«Գրանցված է»
ՀՀ արդարադատության
նախարարության կողմից
28 փետրվարի 2006 թ.
Պետական գրանցման թիվ 12406054

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԿԱՌԱՎԱՐՈՒԹՅԱՆՆ ԱՌԸՆԹԵՐ ՀԱՐԿԱՅԻՆ ՊԵՏԱԿԱՆ ԾԱՌԱՅՈՒԹՅԱՆ ՊԵՏ

Հ Ր Ա Մ Ա Ն

ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԻ ԿԱՐԳԱՎՈՐՄԱՆ ՊԱՐՏԱԴԻՐ ՎՃԱՐՆԵՐԻ ՀԱՇՎԵՏՎՈՒԹՅԱՆ ՁԵՎԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Հանրային ծառայությունների կարգավորման պարտադիր վճարների մասին» Հայաստանի Հանրապետության 2005 թվականի նոյեմբերի 11-ի ՀՕ-225-Ն օրենքի 10-րդ հոդվածը. 

Հաստատել հանրային ծառայությունների կարգավորման պարտադիր վճարների հաշվետվության ձևը՝ համաձայն հավելվածի:

• [1] սյունակի տողերում լրացվում են հանրային ծառայությունների կարգավորման ոլորտում կարգավորվող գործունեության համապատասխան տեսակների անվանումները,
• [2] սյունակի տողերում լրացվում են գործունեության յուրաքանչյուր տեսակի իրականացման համար լիցենզիայի կամ թույլտվության վավերապայմանները (լիցենզիայի կամ թույլտվության համարը, տրման ամսաթիվը և գործողության ժամկետը),
• [3] սյունակի տողերում ըստ գործունեության յուրաքանչյուր տեսակի (լիցենզիայի կամ թույլտվության) լրացվում են օրենքով սահմանված կարգով հաշվարկված և հաստատված կարգավորման պարտադիր վճարի տարեկան դրույքաչափերը,
• [4] սյունակի տողերում ըստ գործունեության յուրաքանչյուր տեսակի (լիցենզիայի կամ թույլտվության) լրացվում են կարգավորման պարտադիր վճարի եռամսյակային դրույքաչափերը (համապատասխան տարեկան դրույքաչափի 1/4-ը),
• [5] տողում լրացվում են 3-րդ և 4-րդ սյունակների համապատասխան տողերի հանրագումարները,
• [6] տողում լրացվում են կարգավորման պարտադիր վճարների գծով դադարեցված պարտավորությունների (վճարի վճարումից ազատում, լիցենզիայի կամ թույլտվության գործողության դադարում կամ օրենքով սահմանված այլ հիմքեր) գումարային մեծությունները՝ պարտադիր նշելով արտոնված կամ գործողությունը դադարեցված լիցենզիայի կամ թույլտվության վավերապայմանները,
• [7] տողում լրացվում է վճարման ենթակա կարգավորման պարտադիր վճարների եռամսյակային գումարը (4-րդ սյունակի 5-րդ և 6-րդ տողերի մեծությունների տարբերությունը):

Հաշվետվությունը կազմվում է երկու օրինակից և սահմանված ժամկետում ներկայացվում է վճար վճարողի հաշվառման վայրի հարկային մարմին: Հարկային մարմնում գրանցվելուց և կնքվելուց հետո հաշվետվության երկրորդ օրինակը վերադարձվում է վճար վճարողին: