«Վավերացնում եմ»
Հայաստանի Հանրապետության
Նախագահ Ռ. Քոչարյան
 30 հունվարի 2006 թ.

Հայաստանի Հանրապետության
վարչապետ

Ա. Մարգարյան

2006 թ. հունվարի 18
Երևան

Հավելված
ՀՀ կառավարության 2005 թվականի 
դեկտեմբերի 22-ի N 2313-Ն որոշման

Տ Ե Խ Ն Ի Կ Ա Կ Ա Ն  Կ Ա Ն Ո Ն Ա Կ Ա Ր Գ

ՍՆՆԴԻ ԱՊԱՀՈՎՄԱՆ ԾԱՌԱՅՈՒԹՅՈՒՆՆԵՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐԻ

I. ԿԻՐԱՌՄԱՆ ՈԼՈՐՏԸ

1. Սննդի ապահովման ծառայություններին ներկայացվող պահանջների տեխնիկական կանոնակարգի (այսուհետ՝ տեխնիկական կանոնակարգ) գործողությունը տարածվում է ռեստորաններում, սրճարաններում, բարերում, բուֆետներում, ճաշարաններում, սննդի ինքնասպասարկման կետերում, սննդի արագ պատրաստման և տեղում վաճառման կետերում, պաղպաղակ-սրճարաններում, երկաթուղային վագոն-ռեստորաններում, նավերում, պատրաստի սննդի իրացման (մատակարարման) այլ կազմակերպություններում և հիմնարկներում` հիմնականում տեղում օգտագործելու համար պատրաստի սննդի (այդ թվում` նաև խմիչքների) վաճառքի, ինչպես նաև կազմակերպությունից դուրս օգտագործելու համար խոհարարական արտադրանքի պատրաստման և իրացման (մատակարարման)` ըստ գործունեության տեսակների արտադրանքի դասակարգման կոդերին համապատասխան հետևյալ սննդի ապահովման ծառայությունների վրա`

   2. Սույն տեխնիկական կանոնակարգով սահմանվում են 1-ին կետում նախատեսված սննդի ապահովման (այսուհետ` հանրային սնունդ) ծառայությունների մատուցման կազմակերպություններում սննդի պատրաստման համար օգտագործվող պարենային հումքի, սննդային հավելումների,  պատրաստվող սննդամթերքի և հանրային սննդի կազմակերպություններում մատուցվող ծառայությունների անվտանգության պահանջները, հանրային սննդի ծառայություններ մատուցող կազմակերպություններին և այդ կազմակերպություններում սննդամթերք պատրաստող և սպասարկող անձնակազմին ներկայացվող պահանջները, շրջակա միջավայրի պահպանման պահանջները, ինչպես նաև հանրային սննդի ծառայությունների համապատասխանության հավաստման ընթացակարգերը:

(2-րդ կետը լրաց. 05.06.08 N 558-Ն)

3. Սույն տեխնիկական կանոնակարգը չի տարածվում առևտրական ավտոմատների միջոցով սննդի և խմիչքի վաճառքի, տեղում օգտագործելու համար չնախատեսված խմիչքների վաճառքի ծառայությունների վրա:

4. Հանրային սննդի ծառայությունները ենթակա են համապատասխանության պարտադիր հավաստման:

II. ՀԱՍԿԱՑՈՒԹՅՈՒՆՆԵՐԸ

5. Սույն տեխնիկական կանոնակարգում կիրառվում են հետևյալ հասկացությունները`

սննդի ապահովման (հանրային սննդի) ծառայություն՝ սպառողների սննդի, սննդի և հանգստի կազմակերպման պահանջների բավարարմանն ուղղված, վաճառողի միջոցով մատուցվող ծառայությունների համալիր,

սննդի ապահովման (հանրային սննդի) կազմակերպություն` սպասարկմանը, իրացվող (մատակարարվող) խոհարարական արտադրանքի տեսականուն և սպառողներին մատուցվող ծառայությունների անվանացանկին բնորոշ առանձնահատկություններով կազմակերպություն,

խոհարարական կիսապատրաստվածք` խոհարարական մշակման մեկ կամ մի քանի փուլ անցած, բայց պատրաստ լինելու աստիճանի չհասցրած սննդամթերք կամ սննդամթերքի համակցություն,

խոհարարական արտադրանք` կերակրատեսակների, խոհարարական արտադրատեսակների և կիսապատրաստվածքների համախումբ,

ճաշարան` հանրամատչելի կամ սպառողների որոշակի քանակակազմին սպասարկող սննդի ապահովման (հանրային սննդի) կազմակերպություն, որը պատրաստում և իրացնում է բազմազան կերակրատեսակներ` ճաշացուցակին համապատասխան,

ռեստորան` սննդի ապահովման (հանրային սննդի) կազմակերպություն, որն ունի բարդ կերակրատեսակների, այդ թվում` պատվիրված և ֆիրմային, ազգային, ինչպես նաև թունդ ալկոհոլային, թույլ ալկոհոլային և ոչ ալկոհոլային խմիչքների, ծխախոտի և հրուշակեղենի լայն տեսականի և հանգստի կազմակերպման հետ զուգորդված սպասարկման բարձր մակարդակ,

սրճարան` սպառողների սննդի և հանգստի ապահովման կազմակերպություն, ռեստորանի համեմատությամբ արտադրատեսակի սահմանափակ տեսականիով, որն իրացնում է նաև պատվիրված և ֆիրմային կերակրատեսակներ, արտադրատեսակներ, խմիչք,

բար` սննդի ապահովման (հանրային սննդի) կազմակերպություն` հատուկ կանգնակով, որն իրացնում է պատվիրված և ֆիրմային, թունդ ալկոհոլային, թույլ ալկոհոլային և ոչ ալկոհոլային խմիչքներ, ակրատներ, խմորեղեն, բուլկեղեն,

բուֆետ` սննդի ապահովման (հանրային սննդի) կազմակերպության կառուցվածքային ենթաբաժին, որը նախատեսված է խմորեղենի, բուլկեղենի, գնովի ապրանքների և ոչ բարդ եղանակով պատրաստվող սահմանափակ տեսականու կերակրատեսակների իրացման համար:

III. ՏԵԽՆԻԿԱԿԱՆ ՊԱՀԱՆՋՆԵՐԸ

Հանրային սննդի կազմակերպություններում սննդի պատրաստման համար օգտագործվող պարենային հումքին, սննդային հավելումներին և պատրաստվող սննդամթերքին ներկայացվող պահանջները

(վերնագիրը լրաց. 05.06.08 N 558-Ն)

6. Հանրային սննդի ծառայությունները պետք է համապատասխանեն սպառողների և սպասարկող անձնակազմի կյանքի և առողջության համար անվտանգության, մարդկանց գույքին և շրջակա միջավայրի պահպանման պահանջներին, նպատակային նշանակությանը, ապահովեն ծառայության ժամանակին մատուցումը, դրա հարմարավետությունը` հաշվի առնելով սպառողների հիգիենիկ, մարդաչափական և ֆիզիոլոգիական հնարավորություններին սպասարկման պայմանների համապատասխանությունը բնութագրող էրգոնոմիկայի պահանջները, մատուցվող հատուկ նշանակության սննդամթերքի, սննդային և էներգիական արժեքների մասին լրիվ, հավաստի և ժամանակին տեղեկատվության տրամադրումը սպառողին:

(6-րդ կետը լրաց., փոփ. 05.06.08 N 558-Ն)

7. Հանրային սննդի կազմակերպություններում սննդամթերքի պատրաստման համար օգտագործվող պարենային հումքի, սննդային հավելումների, սննդամթերքի և խոհարարական կիսապատրաստվածքների անվտանգության ցուցանիշները (թունավոր տարրերի, հակաբիոտիկների, միկոտոքսինների, պեստիցիդների, նիտրոզամինների և այլնի պարունակությունները, ինչպես նաև օքսիդացման փչացման և մանրէաբանական ցուցանիշները) չպետք է գերազանցեն տեխնիկական կանոնակարգերով, իսկ դրանց բացակայության դեպքում Հայաստանի Հանրապետության առողջապահության նախարարի 2003 թվականի մարտի 28-ի N 181 հրամանով հաստատված «Պարենային հումքի և սննդամթերքի անվտանգությանը և սննդային արժեքին ներկայացվող հիգիենիկ պահանջներ» N 2-III-4.9-01-2003 (ՌԴ Սան ՊիՆ 2.3.2.1078-01) սանիտարահամաճարակային կանոններով և նորմերով սահմանված թույլատրելի քանակները:

(7-րդ կետը լրաց., փոփ. 05.06.08 N 558-Ն)

8. Հանրային սննդի կազմակերպություններում սննդամթերքի և խոհարարական արտադրանքի պատրաստման տեխնոլոգիական գործընթացները պետք է ապահովեն սույն տեխնիկական կանոնակարգի 7-րդ կետում նախատեսված նորմատիվ իրավական ակտով սահմանված անվտանգության ցուցանիշները:

(8-րդ կետը փոփ. 05.06.08 N 558-Ն)

9. Հանրային սննդի կազմակերպություններում օգտագործվող ջրի որակը պետք է համապատասխանի տեխնիկական կանոնակարգերով, իսկ դրանց բացակայության դեպքում Հայաստանի Հանրապետության առողջապահության նախարարի 2002 թվականի դեկտեմբերի 25-ի N 876 հրամանով հաստատված «Խմելու ջուր. Ջրամատակարարման կենտրոնացված համակարգերի ջրի որակին ներկայացվող հիգիենիկ պահանջներ. Որակի հսկողություն» N 2-III-Ա2-1-2002 սանիտարական կանոններով և նորմերով սահմանված պահանջներին:

(9-րդ կետը լրաց. 05.06.08 N 558-Ն)

10. Հանրային սննդի կազմակերպություններում սննդամթերքի պատրաստման համար պետք է օգտագործվեն տեխնիկական կանոնակարգով և (կամ) Հայաստանի Հանրապետության առողջապահության նախարարի 2003 թվականի մարտի 28-ի N 181 հրամանով հաստատված N 2-III-4.9-01-2003 (ՌԴ Սան Պին 2.3.2.1078-01) սանիտարահամաճարակային կանոններով և նորմերով թույլատրված սննդային հավելումները:

Արգելվում է հանրային սննդի կազմակերպություններում սննդամթերքի պատրաստման համար պահել և օգտագործել Հայաստանի Հանրապետության կառավարության 2007 թվականի ապրիլի 26-ի «Արգելված սննդային հավելումների ցանկը հաստատելու մասին» N 504-Ն որոշմամբ հաստատված` արգելված սննդային հավելումները:

(10-րդ կետը խմբ. 05.06.08 N 558-Ն)

Հանրային սննդի կազմակերպություններում պարենային հումքի, սննդային հավելումների և սննդամթերքի, ինչպես նաև խոհարարական արտադրանքների տեղափոխման և պահման պայմաններին ներկայացվող պահանջները

(վերնագիրը լրաց. 05.06.08 N 558-Ն)

11. Հանրային սննդի կազմակերպությունները պետք է ապահովեն Հայաստանի Հանրապետության առողջապահության նախարարի 2003 թվականի մայիսի 2-ի N 302 հրամանով հաստատված «Հանրային սննդի կազմակերպություններին ներկայացվող հիգիենիկ պահանջներ» N 2-III-4.2-01-2003, իսկ հատկապես արագ փչացող սննդամթերքի և կիսապատրաստվածքների համար` Հայաստանի Հանրապետության առողջապահության նախարարի 2001 թվականի դեկտեմբերի 28-ի N 961 հրամանով հաստատված «Հատկապես արագ փչացող սննդամթերքի պահպանման ժամկետները և պայմանները» N 2-III-4.4-1-2001 սանիտարական կանոններով ու նորմերով սահմանված և որոշակի պարենային հումքի ու սննդամթերքի փաթեթվածքի վրա մականշված պահման և փոխադրման պայմաններին և ժամկետներին ներկայացվող պահանջների կատարումը:

12. Խոհարարական արտադրանքը պահման, փոխադրման և իրացման համար պետք է փաթեթավորել Հայաստանի Հանրապետության կառավարության 2005 թվականի մայիսի 25-ի «Սննդամթերքի հետ շփվող պոլիմերային և այդ հիմքով պլաստմասսայե արտադրանքների տեխնիկական կանոնակարգը հաստատելու մասին» N 679-Ն, 2006 թվականի նոյեմբերի 16-ի «Խեցեգործական ամանեղենի վերաբերյալ տեխնիկական կանոնակարգը հաստատելու մասին» N 1750-Ն և 2007 թվականի հոկտեմբերի 25-ի «Սննդամթերքի հետ շփվող նյութերին և դրանց հայերեն տեղեկատվության մակնշման ձևերին և բովանդակությանը ներկայացվող պահանջների տեխնիկական կանոնակարգը հաստատելու մասին» N 1282-Ն որոշումներով սահմանված պահանջներին համապատասխանող նյութերից պատրաստված սպառողական տարաներում:

(12-րդ կետը խմբ. 05.06.08 N 558-Ն)

13. Խոհարարական արտադրանքը պատրաստման վայրից դուրս իրացնելու դեպքում տրանսպորտային և սպառողական տարաների վրա անմիջապես, կամ դրանց փակցված պիտակի, կամ ապրանքատրանսպորտային բեռնագրերի, կամ տեղեկատվական թերթիկի վրա հայերենով մականշվածքը պետք է պարունակի հետևյալ տեղեկատվությունը`

պատրաստողի անվանումը և (կամ) ապրանքային նշանը, գտնվելու վայրը,

խոհարարական արտադրանքի անվանումը,

զտաքաշը կամ ծավալը,

խոհարարական արտադրանքների բաժնևորման դեպքում` հատերի (բաժինների) քանակությունը (հատերով) և մեկ հատի (բաժնի) զանգվածը,

փաթեթավորման միավորների քանակությունը (չափածրարված արտադրանքի համար),

պատրաստման թվականը (ամիսը, օրը, ժամը),

պահման պայմաններն ու ժամկետը (ամիսը, օրը, ժամը), առանձնահատուկ հանձնարարականներ և ցուցումներ դրա պահման մասին` եթե այդպիսիք կան,

տեղեկություններ հիմնական բաղադրիչների և սննդային հավելումների մասին,

խոհարարական արտադրանքի օգտագործման մասին ցուցումներ, եթե առանց դրանց այն չի կարող պատշաճորեն օգտագործվել:

(13-րդ կետը փոփ., լրաց. 05.06.08 N 558-Ն)

Հանրային սննդի կազմակերպություններին ներկայացվող պահանջները

14. Հանրային սննդի կազմակերպությունների սննդի պատրաստման և մատուցման տեղամասերում լուսավորությունը պետք է համապատասխանի Հայաստանի Հանրապետության քաղաքաշինության նախարարի 1996 թվականի օգոստոսի 6-ի N 82 հրամանով հաստատված և 2001 թվականի հոկտեմբերի 1-ի N 82 հրամանով Հայաստանի Հանրապետությունում գործողության մեջ դրված «Արհեստական և բնական լուսավորում» ՀՀ ՇՆ II-8.03.96 շինարարական նորմերին:

15. Հանրային սննդի կազմակերպությունների աշխատատեղերում և սրահներում աղմուկի, այդ թվում` ձայնավերարտադրող և ձայնաուժեղացուցիչ սարքավորումների հնչեղության մակարդակները չպետք է գերազանցեն Հայաստանի Հանրապետության առողջապահության նախարարի 2002 թվականի մարտի 6-ի N 138 հրամանով հաստատված «Աղմուկն աշխատատեղերում, բնակելի և հասարակական շենքերում և բնակելի կառուցապատման տարածքներում» N 2-III-11.3-2002 սանիտարական նորմերով սահմանված թույլատրելի մակարդակները:

16. Հանրային սննդի կազմակերպությունները պետք է ապահովեն հրդեհային անվտանգությունը` Հայաստանի Հանրապետության կառավարությանն առընթեր արտակարգ իրավիճակների վարչության պետի 2003 թվականի մայիսի 27-ի N 524-Ն հրամանով հաստատված «Հրդեհային անվտանգության կանոններ» կանոնների և Հայաստանի Հանրապետության քաղաքաշինության նախարարի 2005 թվականի մայիսի 2-ի N 75-Ն հրամանով հաստատված ՀՀ ՇՆ II-8.04.02-2005 «Շենքերի և շինությունների հրդեհային ավտոմատիկա» շինարարական նորմերի պահանջներին համապատասխան:

17. Հանրային սննդի կազմակերպություններում պետք է լինեն Հայաստանի Հանրապետության օրենսդրությամբ նախատեսված վթարային ելքեր, աստիճաններ, վթարային իրավիճակներում գործողությունների կատարման հրահանգներ, հակահրդեհային համակարգ:

18. Հանրային սննդի կազմակերպությունների ջեռուցման, օդափոխման և օդի լավորակման համակարգերը պետք է համապատասխանեն Հայաստանի Հանրապետության քաղաքաշինության նախարարի 2004 թվականի օգոստոսի 4-ի N 83-Ն հրամանով հաստատված «Ջեռուցում, օդափոխում և օդի լավորակում» ՀՀ ՇՆ lV-12.02.01-2004 շինարարական նորմերին:

19. Հանրային սննդի կազմակերպություններում կիրառվող էլեկտրական սարքավորումների, սարքերի, վառարանների, սալիկների և այլ էլեկտրական սարքերի էլեկտրաանվտանգության ցուցանիշները պետք է համապատասխանեն Հայաստանի Հանրապետության կառավարության 2005 թվականի փետրվարի 3-ի N 150-Ն որոշմամբ հաստատված ցածր լարման էլեկտրասարքավորումներին ներկայացվող պահանջների տեխնիկական կանոնակարգով սահմանված պահանջներին:

20. Հանրային սննդի կազմակերպությունների շենքերը և դրանց կառուցվածքային տարրերը, ինչպես նաև տեխնիկական սարքավորումների տեղակայումը պետք է համապատասխանեն Հայաստանի Հանրապետության քաղաքաշինության նախարարի 2001 թվականի հոկտեմբերի 1-ի N 82 հրամանով Հայաստանի Հանրապետությունում գործողության մեջ դրված «Հասարակական շենքեր և կառուցվածքներ» միջպետական ՍՆիՊ 2.08.02-89 շինարարական նորմերին և Հայաստանի Հանրապետության քաղաքաշինության նախարարի 1997 թվականի սեպտեմբերի 8-ի N 110 հրամանով հաստատված ՀՀ ՇՆ II-8.04.01-97 «Շենքերի և կառուցվածքների հրդեհային անվտանգություն» շինարարական նորմերին:

21. Հանրային սննդի կազմակերպությունները պետք է ունենան դեպի մուտք տանող ուղիների և հետիոտնային ճանապարհների համար անհրաժեշտ տեղեկատվական ցուցանակներ:

22. Հանրային սննդի կազմակերպությունների մուտքը և աստիճանները պետք է ապահովեն դուրս եկող և ներս մտնող հաճախորդների 2 հանդիպակաց հոսքերի միաժամանակյա շարժումը, իսկ 50-ից ավելի նստատեղի առկայության դեպքում` հաճախորդների և անձնակազմի համար պետք է նախատեսված լինեն առանձին մուտքեր և աստիճաններ:

23. Հանրային սննդի կազմակերպությունները մուտքի և ելքի մոտ պետք է ունենան թեքահարթակներ և մատչելի լինեն հաշմանդամների տեղաշարժման համար:

24. Հանրային սննդի կազմակերպություններում օգտագործվող և սննդամթերքի հետ շփվող ամանեղենը, տարաները, գործիքները և պարագաները պետք է պատրաստված լինեն սույն տեխնիկական կանոնակարգի 12-րդ կետով նախատեսված իրավական ակտերով սահմանված պահանջներին համապատասխանող նյութերից:

24.1. Հանրային սննդի ծառայություններ մատուցող տնտեսավարող սուբյեկտները պետք է ներդնեն վտանգի աղբյուրի վերլուծության և հսկման կրիտիկական կետերի (ՎՎՀԿԿ) համակարգ:

(24.1-ին կետը լրաց. 05.06.08 N 558-Ն, ուժի մեջ է մտնում 01.01.2014 թ.)

Հանրային սննդի կազմակերպություններում սննդամթերք պատրաստող և սպասարկող անձնակազմին ներկայացվող պահանջները

25. Հանրային սննդի կազմակերպություններում սննդամթերք պատրաստող (խոհարար, հրուշակագործ) և սպասարկող (մատուցող, բարմեն, բուֆետապան) անձնակազմը պետք է ունենա համապատասխան մասնագիտական պատրաստվածություն և պահպանի անձնական և աշխատանքային հիգիենայի պահանջները` Հայաստանի Հանրապետության օրենսդրությամբ սահմանված կարգով:

26. Հանրային սննդի կազմակերպություններում սննդամթերք պատրաստող և սպասարկող անձնակազմը պետք է իրազեկ լինի սույն տեխնիկական կանոնակարգի 16-րդ կետում նախատեսված իրավական ակտերով սահմանված հրդեհաանվտանգության կանոններին, ինչպես նաև աշխատանքի և տեխնիկայի անվտանգության պահանջներին և ապահովի դրանց պահպանումը:

27. Հանրային սննդի կազմակերպություններում սննդամթերք պատրաստող և սպասարկող անձնակազմը պետք է ենթարկվի նախնական (աշխատանքի ընդունվելիս) և պարբերական բժշկական զննությունների և ունենա սանիտարական գրքույկ` Հայաստանի Հանրապետության կառավարության 2003 թվականի մարտի 27-ի «Առողջական վիճակի պարտադիր նախնական (աշխատանքի ընդունվելիս) և պարբերական բժշկական զննության կարգը, գործունեության ոլորտների, որոնցում զբաղված անձինք ենթակա են առողջական վիճակի պարտադիր բժշկական զննության, և բժշկական զննության ծավալի ու հաճախականությունների ցանկը և անձնական սանիտարական (բժշկական) գրքույկի ու բժշկական զննության ենթակա անձանց անվանացանկի ձևերը հաստատելու մասին» N 347-Ն որոշմանը համապատասխան:

Շրջակա միջավայրի պահպանության պահանջները

28. Հանրային սննդի ծառայությունները պետք է ապահովեն կազմակերպության տարածքին, շենքերի տեխնիկական վիճակին, օդափոխությանը, ջրամատակարարմանը, ջրահեռացմանը ներկայացվող` շրջակա միջավայրի պահպանությանն ուղղված պահանջների կատարումը` Հայաստանի Հանրապետության առողջապահության նախարարի 2003 թվականի մայիսի 2-ի N 302 հրամանով հաստատված N 2-III-4.2-01-2003 սանիտարական կանոններին և նորմերին համապատասխան:

IV. ՀԱՄԱՊԱՏԱՍԽԱՆՈՒԹՅԱՆ ՀԱՎԱՍՏՄԱՆ ԸՆԹԱՑԱԿԱՐԳԵՐԸ

29. Սույն տեխնիկական կանոնակարգի պահանջներին հանրային սննդի ծառայությունների համապատասխանությունը հավաստելու համար հանրային սննդի կազմակերպությունը մատուցվող ծառայության համար պետք է ունենա Հայաստանի Հանրապետության կառավարության 2004 թվականի օգոստոսի 12-ի «Արտադրանքի և ծառայությունների համապատասխանության պարտադիր հավաստման համար կիրառվող սխեմաները և դրանց նույնականացման նշագրերը սահմանելու մասին» N 1170-Ն որոշմամբ սահմանված 8 ս սխեմայով հավաստված համապատասխանության սերտիֆիկատ։

30. Սերտիֆիկացման մարմինը հանրային սննդի ծառայությունների համապատասխանությունը սույն տեխնիկական կանոնակարգով սահմանված պահանջներին հավաստելու համար պետք է իրականացնի`

ա) ծառայության նույնականացում, որն ընդգրկում է ըստ գործունեության տեսակների արտադրանքի դասակարգման խմբին հայտարարված հանրային սննդի ծառայության տեսակի պատկանելության ստուգում,

բ) խոհարարական արտադրանքի, այդ թվում` տեղում պատրաստված սննդամթերքի, պատրաստման տեխնոլոգիական գործընթացների համապատասխանության գնահատում, որն ընդգրկում է նորմատիվ փաստաթղթերի, սարքավորանքի, հանդերձանքի, չափման միջոցների, օգտագործվող պարագաների, կատարողների որակավորման համապատասխանությունը տեխնոլոգիական գործընթացների պահանջներին,

գ) ծառայություն կատարողի վարպետության գնահատում, որն ընդգրկում է նորմատիվ փաստաթղթերի և տեխնոլոգիական ընթացակարգերի վերաբերյալ նրա գիտելիքների, աշխատանքային փորձի, որակավորման բարձրացման մասին տվյալների վերլուծություն և պատրաստված խոհարարական արտադրանքի` սույն տեխնիկական կանոնակարգի 7-րդ կետում նշված նորմատիվ իրավական ակտերով և որոշակի տեսակի խոհարարական արտադրանքների նորմատիվ փաստաթղթերով սահմանված ցուցանիշներին համապատասխանության ընտրովի ստուգում` փորձարկումների միջոցով,

դ) ծառայության մատուցման գործընթացի համապատասխանության գնահատում, որը կարող է իրականացվել տեխնոլոգիական գործընթացի, կատարողի վարպետության, սպասարկման պայմանների և որակի կառավարման համակարգի (առկայության դեպքում) գնահատման միջոցով,

ե) հանրային սննդի կազմակերպության աշխատանքների գնահատում, որը ներառում է նրա նյութատեխնիկական բազայի վիճակի, սպառողի սպասարկման սանիտարահիգիենիկ պայմանների, մատուցվող ծառայությունների տեսակների և սպասարկման որակի (հաղորդակցման էթիկա, հարմարավետություն, գեղագիտություն, սպառողների պահանջների հաշվի առնում և այլն), սպասարկող անձնակազմի մասնագիտական վարպետության գնահատում, ինչպես նաև մատուցվող ծառայության և խոհարարական արտադրանքի մասին տեղեկատվության կազմակերպումը:

(30-րդ կետը խմբ., փոփ. 05.06.08 N 558-Ն)

31. Խոհարարական արտադրանքի, այդ թվում` տեղում պատրաստված սննդամթերքի, փորձարկումներն ըստ սույն տեխնիկական կանոնակարգով սահմանված անվտանգության ցուցանիշների, պետք է իրականացվեն հավատարմագրված փորձարկման լաբորատորիաներում:

32. Համապատասխանության սերտիֆիկատի գործողության ժամկետը և սերտիֆիկացված հանրային սննդի ծառայությունների համապատասխանության հսկողությունը պետք է իրականացվի Հայաստանի Հանրապետության օրենսդրությամբ սահմանված կարգով:

33. «Համապատասխանության գնահատման մասին» Հայաստանի Հանրապետության օրենքին համապատասխան սերտիֆիկացման մարմինը համապատասխանության հսկողության արդյունքների հիման վրա իրավունք ունի պահպանելու իր կողմից տրված համապատասխանության սերտիֆիկատի գործողության ժամկետը կամ այն կասեցնելու կամ դադարեցնելու: Համապատասխանության սերտիֆիկատի գործողության կասեցման և դադարեցման պայմանները սահմանված են Հայաստանի Հանրապետության կառավարության 2004 թվականի օգոստոսի 12-ի N 1170-Ն որոշմամբ։

Համապատասխանության սերտիֆիկատի գործողությունը կասեցնելու կամ դադարեցնելու դեպքում սերտիֆիկացման մարմինը դրա մասին տեղեկացնում է համապատասխանության սերտիֆիկատը տնօրինողին և գրավոր ծանուցում ստուգումներ իրականացնող իրավասու մարմիններին։

V. ՉԱՓՈՒՄՆԵՐԻ ՄԻԱՍՆԱԿԱՆՈՒԹՅԱՆ ԱՊԱՀՈՎՈՒՄԸ

34. Հանրային սննդի ծառայությունների չափումների միասնականության ապահովումը պետք է իրականացվի «Չափումների միասնականության ապահովման մասին» Հայաստանի Հանրապետության օրենքով սահմանված կարգով։

VI. ՊԵՏԱԿԱՆ ՎԵՐԱՀՍԿՈՂՈՒԹՅՈՒՆԸ

35. Սույն տեխնիկական կանոնակարգի պահանջներին հանրային սննդի ծառայությունների համապատասխանության պետական վերահսկողությունը պետք է իրականացվի «Համապատասխանության գնահատման մասին» և «Սննդամթերքի անվտանգության մասին» Հայաստանի Հանրապետության օրենքներով սահմանված կարգով։

(35-րդ կետը փոփ. 05.06.08 N 558-Ն)

(հավելվածը լրաց., փոփ., խմբ. 05.06.08 N 558-Ն)