ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

 

Ո Ր Ո Շ ՈՒ Մ

 

19 ապրիլի 2012 թվականի N 594-Ն

 

«ՀԱՅԿԱԿԱՆ ԱՏՈՄԱՅԻՆ ԷԼԵԿՏՐԱԿԱՅԱՆ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ՝ ԱՌԱՆՁՆԱՊԵՍ ԾԱՆՐ, ԱՌԱՆՁՆԱՊԵՍ ՎՆԱՍԱԿԱՐ ՊԱՅՄԱՆՆԵՐ ՈՒՆԵՑՈՂ ՊԱՇՏՈՆՆԵՐ ԶԲԱՂԵՑՆՈՂ ԱՇԽԱՏՈՂՆԵՐԻՆ ՍՈՑԻԱԼԱԿԱՆ ՓԱԹԵԹ ՀԱՏԿԱՑՆԵԼՈՒ ՄԱՍԻՆ

 

«Հայկական ատոմային էլեկտրակայան» փակ բաժնետիրական ընկերության՝ առանձնապես ծանր, առանձնապես վնասակար պայմաններ ունեցող պաշտոններ զբաղեցնող աշխատողների սոցիալական կարիքների որոշ խնդիրներ լուծելու նպատակով Հայաստանի Հանրապետության կառավարությունը որոշում է.

1. Հաստատել`

1) «Հայկական ատոմային էլեկտրակայան» փակ բաժնետիրական ընկերության աշխատողներին սոցիալական փաթեթ հատկացնելու կարգը` համաձայն N 1 հավելվածի.

2) «Հայկական ատոմային էլեկտրակայան» փակ բաժնետիրական ընկերության սոցիալական փաթեթի բովանդակությունը, ծառայությունների ցանկը, ծառայությունները մատուցող կազմակերպությունների ցանկերը և (կամ) չափորոշիչները՝ համաձայն N 2 հավելվածի.

3) լիազոր մարմնի և բանկի միջև կնքվող` սոցիալական փաթեթի հատկացումն ապահովելու մասին պայմանագրի օրինակելի ձևը` համաձայն N 3 հավելվածի։

2. Հայաստանի Հանրապետության ֆինանսների նախարարին` Հայաստանի Հանրապետության կառավարության 2011 թվականի դեկտեմբերի 22-ի N 1919-Ն որոշման N 1 հավելվածում կատարել համապատասխան վերաբաշխում:

3. Սահմանել, որ սոցիալական փաթեթի հատկացումն ապահովելու մասին պայմանագիր կնքող լիազոր մարմինը Հայաստանի Հանրապետության ֆինանսների նախարարությունն է:

4. Հայաստանի Հանրապետության ֆինանսների նախարարին`

1) բանկերի հետ կնքել պայմանագրեր սույն որոշմամբ նախատեսված սոցիալական փաթեթի հատկացումն ապահովելու մասին.

2) ապահովել Հայաստանի Հանրապետության ֆինանսների նախարարության և սոցիալական փաթեթի հատկացումն ապահովելու մասին պայմանագիր կնքած բանկերի տեղեկատվությունը Հայաստանի Հանրապետության ֆինանսների նախարարության կայքում հրապարակելը։

5. Սահմանել, որ Հայաստանի Հանրապետության էներգետիկայի և բնական պաշարների նախարարության գծով Հայաստանի Հանրապետության պետական բյուջեի «Պետական հիմնարկների և կազմակերպությունների աշխատողների սոցիալական փաթեթով ապահովում» ծախսային ծրագրի համար նախատեսված բյուջետային հատկացումների գումարը ներառում է «Հայկական ատոմային էլեկտրակայան» փակ բաժնետիրական ընկերության աշխատողների՝ սոցիալական փաթեթի հատկացման ֆինանսավորման համար «Հայկական ատոմային էլեկտրակայան» փակ բաժնետիրական ընկերությանը հասանելիք գումարը, այդ թվում` 2012 թվականի առաջին կիսամյակում` 19,338 հազ. դրամ, ինն ամսում` 48,345 հազ. դրամ, տարեկան` 77,352.0 հազ. դրամ:

6. Հայաստանի Հանրապետության էներգետիկայի և բնական պաշարների նախարարին`

1) 10-օրյա ժամկետում ապահովել համապատասխան ծախսերի նախահաշվի կազմումը և հաստատումը.

2) «Հայկական ատոմային էլեկտրակայան» փակ բաժնետիրական ընկերության աշխատողների՝ սոցիալական փաթեթի հատկացման ֆինանսավորման համար հասանելիք գումարը եռամսյակային համամասնություններով փոխանցել «Հայկական ատոմային էլեկտրակայան» փակ բաժնետիրական ընկերության հաշվին.

3) ապահովել պատշաճ հսկողություն «Հայկական ատոմային էլեկտրակայան» փակ բաժնետիրական ընկերության կողմից ծրագրով նախատեսված հատկացումների՝ Հայաստանի Հանրապետության օրենսդրությամբ սահմանված շրջանակներում նպատակային օգտագործման նկատմամբ.

4) նշված հատկացումների տնօրինման և դրա շրջանակներում Հայաստանի Հանրապետության պետական բյուջեի կատարման մասին հաշվետվությունները սահմանված կարգով ներկայացնել Հայաստանի Հանրապետության ֆինանսների նախարարություն:

7. Սույն որոշումն ուժի մեջ է մտնում 2012 թվականի մայիսի 1-ից:

 

Հայաստանի Հանրապետության վարչապետ	Տ. Սարգսյան
2012 թ. մայիսի 16 Երևան

 

Հավելված N 1 ՀՀ կառավարության 2012 թվականի ապրիլի 19-ի N 594-Ն որոշման

  

Կ Ա Ր Գ

 

«ՀԱՅԿԱԿԱՆ ԱՏՈՄԱՅԻՆ ԷԼԵԿՏՐԱԿԱՅԱՆ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ԱՇԽԱՏՈՂՆԵՐԻՆ ՍՈՑԻԱԼԱԿԱՆ ՓԱԹԵԹ ՀԱՏԿԱՑՆԵԼՈՒ

 

I. ԸՆԴՀԱՆՈՒՐ ԴՐՈՒՅԹՆԵՐ

 

1. Սույն կարգով սահմանվում է «Հայկական ատոմային էլեկտրակայան» փակ բաժնետիրական ընկերության աշխատողների սոցիալական փաթեթում ներառված ծառայություններից օգտվելու ընթացակարգը:

2. Սույն կարգում օգտագործվում են հետևյալ հիմնական հասկացությունները՝

1) սոցիալական փաթեթ` «Հայկական ատոմային էլեկտրակայան» փակ բաժնետիրական ընկերության աշխատողների ու նրանց անմիջական ընտանիքների անդամների առողջական, կրթական և այլ խնդիրների ապահովման կամընտրական միջոցառումների համախումբ` աշխատողների մոտիվացման ու աշխատանքի արդյունավետության բարձրացման նպատակով.

2) սոցիալական փաթեթի ծառայություններ` Հայաստանի Հանրապետության կառավարության 2012 թվականի ապրիլի 19-ի N 594-Ն որոշման (այսուհետ՝ որոշում) N 2 հավելվածում սահմանված ծառայությունների տեսակներ.

3) սոցիալական փաթեթի գումար` մեկ աշխատողի մեկ ամսվա համար որոշմամբ սահմանված սոցիալական փաթեթի գումարի չափը: Սոցիալական փաթեթի գումարը կազմում է 11 հազ. դրամ.

4) աշխատող` որոշման N 1 հավելվածի N 1 ձևի ցանկում ներառված պաշտոն զբաղեցնող անձ: Որոշումը չի տարածվում «Հայկական ատոմային էլեկտրակայան» փակ բաժնետիրական ընկերությունում վեց ամսվանից պակաս աշխատանքային ստաժ ունեցող անձանց վրա.

5) աշխատողի անմիջական ընտանիքի անդամ` աշխատողի ամուսինը, մինչև 27 տարեկան չամուսնացած զավակները.

6) բանկ` լիազոր մարմնի հետ սոցիալական փաթեթի հատկացումն ապահովելու մասին պայմանագիր կնքած՝ Հայաստանի Հանրապետությունում գրանցված և գործունեության իրավունք ունեցող ցանկացած բանկ, որի միջոցով իրականացվում է աշխատողի սոցիալական փաթեթի գումարի (գումարների) ստացումը և որոշմամբ սահմանված ուղղություններով վճարումը (փոխանցումը):

 

II. ՍՈՑԻԱԼԱԿԱՆ ՓԱԹԵԹԻ ՀԱՏԿԱՑՄԱՆ ՆՊԱՏԱԿԸ ԵՎ ԴՐԱ ԻՐԱԿԱՆԱՑՄԱՆ ՍԿԶԲՈՒՆՔՆԵՐԸ

 

3. Հայաստանի Հանրապետության կառավարության սոցիալական փաթեթի հատկացման հիմնական նպատակը նպաստելն է «Հայկական ատոմային էլեկտրակայան» փակ բաժնետիրական ընկերությունում`

1) աշխատողների սոցիալական կարիքների բավարարմանը.

2) աշխատողների մոտիվացմանը և աշխատանքի արդյունավետության բարձրացմանը.

3) «Հայկական ատոմային էլեկտրակայան» փակ բաժնետիրական ընկերությունում աշխատանքի գրավչության բարձրացմանը։

4. Սոցիալական փաթեթը հատկացվում է՝ համաձայն հետևյալ սկզբունքների՝

1) սոցիալական փաթեթի գումարը տրամադրվում է Հայաստանի Հանրապետության տարեկան պետական բյուջեով հաստատված գումարի սահմաններում` որոշմամբ սահմանված չափով.

2) սոցիալական փաթեթի համար հատկացվող գումարն անկանխիկ գումար է, որը փոխանցվում է աշխատողի` հատուկ այդ նպատակով բանկում բացված հաշվին (այսուհետ` սոցփաթեթի հաշիվ): Այդ հաշվի դրամական միջոցները կանխիկացման ենթակա չեն, սակայն թույլատրվում է կատարել կանխիկ մուտքագրումներ կամ այլ միջոցներից փոխանցումներ: Սոցփաթեթի հաշվից գումարը փոխանցվում է բացառապես որոշման N 2 հավելվածում սահմանված և հաստատված չափորոշիչներին համապատասխանող կազմակերպությունների բանկային հաշվին.

3) որոշման N 2 հավելվածով հաստատվում է սոցիալական փաթեթի շրջանակներում Հայաստանի Հանրապետության կառավարության որոշմամբ սահմանված ծառայությունները մատուցելու իրավասություն ունեցող կազմակերպությունների չափորոշիչները և (կամ) ցանկերը, և աշխատողն իրավունք է ստանում օգտվելու այդ չափորոշիչներին համապատասխանող ցանկերում ընդգրկված կազմակերպությունների մատուցած ծառայություններից.

4) Հայաստանի Հանրապետության կառավարությունը կարող է սահմանել որևէ ծառայությունից օգտվելու պարտադիր պայման, այսինքն՝ աշխատողը չի կարող սոցիալական փաթեթի տվյալ բյուջետային տարվա գումարներն ամբողջովին օգտագործել այլ ծառայությունների վրա՝ առանց նշված ծառայությունից օգտվելու: Կարող են բացառություն կազմել այն դեպքերը, երբ աշխատողն արդեն իսկ օգտվում է համանման ծառայությունից (օրինակ, որպես մեկ այլ աշխատողի ընտանիքի անդամ).

5) սոցիալական փաթեթի գումարն ունի կուտակային բնույթ, այսինքն` պահպանվում և կուտակվում է առևտրային բանկում այդ նպատակով բացված սոցփաթեթի հաշվին:

 

III. ՍՈՑԻԱԼԱԿԱՆ ՓԱԹԵԹԻ ՀԱՏԿԱՑՄԱՆ ԳՈՐԾԸՆԹԱՑԸ

 

5. Սոցիալական փաթեթից օգտվելու համար աշխատողը որոշմամբ նախատեսված լիազոր մարմնի հետ պայմանագիր կնքած ցանկացած բանկում բացում է սոցփաթեթի հաշիվ: Սոցփաթեթի հաշվի բացման և սպասարկման հարաբերությունները կարգավորվում են որոշմամբ, որոշման N 3 հավելվածում ներկայացված պայմանագրով, բանկի և աշխատողի միջև կնքված պայմանագրով, ինչպես նաև Հայաստանի Հանրապետության քաղաքացիական օրենսգրքի ընդհանուր դրույթներով:

6. Ընթացիկ տարվա սոցիալական փաթեթի գումարներն իր սոցփաթեթի հաշվին փոխանցելու համար աշխատողը լրացնում է սոցիալական փաթեթի գումարի փոխանցման մասին դիմում (այսուհետ` դիմում)՝ համաձայն N 2 ձևի, որը բանկի կողմից տրված սոցփաթեթի հաշվի մասին տեղեկանքի հետ միասին ներկայացվում է «Հայաստանի ատոմային էլեկտրակայան» փակ բաժնետիրական ընկերության հաշվապահություն:

7. Դիմումի և տեղեկանքի հիման վրա «Հայաստանի ատոմային էլեկտրակայան» փակ բաժնետիրական ընկերության հաշվապահությունն ընթացիկ տարվա սոցիալական փաթեթի գումարները փոխանցում է աշխատողի սոցփաթեթի հաշվին:

8. Սոցիալական փաթեթի ընթացիկ տարվա առաջին գումարը փոխանցվում է աշխատողի դիմումը ներկայացվելու ամսվան հաջորդող ամսվա առաջին 5 աշխատանքային օրվա ընթացքում, իսկ հերթական (ամենամսյա) փոխանցումներն իրականացվում են մինչև հաջորդ ամսվա 5-րդ աշխատանքային օրը: Դեկտեմբեր ամսվա սոցիալական փաթեթի գումարը փոխանցվում է նախքան ընթացիկ բյուջետային տարվա վերջին օրը:

9. Յուրաքանչյուր բյուջետային տարվա սոցիալական փաթեթի գումարների փոխանցման համար լրացվում է նոր դիմում:

10. Սոցփաթեթի հաշիվը կարելի է փոխել միայն նոր բյուջետային տարում` նախքան սոցիալական փաթեթի ընթացիկ տարվա առաջին գումարի փոխանցումը: Այդ դեպքում աշխատողը դիմումի հետ միասին ներկայացնում է բանկի կողմից տրված սոցփաթեթի հաշվի մասին նոր տեղեկանք, ինչպես նաև սոցփաթեթի նախկին հաշիվն սպասարկող բանկից տեղեկանք սոցփաթեթի հաշվի հիման վրա տրամադրվող վարկային գծի մասին: «Հայկական ատոմային էլեկտրակայան» փակ բաժնետիրական ընկերության հաշվապահությունն աշխատողի սոցփաթեթի հաշվին փոխանցվող սոցիալական փաթեթի գումարը (գումարները) այլ սոցփաթեթի հաշվին փոխանցելու դեպքում առաջնորդվում է սույն կետով սահմանված դրույթներով:

11. Աշխատանքից ազատվելու դեպքում աշխատողի սոցիալական փաթեթի գումարի փոխանցումը սոցփաթեթի հաշվին դադարում է աշխատանքից ազատվելու ամսվան հաջորդող ամսվանից, սակայն այդ հաշվում մնացած գումարի օգտագործման ուղղությունները մնում են նույնը: «Հայաստանի ատոմային էլեկտրակայան» փակ բաժնետիրական ընկերության հաշվապահությունը դրա մասին տեղեկացնում է աշխատանքից ազատված աշխատողի սոցփաթեթի հաշիվն սպասարկող առևտրային բանկին՝ 5 աշխատանքային օրվա ընթացքում:

12. Աշխատողը կարող է սոցփաթեթի հաշվից վճարում իրականացնել առաջին հերթին պարտադիր պայման հանդիսացող ծառայության ձեռքբերման համար, իսկ մնացած գումարը կարող է փոխանցել այլ ծառայությունների ձեռքբերման նպատակով կամ կուտակել` հետագա տարիների համար որոշմամբ սահմանված ծառայություններից օգտվելու համար վճարումներ իրականացնելու նպատակով: Պարտադիր պայման հանդիսացող ծառայությունը ձեռք բերելուց հետո աշխատողը դրա մասին հիմք է ներկայացնում սոցփաթեթի հաշիվն սպասարկող առևտրային բանկ` տարվա ընթացքում այլ վճարումներ իրականացնելու կամ մնացած գումարը կուտակելու նպատակով: Պարտադիր պայման հանդիսացող ծառայության ձեռքբերման հիմք է առնվազն ընթացիկ տարվա համար նախատեսված տվյալ ծառայության ձեռքբերման մասին պայմանագիրը (վկայագիրը) կամ դրա պատճենը: Պարտադիր պայման հանդիսացող ծառայությունից չօգտվելու դեպքում սոցփաթեթի հաշիվն սպասարկող առևտրային բանկն այլ ծառայությունների համար որևէ վճարում չի իրականացնում, եթե աշխատողը չի օգտվում համանման ծառայությունից:

13. Պարտադիր պայման հանդիսացող ծառայության համանման ծառայությունից օգտվելու դեպքում աշխատողն իր սոցփաթեթի հաշիվն սպասարկող առևտրային բանկ է ներկայացնում համանման ծառայությունից օգտվելու հիմք: Համանման ծառայությունից օգտվելու հիմք է առնվազն ընթացիկ տարվա համար նախատեսված տվյալ ծառայությունից օգտվելու մասին պայմանագիրը (վկայագիրը) կամ դրա պատճենը, կամ այդպիսին չլինելու դեպքում` համանման ծառայության մասին համապատասխան ծառայություն մատուցող կազմակերպությունից տեղեկանքը: Այս դեպքում աշխատողը հնարավորություն ունի օգտագործելու և (կամ) կուտակելու ընթացիկ տարվա համար նախատեսված սոցիալական փաթեթի ամբողջ գումարը:

14. Սույն կարգի 12-րդ կամ 13-րդ կետերով նախատեսված պայմանները չբավարարելու դեպքում սոցփաթեթի հաշիվն սպասարկող առևտրային բանկն ընթացիկ տարվա սոցիալական փաթեթի դրամական միջոցները բյուջետային տարվա վերջին աշխատանքային օրվա ավարտին փոխանցում է Հայաստանի Հանրապետության պետական բյուջե` որոշման N 3 հավելվածով նախատեսված կարգով:

15. Բանկերի կողմից սոցփաթեթի հաշվի բացման և սպասարկման գործունեության նկատմամբ վերահսկողությունն իրականացնում է բացառապես Հայաստանի Հանրապետության կենտրոնական բանկը՝ օրենքով սահմանված կարգով բանկային գործունեության նկատմամբ իրականացվող բացառիկ վերահսկողության համատեքստում:

 

IV. ՍՈՑՓԱԹԵԹԻ ՀԱՇՎԻՑ ԳՈՒՄԱՐԻ ՓՈԽԱՆՑՄԱՆ ՀԱՄԱՐ ՀԻՄՔ ՀԱՆԴԻՍԱՑՈՂ ՓԱՍՏԱԹՂԹԵՐԸ

 

16. Սոցփաթեթի հաշվից գումարի փոխանցման համար հիմք է հետևյալ փաստաթղթերից որևէ մեկը՝

1) կանխավճարի փոխանցման հաշիվ, որտեղ արտացոլված են ծառայությունը մատուցող կազմակերպության վավերապայմանները և ծառայությունն ստացող ֆիզիկական անձի տվյալները (անունը, ազգանունը, բնակության վայրը, քաղաքացիությունը, անձնագրի տվյալները (սերիան, համարը, վավերականության ժամկետը, ում կողմից է տրված), ծառայության տեսակը և փոխանցման նպատակը.

2) հաշիվ-ապրանքագիր, որի վավերապայմանները սահմանված են «Հաշվապահական հաշվառման մասին» Հայաստանի Հանրապետության օրենքով, ինչպես նաև Հայաստանի Հանրապետության կառավարության 1998 թվականի օգոստոսի 25-ի «Ծախսերը հիմնավորող փաստաթղթերի նկատմամբ ներկայացվող պահանջները սահմանելու և այդ փաստաթղթերի կազմման կարգը հաստատելու մասին» N 525 որոշմամբ:

17. Աշխատողի ամուսնու կամ զավակի՝ սոցիալական փաթեթի ծառայություններից օգտվելու դեպքում գումարի փոխանցման համար հիմք հանդիսացող փաստաթղթեր են համարվում նաև ամուսնության վկայականը և (կամ) զավակի ծննդյան վկայականը կամ դրանց պատճենները:

18. Սոցիալական փաթեթի շրջանակներում փոխանցում իրականացնելիս՝ աշխատողը բանկում պետք է ներկայացնի անձը հաստատող փաստաթուղթ:

19. Սույն կարգի 16-րդ և 17-րդ կետերում նշված փաստաթղթերի պատճենները պահվում են բանկում:

20. Հիփոթեքային վարկի ամսական վճարի մարման ծառայությունից օգտվելու դեպքում աշխատողը ներկայացնում է նաև որոշման N 2 հավելվածի N 2.1 ձևով ներկայացված տեղեկանքը, եթե աշխատողի հիփոթեքային վարկը տրամադրված չէ սոցփաթեթի հաշիվն սպասարկող առևտրային բանկի կողմից:

 

Հայաստանի Հանրապետության կառավարության աշխատակազմի ղեկավար

Դ. Սարգսյան

 

Ձև N 1

 

Ց Ա Ն Կ

 

«Հայկական ատոմային էլեկտրակայան» փակ բաժնետիրական ընկերության՝ աշխատանքի առանձնապես ծանր, առանձնապես վնասակար պայմաններ ունեցող պաշտոնների

 

NN ը/կ	Կառուցվածքային ստորաբաժանումը, պաշտոնը	Թիվը (մարդ)	Պաշտոնների դասակարգումը՝ համաձայն ՀՀ կառավարության 2012 թվականի հունվարի 12-ի N 12-Ն որոշման N 1 հավելվածի
1	2	3	4
	1. Վարչություն		12406000-17541 12418000-17541
1.1.	գլխավոր տնօրեն	1
1.2.	գլխավոր ճարտարագետ	1
1.3.	գլխավոր ճարտարագետի տեղակալ	5
1.4.	կայանի հերթափոխի պետ (ավագ)	7
	Տեխնիկական տեսչություն
1.5.	պետ	1
1.6.	տեսուչ (ավագ)	5
1.7.	ճարտարագետ (առաջատար)	4
	Վերանորոգման նախապատրաստման և կատարման բաժին
1.8.	պետ	1
1.9.	պետի տեղակալ	4
1.10.	ճարտարագետ (առաջատար)	9
	Ճարտարագիտատեխնիկական աջակցության բաժին
1.11.	պետ	1
1.12.	պետի տեղակալ	2
1.13.	ճարտարագետ (առաջատար)	2
	Շահագործման փորձի բաժին
1.14.	ճարտարագետ (առաջատար)	2
	Շենքերի, շինությունների շինարարության և շահագործման բաժին
1.15.	պետ	1
1.16.	ճարտարագետ (առաջատար)	1
	2. Ռեակտորային արտադրամաս		12406000-17541 12406000-17541
2.1.	պետ	1
2.2.	պետի տեղակալ	2
2.3.	ճարտարագետ (առաջատար)	21
2.4.	պահեստապետ	1
2.5.	փականագործ	1
2.6.	հերթափոխի պետ	7
2.7.	օպերատոր (ավագ)	34
	3. Էլեկտրական արտադրամաս
3.1.	պետ	1
3.2.	պետի տեղակալ	3
3.3.	ճարտարագետ (առաջատար)	15
3.4.	վարպետ (ավագ)	14
3.5.	լաբորատորիայի վարիչ	4
3.6.	էլեկտրափականագործ	21
3.7.	էլեկտրամոնտյոր	52
3.8.	հերթափոխի պետ	7
	4. Ջերմային ավտոմատիկայի և չափումների արտադրամաս		12406000-17541
4.1.	պետ	1
4.2.	պետի տեղակալ	3
4.3.	ճարտարագետ (առաջատար)	35
4.4.	նշագրող	1
4.5.	լաբորատորիայի վարիչ	5
4.6.	վարպետ (ավագ)	23
4.7.	էլեկտրափականագործ	49
4.8.	փականագործ	14
4.9.	էլեկտրագազաեռակցող	1
4.10.	հերթափոխի պետ	7
	5. Քիմիական արտադրամաս		12415000-17541 12406000-17541
5.1.	պետ	1
5.2.	պետի տեղակալ	1
5.3.	լաբորատորիայի վարիչ	1
5.4.	ճարտարագետ (առաջատար)	4
5.5.	տեխնիկ	1
5.6.	հերթափոխի պետ	7
5.7.	լաբորանտ	7
	6. Ռադիացիոն անվտանգության բաժին		12406000-17541 12416000-17541
6.1.	պետ	1
6.2.	պետի տեղակալ	3
6.3.	ճարտարագետ (առաջատար)	9
6.4.	պահեստապետ	1
6.5.	լաբորատորիայի վարիչ	1
6.6.	վարպետ (ավագ)	3
6.7.	փականագործ	6
6.8.	էլեկտրափականագործ	1
6.9.	հերթափոխի պետ	6
6.10.	հերթապահ դոզիմետրիստ	13
6.11.	լաբորանտ	8
	7. Կենտրոնացված վերանորոգումների արտադրամաս		12406000-17541
7.1.	պետ	1
7.2.	պետի տեղակալ	2
7.3.	ճարտարագետ (առաջատար)	3
7.4.	վարպետ (ավագ)	23
7.5.	խառատ	3
7.6.	փականագործ	79
7.7.	էլեկտրափականագործ	3
7.8.	էլեկտրազոդող	1
7.9.	էլեկտրաեռակցող	13
7.10.	կռունկավար	5
7.11.	էլեկտրամեխանիկ	1
7.12.	օպերատոր	5
	8. Ակտիվազերծման արտադրամաս		12417000-1754Ա 12417000-1754Բ 12417000-1754Գ
8.1.	պետ	1
8.2.	պետի տեղակալ	1
8.3.	ճարտարագետ (առաջատար)	3
8.4.	վարպետ (ավագ)	2
8.5.	պահարանապետ	1
8.6.	փականագործ	3
8.7.	ակտիվազերծող	32
	9. Շահագործման պլանավորման տեխնիկական բաժին		12406000-17541
9.1.	պետ	1
9.2.	պետի տեղակալ	1
9.3.	ճարտարագետ (առաջատար)	4
	10. Մետաղների ախտորոշման և տեխնիկական հսկողության ծառայություն		12415000-17541 12406000-17541
10.1.	պետ	1
10.2.	պետի տեղակալ	2
10.3.	ճարտարագետ (առաջատար)	22
10.4.	լաբորատորիայի վարիչ	3
10.5.	լաբորանտ	1
10.6.	տեխնիկ	1
10.7.	վարպետ (ավագ)	5
10.8.	արատանշող	14
	11. Դիսպետչերական և տեխնոլոգիական կառավարման միջոցների ծառայություն		12406000-17541
11.1.	պետ	1
11.2.	պետի տեղակալ	2
11.3.	վարպետ (ավագ)	6
11.4.	էլեկտրամոնտյոր	17
	12. Չափագիտական լաբորատորիա		12406000-17541
12.1.	պետ	1
12.2.	ճարտարագետ (առաջատար)	4
12.3.	փականագործ	1
	13. Սեյսմիկ անվտանգության բաժին		12406000-17541
13.1.	պետ	1
13.2.	ճարտարագետ (առաջատար)	4
13.3.	փականագործ	1
	14. Միջուկային անվտանգության և հուսալիության բաժին		12415000-17541
14.1.	պետ	1
14.2.	պետի տեղակալ	2
14.3.	ֆիզիկոս	5
14.4.	լաբորատորիայի վարիչ	3
14.5.	ճարտարագետ (առաջատար)	23
14.6.	լաբորանտ	4
14.7.	տեխնիկ	1
	15. Ուսումնավարժական կետ		12406000-17541
15.1.	հրահանգիչ	1
15.2.	հերթապահ անձնակազմի փորձնակներ	28
	16. Ջերմամատակարարման և ստորգետնյա հաղորդակցությունների արտադրամաս		12415000-17541 12418000-17541
16.1.	վարպետ (ավագ)	2
16.2.	փականագործ	8
16.3.	գազաեռակցող	1
	17. Շինարարավերանորոգման արտադրամաս		12418000-17541
17.1.	պետ	1
17.2.	պետի տեղակալ	2
17.3.	վարպետ (ավագ)	2
17.4.	ներկարար	8
17.5.	բետոնագործ	2
17.6.	մեկուսացնող	15
17.7.	հյուսն	8
17.8.	քարտաշ	2
17.9.	թիթեղագործ	1
17.10.	ճարտարագետ (առաջատար)	1
17.11.	էլեկտրաեռակցող	1
	18. Ավտոտրանսպորտային տնտեսություն		12419000-17541
18.1.	հատուկ աղբահանման մեքենայի վարորդ	2
	19. Ֆիզիկական պաշտպանության ճարտարագիտատեխնիկական միջոցների բաժին		12406000-17541
19.1.	պետ	1
19.2.	պետի տեղակալ	1
19.3.	ճարտարագետ (առաջատար)	4
19.4.	էլեկտրափականագործ	6
	20. Ռեժիմի բաժին		12406000-17541
20.1.	պետ	1
20.2.	պետի տեղակալ	1
20.3.	ճարտարագետ (առաջատար)	2
20.4.	հերթափոխի պետ	6
20.5.	տեսուչ	12
	21. Կայանը շահագործումից հանող խումբ		12406000-17541
21.1.	ճարտարագետ (առաջատար)	2
	Ընդամենը	879

 

Ձև N 2

 

«Հայկական ատոմային էլեկտրակայան» փակ բաժնետիրական ընկերության հաշվապահության ղեկավար   ________________________________________-ին   _______________________________-ի աշխատող (արտադրամաս, բաժին և այլն) __________________________________________ (անունը, ազգանունը)

 

 

 

 

 

 

 

 

 

 

 

 

Դ Ի Մ ՈՒ Մ

 

Խնդրում եմ իմ 20____ թվականի սոցիալական փաթեթի գումարները փոխանցել ____________________ բանկի _______________________ հաշվի համարին: Ես տեղյակ եմ, որ նշված բանկ ուղղորդվող սոցիալական փաթեթի միջոցները կարող են օգտագործվել միայն Հայաստանի Հանրապետության կառավարության 2012 թվականի ապրիլի 19-ի N 594 -Ն որոշմամբ սահմանված պայմաններով:

 

Դիմող ________________________  (ստորագրությունը)	______________________________ (անունը, ազգանունը)
______ _______________ 20  թ.

 

Հավելված N 2 ՀՀ կառավարության 2012 թվականի ապրիլի 19-ի N 594-Ն որոշման

 

«ՀԱՅԿԱԿԱՆ ԱՏՈՄԱՅԻՆ ԷԼԵԿՏՐԱԿԱՅԱՆ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ՍՈՑԻԱԼԱԿԱՆ ՓԱԹԵԹԻ ԲՈՎԱՆԴԱԿՈՒԹՅՈՒՆԸ, ԾԱՌԱՅՈՒԹՅՈՒՆՆԵՐԻ ՑԱՆԿԸ, ԾԱՌԱՅՈՒԹՅՈՒՆՆԵՐԸ ՄԱՏՈՒՑՈՂ ԿԱԶՄԱԿԵՐՊՈՒԹՅՈՒՆՆԵՐԻ ՑԱՆԿԵՐԸ ԵՎ (ԿԱՄ) ՉԱՓՈՐՈՇԻՉՆԵՐԸ

 

1. «Հայկական ատոմային էլեկտրակայան» փակ բաժնետիրական ընկերության սոցիալական փաթեթը ներառում է հետևյալ ծառայությունները`

1) առողջության ապահովագրություն.

2) հիփոթեքային վարկի ամսական վճարի մարում.

3) ուսման վճար.

4) հանգստի ապահովում Հայաստանի Հանրապետությունում և Լեռնային Ղարաբաղի Հանրապետությունում:

2. Սույն հավելվածով սահմանվում է, որ`

1) առողջության ապահովագրության ծառայությունն աշխատողների համար պարտադիր պայման է, իսկ նրանց անմիջական ընտանիքի անդամների համար` կամավոր.

2) հիփոթեքային վարկի ամսական վճարի մարման ծառայությունից կարող են (է) օգտվել աշխատողը և (կամ) նրա ամուսինը.

3) ուսման վճարից կարող են (է) օգտվել աշխատողը և (կամ) աշխատողի անմիջական ընտանիքի անդամը (անդամները).

4) հանգստի ապահովման ծառայությունից կարող են (է) օգտվել աշխատողը և (կամ) աշխատողի անմիջական ընտանիքի անդամը (անդամները):

3. Սույն հավելվածով սահմանվում են`

1) առողջության ապահովագրության ծառայություններ մատուցող ընկերությունների և առողջության ապահովագրության չափորոշիչները՝ համաձայն N 1 ձևի.

2) հիփոթեքային վարկի ամսական վճարի մարման ծառայության չափորոշիչները՝ համաձայն N 2 ձևի.

3) սոցիալական փաթեթի ուսման վճարի ծառայության մեջ ներառված ուսումնական հաստատությունների ցանկը՝ համաձայն N 3 ձևի.

4) Հայաստանի Հանրապետությունում և Լեռնային Ղարաբաղի Հանրապետությունում հանգիստն ապահովող հաստատությունների ցանկը՝ համաձայն N 4 ձևի:

4. Որոշման N 3 հավելվածի 2.3-րդ կետի համաձայն սոցփաթեթի հաշվի միջոցով որոշմամբ սահմանված ծառայությունների ձեռքբերման համար տրամադրված վարկային գծի մարման ժամանակ սոցիալական փաթեթի փոխանցված գումարը ևս դիտարկվում է որպես սոցիալական փաթեթի ծառայության տեսակ: Այս դեպքում սոցփաթեթի հաշվին փոխանցված կամ մուտքագրված գումարներն օգտագործվում են որպես վարկային գծի մարում:

 

Հայաստանի Հանրապետության կառավարության աշխատակազմի ղեկավար

Դ. Սարգսյան

 

Ձև N 1

 

Չ Ա Փ Ո Ր Ո Շ Ի Չ Ն Ե Ր

 

ԱՌՈՂՋՈՒԹՅԱՆ ԱՊԱՀՈՎԱԳՐՈՒԹՅԱՆ ԾԱՌԱՅՈՒԹՅՈՒՆՆԵՐ ՄԱՏՈՒՑՈՂ ԸՆԿԵՐՈՒԹՅՈՒՆՆԵՐԻ ԵՎ ԱՌՈՂՋՈՒԹՅԱՆ ԱՊԱՀՈՎԱԳՐՈՒԹՅԱՆ

 

1. Սոցիալական փաթեթում ներառված առողջության ապահովագրության ծառայության ընտրության դեպքում աշխատողը հնարավորություն ունի իր ցանկությամբ ընտրելու ցանկացած ապահովագրական ընկերություն, որը Հայաստանի Հանրապետության կենտրոնական բանկի կողմից ստացել է պետական գրանցում և առողջության ապահովագրության դասի գործունեություն իրականացնելու լիցենզիա:

2. Աշխատողը կարող է ընտրել ապահովագրական ընկերությունների կողմից առաջարկվող առողջության ապահովագրության ցանկացած փաթեթ` անհրաժեշտության դեպքում լրավճարելով տարբերությունը:

3. Աշխատողի առողջության ապահովագրության փաթեթը պետք է ներառի առնվազն որոշման N 2 հավելվածի N 1.1 ձևում ներկայացված առողջության ապահովագրության բազային փաթեթի ծառայությունները:

3.1. Առողջության ապահովագրության ծառայության համանման ծառայություն է համարվում առողջության ապահովագրության այնպիսի ծառայությունը, որը տրամադրում է առնվազն որոշման N 2 հավելվածի N 1.1 ձևով նախատեսված ապահովագրական գումարի չափով ծածկույթ:

4. Աշխատողի առողջության ապահովագրության ծառայության առողջության ապահովագրության պայմանագրի օրինակելի ձևը սահմանված է որոշման N 2 հավելվածի N 1.2 ձևով:

 

 Ձև N 1.1

 

Բ Ա Զ Ա Յ Ի Ն  Փ Ա Թ Ե Թ

 

ԱՌՈՂՋՈՒԹՅԱՆ ԱՊԱՀՈՎԱԳՐՈՒԹՅԱՆ

 

Ապահովագրավճար՝	52000 դրամ
Ապահովագրական գումար՝	3800000 դրամ

 

Փաթեթը ներառում է հիվանդանոցային պայմաններում` սուր, անհետաձգելի և պլանային հետևյալ բժշկական ծառայությունները, ինչպես նաև այն նախահիվանդանոցային հետազոտությունները, որոնց հաջորդում է տվյալ հիվանդության հիվանդանոցային բուժումը:

 

1. ՀԻՎԱՆԴԱՆՈՑԱՅԻՆ ԲՈՒԺՕԳՆՈՒԹՅՈՒՆԸ

 

1) թերապևտիկ բուժում պահանջող հիվանդություններ.

2) վիրաբուժական բուժում պահանջող հիվանդություններ, այդ թվում՝ նաև նյարդավիրաբուժական, սրտի վիրահատական և ներանոթային միջամտությունների իրականացում (ընդ որում, կորոնար անոթների ստենտավորումը հատուցվում է ոչ դեղապատ ստենտի արժեքի չափով), գինեկոլոգիական և այլն.

3) վնասվածքների (կոտրվածքներ, հոդախախտեր, վերքեր, սալջարդեր, պոլիտրավմաներ) բուժում.

4) էլեկտրահարությունների, այրվածքների և ցրտահարությունների բուժում։

 

Ծանոթագրություններ.

 

1. Հատուցման ենթակա են այն հիվանդանոցային ծախսերը, որոնք ներառում են հատկացված դեղորայքի և բժշկական պարագաների (ներարկիչներ, ներարկման համակարգ և այլն) արժեքները, անհրաժեշտ լաբորատոր և գործիքային հետազոտությունների արժեքները, վիրահատական և կոնսերվատիվ բուժումը, հիվանդանոցի աշխատակազմի աշխատանքի վարձատրությունը:

2. Հատուցման ենթակա չեն հիվանդանոցներում հատկացվող սննդի, առանձնահատուկ հարմարավետ հիվանդասենյակների և անհատական խնամքի համար սահմանված վճարները:

3. Հատուցման ենթակա են պետական պատվերի շրջանակում բուժվող հիվանդությունների կապակցությամբ ապահովագրված անձի կողմից վճարման ենթակա համավճարները:

4. Հատուցման ենթակա են նախահիվանդանոցային այն հետազոտությունները, որոնց հաջորդում է տվյալ հիվանդության հիվանդանոցային բուժումը:

5. Ապահովագրությունը գործում է միայն Հայաստանի Հանրապետության և Լեռնային Ղարաբաղի Հանրապետության տարածքներում:

6. Ընտանիքի անդամները չեն կարող ապահովագրվել այն դեպքում, երբ աշխատողը հրաժարվում է ապահովագրվելուց:

7. Հատուցման ենթակա չեն ֆորս-մաժորի (միջուկային պայթյուն, ճառագայթային, ռադիոակտիվ կամ քիմիական վարակ, ռազմական գործողություններ, քաղաքացիական պատերազմ, հասարակական հուզումներ կամ գործադուլներ) հետևանքով առաջացած հիվանդությունները:

 

2. ԱԽՏՈՐՈՇԻՉ ԼԱԲՈՐԱՏՈՐ ԵՎ ԳՈՐԾԻՔԱՅԻՆ ՀԵՏԱԶՈՏՈՒԹՅՈՒՆՆԵՐԸ

 

Հատուցման ենթակա են սուր, անհետաձգելի և պլանային դեպքերում ախտորոշման, ինչպես նաև բուժման ընթացքի վերահսկման նպատակով հիվանդանոցային բուժման համար իրականացվող լաբորատոր և գործիքային հետազոտությունները՝

1) լաբորատոր`

ա. կլինիկական,

բ. բիոքիմիական,

գ. իմունաբանական,

դ. մանրէաբանական,

ե. հորմոնալ,

զ. գենետիկ,

է. պաթոհիստոլոգիական,

ը. PCR և այլն.

2) գործիքային`

ա. ռենտգենաբանական,

բ. համակարգչային տոմոգրաֆիա,

գ. մագնիսառեզոնանսային տոմոգրաֆիա,

դ. ուլտրաձայնային հետազոտություններ,

ե. ռադիոիզոտոպային հետազոտություններ,

զ. ֆունկցիոնալ հետազոտում (ԷՍԳ, էլեկտրամիոգրաֆիա, սպիրոգրաֆիա, դոպլեր, դուպլեքս հետազոտություններ և այլն),

է. էնդոսկոպիկ հետազոտություններ (էզոֆագոգաստրոդուոդենոսկոպիա, կոլոնոսկոպիա, ցիստոսկոպիա և այլն),

ը. նեյրոֆիզիոլոգիական հետազոտություններ (ԷԷԳ, աուդիոմետրիա և այլն):

 

3. ԿԱՆԽԱՐԳԵԼԻՉ ԲՈՒԺԶՆՆՈՒՄԸ

 

Փաթեթը ներառում է նաև տարեկան կանխարգելիչ բուժզննում՝ 3000 դրամի սահմաններում (արյան և մեզի քննություններ, գործիքային քննություն (ԷՍԳ), ընդհանուր պրակտիկայի բժշկի խորհրդատվություն):

 

4. ԱՊԱՀՈՎԱԳՐԱԿԱՆ ՀԱՏՈՒՑՄԱՆ ԲԱՑԱՌՈՒԹՅՈՒՆՆԵՐԸ

 

Առողջության ապահովագրական փաթեթով որպես ապահովագրական պատահար չեն դիտվում և փոխհատուցման ենթակա չեն`

1) ամբուլատոր հետազոտությունները և բուժումը (ներառյալ՝ դեղորայքայինը).

2) առանց բժշկական ցուցումների իրականացվող բժշկական ծառայությունները, դեղորայքը, հոսպիտալացումը.

3) պետական պատվերի ծրագրում ընդգրկված հիվանդությունների և իրավիճակների բուժումը.

4) ցանկացած կանխարգելիչ և կազդուրիչ միջոցառումները, իմունականխարգելիչ պատվաստումները և այլն.

5) թոքերի քրոնիկ ոչ յուրահատուկ հիվանդությունները` թոքերի էմֆիզեմա, պնևմոսկլերոզ.

6) բնածին անոմալիաները և զարգացման արատները կամ անատոմիական առանձնահատկությունները, ժառանգական և գենետիկ հիվանդությունները` պարբերական հիվանդությունը, էպիլեպսիան, դեֆորմացիաները և քրոմոսոմային խանգարումները, մանկական ուղեղային պարալիչը.

7) ողնաշարի միջողնային սկավառակների ախտահարումները, դեգեներատիվ դիստրոֆիկ փոփոխությունները, օստեոխոնդրոզը.

8) շաքարային դիաբետը և դրա հետևանքները.

9) քրոնիկ հիվանդությունները, որոնք պահանջում են մշտական, պահպանողական բուժում և դինամիկ հսկողություն՝ բացառությամբ դրանց անհետաձգելի (կյանքին սպառնացող) սրացումների՝ ապահովագրության ժամկետի ընթացքում.

10) հեմոդիալիզի անցկացում պահանջող քրոնիկական երիկամային անբավարարությունը.

11) աուտոիմուն և շարակցական հյուսվածքի համակարգային հիվանդությունները.

12) քաշի և խոսքի շտկումը, սեռի վիրաբուժական փոփոխումը.

13) կոսմետիկ, էսթետիկ կամ ապահովագրված անձի հոգեբանական վիճակը բարելավելու նպատակներով իրականացվող պլաստիկ և վերականգնողական վիրահատությունները, այդ թվում՝ մաշկի հիվանդության կապակցությամբ (կոշտուկներ, պտկիկներ, գորտնուկներ և խալեր, կանդիլոմաներ), քթի միջնապատի շտկումը, դրանց բարդացումները՝ բացառությամբ դժբախտ պատահարի հետևանքով առաջացածների.

14) աչքի էքսիմեր լազերային վիրահատությունները.

15) ատամնաբուժությունը.

16) ոչ ավանդական, այլընտրանքային (ոչ գիտական) բուժման ու ախտորոշման մեթոդները, փորձարարական կամ հետազոտական մեթոդներով բուժումը, կազդուրման ավանդական համակարգերը, հեռաբժշկության հետ կապված ծառայությունները.

17) սանատոր-առողջարանային բուժումը և ցանկացած ֆիզիոթերապևտիկ միջոցառումները.

18) վերականգնողական (ռեաբիլիտացիոն) բուժումը.

19) ներարգանդային սերմնավորումը և էքստրակորպորալ բեղմնավորումը.

20) ռեպրոդուկտիվ (վերարտադրողական) ֆունկցիայի և էրեկտիլ դիսֆունկցիայի (իմպոտենցիա) հետ կապված հետազոտությունները և բուժումը, հակաբեղմնավորիչ կոնսերվատիվ միջամտությունները, այդ թվում՝ ՆԱՄ-ի տեղադրումը և հեռացումը, դիսմենորեան, հակաբեղմնավորիչ միջոցները.

21) առավելապես սեռական ճանապարհով փոխանցվող հիվանդությունները (ախտորոշում և բուժում).

22) քրոնիկական վիրուսակրությունը, բացիլակրությունը, պարազիտակրությունը (հեպատիտ B, C, D, E, F).

23) լյարդային անբավարարությունը.

24) ՄԻԱՎ/ՁԻԱՀ-ը.

25) ճառագայթային հիվանդությունները.

26) օրգանների և վերջույթների պրոթեզավորումները, էնդոպրոթեզավորումները (բացառությամբ դժբախտ պատահարի արդյունքի), բժշկական սարքավորումները, իմպլանտները, տեսողական և լսողական սարքերի ձեռքբերումը, ինչպես նաև այլ կարգավորիչ բժշկական հարմարանքներ ձեռք բերելու և դրանց հարմարեցման համար կատարված ծախսերը, հաշմանդամային սայլակները, օրթոպեդիկ սարքերը և այլն, կենսաակտիվ հավելումները, վիտամինաթերապիան, կոսմետիկ պարագաները.

27) հոգեկան հիվանդությունները, դրանց հետևանքները և սահմանային վիճակները (նևրոզ, փսիխոպաթիա, փսիխոզ և այլն), հոգեթերապևտի ծառայություններ, հիպնոս.

28) ապահովագրված անձի կողմից բժշկի նշանակումներին չհետևելու կամ դրանցից հրաժարվելու հետևանքով առաջացած ծախսերը.

29) ալկոհոլիզմը, թմրամոլությունը և տոքսիկոմանիան և դրանց հետևանքով առաջացած հիվանդությունները.

30) ապահովագրված անձի կողմից հակաօրինական գործողությունների արդյունքում առաջացած վնասվածքները և հիվանդությունները:

 

Ձև N 1.2

 

Օ Ր Ի Ն Ա Կ Ե Լ Ի  Ձ ԵՎ

 

ԱՌՈՂՋՈՒԹՅԱՆ ԱՊԱՀՈՎԱԳՐՈՒԹՅԱՆ ՊԱՅՄԱՆԱԳՐԻ

 

1. Ապահովագրության պայմանագիր

1.1. Պայմանագրի բովանդակությունը

1. Պայմանագիրը կազմված է 2 մասից՝ վկայագրից՝ համաձայն N 1.2.1 ձևի, և ստորև ներկայացված պայմաններից, ընդ որում, վկայագիրը կազմվում է 2 օրինակից, որոնցից առաջին օրինակը պայմանների հետ միասին տրվում է ապահովագրված անձին (ապահովադրին), մյուս օրինակը` ապահովագրական ընկերությանը:

1.2. Վկայագիրը բաղկացած է առնվազն 14 մասից, որոնց մի մասը նախապես լրացված է , իսկ մյուս մասը ենթակա է լրացման.

1.2.1. վկայագրի անվանումը, օրինակ, «Բյուջետային աշխատողների բժշկական ապահովագրություն», կամ «Սոցիալական փաթեթով առողջության ապահովագրություն», կամ «Բյուջետային աշխատողների առողջության պետական ապահովագրություն», կամ «Առողջության պետական ապահովագրություն» (նախապես լրացված է),

1.2.2. վկայագրի համարը,

1.2.3. ապահովագրողի անվանումը, հասցեն և այլ վավերապայմաններ (նախապես լրացված է),

1.2.4. ապահովադրի անունը, հայրանունը, ազգանունը, անձնագրի տվյալները, հասցեն, հեռախոսահամարը, աշխատանքի վայրը,

1.2.5. ապահովագրված անձի (անձանց) անունը, հայրանունը, ազգանունը, անձնագրի տվյալները, հասցեն, հեռախոսահամարը (եթե ապահովադիրն ու ապահովագրված անձը նույն անձն է, ապա կարելի է պարզապես համապատասխան նշում կատարել),

1.2.6. ապահովագրական պայմանագրի գործողության ժամկետը (այս կետում նշվում է, որ ապահովագրության պայմանագիրն ուժի մեջ է մտնում ապահովագրական ընկերությանն ապահովագրավճարի կամ դրա` պայմանագրով նախատեսված չափով առաջին մասնաբաժնի վճարման պահից 5 օր հետո և գործում է 365 օր),

1.2.7. տարածքային սահմանափակումները (նախապես լրացված է), Հայաստանի Հանրապետություն և Լեռնային Ղարաբաղի Հանրապետություն,

1.2.8. ապահովագրական ծածկույթը (տե՛ս 1.3-րդ կետը),

1.2.9. ապահովագրական գումարը (նախապես լրացված է), 3,800,000 դրամ,

1.2.10. չհատուցվող գումարը (նախապես լրացված է), չի կիրառվում,

1.2.11. ապահովագրավճարի չափը (տե՛ս 1.3-րդ կետը),

1.2.12. ապահովագրավճարի վճարման կարգը (նշվում է, որ ապահովագրավճարը կամ դրա առաջին մասը պետք է վճարվի պայմանագրի կնքումից հետո 5 աշխատանքային օրվա ընթացքում), այդ թվում՝ վճարումների քանակը, որը կարող է լինել առավելագույնը 12` ամսական հավասար մասնաբաժիններով, վճարվելիք գումարները և վճարման ժամկետները, որը կարող է լինել մինչև յուրաքանչյուր ամսվա ամրագրված օրը,

1.2.13. վկայագիրը կնքելու և տալու ամսաթվերը,

1.2.14. Հայաստանի Հանրապետության օրենսդրությամբ պահանջվող այլ տվյալներ:

1.3. Վկայագրի «Ծածկույթ» մասը պարունակում է մի քանի ներգրված մասեր (ծածկույթներ), որոնցից միայն առաջինն է պարտադիր, իսկ մնացածը՝ ըստ ընտրության: Ընդ որում, պարտադիր բազային ծածկույթը և դրա ապահովագրավճարը միասնական ու պարտադիր են բոլոր ապահովագրական ընկերությունների համար: Վկայագրի ծածկույթներն են՝

1.3.1. պարտադիր բազային ծածկույթը՝ 52 հազ. դրամի չափով (պարտադիր, միասնական),

1.3.2. օրինակ, ըստ ընտրության՝ «Ամբուլատորիա» ծածկույթ՝ XXXX դրամ,

1.3.3. օրինակ, ըստ ընտրության՝ «Ատամնաբուժություն» ծածկույթ՝ XXXX դրամ,

1.3.4. օրինակ, ըստ ընտրության՝ «Ամբողջական փաթեթ» ծածկույթ՝ XXXX դրամ,

1.3.5. և այլն (ըստ կոնկրետ ապահովագրական ընկերության առաջարկած փաթեթների):

1.4. Պայմանագիրը կարող է դադարեցվել հերթական վճարումը սահմանված ժամկետներում չկատարելու դեպքում` վերջնաժամկետի օրվանից հաշված 5 օր հետո:

 

Ձև N 1.2.1

 

Օ Ր Ի Ն Ա Կ Ե Լ Ի  Ձ ԵՎ

 

Վ Կ Ա Յ Ա Գ Ի Ր  N

 

ՍՈՑԻԱԼԱԿԱՆ ՓԱԹԵԹՈՎ ԱՌՈՂՋՈՒԹՅԱՆ ԱՊԱՀՈՎԱԳՐՈՒԹՅԱՆ

 

Սույն պայմանագիրը (վկայագիրը) կազմված է ____________ ապահովագրականի Առողջության ապահովագրության պայմանների (այսուհետ` պայմաններ) հիման վրա, որոնք կցվում են սույն պայմանագրին և դրա անբաժանելի մասն են:

 

ԱՊԱՀՈՎԱԳՐՈՂ	ԱՊԱՀՈՎԱԴԻՐ
«____________» _____________   Հասցեն՝ ՀՀ, քաղ. Երևան, ____________________________ Հեռ.՝ 374 (10) ________________   Ֆաքսը՝ 374 (10) _____________   Հաշվարկային հաշիվը՝ __________   Բանկը՝ ____________________   Գրանցման համարը՝ __________   Գրանցման վկայականը՝ _________   ՀՎՀՀ՝ _______________________   Լիցենզիա       ԱՊՈ	Անունը, հայրանունը, ազգանունը _____________   _____________________________________________   Հասցեն՝ ___________________________________   Հեռ.՝ ______________________________________   Անձնագրի տվյալները _______________________   _____________________________________________ (համարը, սերիան, ում կողմից է տրված և տալու ամսաթիվը)       Հիմնարկը __________________________________   _____________________________________________
ԱՊԱՀՈՎԱԳՐԱՎՃԱՐԸ ՎՃԱՐՈՂ ԿԱԶՄԱԿԵՐՊՈՒԹՅՈՒՆԸ (ՀԻՄՆԱՐԿԸ)
ԱՊԱՀՈՎԱԳՐՎԱԾ ԱՆՁԸ	Ապահովադիրն է։ Նրա ընտանիքի անդամն է։
ԱՊԱՀՈՎԱԳՐՈՒԹՅԱՆ ՕԲՅԵԿՏԸ	Ապահովագրված անձանց գույքային և անձնական շահերը, որոնք կապված են ապահովագրական պատահարների (ռիսկերի) ի հայտ գալու հետ:
ՊԱՅՄԱՆԱԳՐԻ ԳՈՐԾՈՂՈՒԹՅԱՆ ԺԱՄԿԵՏԸ	Ապահովագրության պայմանագիրն ուժի մեջ է մտնում առաջին վճարումից 5 աշխատանքային օր հետո և գործում է 365 օր:
ՏԱՐԱԾՔԱՅԻՆ ՍԱՀՄԱՆԱՓԱԿՈՒՄՆԵՐԸ	Հայաստանի Հանրապետություն և Լեռնային Ղարաբաղի Հանրապետություն
ԱՊԱՀՈՎԱԳՐԱԿԱՆ ՊԱՏԱՀԱՐՆԵՐ (ՌԻՍԿԵՐ), ԾԱԾԿՈՒՅԹ	Սույն վկայագրին կից առողջության ապահովագրության պայմաններում ներկայացված ապահովագրական ծածկույթների համաձայն՝ 1. Պարտադիր բազային ծածկույթ՝           52000 դրամ 2. «Ամբուլատորիա» ծածկույթ՝            XXXX դրամ 3. «Ատամնաբուժություն» ծածկույթ՝    XXXX դրամ 4. «Ամբողջական փաթեթ» ծածկույթ՝   XXXX դրամ
ԱՊԱՀՈՎԱԳՐԱԿԱՆ ԳՈՒՄԱՐԸ	Յուրաքանչյուր ապահովագրված անձի համար` 3,800,000 դրամ Սույն պայմանագրով ապահովագրված անձանց համար` ____ դրամ
ՈՉ ՊԱՅՄԱՆԱԿԱՆ ՉՀԱՏՈՒՑՎՈՂ ԳՈՒՄԱՐԸ	Չի կիրառվում:
ԱՊԱՀՈՎԱԳՐԱՎՃԱՐԸ	52,000 դրամ
ԱՊԱՀՈՎԱԳՐԱՎՃԱՐԻ ՎՃԱՐՄԱՆ ԿԱՐԳԸ

 

Պ Ա Յ Մ Ա Ն Ն Ե Ր

 

1. Ապահովադիրը կամ ապահովագրված անձը պետք է հեռախոսով կամ գրավոր, այդ թվում՝ էլեկտրոնային նամակով ընկերությանը տեղյակ պահի ախտորոշում կամ բուժում պահանջող իր առողջական վիճակի մասին՝ 24 ժամվա ընթացքում կամ, հնարավորության դեպքում, անմիջապես՝ բացառությամբ շտապ և անհետաձգելի բուժօգնության դեպքերի: Նշված ժամկետի խախտման դեպքում` ապահովադիրը կամ ապահովագրված անձը պարտավոր է գրավոր հիմնավորել ուշացման պատճառը: Ուշ տեղեկացումը հիմք չէ հատուցման մերժման համար՝ բացառությամբ այն դեպքերի, երբ ապահովագրական պատահարի մասին տեղեկությունների բացակայությունը կարող էր ազդել ապահովագրողի` ապահովագրական հատուցման վճարման հետ կապված պարտավորությունների իրականացման վրա:

2. Սույն պայմանագրի պայմանները, այդ թվում՝ լուծման պայմանները, ապահովագրական հատուցման պայմանները և կարգը ներկայացված են ____________________ ապահովագրականի Առողջության ապահովագրության պայմաններում, որոնք սույն պայմանագրի անբաժանելի մասն են:

 

ԱՊԱՀՈՎԱԳՐՈՂ	ԱՊԱՀՈՎԱԴԻՐ
Գործադիր տնօրեն	Վկայագրին և պայմաններին ծանոթացել եմ և համաձայն եմ։ Ստացա դրանցից մեկական օրինակ
__________________________________  (ստորագրությունը)	__________________________ (ստորագրությունը)
Կ.Տ.   _______ ______________ 20 թ.

 

Ձև N 2

 

Չ Ա Փ Ո Ր Ո Շ Ի Չ Ն Ե Ր

 

ՀԻՓՈԹԵՔԱՅԻՆ ՎԱՐԿԻ ԱՄՍԱԿԱՆ ՎՃԱՐԻ ՄԱՐՄԱՆ ԾԱՌԱՅՈՒԹՅԱՆ

 

1. Սոցիալական փաթեթի այս ծառայությունն ընտրած աշխատողն իրավունք ունի օգտվելու հիփոթեքային վարկի ամսական վճարի մարման ծառայությունից, եթե աշխատողի հիփոթեքային պայմանները համապատասխանում են «Ազգային հիփոթեքային ընկերություն» ՈՒՎԿ» փակ բաժնետիրական ընկերության կողմից վերաֆինանսավորվող հիփոթեքային վարկերի ընդհանուր պայմաններին: Աշխատողն իրեն հիփոթեք տրամադրած բանկից կամ վարկային կազմակերպությունից ներկայացնում է դրա մասին տեղեկանք՝ համաձայն N 2.1 ձևի:

2. Աշխատողն իրավունք ունի օգտվելու հիփոթեքային վարկի ամսական վճարի մարման ծառայությունից՝ նույնիսկ այն դեպքում, երբ նա կամ նրա ամուսինը հիփոթեքային վարկն ստացել է նախքան սույն որոշումն ուժի մեջ մտնելը:

 

 

Ձև N 2.1

 

Տ Ե Ղ Ե Կ Ա Ն Ք

 

«Ազգային Հիփոթեքային Ընկերություն» ՈՒՎԿ» փակ բաժնետիրական ընկերության Կողմից Վերաֆինանսավորվող Հիփոթեքային Վարկերի Ընդհանուր Պայմանների Համապատասխանության Մասին

 

Սույն տեղեկանքը տրվում է այն մասին, որ քաղաքացի ______________________ին տրված վարկը լիովին բավարարում է «Ազգային հիփոթեքային ընկերություն» ՈՒՎԿ» փակ բաժնետիրական ընկերության կողմից սահմանված վերաֆինանսավորվող հիփոթեքային վարկերի ընդհանուր պայմանները և չափորոշիչները:

 

Տնօրեն	__________________________ (ստորագրությունը)	_________________________ (անունը, ազգանունը)
Կ.Տ.    ____ _______________ 20 թ.

 

Ձև N 3

 

Ց Ա Ն Կ

 

ՍՈՑԻԱԼԱԿԱՆ ՓԱԹԵԹԻ ՈՒՍՄԱՆ ՎՃԱՐԻ ԾԱՌԱՅՈՒԹՅԱՆ ՄԵՋ ՆԵՐԱՌՎԱԾ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ

 

1. Սույն ցանկով ներկայացված են այն ուսումնական հաստատությունները, որոնք ներառվում են սոցիալական ապահովության փաթեթում:

2. Սոցիալական փաթեթում ներառվում են հետևյալ կրթական ծրագրեր իրականացնող պետական և հավատարմագրված ոչ պետական ուսումնական հաստատությունները`

1) բարձրագույն և հետբուհական հիմնական կրթական ծրագրեր.

2) նախնական մասնագիտական (արհեստագործական) և միջին մասնագիտական կրթական ծրագրեր.

3) հանրակրթական հիմնական ծրագրեր (բացառությամբ մասնագիտացված և հատուկ ծրագրերի):

3. Սույն ձևի 2-րդ կետով սահմանված՝ կրթական ծրագրեր իրականացնող ուսումնական հաստատությունների ցանկերը հրապարակված են Հայաստանի Հանրապետության կրթության և գիտության նախարարության կայքում:

4. Սոցիալական փաթեթի շրջանակներում հնարավոր է ուսման վճարի համար փոխանցում իրականացնել միայն սույն ձևի 2-րդ կետում նշված կրթական ծրագրի դեպքում:

 

Ձև N 4

 

Ց Ա Ն Կ

 

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԵՎ ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅՈՒՆՈՒՄ ՀԱՆԳԻՍՏՆ ԱՊԱՀՈՎՈՂ ՀԱՍՏԱՏՈՒԹՅՈՒՆՆԵՐԻ

 

Սոցիալական փաթեթի հանգստի ապահովման ծառայության մեջ ընդգրկվում են Հայաստանի Հանրապետությունում գրանցված՝ «Զբոսաշրջության և զբոսաշրջային գործունեության մասին» Հայաստանի Հանրապետության օրենքով նախատեսված, Հայաստանի Հանրապետության էկոնոմիկայի նախարարության կողմից` նախարարի սահմանած կարգով հաշվառված զբոսաշրջային օպերատորները, որոնք զբասաշրջային փաթեթներ են առաջարկում Հայաստանի Հանրապետությունում և Լեռնային Ղարաբաղի Հանրապետությունում, և որոնց ցանկը հրապարակված է Հայաստանի Հանրապետության էկոնոմիկայի նախարարության պաշտոնական ինտերնետային կայքում:

 

Հավելված N 3 ՀՀ կառավարության 2012 թվականի ապրիլի 19-ի N 594-Ն որոշման

 

O Ր Ի Ն Ա Կ Ե Լ Ի  Ձ ԵՎ

 

ԼԻԱԶՈՐ ՄԱՐՄՆԻ ԵՎ ԲԱՆԿԻ ՄԻՋԵՎ ԿՆՔՎՈՂ` ՍՈՑԻԱԼԱԿԱՆ ՓԱԹԵԹԻ ՀԱՏԿԱՑՈՒՄՆ ԱՊԱՀՈՎԵԼՈՒ ՄԱՍԻՆ ՊԱՅՄԱՆԱԳՐԻ

 

Քաղ. Երևան

__________ ______________________ 20  թ.

 

Հայաստանի Հանրապետության ֆինանսների նախարարությունը (այսուհետ` լիազոր մարմին), ի դեմս նախարար ______________-ի, ով գործում է Հայաստանի Հանրապետության կառավարության 2008 թվականի մայիսի 15-ի N 503-Ն որոշմամբ հաստատված Հայաստանի Հանրապետության ֆինանսների նախարարության կանոնադրության հիման վրա, և ________________________ ընկերությունը (այսուհետ` կատարող)` ի դեմս ______________________ -ի, ով գործում է ընկերության կանոնադրության հիման վրա, կնքեցին սույն պայմանագիրը` հետևյալի մասին.

 

 1. ՊԱՅՄԱՆԱԳՐԻ ԱՌԱՐԿԱՆ ԵՎ ԱՅԼ ՊԱՅՄԱՆՆԵՐ

 

1.1. Սույն պայմանագրում կիրառվող հասկացություններն ունեն հետևյալ իմաստները՝

1.1.1. սոցիալական փաթեթի գումար` Հայաստանի Հանրապետության կառավարության 2012 թվականի ապրիլի 19-ի «Հայկական ատոմային էլեկտրակայան» փակ բաժնետիրական ընկերության՝ առանձնապես ծանր, առանձնապես վնասակար պայմաններ ունեցող պաշտոններ զբաղեցնող աշխատողներին սոցիալական փաթեթի հատկացման մասին» N 594-Ն որոշման (այսուհետ` որոշում) N 1 հավելվածով սահմանված կարգով աշխատողին հատկացվող գումար.

1.1.2. սոցիալական փաթեթի հաշիվ` բանկում բացվող հատուկ հաշիվ, որին փոխանցվում են աշխատողին հատկացվող սոցիալական փաթեթի գումարները.

1.1.3. աշխատող` որոշման N 1 հավելվածի 2-րդ կետի 4-րդ ենթակետի պահանջները բավարարող անձ, ում սոցիալական փաթեթի գումարը հատկացվում է կատարողի մոտ իր անվամբ բացված սոցիալական փաթեթի հաշվին փոխանցելու միջոցով.

1.1.4. սոցիալական փաթեթի ծառայություններ` որոշման N 2 հավելվածով սահմանված ծառայություններ` ուսման վճար, հիփոթեքային վարկի ամսական վճարի մարում, առողջության ապահովագրություն, հանգստի ապահովում Հայաստանի Հանրապետությունում և Լեռնային Ղարաբաղի Հանրապետությունում:

1.2. Կատարողը սույն պայմանագրով պարտավորվում է՝

1.2.1. աշխատողի պահանջով բացել սոցիալական փաթեթի հաշիվ և նրան տրամադրել համապատասխան հաշվի բացման մասին տեղեկանք` այդ հաշվին սոցիալական փաթեթի գումարների փոխանցումներն իրականացնելու նպատակով.

1.2.2. ընդունել և աշխատողի սոցիալական փաթեթի հաշվին մուտքագրել սոցիալական փաթեթի գումարներ.

1.2.3. սոցիալական փաթեթի հաշվից սոցիալական փաթեթի ծառայությունների վճարման համար համապատասխան գումար փոխանցել ծառայությունը մատուցող կազմակերպության հաշվին, որը բավարարում է որոշմամբ սահմանված չափանիշները և (կամ) ընդգրկված է համապատասխան ցանկում:

1.3. Սոցիալական փաթեթի հաշիվը բացելու և վարելու հետ կապված հարաբերությունները (ներառյալ հաշվի միջոցների տնօրինման ուղղությունները, սահմանափակումներն ու կարգը, ինչպես նաև հաշվից փոխանցումների իրականացման համար ներկայացվող փաստաթղթերի ցանկը) կարգավորվում են աշխատողի և կատարողի միջև կնքված սոցիալական փաթեթի հաշվի մասին պայմանագրով, սույն պայմանագրով, որոշմամբ և Հայաստանի Հանրապետության քաղաքացիական օրենսգրքի ընդհանուր դրույթներով:

1.4. Սոցիալական փաթեթի հաշվում առկա սոցիալական փաթեթի գումարները ենթակա չեն կանխիկացման:

 

 2. ԿՈՂՄԵՐԻ ԻՐԱՎՈՒՆՔՆԵՐՆ ՈՒ ՊԱՐՏԱԿԱՆՈՒԹՅՈՒՆՆԵՐԸ

 

2.1. Կողմերն իրավունք ունեն՝

2.1.1. սույն պայմանագրով սահմանված կարգով դադարեցնելու պայմանագրի գործողությունը.

2.1.2. Հայաստանի Հանրապետության օրենսդրությամբ սահմանված կարգով բողոքարկելու մյուս կողմի գործողությունները և (կամ) անգործությունը:

2.2. Կողմերը սույն պայմանագրի կատարման համար անհրաժեշտ տեղեկատվութունը փոխանակում են փոխհամաձայնեցված կարգով:

2.3. Կատարողն իրավունք ունի սոցիալական փաթեթի հաշվի հիման վրա աշխատողին տրամադրելու վարկային գիծ` բանկում գործող սպառողական վարկի տոկոսադրույքից ավելի ցածր տոկոսադրույքով` սոցիալական փաթեթի շրջանակներում փոխանցումներ կատարելու համար:

2.4. Կատարողը պարտավոր է՝

2.4.1. սոցիալական փաթեթի գումարն աշխատողի սոցիալական փաթեթի հաշվին մուտքագրել համապատասխան դրամական միջոցների ընդունման օրվան հաջորդող բանկային օրվա ընթացքում.

2.4.2. աշխատողի համար սոցիալական փաթեթի հաշվի բացումն ու սպասարկումը, ինչպես նաև այդ հաշվից սոցիալական փաթեթի գումարի փոխանցումներն իրականացնել անվճար.

2.4.3. աշխատողի կողմից որոշման համաձայն` սոցիալական փաթեթի պարտադիր պայման հանդիսացող ծառայություն ձեռք չբերվելու և այդ ծառայությանը համանման ծառայությունից օգտվելու մասին պայմանագիր (վկայագիր) կամ դրա պատճենը կատարողին չներկայացվելու դեպքում` ընթացիկ տարվա սոցիալական փաթեթի գումարները բյուջետային տարվա վերջին աշխատանքային օրվա ավարտին փոխանցել Հայաստանի Հանրապետության պետական բյուջե.

2.4.4. աշխատողին մատչելի եղանակով անվճար տրամադրել իր սոցիալական փաթեթի հաշվին մուտքագրված գումարների մասին տեղեկատվություն (այսուհետ՝ քաղվածք)` առնվազն յուրաքանչյուր ամիսը մեկ անգամ.

2.4.5. մինչև յուրաքանչյուր եռամսյակին հաջորդող ամսվա 15-րդ օրը լիազոր մարմին ներկայացնել սույն պայմանագրի հավելվածով նախատեսված տեղեկատվությունը` համաձայն ձևի.

2.4.6. սոցիալական փաթեթի հաշվին առկա դրական մնացորդի դիմաց աշխատողին վճարել տոկոս` նրա հետ կնքված պայմանագրով սահմանված չափով.

2.4.7. սոցիալական փաթեթի հաշվից փոխանցումներն իրականացնել որոշման պահանջներին համապատասխան.

2.4.8. սոցիալական փաթեթի հաշվից ընթացիկ տարում վճարում իրականացնել առաջին հերթին սոցիալական փաթեթի պարտադիր պայման հանդիսացող ծառայության համար (եթե աշխատողը չի օգտվում համանման ծառայությունից), իսկ մնացած գումարը կուտակել աշխատողի սոցիալական փաթեթի հաշվին կամ փոխանցել որոշմամբ սահմանված սոցիալական փաթեթի այլ ծառայությունների համար: Համանման ծառայությունից օգտվելու և դրա վերաբերյալ որոշմամբ սահմանված հիմք ներկայացնելու դեպքում ընթացիկ տարվա սոցիալական փաթեթի գումարները կուտակել աշխատողի սոցիալական փաթեթի հաշվին կամ փոխանցել որոշմամբ սահմանված սոցիալական փաթեթի այլ ծառայությունների համար:

2.5. Լիազոր մարմինը պարտավոր է`

2.5.1. օրենքով սահմանված կարգով ապահովել սույն պայմանագրի շրջանակներում իրեն հայտնի դարձած` բանկային գաղտնիք կազմող տեղեկատվության գաղտնիությունը.

2.5.2. կատարողին տրամադրել որոշմամբ սահմանված սոցիալական փաթեթի շրջանակներում ծառայություններ մատուցող կազմակերպությունների ցանկերն ու ՀՎՀՀ-ները և դրանց վերաբերյալ փոփոխությունների մասին տեղեկացնել կատարողին։

2.6. Գումարի փոխանցման նպատակով աշխատողի կողմից կեղծ, անվավեր, իրականությանը չհամապատասխանող փաստաթղթեր ներկայացվելու համար կատարողը պատասխանատվություն չի կրում:

 

3. ՎԵՃԵՐԻ ԼՈՒԾՄԱՆ ԿԱՐԳԸ

 

3.1. Սույն պայմանագրի կապակցությամբ վեճեր ու տարաձայնություններ առաջանալու դեպքում դրանք լուծվում են 15 օրվա ընթացքում` բանակցությունների միջոցով, իսկ բանակցությունների միջոցով համաձայնություն ձեռք չբերվելու դեպքում` Հայաստանի Հանրապետության օրենսդրությամբ սահմանված կարգով:

3.2. Վեճերի ու տարաձայնությունների շուրջ բանակցությունների կամ դատական գործընթացների ժամանակահատվածում կատարողը պարտավոր է շարունակել մատուցել սույն պայմանագրով սահմանված ծառայությունները:

 

4. ԵԶՐԱՓԱԿԻՉ ԴՐՈՒՅԹՆԵՐ

 

4.1. Սույն պայմանագրում փոփոխություններ և լրացումներ կատարվում են կողմերի փոխադարձ համաձայնությամբ և Հայաստանի Հանրապետության օրենսդրությամբ սահմանված կարգով` լրացուցիչ համաձայնագրեր կնքելու միջոցով, որոնք կհանդիսանան սույն պայմանագրի անբաժանելի մասը:

4.2. Սույն պայմանագիրը կազմված է հավասարազոր իրավաբանական ուժ ունեցող երկու օրինակից։ Յուրաքանչյուր կողմին տրվում է պայմանագրի մեկ օրինակ։

4.3. Սույն պայմանագիրը լուծվում է կողմերի փոխադարձ համաձայնությամբ կամ պայմանագրի կատարումից միակողմանի հրաժարվելու դեպքում` պայմանագրի լուծման կոնկրետ օրվա մասին նախապես, բայց ոչ ուշ, քան երկու ամիս առաջ մյուս կողմին ծանուցելու պայմանով: Պայմանագրի լուծումը նախաձեռնող կողմը պարտավոր է պայմանագիրը լուծելու մասին պատշաճ կարգով ծանուցել աշխատողին՝ պայմանագրի լուծման նախատեսվող ժամկետից առնվազն մեկ ամիս առաջ: Սույն պայմանագիրը լուծվում է պայմանագրով ստանձնած պարտավորությունները ոչ պատշաճ կատարելու հետևանքով պատճառած վնասները լրիվ հատուցելու պայմանով: Պայմանագրի լուծման դեպքում աշխատողի սոցիալական փաթեթի հաշվին առկա սոցիալական փաթեթի գումարները փոխանցվում են նրա՝ մեկ այլ բանկում բացված սոցիալական փաթեթի հաշվին:

4.4. Սույն պայմանագիրն իրավաբանական ուժ է ստանում կնքման պահից և գործում է անորոշ ժամկետով:

 

ՀՀ ՖԻՆԱՆՍՆԵՐԻ ՆԱԽԱՐԱՐ	ԲԱՆԿԻ ՆԱԽԱԳԱՀ (ԳՈՐԾԱԴԻՐ ՏՆՕՐԵՆ)
________________________  (ստորագրությունը)	________________________ (ստորագրությունը)
__________________________  (անունը, ազգանունը)	__________________________  (անունը, ազգանունը)

 

Հայաստանի Հանրապետության կառավարության աշխատակազմի ղեկավար

Դ. Սարգսյան

 

Ձև

 

Կատարողի կողմից լիազոր մարմին ներկայացվող տեղեկատվությունը

 

(01. ______. 20__ թ. – 01. ______. 20__թ. ժամանակահատվածի համար)

 

NN ը/կ	Տեղեկատվության անվանումը	Ծախսը	Քանակը
1.	Պայմանագրի հիման վրա նշված ժամանակահատվածում ստացված սոցիալական փաթեթի գումարները		Χ
2.	Պայմանագրի հիման վրա բացված սոցիալական փաթեթի հաշիվների քանակը	Χ
3.	Նշված ժամանակահատվածում սոցիալական փաթեթի հաշիվների միջոցներից ծախսված (փոխանցված) ընդհանուր գումարը		Χ
	այդ թվում`
3.1.	ուսման վճար		Χ
3.2.	հիփոթեքային վարկի ամսական վճարի մարում		Χ
3.3.	հանգստի ապահովում ՀՀ-ում և ԼՂՀ-ում		Χ
3.4.	առողջության ապահովագրություն
	այդ թվում`
3.4.N	__________________________ ապահովագրական ընկերությանը  (անվանումը) փոխանցված ընդհանուր գումարը		Χ
	_________________ ապահովագրական ընկերությանը գումար  (անվանումը) փոխանցող քաղաքացիների թիվը	Χ
4.	Սոցիալական փաթեթի հաշվի հիման վրա տրամադրվող վարկերի մասին տեղեկատվություն	Χ	Χ
	այդ թվում`
4.1.	տրամադրված վարկերի քանակը	Χ
4.2.	օգտագործված վարկերի ընդհանուր ծավալը		Χ

Աղյուսակի 3-րդ և 4-րդ սյունակների «Χ» նշանով վանդակները չեն լրացվում: