ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳԵՐԱԳՈՒՅՆ ԽՈՐՀՈՒՐԴ

Ո Ր Ո Շ ՈՒ Մ

Հայաստանի Հանրապետության նախագահի և Հայաստանի Հանրապետության փոխնախագահի լիազորությունների արդյունավետ իրականացումն ապահովելու նպատակով Հայաստանի Հանրապետության Գերագույն խորհուրդը որոշում է.

1. Սահմանել Հայաստանի Հանրապետության նախագահի գործունեության և անվտանգության պետական ապահովման ու սպասարկման հետևյալ պայմանները և ծառայությունները`

նստավայր Երևանում (Մարշալ Բաղրամյան պող. 26).

ծառայողական բնակարան Երևանում («Հրազդան-1» ).

պետական ամառանոց Սևանում և Դիլիջանում.

աշխատավարձ` ամսական 4000 ռուբլու չափով. /ուժը կորցրել է 02.10.92 որոշում/

առողջական սպասարկում` անձնական բժիշկ.

հատուկ նշանակության ավտոտրանսպորտ.

հատուկ սարքավորված ինքնաթիռ և ուղղաթիռ.

անվտանգության ապահովում` դրվում է Հայաստանի Հանրապետության նախագահին ենթակա հատուկ ստորաբաժանման վրա:

2. Սահմանել Հայաստանի Հանրապետության փոխնախագահի գործունեության և անվտանգության պետական ապահովման և սպասարկման հետևյալ պայմանները և ծառայությունները`

նստավայր Երևանում ( Մարշալ Բաղրամյան պող. 26 ).

ծառայողական բնակարան Երևանում («Հրազդան - 1» ).

պետական ամառանոց Սևանում և Դիլիջանում.

աշխատավարձ` ամսական 3000 ռուբլու չափով. /ուժը կորցրել է 02.10.92 որոշում/

անվտանգության ապահովում` դրվում է Հայաստանի Հանրապետության նախագահին ենթակա հատուկ ստորաբաժանման վրա:

3. Հայաստանի Հանրապետության նախագահի և Հայաստանի Հանրապետության փոխնախագահի ընտանիքները օգտվում են Հայաստանի Հանրապետության նախագահի և Հայաստանի Հանրապետության փոխնախագահի գործունեության և անվտանգության ապահովման ու սպասարկման պետական ծառայություններից:

4. Պաշտոնաթողությունից հետո Հայաստանի Հանրապետության նախագահի և Հայաստանի Հանրապետության փոխնախագահի համար, բացառությամբ այն դեպքերի, երբ նրանք պաշտոնանկ են արվում, սահմանվում է հատուկ թոշակ` աշխատավարձի 60 տոկոսի չափով, Հայաստանի Հանրապետության Նախարարների խորհրդի կողմից սահմանված կարգով տրվում է պետական ամառանոցից և ավտոտրանսպորտից օգտվելու իրավունք: Անհրաժեշտության դեպքում ապահովվում է Հայաստանի Հանրապետության պաշտոնաթող նախագահի անվտանգությունը:

5. Հայաստանի Հանրապետության Նախարարների խորհրդին`

1992 թվականից սկսած Հայաստանի Հանրապետության պետական բյուջեի` պետական իշխանության և կառավարման մարմինների ֆինանսավորմանը վերաբերող հոդվածում նախատեսել սույն որոշմամբ սահմանված ծառայությունների ծախսերը:

1991 թվականի նոյեմբեր-դեկտեմբեր ամիսներին սույն որոշման 1-ին և 2-րդ կետերով սահմանված ծախսերը կատարել Հայաստանի Հանրապետության պետական բյուջեի հաշվին: