«Վավերացնում եմ»

Հայաստանի Հանրապետության

Նախագահ Ռ. Քոչարյան

23 նոյեմբերի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 հոկտեմբերի 2002 թվականի N 1798-Ն

ՀԱՐԿԱՅԻՆ ԾԱՌԱՅՈՒԹՅԱՆ ՄՐՑՈՒԹԱՅԻՆ ԵՎ ԱՏԵՍՏԱՎՈՐՄԱՆ ՀԱՆՁՆԱԺՈՂՈՎԻ ԱՆԴԱՄՆԵՐԻ ԱՌԱՋԱԴՐՄԱՆ ՉԱՓԱՆԻՇՆԵՐԸ ՍԱՀՄԱՆԵԼՈՒ ՄԱՍԻՆ

Համաձայն «Հարկային ծառայության մասին» Հայաստանի Հանրապետության օրենքի 17-րդ հոդվածի 1-ին մասի՝ Հայաստանի Հանրապետության կառավարությունը որոշում է.

1. Սահմանել հարկային ծառայության մրցութային և ատեստավորման հանձնաժողովի անդամների առաջադրման չափանիշները՝ համաձայն հավելվածի:

2. Հայաստանի Հանրապետության պետական եկամուտների նախարարին՝ սույն որոշումն ուժի մեջ մտնելուց հետո 10-օրյա ժամկետում Հայաստանի Հանրապետության կառավարության հաստատմանը ներկայացնել հարկային ծառայության մրցութային և ատեստավորման հանձնաժողովի անհատական կազմը և աշխատակարգը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Չ Ա Փ Ա Ն Ի Շ Ն Ե Ր

ՀԱՐԿԱՅԻՆ ԾԱՌԱՅՈՒԹՅԱՆ ՄՐՑՈՒԹԱՅԻՆ ԵՎ ԱՏԵՍՏԱՎՈՐՄԱՆ ՀԱՆՁՆԱԺՈՂՈՎԻ ԱՆԴԱՄՆԵՐԻ ԱՌԱՋԱԴՐՄԱՆ

1. Սույն չափանիշներով սահմանվում են հարկային ծառայության մրցութային և ատեստավորման հանձնաժողովի (այսուհետ՝ հանձնաժողով) նախագահի և անդամների առաջադրման չափանիշները:

2. Հայաստանի Հանրապետության հարկային ծառայության մարմնի (այսուհետ՝ հարկային ծառայության մարմին) ղեկավարը, ելնելով սույն չափանիշներից, հաստատում է հանձնաժողովի անհատական կազմը հանձնաժողովի անհատական կազմը (նախագահի և անդամների (քարտուղարի) թեկնածուներին):

(2-րդ կետը փոփ. 16.10.08 N 1181-Ն)

3. Հանձնաժողովի նախագահի և անդամների առաջադրման համար անհրաժեշտ են հետևյալ չափանիշները՝

ա) հարկային ծառայության աշխատանքային ստաժ

Հանձնաժողովի նախագահի թեկնածուն առաջադրման պահին պետք է ունենա հարկային ծառայության առնվազն երեք տարվա աշխատանքային ստաժ, հանձնաժողովի անդամի թեկնածուն՝ հարկային ծառայության, մաքսային ծառայության կամ քաղաքացիական ծառայության կամ ֆինանսահարկային բնագավառի գիտական աշխատանքի առնվազն մեկ տարվա աշխատանքային ստաժ.

բ) ծառայողական բարձր կարգապահություն

Հանձնաժողովի նախագահ և անդամ չեն կարող լինել այն անձինք, ովքեր առաջադրման պահին նախորդող մեկ տարվա ծառայության ընթացքում ենթարկվել են կարգապահական պատասխանատվության.

գ) հարկային և այլ օրենսդրության իմացություն

Հանձնաժողովի նախագահը պետք է հմտորեն տիրապետի Հայաստանի Հանրապետության հարկային և բյուջետային օրենսդրությանը, ինչպես նաև պետական կառավարման համակարգի ընդհանուր կառուցվածքին ու պետական կառավարման մարմինների հիմնական խնդիրներին և իրավասություններին:

Հանձնաժողովի անդամը պետք է հմտորեն տիրապետի Հայաստանի Հանրապետության հարկային օրենսդրությանը, ինչպես նաև պետական կառավարման մարմնի այն կառուցվածքային ստորաբաժանման գործառույթների և իրավասությունների առանձնահատկություններին, որը ներկայացնում է.

դ) պաշտոնական դիրք

Հանձնաժողովի անդամը պետք է զբաղեցնի հայեցողական պաշտոն կամ հարկային ծառայության կամ մաքսային ծառայության կամ քաղաքացիական ծառայության բարձրագույն կամ գլխավոր պաշտոն: Հանձնաժողովի նախագահը չի կարող լինել հանձնաժողովի անդամից ցածր պաշտոն զբաղեցնող հարկային ծառայող:

(3-րդ կետը փոփ. 06.04.06 N 446-Ն, փոփ., լրաց. 16.10.08 N 1181-Ն)

4. Հանձնաժողովի կազմում ընդգրկվում են հանձնաժողովի նախագահը (պետական լիազոր մարմնի հարկային ծառայողներից), Հայաստանի Հանրապետության վարչապետի ներկայացուցիչը, մեկ անդամ` Հայաստանի Հանրապետության ֆինանսների նախարարությունից և հինգ անդամներ` պետական լիազոր մարմնի հարկային ծառայողներից:

(4-րդ կետը խմբ. 16.10.08 N 1181-Ն)

(հավելվածը փոփ. 06.04.06 N 446-Ն, փոփ., լրաց., խմբ. 16.10.08 N 1181-Ն)