացման ամբողջ ժամանակաընթացքում.

գ) պաշտոնեական (ծառայողական) բնակարանները հատկացվում են վարձակալության իրավունքով:

3. Սույն որոշումն ուժի մեջ է մտնում 2000 թվականի հոկտեմբերի 23-ից:

Կ Ա Ր Գ

պետական սեփականություն համարվող բնակարանները որպես պաշտոնեական (ծառայողական) բնակարաններ հատկացնելու

1. Պետական սեփականություն համարվող բնակարանները պաշտոնեականի (ծառայողականի) թվին են դասվում Հայաստանի Հանրապետության կառավարության որոշմամբ և հանձնվում են Հայաստանի Հանրապետության պետական գույքի կառավարման նախարարության տնօրինությանը, որն ապահովում է նշված բնակարանների հաշվառումը:

2. Պաշտոնեական (ծառայողական) բնակարան ստանալու համար անձը դիմում է ներկայացնում այն պետական հիմնարկի ղեկավարությանը, որտեղ աշխատում է:

Պետական հիմնարկի ղեկավարությունը դիմումն ստանալուց հետո 10-օրյա ժամկետում այն իր կարծիքի հետ միասին ներկայացնում է համապատասխան վերադաս պետական մարմին:

3. Պետական մարմինը սույն կարգի 2-րդ կետում նշված դիմումը պետական հիմնարկի ղեկավարության կողմից ստանալուց հետո 10-օրյա ժամկետում այն իր միջնորդության հետ միասին ներկայացնում է Հայաստանի Հանրապետության պետական գույքի կառավարման նախարարություն:

4. Հայաստանի Հանրապետության պետական գույքի կառավարման նախարարությունը Հայաստանի Հանրապետության կառավարության աշխատակազմի ղեկավար-նախարարի համաձայնությամբ հատկացնում է պաշտոնեական (ծառայողական) բնակարան:

5. Պաշտոնեական (ծառայողական) բնակարանի վարձակալության պայմանագիրը կնքվում է Հայաստանի Հանրապետության պետական գույքի կառավարման նախարարության կողմից, իսկ վարձակալության իրավունքը ենթակա է սահմանված կարգով գույքային իրավունքների պետական գրանցման: