ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՐԴԱՐԱԴԱՏՈՒԹՅԱՆ ՆԱԽԱՐԱՐ

Հ Ր Ա Մ Ա Ն

ՀԱՐԿԱԴԻՐ ԿԱՏԱՐՈՂԻՆ ՀՐԱԶԵՆ ԵՎ ՀԱՏՈՒԿ ՄԻՋՈՑՆԵՐ ՀԱՏԿԱՑՆԵԼՈՒ ԵՎ ՊԱՀԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով «Հարկադիր կատարումն ապահովող ծառայության մասին» օրենքի 50-րդ հոդվածի 4-րդ մասով.

ՀՐԱՄԱՅՈՒՄ ԵՄ՝

1. Հաստատել հրազեն և հատուկ միջոցներ հատկացնելու և պահելու կարգը՝ համաձայն Հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

ՀՐԱԶԵՆ ԵՎ ՀԱՏՈՒԿ ՄԻՋՈՑՆԵՐ ՀԱՏԿԱՑՆԵԼՈՒ ԵՎ ՊԱՀԵԼՈՒ

I. ՀՐԱԶԵՆ ԵՎ ՀԱՏՈՒԿ ՄԻՋՈՑՆԵՐ ՀԱՏԿԱՑՆԵԼՈՒ ԿԱՐԳԸ

1. Սույն կարգով կարգավորվում են հարկադիր կատարողին պահելու և կրելու իրավունքով հրազեն և հատուկ միջոցներ (այսուհետ` զենք) հատկացնելու, հատկացված զենքը պահելու հետ կապված հարաբերությունները:

2. Անհրաժեշտության դեպքում հարկադիր կատարողին հատկացվում է համապատասխան զենք պահելու և կրելու իրավունքով:

3. Հարկադիր կատարողին պահելու և կրելու իրավունքով հատկացվում է Հարկադիր կատարումն ապահովող ծառայության սպառազինության մեջ ընդգրկված հաշվեցուցակային ատրճանակ:

4. Հարկադիր կատարողին հատկացվող զենքի հետ միասին տրվում են համապատասխան հարմարանքներ՝ զենքը բացահայտ կամ քողարկված կրելու համար, ինչպես նաև՝ զենքի խնամքի համար նախատեսված պարագաներ:

5. Գլխավոր հարկադիր կատարողին, գլխավոր հարկադիր կատարողի տեղակալին պահելու և կրելու իրավունքով զենք հատկացվում է ծառայողական պարտականությունների կատարմանն անցնելու պահից:

6. Հարկադիր կատարողին զենք պահելու և կրելու իրավունքով հատկացվում է հանրային ծառայությունը համակարգող փոխվարչապետի սահմանված կարգով հատուկ ուսուցում անցնելուց հետո:

7. Զենքը հատկացվում է Գլխավոր հարկադիր կատարողի անհատական իրավական ակտով:

8. Հատկացված զենքը գործադրվում (կիրառվում) և օգտագործվում է օրենքով սահմանված դեպքերում և կարգով:

9. Հարկադիր կատարողին զենք հատկացնելու համար հիմք է հարկադիր կատարողի զեկուցագիրը (Ձև 1)՝ ուղղված գլխավոր հարկադիր կատարողին՝ ստորաբաժանման ղեկավարի միջնորդությամբ:

10. Հատուկ ուսուցում անցած հարկադիր կատարողի զեկուցագիրը և հատուկ ուսուցումն անցնելու արդյունքում տրված վկայականի պատճենը փոխանցվում է սպառազինության համար պատասխանատու անձին՝ զենքը հարկադիր կատարողին հատկացնելու համար: Վկայականի համարը գրանցվում է հաշվեցուցակային զենք հատկացնելու թույլտվությունների հաշվառման մատյանում (համաձայն Ձև 2-ի):

11. Հաշվեցուցակային զենք հատկացնելու թույլտվությունների հաշվառման մատյանը վարում է Գլխավոր հարկադիր կատարողի կողմից նշանակված սպառազինության համար պատասխանատու անձը:

II. ՀՐԱԶԵՆ ԵՎ ՀԱՏՈՒԿ ՄԻՋՈՑՆԵՐ ՊԱՀԵԼՈՒ ԿԱՐԳԸ

12. Հարկադիր կատարողը պարտավոր է սարքին, անվտանգ և մաքուր պահել ստացած զենքը:

13. Զենքի կորուստը բացառելու նպատակով այն պետք է համապատասխան ամրակապով հուսալիորեն ամրացված լինի հարկադիր կատարողի համազգեստին (հագուստին):

14. Արգելվում է հարկադիր կատարողի կողմից զենք կրելն առանց համապատասխան հարմարանքների (ատրճանակի պատյան, ամրակապ և այլն):

15. Զենքը հարկադիր կատարողի բնակության վայրում պետք է պահվի փականով ամրացված պահարանում կամ արկղում` միջոցներ ձեռնարկելով զենքին այլ անձանց հասանելիությունը բացառելու համար:

16. Քաղաքացիական հագուստ կրող հարկադիր կատարողը զենքը կրում է քողարկված:

17. Հայաստանի Հանրապետության տարածքում գործուղման դեպքում` ժամանման վայրում զենքն անվտանգ պահելու հնարավորության բացակայության դեպքում գործուղված հարկադիր կատարողը զենքն ի պահ է հանձնում սպառազինության համար պատասխանատու անձին։

18. Հարկադիր կատարողին հատկացված զենքի, դրա տեխնիկական վիճակի, ինչպես նաև համապատասխան հարմարանքների նկատմամբ հսկողությունն իրականացվում է`

1) հարկադիր կատարողի անմիջական ղեկավարի կողմից յուրաքանչյուր շաբաթը մեկ անգամ, հարկադիր կատարողի՝ ծառայության մեջ գտնվելու ժամանակ,

3) սպառազինության համար պատասխանատու անձի կողմից` ամիսը մեկ անգամ,

4) շարային ստուգատես անցկացնելու ժամանակ` ստուգատես անցկացնող անձի կողմից:

19. Այլ ստորաբաժանում տեղափոխվելու, ծառայությունից ազատվելու դեպքերում հարկադիր կատարողը պարտավոր է զենքը հանձնել ստորաբաժանման սպառազինության համար պատասխանատու անձին:

20. Հարկադիր կատարողը ստացիոնար բուժման, ուսման կամ արձակուրդ մեկնելիս, ինչպես նաև զենքը պահելու համար հուսալի պայմանների չապահովման դեպքում զենքը ժամանակավորապես ի պահ է հանձնում սպառազինության համար պատասխանատու անձին:

21. Հարկադիր կատարողը պարտավոր է զենքը հանձնել`

1) ստորաբաժանման ղեկավարի կարգադրությամբ, եթե հարկադիր կատարողի կողմից խախտվել են սույն կարգով նախատեսված զենքը պահելու և կրելու պայմանները.

2) եթե ժամանակավորապես կասեցվել են հարկադիր կատարողի ծառայողական լիազորությունները.

3) եթե հարկադիր կատարողն ազատվել է ծառայությունից.

4) եթե բժշկական եզրակացությամբ հարկադիր կատարողին արգելվել է զենք կրել:

22. Սպառազինության համար պատասխանատու անձին հանձնած զենքի վերաբերյալ համապատասխան գրառում է կատարվում զենքի և հատուկ միջոցների հանձնման և ընդունման գրքում:

23. Զենքը գործադրելու կամ օգտագործելու, ինչպես նաև զենքը կորցնելու կամ փչացնելու դեպքերում հարկադիր կատարողն անմիջապես զեկուցում է վերադասության կարգով և ձեռնարկում միջոցներ` զենքը վերանորոգելու, կորած զենքը որոնելու համար:

Ձև N 1

ՀՀ Գլխավոր հարկադիր կատարող

_______________________________

_______________________________

(անունը, ազգանունը)

 «Թույլատրում եմ

հատկացնել հաշվեցուցակային զենք»

ՀՀ Գլխավոր հարկադիր կատարող

_______________________________

(անունը, ազգանունը)

___________________

(ստորագրությունը)

____ _______________ 20 թ.

Զ Ե Կ ՈՒ Ց Ա Գ Ի Ր

Հաշվի առնելով այն, որ անցել եմ ՀՀ փոխվարչապետի 06.08.2020թ. թիվ 476-Լ որոշմամբ նախատեսված հրազեն և օրենքով նախատեսված հատուկ միջոցներ կրելու, պահելու և գործադրելու (կիրառելու) հատուկ ուսուցումը և ստացել եմ համապատասխան վկայական՝ խնդրում եմ Ձեր հանձնարարականը համապատասխան անձին` հաշվեցուցակային զենք հատկացնելու համար:

Հաշվեցուցակային զենքը պահելու անվտանգության պայմաններն աշխատավայրում և բնակության վայրում ապահովում եմ:

Տեղյակ եմ զենքի անօրինական գործադրման (կիրառման) կամ օգտագործման հետևանքների մասին:

________________________________

(պաշտոնը, կոչումը)

_____ _______________ 20 թ.

«Միջնորդում եմ

հատկացնել հաշվեցուցակային զենք»

______________________________________________

(ստորաբաժանման ղեկավարի պաշտոնը, կոչումը)

____ _______________ 20 թ.

Ձև N 2

ՀԱՇՎԱՌՄԱՆ ՄԱՏՅԱՆ

ՀԱՇՎԵՑՈՒՑԱԿԱՅԻՆ ԶԵՆՔ ՀԱՏԿԱՑՆԵԼՈՒ ԹՈՒՅԼՏՎՈՒԹՅՈՒՆՆԵՐԻ

Պաշտոնական հրապարակման օրը՝ 11 դեկտեմբերի 2020 թվական: