ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԷՆԵՐԳԵՏԻԿԱՅԻ ՀԱՆՁՆԱԺՈՂՈՎ

Ո Ր Ո Շ ՈՒ Մ

24 հունիսի 1998 թվականի N 30
քաղ. Երևան

ՀՀ ԷՆԵՐԳԵՏԻԿԱՅԻ ՀԱՆՁՆԱԺՈՂՈՎԻ ՆԻՍՏԵՐԻ ՆԱԽԱՊԱՏՐԱՍՏՄԱՆ ԵՎ ԱՆՑԿԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության էներգետիկայի հանձնաժողովը որոշում է`

1. Հիմք ընդունելով «Էներգետիկայի մասին» ՀՀ օրենքի N 26 հոդվածը` հաստատել ՀՀ էներգետիկայի հանձնաժողովի նիստերի նախապատրաստման և անցկացման կարգը (հավելված):

2. Ուժը կորցրած ճանաչել ՀՀ էներգետիկայի հանձնաժողովի 1997 թ. սեպտեմբերի 12-ի N 13 որոշման` ՀՀ էներգետիկայի հանձնաժողովի նիստերի անցկացման կարգի վերաբերյալ N 2 հավելվածը:

Կ Ա Ր Գ

ՀՀ ԷՆԵՐԳԵՏԻԿԱՅԻ ՀԱՆՁՆԱԺՈՂՈՎԻ ՆԻՍՏԵՐԻ ՆԱԽԱՊԱՏՐԱՍՏՄԱՆ ԵՎ ԱՆՑԿԱՑՄԱՆ

1. ՀՀ էներգետիկայի հանձնաժողովն իր աշխատանքներն կազմակերպում է նիստերի միջոցով:

2. Նիստերը գումարվում են առնվազն երկու շաբաթը մեկ անգամ: Արտահերթ նիստերը գումարվում են հանձնաժողովի նախագահի կամ հանձնաժողովի անդամի (անդամների) նախաձեռնությամբ:

3. Պլանային նիստերը անցկացվում են յուրաքանչյուր երկրորդ շաբաթվա ուրբաթ օրը: Պլանային նիստերում սահմանված կարգով քննարկվում են հանձնաժողովի նախագահի կողմից հաստատված եռամսյակային նախնական ծրագրում և (կամ) օրակարգում ընդգրկված լրացուցիչ հարցեր:

4. Քննարկման նախապատրաստվող փաստաթղթի և որոշման նախագծի մշակման աշխատանքները համակարգում է հանձնաժողովի նախագահը և յուրաքանչյուր նախագծի նախապատրաստման համար որպես պատասխանատու նշանակում հանձնաժողովի ստորաբաժանումների պետերից մեկին, իսկ անհրաժեշտության դեպքում` համակարգող նշանակում հանձնաժողովի անդամներից մեկին:

5. Հանձնաժողովի նիստի քննարկմանը ներկայացվող որոշման նախագիծը պատրաստվում է պատասխանատու ստորաբաժանումների կողմից:

6. Նախքան նախագահին ներկայացնելը, օրակարգում ընդգրկելու համար քննարկման ենթակա որոշումների նախագծերը` կից անհրաժեշտ փաստաթղթերով, պատասխանատուի կողմից ներկայացվում են ստորաբաժանումների պետերին` նշագրման: Նախագծի վերաբերյալ սկզբունքային դիտողություններ կամ առաջարկություններ ունենալու դեպքում ստորաբաժանման ղեկավարը նախագծի վրա կատարում է նշումներ` հատուկ կարծիքի առկայության մասին և սահմանված կարգով նիստի քննարկմանը ներկայացնում որոշման նախագծի կամ կոնկրետ կետի (կետերի) այլընտրանքային տարբերակ:

7. Որոշման նախագծի այլընտրանքային տարբերակը նիստից առնվազն 3 օր առաջ ներկայացվում է հանձնաժողովի նախագահին, նրա բացակայության դեպքում` նախագահի տեղակալին և նրա հանձնարարությամբ նախօրոք տրամադրվում է հանձնաժողովի անդամներին և ստորաբաժանումների պետերին:

8. Հանձնաժողովի անդամները սեփական նախաձեռնությամբ կարող են մասնակցել հանձնաժողովի նիստի քննարկման համար նախապատրաստվող փաստաթղթերի մշակմանը, տալ կարծիք:

9. Հանձնաժողովի անդամները, ստորաբաժանումների պետերը նիստի օրակարգին վերաբերող առաջարկությունները ներկայացնում են հանձնաժողովի նախագահին նիստից առնվազն 5 օր առաջ: Նիստի վերջնական օրակարգը հաստատում է հանձնաժողովի նախագահը, և նիստից առնվազն 3 օր առաջ օրակարգում ընդգրկված որոշումների նախագծերը տրամադրվում են հանձնաժողովի անդամներին և ստորաբաժանումների պետերին:

10. Կոնկրետ տնտեսվարող սուբյեկտին առնչվող հարցի քննարկման դեպքում նիստից առնվազն երեք օր առաջ այդ մասին տեղեկացվում է տվյալ անձը կամ նրա լիազոր ներկայացուցիչը: Նա իրավունք ունի ծանոթանալ նյութերին և որոշման նախագծին, արտահայտել իր կարծիքը կամ ելույթ ունենալ նիստում:

11. Այն որոշման նախագծերը, որոնց իրականացումը կարող է հանգեցնել հանձնաժողովի բյուջեով չնախատեսված ծախսերի, նիստերի քննարկմանն են ներկայացվում հանձնաժողովի գործերի կառավարիչի եզրակացության առկայության դեպքում:

12. Նիստն իրավազոր է, եթե մասնակցում են հանձնաժողովի առնվազն երեք անդամ, այդ թվում` նախագահը կամ նախագահի տեղակալը:

13. Նիստում որոշումներն ընդունվում են հանձնաժողովի ներկա անդամների ձայների պարզ մեծամասնությամբ:

14. Նիստը վարում է հանձնաժողովի նախագահը, իսկ նրա բացակայության դեպքում` հանձնաժողովի նախագահի տեղակալը:

15. Նիստի վերաբերյալ կազմվում է արձանագրություն: Արձանագրությունների, որոշումների պատճենները 10-օրյա ժամկետում ուղարկվում են հանձնաժողովի անդամներին և ստորաբաժանումների ղեկավարներին, անհրաժեշտության դեպքում` նշված փաստաթղթերը, ինչպես նաև դրանց քաղվածքները, ուղարկվում են շահագրգիռ անձանց և կազմակերպություններին:

16. Հանձնաժողովի նախնական եռամսյա ծրագիրը ենթակա է հրապարակման:

17. Նիստում ընդունված նորմատիվ բնույթի ակտերը հրապարակվում են «ՀՀ գերատեսչական նորմատիվ ակտեր» տեղեկագրում և ուժի մեջ են մտնում հրապարակման պահից:

18. Հանձնաժողովի նիստերը դռնբաց են, և ցանկացած շահագրգիռ կողմ կարող է ծանոթանալ քննարկվող հարցերին:

19. Շահագրգիռ անձանց, հասարակայնության ներկայացուցիչներին հնարավորություն է ընձեռվում մասնակցել նիստերին, ներկայացնել տեղեկություններ, անհրաժեշտության դեպքում հանդես գալ ելույթով և արտահայտել սեփական կարծիքը:

20. Նիստերին կարող են մասնակցել զանգվածային լրատվամիջոցների ներկայացուցիչները: