«Վավերացնում եմ»
Հայաստանի Հանրապետության
Նախագահ Ռ. Քոչարյան
31 oգոստոսի 2000 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
31 օգոստոսի 2000 թվականի N 531
քաղ. Երևան
«ԳՆՈՒՄՆԵՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ԿԻՐԱՐԿՈՒՄՆ ԱՊԱՀՈՎՈՂ ԱՌԱՋՆԱՀԵՐԹ ՄԻՋՈՑԱՌՈՒՄՆԵՐԻ ՄԱՍԻՆ
«Գնումների մասին» Հայաստանի Հանրապետության օրենքի կիրարկումն ապահովելու նպատակով և Հայաստանի Հանրապետության քաղաքացիական օրենսգրքի 62 հոդվածին համապատասխան` Հայաստանի Հանրապետության կառավարությունը որոշում է.
1. Ստեղծել Հայաստանի Հանրապետության կառավարությանն առընթեր պետական գնումների գործակալություն` պետական հիմնարկ:
2. «Գնումների մասին» Հայաստանի Հանրապետության օրենքի 5, 17, և 19 հոդվածների համաձայն`
ա) լիազոր մարմնի իրավասությունը վերապահել Հայաստանի Հանրապետության ֆինանսների և էկոնոմիկայի նախարարությանը.
բ) կենտրոնացված գնումներ կատարելու իրավասությունը վերապահել Հայաստանի Հանրապետության կառավարությանն առընթեր պետական գնումների գործակալությանը:
3. Պետական գաղտնիք պարունակող` Հայաստանի Հանրապետության պաշտպանության, ազգային անվտանգության կարիքների համար գնումները կատարվում են լիազոր պետական մարմինների կողմից` փակ մրցույթով, ապակենտրոնացված:
4. «Գնումների մասին» Հայաստանի Հանրապետության օրենքի 5 և 32 հոդվածներին համապատասխան հաստատել`
ա) մրցույթի հանձնաժողովների կազմավորման և գործունեության կարգը (կցվում է).
բ) գնումների ֆինանսավորման կարգը (կցվում է):
5. Հայաստանի Հանրապետության ֆինանսների և էկոնոմիկայի նախարարությանը, Հայաստանի Հանրապետության կառավարությանն առընթեր պետական գնումների գործակալությանը`
ա) երկամսյա ժամկետում Հայաստանի Հանրապետության կառավարության հաստատմանը ներկայացնել Հայաստանի Հանրապետության կառավարությանն առընթեր պետական գնումների գործակալության կանոնադրությունը, կենտրոնական ապարատի կառուցվածքը և աշխատողների թիվը.
բ) «Գնումների մասին» Հայաստանի Հանրապետության օրենքով սահմանված ժամկետում Հայաստանի Հանրապետության կառավարություն ներկայացնել օրենքի կիրարկումն ապահովող իրավական ակտերի նախագծերը:
6. Հայաստանի Հանրապետության ֆինանսների և էկոնոմիկայի նախարարությանը` լիազոր մարմնի վերապահված իրավասությունների սահմաններում մինչև 2000 թվականի սեպտեմբերի 30-ը ընդունել օրենքի կիրարկումն ապահովող գերատեսչական նորմատիվ ակտեր:
7. Հայաստանի Հանրապետության նախարարություններին, գերատեսչություններին, պետական կառավարման տարածքային մարմիններին` մինչև Հայաստանի Հանրապետության կառավարությանն առընթեր պետական գնումների գործակալության կողմից գնումների իրականացումը օրենքով սահմանված կարգով կատարել բաց մրցույթով գնումներ:
Առաջարկել Հայաստանի Հանրապետության տեղական ինքնակառավարման մարմիններին քննության առնել համայնքների կարիքների համար կենտրոնացված գնումներ կատարելու լիազորությունը, օրենքով սահմանված ժամկետում Հայաստանի Հանրապետության կառավարությանն առընթեր պետական գնումների գործակալությանը վերապահելու նպատակահարմարության հարցը և դրա մասին տեղեկացնել վերջինիս:
9. «Գնումների մասին» Հայաստանի Հանրապետության օրենքն ուժի մեջ մտնելու պահից ուժը կորցրած ճանաչել Հայաստանի Հանրապետության կառավարության 1997 թվականի մայիսի 30-ի «Շինարարության պատվերի տեղադրման և տեխնիկական վերահսկման մրցույթների կազմակերպման և անցկացման կարգը հաստատելու մասին» N 159 որոշումը:
10. Սույն որոշումն ուժի մեջ է մտնում 2000 թվականի օգոստոսի 22-ից:
Հայաստանի Հանրապետության |
Ա. Մարգարյան |
Հաստատված է |
Կ Ա Ր Գ
մրցույթի հանձնաժողովների կազմավորման եվ գործունեության
I. Ընդհանուր դրույթներ
1. Սույն կարգը «Գնումների մասին» Հայաստանի Հանրապետության օրենքի (այսուհետև` օրենք) 32 հոդվածի պահանջներին համապատասխան սահմանում է մրցույթի հանձնաժողովների կազմավորման և գործունեության կարգը:
2. Օրենքով սահմանված հասկացությունները սույն կարգում գործածվում են նույն իմաստով:
3. Մրցույթի հանձնաժողովների կազմավորման և գործունեության հետ կապված հարաբերությունները կարգավորվում են գնումների մասին օրենսդրությամբ, սույն կարգով և սույն կարգով նախատեսված դեպքերում լիազոր մարմնի ղեկավարի ընդունած որոշումներով:
II. Մրցույթի հանձնաժողովների կազմավորման կարգը
4. Մինչև մրցույթի հայտարարության և (կամ) մրցույթի հրավերի հրապարակումը պատվիրատուն կազմավորում է առնվազն 5, բայց ոչ ավելի, քան 12 անդամից կազմված հանձնաժողով: Հանձնաժողովը կազմավորվում է պատվիրատուի ղեկավարի համապատասխան հրամանով: Ընդ որում, կենտրոնացված գնումների դեպքում պետական գնումների գործակալության ղեկավարի հրամանը հաստատվում է մրցույթի հանձնաժողովում ընդգրկելու նպատակով թեկնածություններ ներկայացրած պետական մարմինների ղեկավարների գրավոր առաջարկի հիման վրա, իսկ սույն կարգով նախատեսված դեպքերում` նաև մրցույթի հանձնաժողովի անդամների թեկնածությունները քննարկելու նպատակով հրավիրված խորհրդակցության արդյունքների մասին արձանագրության հիման վրա:
5. Ապակենտրոնացված գնումների դեպքում հանձնաժողովի անդամներն են պատվիրատուի`
ա) ղեկավարը կամ նրա տեղակալը (հանձնաժողովի նախագահ).
բ) իրավաբանական ծառայության ղեկավարը կամ ներկայացուցիչը (հանձնաժողովի քարտուղար).
գ) ֆինանսատնտեսական ծառայության ղեկավարը կամ ներկայացուցիչը.
դ) գնումների գծով մասնագետը (մասնագետները).
ե) ղեկավարի հայեցողությամբ` այլ պաշտոնատար անձինք:
6. Կենտրոնացված գնումների դեպքում հանձնաժողովի անդամներ են պետական գնումների գործակալության ներկայացուցիչը` գործակալության ղեկավարի առաջադրմամբ, ինչպես նաև այն պետական մարմինների ներկայացուցիչները, որոնց կարիքների համար պետք է իրականացվեն այդ գնումները: Յուրաքանչյուր պետական մարմին մրցույթի հանձնաժողովում ներկայացվում է մեկ անդամով` տվյալ պետական մարմնի ղեկավարի գրավոր առաջադրմամբ:
7. Ավելի քան 11 պետական մարմնի կարիքների համար կենտրոնացված գնումներ կատարելու դեպքում հանձնաժողովի անդամներ են`
ա) պետական գնումների գործակալության ներկայացուցիչը` գործակալության ղեկավարի գրավոր առաջադրմամբ.
բ) այն 5 պետական մարմինների մեկական ներկայացուցիչները, որոնց կարիքների համար ձեռք բերվող ապրանքները, աշխատանքները կամ ծառայությունները տվյալ գնումներում համեմատաբար մեծ տեսակարար կշիռ ունեն.
գ) մնացած պետական մարմինների կողմից ընտրված 6 ներկայացուցիչ:
Ներկայացուցիչներն ընտրվում են պետական գնումների գործակալության ղեկավարի հրավիրած խորհրդակցության ժամանակ: Խորհրդակցությանը պետք է ներկա գտնվեն այն բոլոր պետական մարմինների ներկայացուցիչները` դրանց ղեկավարների առաջադրմամբ, որոնց կարիքների համար իրականացվելու են այդ գնումները` բացառությամբ սույն կետի «բ» ենթակետում նշված պետական մարմինների ներկայացուցիչների: Խորհրդակցության հրավիրված անձինք լիազորությունների վերապահման միջոցով ընտրում են հանձնաժողովի 6 անդամի: Եթե լիազորությունների վերապահման միջոցով մրցույթի հանձնաժողովի անդամներ չեն ընտրվում, ապա այդ անձինք ընտրվում են վիճակահանությամբ:
Խորհրդակցության արդյունքների մասին կազմվում է արձանագրություն, որն ստորագրում են խորհրդակցության բոլոր մասնակիցները: Եթե խորհրդակցության մասնակիցները դրա արդյունքների մասին ունեն կարծիք (հատուկ կարծիք), որը ներառված չէ արձանագրության մեջ, և հարկ են համարում արտահայտել այն, շարադրում են գրավոր, ստորագրում և կցում արձանագրությանը: Հատուկ կարծիք ներկայացրած անձինք արձանագրությունն ստորագրելիս` դրանում կատարում են նշում հատուկ կարծիքի առկայության մասին: Հատուկ կարծիքն արձանագրության անբաժանելի մասն է:
8. 3 և պակաս պետական մարմնի կարիքների համար կենտրոնացված գնումներ կատարելու դեպքում պետական մարմինները և պետական գնումների գործակալությունը մրցույթի հանձնաժողովում ներկայացվում են առավելագույնը 3 անդամով:
9. Կենտրոնացված գնումների դեպքում, սահմանված կարգով հանձնաժողովի կազմավորումից հետո, հանձնաժողովի որոշմամբ ընտրվում են հանձնաժողովի նախագահ և քարտուղար:
10. Մրցույթի հանձնաժողովի աշխատանքներին խորհրդատվական ձայնի իրավունքով կարող են իրենց նախաձեռնությամբ մասնակցել Հայաստանի Հանրապետության Ազգային ժողովի պատգամավորները:
11. Հանձնաժողովի աշխատանքներին խորհրդատվական ձայնի իրավունքով կարող են մասնակցել նաև այլ անձինք (այսուհետև` խորհրդատու): Խորհրդատուների անվանացանկը հաստատվում է մրցույթի հանձնաժողովի կազմավորման մասին որոշմամբ: Ընդ որում, եթե մրցույթի հանձնաժողովը որոշում է ընդունում խորհրդատուի եզրակացության հիման վրա, ապա դրա մասին նշվում է գնումների ընթացակարգի արձանագրության մեջ, և ընդունած որոշման համար պատասխանատվություն են կրում հանձնաժողովի անդամները` Հայաստանի Հանրապետության օրենսդրությամբ սահմանված կարգով, եթե այլ բան նախատեսված չէ խորհրդատուի և պատվիրատուի միջև կնքված պայմանագրով (եթե այդպիսին առկա է):
12. Հանձնաժողովի կազմը մնում է անփոփոխ` մինչև սույն կարգի 13-րդ կետով նախատեսված աշխատանքների վերջին օրը, բացառությամբ այն դեպքերի, երբ անհնար է դրա անդամների կամ նրանց մի մասի կողմից իրենց պարտավորությունների կատարումը:
III. Մրցույթի հանձնաժողովների լիազորությունները եվ գործունեության հիմնական սկզբունքները
13. Մրցույթի հանձնաժողովը`
ա) հաստատում է մրցույթի հայտարարության և մրցույթի հրավերի տեքստերը.
բ) բացում և գնահատում է մրցույթի հայտերը.
գ) որոշում է մրցույթի հաղթողին:
14. Մրցույթի հանձնաժողովի գործունեությունն իրականացվում է կոլեգիալության սկզբունքով: Հանձնաժողովի նիստն իրավազոր է, եթե նիստին ներկա է հանձնաժողովի անդամների առնվազն երեք քառորդը: Հանձնաժողովի որոշումը համարվում է ընդունված, եթե դրա օգտին քվեարկել է հանձնաժողովի անդամների կեսից ավելին: Հանձնաժողովի յուրաքանչյուր անդամ ունի մեկ ձայնի իրավունք, իսկ ձայների հավասարության դեպքում հանձնաժողովի նախագահի (նիստը վարողի) ձայնը վճռորոշ է:
15. Մրցույթի հանձնաժողովն իր որոշմամբ սահմանում է հերթական նիստերի անցկացման ժամանակացույցը: Արտահերթ նիստ հրավիրում է հանձնաժողովի նախագահը` իր նախաձեռնությամբ կամ հանձնաժողովի անդամների առնվազն մեկ երրորդի պահանջով` նրանց նշած ժամկետում: Արտահերթ նիստ հրավիրելու ժամկետի մասին հանձնաժողովի նախագահը նիստից առնվազն 24 ժամ առաջ գրավոր տեղյակ է պահում հանձնաժողովի անդամներին` ներկայացնելով արտահերթ նիստի առաջարկվող օրակարգը:
IV. Մրցույթի հայտարարության եվ մրցույթի հրավերի հաստատումը
16. Բաց մրցույթի ձևով գնումների կատարման ժամանակ մրցույթի հայտեր ներգրավելու նպատակով մրցույթի հանձնաժողովի կազմավորման օրվանից 5 աշխատանքային օրվա ընթացքում մրցույթի հանձնաժողովի որոշմամբ հաստատվում է մրցույթի հայտարարության տեքստը: Եթե գնման պայմանագրի նախահաշվային գինն ապրանքների և ծառայությունների դեպքում գերազանցում է գնումների բազային միավորի իննսունապատիկը, իսկ աշխատանքների դեպքում` հինգ հարյուրապատիկը, ապա պատվիրատուի համապատասխան ծառայության եզրակացության հիման վրա մրցույթի հայտարարության տեքստը հաստատվում է միաժամանակ հայերենով, ռուսերենով և անգլերենով:
Պատվիրատուն մրցույթի հայտարարության տեքստը լիազոր մարմնի սահմանած կարգով հրապարակում է գնումների պաշտոնական տեղեկագրում: Ընդ որում, մրցույթի մասին հայտարարությունը պետք է պարունակի հետևյալ տեղեկությունները`
ա) պատվիրատուի անվանումը (անունը) և գտնվելու վայրը.
բ) մրցույթի տեսակը.
գ) մրցույթի ծածկագիրը.
դ) կնքվելիք պայմանագրի բովանդակության, պայմանագրի առարկայի, դրա տեխնիկական, որակական և տնտեսական բնութագրերի համառոտ շարադրանքը.
ե) կնքվելիք պայմանագրի կատարման նախընտրելի կամ պահանջվող ժամկետը.
զ) մասնակիցների` անկախ որևէ երկրի ռեզիդենտը լինելու հանգամանքից, մրցույթին մասնակցելու հավասար իրավունքի կամ օրենքին համապատասխան այդ իրավունքի սահմանափակման մասին հայտարարությունը.
է) մրցույթի հրավեր ստանալու պայմանները, այդ թվում` դրա համար գանձվող վճարի չափը, վճարման կարգը, ժամկետները և արժույթը.
ը) լեզուն կամ լեզուները, որով կամ որոնցով պետք է մրցույթի հայտեր ներկայացվեն.
թ) մասնակիցների որակավորման տվյալների նկատմամբ ներկայացվող հիմնական պահանջները.
ժ) մրցույթի հայտերը ներկայացնելու տեղը և ժամկետը.
ժա) պատվիրատուի հայեցողությամբ անհրաժեշտ այլ տեղեկություններ:
17. Սույն կարգի 16-րդ կետում նշված որոշմամբ մրցույթի հանձնաժողովը մրցույթի հայտարարության տեքստի հաստատման կարգով հաստատում է նաև մրցույթի հրավերի տեքստը, որը պետք է պարունակի`
ա) հղում հրապարակված մրցույթի մասին հայտարարությանը` ի լրումն որի տրամադրվում է տվյալ մրցույթի հրավերը.
բ) մրցույթի հայտերի պատրաստման հրահանգները.
գ) մասնակիցներից պահանջվող որակավորման տվյալների չափանիշները և դրանց գնահատման կարգը.
դ) մասնակիցների կողմից իրենց որակավորման տվյալները հաստատելու նպատակով ներկայացվող փաստաթղթերին կամ այդ նպատակով պահանջվող այլ տեղեկատվությանն առաջադրվող պահանջները.
ե) գնվող ապրանքների, աշխատանքների և ծառայությունների բնույթը, կազմը և կառուցվածքը բնորոշող բնութագրերը, ներառյալ տեխնիկական առանձնահատկությունները, պլանները, գծագրերը.
զ) մրցույթի հաղթողի ընտրության կարգը, ներառյալ պատվիրատուի կողմից օգտագործվող չափանիշները և օրենքին համապատասխան տրամադրվող նախապատվության հնարավորությունն ու պայմանները.
է) կնքվելիք պայմանագրի նախագիծը.
ը) եթե մասնակիցներին թույլատրվում է հայտեր ներկայացնել գնվող ապրանքների, աշխատանքների և ծառայությունների միայն մի մասի համար, ապա` դրա պայմանները և կարգը.
թ) մրցույթի հայտի գնի հաշվարկման մեթոդը և արտահայտման ձևը, արժույթը.
ժ) նշում այն մասին, որ առաջարկվող գինը, ապրանքի, աշխատանքների և ծառայությունների արժեքից բացի, ներառում է փոխադրման, ապահովագրման, տուրքերի և հարկերի վճարման ծախսերը.
ժա) պատվիրատուի կողմից` մրցույթի հայտի և պայմանագրի կատարման ապահովմանը և մրցույթի հայտ ներկայացրած անձի կողմից պարտավորությունների կատարման ցանկացած ապահովման բնույթին, ձևին, քանակին և այլ հիմնական պայմաններին առաջարկվող պահանջները.
ժբ) մրցույթի հայտերը ներկայացնելու պայմանները, ներառյալ եղանակը, տեղը, ժամկետը, մրցույթի հայտի լեզուն.
ժգ) այն եղանակները, որոնցով մասնակիցները կարող են պահանջել մրցույթի փաստաթղթերի վերաբերյալ պարզաբանումներ և տեղեկատվություն` պատվիրատուի կողմից մասնակիցների հետ կազմակերպվելիք հանդիպումների մասին, այդ թվում` պատվիրատուի ու մասնակիցների միջև անմիջական կապ ապահովելու և գնումների վերաբերյալ տեղեկություններ ստանալու լիազորությամբ օժտված պաշտոնատար անձանց (ծառայողների) անունը, պաշտոնը, հասցեն, ծառայողական հեռախոսի համարը.
ժդ) մրցույթի հայտերը ներկայացնելու պայմանները, դրանց բացման օրը և ժամը, քննարկման (գնահատման և համեմատման) կարգը.
ժե) գնումներին վերաբերող օրենքի և այլ իրավական ակտերի դրույթներին կատարված հղումները.
ժզ) ընտրված մասնակցին պայմանագիրը կնքելու առաջարկը ներկայացնելու պայմանները.
ժէ) պատվիրատուի գործողությունները և (կամ) որոշումները, նրա կողմից օգտագործվող ընթացակարգերը բողոքարկելու` մասնակցի իրավունքի պարզաբանումները.
ժը) տեղեկատվություն պատվիրատուի կողմից մրցույթի հայտերը մերժելու վերաբերյալ իրեն իրավունք վերապահելու մասին.
ժթ) մրցույթի հայտերը նախապատրաստելու, ներկայացնելու և գնումների վերաբերյալ այլ տեղեկատվություն:
18. Փակ մրցույթի անցկացման դեպքում դրա մասին նշվում է մրցույթի հրավերի մեջ:
19. Երկու փուլով մրցույթի անցկացման դեպքում դրա մասին նշվում է բաց մրցույթով գնումների կատարման դեպքում` մրցույթի հայտարարության, իսկ փակի դեպքում` մրցույթի հրավերի մեջ:
V. Մրցույթի հրավերի տրամադրման կարգը եվ պայմանները
20. Մրցույթի հանձնաժողովի անդամ հանդիսացող պատվիրատուի պաշտոնատար անձն այն տրամադրում է մրցույթի հրավեր ստանալու պահանջ ներկայացրած անձանց: Ընդ որում`
ա) բայց մրցույթի հրավեր տրամադրելու համար պահանջվում է վճար, որը չի կարող գերազանցել մրցույթի հրավերի պատճենահանման և առաքման համար պահանջվող ծախսերի չափը.
բ) մրցույթի հրավերը տրամադրում է պահանջվող վճարն ստանալուց հետո` 2 աշխատանքային օրվա ընթացքում:
21. Փակ մրցույթի անցկացման դեպքում մրցույթի հրավերն ուղարկվում է բոլոր հնարավոր անձանց:
22. Եթե գնման պայմանագրի նախահաշվային գինն ապրանքների և ծառայությունների դեպքում գերազանցում է գնումների բազային միավորի իննսունապատիկը, իսկ աշխատանքների դեպքում` հինգ հարյուրապատիկը, ապա մրցույթին մասնակցելու մտադրություն ունեցող անձինք իրավունք ունեն պահանջելու մրցույթի հրավեր` հայերենով, ռուսերենով և անգլերենով:
VI. Մրցույթի հրավերի պարզաբանումը եվ դրանում փոփոխության կատարումը
23. Մասնակիցն իրավունք ունի սահմանված կարգով պահանջելու մրցույթի հրավերի պարզաբանում: Պարզաբանումը տրամադրվում է մրցույթի հանձնաժողովի որոշմամբ` հարցում ստանալու օրվանից 5 աշխատանքային օրվա ընթացքում: Նման որոշումը նույն ժամկետում հրապարակվում է պաշտոնական մամուլում, ինչպես նաև տրամադրվում է մրցույթի հայտեր ներկայացրած անձանց:
24. Պարզաբանումներ չեն տրամադրվում, եթե հարցումը կատարվել է օրենքով սահմանված ժամկետի խախտմամբ, ինչպես նաև` եթե հարցումը դուրս է գալիս մրցույթի հրավերի բովանդակության շրջանակից կամ, եթե հարցման պարզաբանումը պետական գաղտնիքի հրապարակման վտանգ է պարունակում:
25. Մինչև մրցույթի հայտերը ներկայացնելու ժամկետի կեսի ավարտը` մրցույթի հանձնաժողովի որոշմամբ կարող են օրենքով սահմանված կարգով փոփոխություններ կատարվել մրցույթի հրավերում: Որոշումը հրապարակվում է պաշտոնական տեղեկագրում, ինչպես նաև այն տրամադրվում է մրցույթի հայտեր ներկայացրած անձանց: Մրցույթի հրավերում փոփոխությունների կատարման դեպքում մրցույթի հայտերը ներկայացնելու ժամկետի ավարտը հաշվվում է այդ փոփոխությունների մասին որոշման հրապարակման օրվանից:
VII. Մրցույթի հայտերի ստացումը, դրանց գնահատումը եվ համեմատումը
26. Օրենքով սահմանված կարգով մրցույթի հայտեր ստանալու դեպքում մրցույթի հրավերում նշված պաշտոնատար անձը մրցույթի հայտերը գրանցում է առանձին գրանցամատյանում` ըստ ստացման հերթականության, ծրարի վրա նշելով գրանցման համարը, օրը և ժամը: Ընդ որում, մասնակցի պահանջով դրա մասին տրամադրվում է տեղեկանք: Գրանցամատյանի ձևը և վարման կարգը սահմանում է լիազոր մարմինը:
27. Օրենքի պահանջների խախտմամբ, ինչպես նաև մրցույթի հայտերը ներկայացնելու ժամկետը լրանալուց հետո տրված հայտերը մերժվում են և առանց բացվելու վերադարձվում ներկայացնողին:
28. Մրցույթի հայտերը բացվում են մրցույթի հրավերում նշված ժամկետը լրանալու օրը, մրցույթի հանձնաժողովի հատուկ նիստում: Հայտերի բացման օրը և ժամը պետք է համընկնի դրանք ներկայացնելու վերջին ժամկետին:
29. Մրցույթի հայտերի բացման նիստում մրցույթի հանձնաժողովը հրապարակում է`
ա) հայտ ներկայացրած յուրաքանչյուր անձի անվանումը (անունը).
բ) նախնական տվյալներ` ներկայացված մրցույթի հայտերի` մրցույթի հրավերի պահանջներին համապատասխանության վերաբերյալ.
գ) տվյալներ` գնային առաջարկներ պարունակող ծրարների առկայության, դրանք կազմելու ու ներկայացնելու Հայաստանի Հանրապետության օրենքի պահանջներին համապատասխանության վերաբերյալ.
դ) ամփոփ տվյալներ մրցույթի ներկայացված հայտերում սահմանված կարգով համապատասխան փոփոխություններ կատարելու մասին ծանուցումների վերաբերյալ:
30. Մրցույթի հանձնաժողովը մրցույթի հայտերը բացելուց հետո կազմում է արձանագրություն, որը գնումների ընթացակարգի արձանագրության անբաժանելի մասն է: Արձանագրությունն ստորագրում են մրցույթի հանձնաժողովի անդամները և նիստին ներկա մասնակիցները: Արձանագրությունը պետք է ներառի`
ա) նշում մրցույթի հայտերի բացման վայրի, օրվա և ժամի մասին.
բ) մրցույթի հայտեր ներկայացրած անձանց անվանումները (անունները) և գտնվելու վայրերը (հասցեները).
գ) նախնական տվյալներ մրցույթի հայտերի` մրցույթի հրավերի պահանջներին համապատասխանության մասին.
դ) նշում մրցույթի յուրաքանչյուր հայտի` գնային առաջարկ պարունակող ծրարի առկայության, դրա կազմման ու ներկայացնելու` սույն օրենքի պահանջներին համապատասխանության, մրցույթի յուրաքանչյուր հայտի մյուս հիմնական պայմանների մասին.
ե) մրցույթը չկայացած հայտարարվելու դեպքում` դրա հիմնավորումը.
զ) մրցույթի որևէ հայտի մերժման դեպքում` դրա հիմնավորումը.
է) տեղեկատվություն մրցույթի հայտերի վերաբերյալ հարցումների և դրանց պատասխանների մասին.
ը) մրցույթի արդյունքներն ամփոփելու նպատակով կայանալիք նիստի վայրը, օրը և ժամը.
թ) մրցույթի հանձնաժողովի անդամների անունները, ազգանունները և պաշտոնները.
ժ) այլ անհրաժեշտ տեղեկատվություն:
31. Եթե մրցույթի հանձնաժողովի անդամները և (կամ) մասնակիցները մրցույթի հայտերի բացման ընթացակարգի վերաբերյալ ունեն մրցույթի բացման նիստի արձանագրության մեջ չներառված այլ կարծիք (հատուկ կարծիք), ապա դա ներկայացնում են գրավոր, որը կցվում է արձանագրությանը` որպես դրա անբաժանելի մաս:
32. Մրցույթի մասնակիցները և նրանց ներկայացուցիչները կարող են ներկա գտնվել հայտերի բացման նիստին: Մասնակիցները կամ նրանց ներկայացուցիչները կարող են պահանջել մրցույթի բացման նիստի արձանագրության պատճենը, որը մրցույթի հանձնաժողովը տրամադրում է անհապաղ:
33. Մրցույթի հայտերի բացման նիստի օրվան հաջորդող 2 աշխատանքային օրվա ընթացքում մրցույթի հայտերի բացման արդյունքները հաղորդվում են այն մասնակիցներին, որոնք կամ որոնց ներկայացուցիչները չեն մասնակցել այդ նիստին:
34. Մրցույթի հայտերի բացումից հետո մրցույթի հանձնաժողովը կարող է բոլոր մասնակիցներից պահանջել բացատրություններ (պարզաբանումներ) ներկայացված մրցույթի հայտերի վերաբերյալ, ինչպես նաև վերահաստատել իրենց կողմից ներկայացված որակավորման տվյալները: Ընդ որում, բացատրություններ ստանալու նպատակով մրցույթի հանձնաժողովը հրավիրում է նիստ, որին մասնակցելու նպատակով հրավիրվում են մրցույթի հայտեր ներկայացրած բոլոր անձինք: Բացատրությունների և ստացված պարզաբանումների վերաբերյալ կազմվում է արձանագրություն, որը գնման ընթացակարգի արձանագրության անբաժանելի մասն է: Բացատրությունները չեն կարող ներառել առաջարկություններ գների կամ մրցույթի հայտի պայմանների փոփոխման վերաբերյալ:
Եթե մասնակիցը չի վերահաստատում իր որակավորման տվյալները, ապա նրա մրցույթի հայտը մերժվում է: Նման դեպքում կազմվում է արձանագրություն` նշելով մրցույթի հայտի մերժման հիմքը, որի պատճենը տրամադրվում է մասնակցին` նրա կողմից նման պահանջ ներկայացվելու պահին: Արձանագրությունը գնումների ընթացակարգի արձանագրության անբաժանելի մասն է:
35. Մրցույթի հանձնաժողովը մրցույթի հայտերը գնահատում և համեմատում է լիազոր մարմնի հաստատած մեթոդական հրահանգի (ցուցումի) հիման վրա: Ընդ որում, մրցույթի հրավերի պահանջները բավարարող հայտերը գնահատվում են նախ տեխնիկապես: Տեխնիկապես բավարար գնահատված հայտերը գնահատվում են տնտեսապես: Մրցույթի հայտերի գնահատման և համեմատման ժամանակ մրցույթի հրավերով նախատեսված չափանիշներից բացի այլ չափանիշների օգտագործումն անթույլատրելի է:
36. Եթե բավարար գնահատված մրցույթի հայտերում անհամապատասխանություն է տեղ գտել տառերով և թվերով գրված գումարների միջև, ապա մրցույթի հանձնաժողովը հիմք է ընդունում տառերով գրված գումարը:
37. Մրցույթի հանձնաժողովը մերժում է մասնակիցների ներկայացրած հայտերը` օրենքով նախատեսված դեպքերում և, եթե մրցույթի հայտ ներկայացրած մասնակիցը`
ա) չի համապատասխանում մրցույթի հրավերով սահմանված որակավորման և (կամ) ընթացակարգային այլ պահանջներին.
բ) չի համաձայնում սույն կարգի 36-րդ կետին համապատասխան կատարված ուղղումներին:
38. Մրցույթի հաղթողին որոշելու նպատակով մրցույթի հանձնաժողովը համեմատում է բավարար գնահատված հայտերը: Հաղթող է ճանաչվում այն մասնակիցը, որի ներկայացրած առաջարկը տեխնիկապես և որակապես բավարարում է մրցույթի հրավերի պահանջները և, եթե նրա հայտը մյուսներից առավել շահավետ է: Մրցույթի հայտը որպես առավել շահավետ ճանաչելիս` մրցույթի հանձնաժողովը հաշվի է առնում միայն մրցույթի հայտի գինը, ընդ որում, ընտրված մասնակցի մրցույթի հայտի գինը մնացած հավասար պայմաններում պետք է լինի առաջարկվող գներից ամենացածրը:
39. Եթե առաջարկվող գները ներկայացված են 2 կամ ավելի արժույթներով, ապա դրանք համեմատվում են Հայաստանի Հանրապետության դրամով` մրցույթի հայտերի բացման օրը Հայաստանի Հանրապետության կենտրոնական բանկի կողմից սահմանված հաշվարկային փոխարժեքով:
40. Ապրանքների և ծառայությունների գնման դեպքում, լիազոր մարմնի համաձայնությամբ, պայմանագիրը կնքելու նախապատվությունը մինչև առաջարկվող գնի 20 տոկոսի չափով տրվում է այն մասնակցին, որը պարտավորվում է պայմանագիրը կատարելու ժամանակ ավելի քան 50 տոկոսի չափով օգտագործել հայաստանյան ծագում ունեցող աշխատանքային և արտադրական ռեսուրսները: Այդ նախապատվությունը կարող է կիրառվել, եթե բաց մրցույթով գնումների կատարման ժամանակ նախատեսված է մրցույթի հայտարարության, իսկ փակի դեպքում` մրցույթի հրավերի մեջ:
41. Մրցույթի հայտերը ներկայացնելու վերջին օրվանից 30 աշխատանքային օրվա ընթացքում մրցույթի արդյունքների ամփոփման նիստում մրցույթի հանձնաժողովը որոշում է հաղթողին կամ մրցույթը օրենքին համապատասխան չկայացած է հայտարարում:
42. Մրցույթի արդյունքների ամփոփման նիստում մրցույթի հանձնաժողովը հրապարակում է հաղթող ճանաչված մասնակցի անվանումը (անունը) և հիմնավորում վերջինիս ընտրությունը:
43. Հաղթողին ընտրելուց հետո մրցույթի հանձնաժողովը կազմում է մրցույթի արդյունքների ամփոփման նիստի արձանագրություն, որը գնումների ընթացակարգի արձանագրության անբաժանելի մասն է: Արձանագրությունն ստորագրում են մրցույթի հանձնաժողովի անդամները: Եթե մրցույթի հանձնաժողովի անդամները և (կամ) մասնակիցները մրցույթի արդյունքների ամփոփման վերաբերյալ ունեն այլ կարծիք (հատուկ կարծիք) և հարկ են համարում արտահայտել այն, շարադրում են գրավոր ու կցում արձանագրությանը: Հատուկ կարծիքը մրցույթի արդյունքների ամփոփման նիստի արձանագրության անբաժանելի մասն է:
44. Մրցույթի հանձնաժողովն իր որոշմամբ չկայացած է հայտարարում մրցույթը, եթե`
ա) ներկայացված հայտերից ոչ մեկը չի համապատասխանում մրցույթի հրավերի պայմաններին.
բ) արտակարգ իրավիճակում անհնար է դառնում գնումների կատարումը.
գ) ոչ մի հայտ չի ներկայացվել.
դ) ներկայացվել է միայն մեկ հայտ:
45. Մրցույթը չկայացած հայտարարվելուց հետո հայտերը չեն բացվում և ներկայացված տեսքով դրանք պետք է վերադարձվեն մասնակցին: Ընդ որում, մրցույթը չկայացած հայտարարվելու մասին որոշումը` այն ընդունելուց հետո 15 աշխատանքային օրվա ընթացքում հրապարակվում է պաշտոնական տեղեկագրում:
46. Մինչև պայմանագրի կնքումը մրցույթի հանձնաժողովի, պատվիրատուի և մասնակիցների միջև բանակցություններ վարելն արգելվում է` բացառությամբ օրենքով նախատեսված դեպքերի:
VIII. Մրցույթի հանձնաժողովի լուծարման կարգը
47. Մրցույթի արդյունքներն ամփոփելուց հետո մրցույթի հանձնաժողովն իր որոշմամբ հաստատում է իր կողմից իրականացված աշխատանքների մասին հաշվետվությունը: Եթե հանձնաժողովի անդամները հաշվետվության մասին ունեն այլ կարծիք (հատուկ կարծիք) և հարկ են համարում արտահայտել այն, շարադրում են գրավոր և կցում հաշվետվությանը: Հատուկ կարծիք ներկայացրած անձինք հաշվետվությունն ստորագրելու մասին որոշումն ստորագրելիս դրանում կատարում են նշում հատուկ կարծիքի առկայության մասին: Հատուկ կարծիքը հաշվետվության անբաժանելի մասն է:
Հաշվետվությանը կցվում են նաև հանձնաժողովի գործունեության ընթացքում կազմված բոլոր փաստաթղթերը (որոշումներ, արձանագրություններ, խորհրդատուի եզրակացություններ և այլ փաստաթղթեր): Հանձնաժողովի որոշմամբ հաշվետվությունը տրվում է պատվիրատուի ղեկավարին:
48. Պատվիրատուն սույն կարգի 47-րդ կետում նշված հաշվետվությունն ստանալուց հետո, դրա հիման վրա համապատասխան հրամանով լուծարում է մրցույթի հանձնաժողովը:
49. Մրցույթի հանձնաժողովի նախագահը պետք է ապահովի մրցույթի հանձնաժողովի գործունեությանը վերաբերող տեղեկությունների գրառումը` կազմելով համապատասխան փաստաթղթեր:
50. Հանձնաժողովի գործունեության համար նրա անդամները կրում են անձնական պատասխանատվություն` Հայաստանի Հանրապետության օրենսդրությամբ սահմանված կարգով:
Հաստատված է |
Կ Ա Ր Գ
գնումների ֆինանսավորման
I. Ընդհանուր դրույթներ
1. Սույն կարգը «Գնումների մասին» Հայաստանի Հանրապետության օրենքի (այսուհետև` օրենք) 5 հոդվածի հիման վրա սահմանում է պետության ու համայնքների կարիքների համար ապրանքների, աշխատանքների և ծառայությունների գնումների ֆինանսավորման կարգը:
2. Օրենքով սահմանված հասկացությունները սույն կարգում գործածվում են նույն իմաստով:
3. Գնումները ֆինանսավորվում են Հայաստանի Հանրապետության պետական բյուջեի, համայնքների բյուջեների և (կամ) պետական ու տեղական ինքնակառավարման մարմինների տնօրինության տակ գտնվող ֆինանսական այլ միջոցների հաշվին` դրանց համար նախատեսված հատկացումների սահմաններում:
II. Գնումների ֆինանսավորումը Հայաստանի Հանրապետության պետական բյուջեի միջոցների հաշվին
4. Պետական բյուջեի միջոցների հաշվին գնումների ֆինանսավորումն իրականացվում է այդ գնումներն իրականացնելու նպատակով Հայաստանի Հանրապետության պետական բյուջեով և Հայաստանի Հանրապետության կառավարության կողմից սահմանված, Հայաստանի Հանրապետության պետական բյուջեի կատարման համամասնություններով նախատեսված հատկացումների սահմաններում և դրանց հաշվին: Ընդ որում, գնումները ֆինանսավորելու համար անհրաժեշտ հատկացումները պետք է նախատեսված լինեն նաև սահմանված կարգով հաստատված և վճարման պահին գործող բյուջետային ծախսերի նախահաշվում (այսուհետև` նախահաշիվ): Նախահաշվի ձևը, դրա հաստատման և ներկայացման կարգը սահմանում է Հայաստանի Հանրապետության ֆինանսների և էկոնոմիկայի նախարարությունը:
5. Ապակենտրոնացված գնումների դեպքում պայմանագիր կնքելուց հետո 10 աշխատանքային օրվա ընթացքում պատվիրատուն իրեն սպասարկող` Հայաստանի Հանրապետության ֆինանսների և էկոնոմիկայի նախարարության տեղական գանձապետական բաժանմունքին (այսուհետև` ՏԳԲ) է տրամադրում պայմանագրից քաղվածք (այսուհետև` քաղվածք)` Հայաստանի Հանրապետության ֆինանսների և էկոնոմիկայի նախարարության սահմանած ձևով` բացառությամբ գնանշումների հարցման ձևով գնումների կատարման դեպքերի:
6. Կենտրոնացված գնումների դեպքում պայմանագիր կնքելուց հետո 5 աշխատանքային օրվա ընթացքում պայմանագրի պատճենները պետական գնումների գործակալությունը տրամադրում է այն պետական մարմիններին, որոնց կարիքների համար իրականացվում են և որոնց կողմից պետք է ֆինանսավորվեն այդ գնումները (այսուհետև` պետական մարմիններ): Պետական մարմինները 5 աշխատանքային օրվա ընթացքում իրենց սպասարկող ՏԳԲ-ներ են ներկայացնում քաղվածք:
7. Պայմանագրով նախատեսված գնումների դիմաց վճարելու` պատվիրատուի պարտավորությունը համարվում է կատարման ենթակա, եթե առկա են տվյալ վճարումը հիմնավորող փաստաթղթերի պատճենները (այսուհետև` հիմնավորող փաստաթղթեր): Հիմնավորող փաստաթղթերն են`
ա) սահմանված կարգով հաստատված գնումների` պայմանագրով նախատեսված բնութագրերին և այլ պահանջներին համապատասխանության մասին դրական եզրակացությունը, և
բ) եզրակացության հիման վրա սահմանված կարգով ստորագրված հանձնման- ընդունման արձանագրությունը (այսուհետև` արձանագրություն):
Եզրակացության և արձանագրության ձևերը սահմանում է Հայաստանի Հանրապետության ֆինանսների և էկոնոմիկայի նախարարությունը:
8. Գնումների դիմաց վճարելու նպատակով եզրակացության և արձանագրության պատճենները, ինչպես նաև Հայաստանի Հանրապետության ֆինանսների և էկոնոմիկայի նախարարության կողմից սահմանված ձևով կազմված վճարման հանձնարարագիրը (այսուհետև` վճարման հանձնարարագիր) պատվիրատուն ներկայացնում է իրեն սպասարկող ՏԳԲ: Կենտրոնացված գնումների դեպքում գնումների դիմաց վճարելու նպատակով եզրակացության և արձանագրության պատճենները, ինչպես նաև վճարման հանձնարարագիրն իրեն սպասարկող ՏԳԲ է ներկայացնում պետական մարմինը:
9. Գնանշումների հարցման ձևով գնումների կատարման դեպքում գնումները ֆինանսավորելու համար պատվիրատուն ՏԳԲ է ներկայացնում վճարման հանձնարարագիր` առանց եզրակացության և արձանագրության պատճենների:
10. Եթե պայմանագրով նախատեսված է, որ պատվիրատուի հետ պայմանագիր կնքած անձին պետք է հատկացվի կանխավճար, ապա սույն կարգի 5-րդ և 6-րդ կետերի համաձայն ՏԳԲ ներկայացվող փաստաթղթերից բացի ներկայացվում են նաև պայմանագրի կատարման ապահովման առկայությունը հավաստող փաստաթղթի պատճենը և վճարման հանձնարարագիրը: Պայմանագրով նախատեսված կանխավճարը հատկացնելու համար ՏԳԲ չեն ներկայացվում եզրակացության և արձանագրության պատճենները:
11. Սույն կարգի համաձայն ներկայացված փաստաթղթերի հիման վրա ՏԳԲ-ն Հայաստանի Հանրապետության պետական բյուջեի կատարման գործընթացը կարգավորող օրենքներով և իրավական այլ ակտերով սահմանված կարգով կատարում է վճարում: Ընդ որում`
ա) պահանջվող հատկացումները վճարվում են պետական մարմնի` բյուջետային միջոցների մուտքերը և ծախսերն արտացոլելու համար բացված գանձապետական հաշվից.
բ) վճարումները կատարվում են, եթե դրանք իրականացնելու համար պահանջվող փաստաթղթերը համապատասխանում են սույն կարգի պահանջներին: Հակառակ դեպքում ներկայացված փաստաթղթերը վերադարձվում են.
գ) եթե ներկայացված փաստաթղթերը համապատասխանում են սույն կարգով սահմանված պահանջներին, սակայն դրանք ներկայացնողի անվամբ բացված գանձապետական հաշվում առկա դրամական միջոցները չեն բավարարում վճարումը կատարելու համար, ապա ՏԳԲ-ն ընդունում է ներկայացված փաստաթղթերը, որոնց հետագա տնօրինման կարգը սահմանում է Հայաստանի Հանրապետության ֆինանսների և էկոնոմիկայի նախարարությունը:
12. Սույն կարգի 9-րդ կետով սահմանված հիմքով վճարումն իրականացնելու դեպքում բյուջետային ծախսերի տնտեսագիտական դասակարգման նույն հոդվածով նախատեսված հատկացումների սահմաններում կարող է վճարում իրականացվել, եթե ՏԳԲ են ներկայացվում նախորդ վճարումը հիմնավորող` Հայաստանի Հանրապետության օրենսդրությամբ սահմանված փաստաթղթերը: Ընդ որում, նշված փաստաթղթերը ներկայացվում են ոչ ուշ, քան սույն կարգի 9-րդ կետով սահմանված հիմքով առաջին վճարումը կատարելու օրվան հաջորդող 7 աշխատանքային օրվա ընթացքում:
13. Սույն կարգի 10-րդ կետով սահմանված հիմքով վճարումն իրականացնելու դեպքում նույն պայմանագրի շրջանակներում կարող է վճարում իրականացվել, եթե ՏԳԲ են ներկայացվում նախորդ վճարումը հիմնավորող փաստաթղթերը, որոնք այդ վճարման համար կազմված եզրակացության և արձանագրության պատճեններն են:
14. Սույն կարգի 11-րդ կետի համաձայն վճարումն իրականացնելուց հետո ՏԳԲ-ն դրա մասին սահմանված կարգով ծանուցում է պատվիրատուին, իսկ կենտրոնացված գնումների դեպքում` պետական մարմնին, որն իր հերթին` վճարման հաստատումը ՏԳԲ-ից ստանալուց հետո 3 աշխատանքային օրվա ընթացքում, գրավոր ծանուցում է պետական գնումների գործակալությանը` պայմանագրով սահմանված կարգով վերջնահաշվարկ իրականացնելու նպատակով:
III. Գնումների ֆինանսավորումը համայնքի բյուջեի միջոցների հաշվին
15. Համայնքի բյուջեի միջոցների հաշվին գնումների ֆինանսավորումն իրականացվում է սույն կարգի 4-14-րդ կետերով սահմանված կարգով` այդ գնումներն իրականացնելու նպատակով համայնքի բյուջեով նախատեսված հատկացումների շրջանակներում և դրանց հաշվին: Ընդ որում, գնումները ֆինանսավորելու համար անհրաժեշտ հատկացումները պետք է նախատեսված լինեն նաև սահմանված կարգով հաստատված և վճարման պահին գործող նախահաշվով:
IV. Գնումների ֆինանսավորումն այլ միջոցների հաշվին
16. Այլ միջոցների հաշվին գնումների ֆինանսավորումն իրականացվում է սույն կարգի 4-14-րդ կետերով սահմանված կարգով` այդ գնումներն իրականացնելու նպատակով սահմանված կարգով հաստատված ծախսերի նախահաշիվներով նախատեսված հատկացումների շրջանակներում և դրանց հաշվին:
![loading...](/static/img/loader.gif)