040.0189.30.03.99

«Վավերացնում եմ»
Հայաստանի Հանրապետության
Նախագահ Ռ. Քոչարյան
30 մարտի 1999 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

30 մարտի 1999 թվականի N 189
քաղ. Երևան

ԱՐՓԱ-ՍԵՎԱՆ ԹՈՒՆԵԼԻ ԱՆԽԱՓԱՆ ՇԱՀԱԳՈՐԾՄԱՆ ԵՎ ՏԵԽՆԻԿԱԿԱՆ ՎԻՃԱԿԻ ԲԱՐԵԼԱՎՄԱՆ ՄԻՋՈՑԱՌՈՒՄՆԵՐԻ ՄԱՍԻՆ

Արփա-Սևան թունելի հետագա անխափան շահագործումն ապահովելու նպատակով Հայաստանի Հանրապետության կառավարությունը որոշում է.

1. Ընդունել ի գիտություն Արփա-Սևան թունելի տեխնիկական վիճակը գնահատող հանձնաժողովի եզրակացությունը (կցվում է):

2. Արփա-Սևան թունելի տեխնիկական վիճակը գնահատող հանձնաժողովին` շարունակել Արփա-Սևան թունելի փորձագիտական ուսումնասիրությունները և դրանց արդյունքները պարբերաբար ներկայացնել Հայաստանի Հանրապետության կառավարություն:

3. Արփա-Սևան թունելի տեխնիկական վիճակը գնահատող հանձնաժողովին, Հայաստանի Հանրապետության կառավարությանն առընթեր արտակարգ իրավիճակների վարչության արդյունաբերության մեջ աշխատանքների անվտանգ կատարման և լեռնային հսկողության (Հայլեռտեխհսկողություն) վարչությանը և «Հայհիդրոէներգանախագիծ» պետական փակ բաժնետիրական ընկերությանը` յուրաքանչյուր ամիս Հայաստանի Հանրապետության կառավարություն ներկայացնել տեղեկանք Արփա-Սևան թունելի շահագործման վերահսկողության և տեխնիկական վիճակի դիտանցի արդյունքների վերաբերյալ:

4. Հայաստանի Հանրապետության գյուղատնտեսության նախարարությանը`

ա) ձեռնարկել համապատասխան միջոցներ Արփա-Սևան թունելի տեխնիկական վիճակը գնահատող հանձնաժողովի կողմից առաջարկված ժամանակավոր միջոցառումների իրականացման համար.

բ) Արփա-Սևան թունելի վերանորոգման-վերականգնման, ինչպես նաև անհրաժեշտ տեխնիկատրանսպորտային և այլ արտադրական մեխանիզմների բազայի վերազինման աշխատանքներն իրականացնել համապատասխան ժամանակացույցի համաձայն ու Հայաստանի Հանրապետության 1999 թվականի պետական բյուջեով Արփա-Սևան թունելի վերանորոգման համար նախատեսված միջոցների սահմաններում.

գ) 1999 թվականի ընթացքում Սևանա լիճ ջրերի տեղափոխումն իրականացնել առավելագույն թողունակությամբ` միաժամանակ ապահովելով Արփա-Սևան թունելի անվտանգ շահագործումը.

դ) 10-օրյա ժամկետում` սահմանված կարգով համապատասխան փոփոխություններ և լրացումներ կատարել Արփա-Սևան թունելի շահագործման կանոններում.

ե) Հայաստանի Հանրապետության քաղաքաշինության նախարարության, Հայաստանի Հանրապետության ֆինանսների և էկոնոմիկայի նախարարության հետ համատեղ, Արփա-Սևան թունելի տեխնիկական վիճակը գնահատող հանձնաժողովի վերջնական եզրակացության հիման վրա, Հայաստանի Հանրապետության կառավարություն ներկայացնել առաջարկություն Հայաստանի Հանրապետության վարչապետի 1995 թվականի դեկտեմբերի 24-ի «Արփա-Սևան թունելի անխափան ու անվտանգ շահագործման և նրա տեխնիկական վիճակի բարելավման միջոցառումների մասին» N 360 որոշմամբ հաստատված ծրագրում համապատասխան փոփոխություններ և լրացումներ կատարելու վերաբերյալ և 20-օրյա ժամկետում սահմանված կարգով` տեղեկանք նշված որոշումը չկատարելու պատճառների մասին.

զ) Հայաստանի Հանրապետության ֆինանսների և էկոնոմիկայի նախարարության հետ համատեղ լուծել Արփա-Սևան թունելի պահպանության ֆինանսավորման հարցը:

5. Արփա-Սևան թունելի վերանորոգման և շահագործման ապահովման աշխատանքների պատասխանատուներ համարել`

ա) Հայաստանի Հանրապետության գյուղատնտեսության նախարարության «Որոտան-Արփա-Սևան» թունելների շահագործման վարչությունը` ժամանակավոր ամրակապերի տեղադրման և պատվիրատուի պարտականությունների կատարման համար.

բ) «Արփա-Սևան» փակ բաժնետիրական ընկերությունը` հորանների վերականգնման համալիր աշխատանքների կատարման համար.

գ) Հայաստանի Հանրապետության էներգետիկայի նախարարության «Կենտրոնական էլեկտրացանց» պետական փակ բաժնետիրական ընկերությունը` բարձր լարման էլեկտրահաղորդման գծերի և ենթակայանների վերականգնման համար.

դ) «Հայհիդրոէներգանախագիծ» պետական փակ բաժնետիրական ընկերությունը` նախագծային և ինժեներահետազոտական աշխատանքների համար.

ե) Արփա-Սևան թունելի տեխնիկական վիճակը գնահատող հանձնաժողովը և «Հայհիդրոէներգանախագիծ» պետական փակ բաժնետիրական ընկերությունը` Արփա-Սևան թունելի տեխնիկական վիճակի դիտանցի իրականացման համար.

զ) Հայաստանի Հանրապետության կառավարությանն առընթեր արտակարգ իրավիճակների վարչության արդյունաբերության մեջ աշխատանքների անվտանգ կատարման և լեռնային հսկողության (Հայլեռտեխհսկողություն) վարչությունը` Արփա-Սևան թունելի անվտանգ շահագործման վերահսկողության համար:

6. Հայաստանի Հանրապետության ֆինանսների և էկոնոմիկայի նախարարությանը, Հայաստանի Հանրապետության գյուղատնտեսության նախարարությանը`

ա) Արփա-Սևան թունելի վերանորոգման-վերականգնման աշխատանքների ֆինանսավորումը սկսած 1999 թվականի մարտ ամսից, իրականացնել առաջնահերթության կարգով.

բ) 10-օրյա ժամկետում Հայաստանի Հանրապետության կառավարություն ներկայացնել առաջարկություն նշված օբյեկտի հետագա ֆինանսավորման համար անհրաժեշտ միջոցների չափի և աղբյուրների վերաբերյալ` ելնելով Հայաստանի Հանրապետության 1999 թվականի պետական բյուջեի միջոցների սահմանված կարգով վերաբաշխման հնարավորությունից.

գ) 7-օրյա ժամկետում ճշտել և կազմել ժամանակացույց նշված օբյեկտի 1998 թվականի պարտքերի մարման վերաբերյալ:

7. Հայաստանի Հանրապետության ֆինանսների և էկոնոմիկայի նախարարությանը`

ա) մեկամսյա ժամկետում Հայաստանի Հանրապետության կառավարություն ներկայացնել տեղեկանք Որոտան-Արփա-Սևան թունելի շահագործման համար 1994-1999 թվականներին ծախսված միջոցների և կատարված հատկացումների մասին.

բ) 10-օրյա ժամկետում լուծել Արփա-Սևան թունելի տեխնիկական վիճակը գնահատող հանձնաժողովի աշխատանքների ֆինանսավորման հարցը:

8. Առաջարկել Հայաստանի Հանրապետության գլխավոր դատախազին ուժեղացնել հսկողությունը թունելի շահագործման և սպասարկման համար նախատեսված գույքի ու սարքավորումների հափշտակման դեպքերի վերաբերյալ հարուցված քրեական գործերով նախաքննության նկատմամբ տեղեկատվություն ներկայացնել Հայաստանի Հանրապետության կառավարություն:

9. Հայաստանի Հանրապետության կառավարության 1998 թվականի սեպտեմբերի 22-ի «Հատուկ, կարևորագույն և պատմամշակութային նշանակության օբյեկտների պետական պահպանության մասին» N 599 որոշման մեջ (Հայաստանի Հանրապետության կառավարության 1999 թվականի մարտի 3-ի N 123 որոշման խմբագրությամբ) կատարել հետևյալ փոփոխությունը`

որոշմամբ հաստատված ցանկի 7-րդ կետում «Արփա-Սևան ջրային թունելի 3 տեղամասեր» բառերը փոխարինել «Արփա-Սևան ջրային թունել» բառերով:

10. Սույն որոշումն ուժի մեջ է մտնում 1999 թվականի մարտի 30-ից: