«Վավերացնում եմ»

Հայաստանի Հանրապետության

Նախագահ Ռ. Քոչարյան

7 հունվարի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

7 հունվարի 2002 թվականի N 1

քաղ. Երևան

ՀԱՅՏԱՐԱՐԱԳԻՐ ՆԵՐԿԱՅԱՑՆՈՂՆԵՐԻ ԲՆԱՄԹԵՐԱՅԻՆ (ՈՉ ԴՐԱՄԱԿԱՆ) ՁԵՎՈՎ ՍՏԱՑՎԱԾ ԵԿԱՄՈՒՏՆԵՐԸ ԳՈՒՅՔԻ ԵՎ ԵԿԱՄՈՒՏՆԵՐԻ ՀԱՅՏԱՐԱՐԱԳՐԵՐՈՒՄ ԱԶԱՏ (ՇՈՒԿԱՅԱԿԱՆ) ԳՆԵՐՈՎ ՀԱՇՎԻ ԱՌՆԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Հայաստանի Հանրապետության իշխանության մարմինների ղեկավար աշխատողների գույքի և եկամուտների հայտարարագրման մասին» Հայաստանի Հանրապետության օրենքի 4-րդ հոդվածի 3-րդ կետին համապատասխան՝ Հայաստանի Հանրապետության կառավարությունը որոշում է.

1. Հաստատել հայտարարագիր ներկայացնողների բնամթերային (ոչ դրամական) ձևով ստացված եկամուտները գույքի և եկամուտների հայտարարագրերում ազատ (շուկայական) գներով հաշվի առնելու կարգը (կցվում է):

2. Սույն որոշումն ուժի մեջ է մտնում պաշտոնական հրապարակման պահից:

Կ Ա Ր Գ

հայտարարագիր ներկայացնողների բնամթերային (ոչ դրամական) ձԵՎով ստացված եկամուտները գույքի ԵՎ եկամուտների հայտարարագրերում ազատ (շուկայական) գներով հաշվի առնելու

1. Սույն կարգով սահմանվում է հայտարարագիր ներկայացնողների բնամթերային (ոչ դրամական) ձևով ստացված եկամուտները (այսուհետև՝ բնամթերային եկամուտ) գույքի և եկամուտների հայտարարագրերում ազատ (շուկայական) գներով հաշվի առնելու կարգը:

2. Բնամթերային եկամուտները կարող են ստացվել՝

ա) գույքի (բացառությամբ՝ դրամական միջոցների) տեսքով,

բ) աշխատանքի, ծառայության տեսքով,

գ) մտավոր սեփականության արդյունքի տեսքով:

3. Գրավոր պայմանագրով կարգավորվող գործարքներից ստացված բնամթերային եկամուտը հայտարարատուի եկամուտներում հաշվի է առնվում պայմանագրով սահմանված գնով:

4. Պայմանագրով չկարգավորվելու դեպքում բնամթերային եկամուտը հայտարարատուի եկամուտներում հաշվի է առնվում ստացման տարում այն ձեռք բերելու հնարավոր գնով:

Սույն կարգի առումով բնամթերային եկամուտը ձեռք բերելու հնարավոր գին է համարվում այն գինը, որը համեմատելի հանգամանքներում սովորաբար գանձվում է նույնանման ապրանքների, աշխատանքների կամ ծառայությունների համար կամ այն գինը, որով գույքի մասին բոլոր անհրաժեշտ տեղեկություններ ունեցող և այն վաճառելու պարտավորություն չունեցող վաճառողը համաձայն է վաճառել այդ գույքը, իսկ գույքի արժեքի մասին բոլոր անհրաժեշտ տեղեկություններ ունեցող և այն ձեռք բերելու պարտավորություն չունեցող գնորդը համաձայն է ձեռք բերել այդ գույքը:

Այդ նպատակով կիրառելի են, մասնավորապես, առուվաճառքով զբաղվող սուբյեկտների (բրոքերների, խանութների, բորսաների, տոնավաճառների, շուկաների և այլն) գները (սակագները), գնացուցակային (կատալոգային) գները, այդ թվում՝ նաև համապատասխան դեպքերում «Ինտերնետ» համաշխարհային համակարգչային ցանցի միջոցով ստացված տվյալները, ինչպես նաև նույնանման գույքի աճուրդային կարգով իրացման ձևավորված նախադեպային տվյալները: