ԵՎՐԱՍԻԱԿԱՆ ՏՆՏԵՍԱԿԱՆ ՀԱՄԱՅՆՔ

ՄԱՔՍԱՅԻՆ ՄԻՈՒԹՅԱՆ ՀԱՆՁՆԱԺՈՂՈՎ

Ո Ր Ո Շ ՈՒ Մ

2011 թվականի սեպտեմբերի 23-ի N 798 որոշում

Փոփոխող փաստաթղթերի ցանկը

(Եվրասիական տնտեսական հանձնաժողովի կոլեգիայի 2012 թվականի դեկտեմբերի 12-ի N 276 որոշման, Եվրասիական տնտեսական հանձնաժողովի խորհրդի 2017 թվականի մարտի 17-ի N 12 որոշման, Եվրասիական տնտեսական հանձնաժողովի կոլեգիայի 2017 թվականի սեպտեմբերի 26-ի N 124, 2019 թվականի դեկտեմբերի 17-ի N 221 և 2020 թվականի հունիսի 23-ի N 80 որոշումների խմբագրությամբ)

«Բելառուսի Հանրապետությունում, Ղազախստանի Հանրապետությունում և Ռուսաստանի Դաշնությունում տեխնիկական կանոնակարգման միասնական սկզբունքների և կանոնների մասին» 2010 թվականի նոյեմբերի 18-ի համաձայնագրի 13-րդ հոդվածին համապատասխան՝ Մաքսային միության հանձնաժողովը (այսուհետ՝ Հանձնաժողով) որոշեց.

1.1. Ընդունել «Խաղալիքների անվտանգության մասին» Մաքսային միության տեխնիկական կանոնակարգը (ՄՄ ՏԿ 008/2011) (կցվում է).

2. Հաստատել՝

2.1. միջազգային և տարածաշրջանային (միջպետական) ստանդարտների, իսկ դրանց բացակայության դեպքում՝ ազգային (պետական) ստանդարտների ցանկը (կցվում է), որոնց կամավոր հիմունքով կիրառման արդյունքում ապահովվում է «Խաղալիքների անվտանգության մասին» Մաքսային միության տեխնիկական կանոնակարգի (ՄՄ ՏԿ 008/2011) պահանջների պահպանումը .

(Եվրասիական տնտեսական հանձնաժողովի կոլեգիայի 2019 թվականի դեկտեմբերի 17-ի N 221 որոշման խմբագրությամբ)

2.2. միջազգային և տարածաշրջանային (միջպետական) ստանդարտների, իսկ դրանց բացակայության դեպքում՝ ազգային (պետական) ստանդարտների ցանկը (կցվում է), որոնք ներառում են «Խաղալիքների անվտանգության մասին» Մաքսային միության տեխնիկական կանոնակարգի (ՄՄ ՏԿ 008/2011) պահանջները կիրառելու և կատարելու ու տեխնիկական կանոնակարգման օբյեկտների համապատասխանության գնահատում իրականացնելու համար անհրաժեշտ՝ հետազոտությունների (փորձարկումների) և չափումների կանոններ ու մեթոդներ, այդ թվում՝ նմուշառման կանոններ:

(Եվրասիական տնտեսական հանձնաժողովի կոլեգիայի 2017 թվականի սեպտեմբերի 26-ի N 124, 2019 թվականի դեկտեմբերի 12-ի N 221 որոշումների խմբագրությամբ)

3. Սահմանել՝

3.1. «Խաղալիքների անվտանգության մասին» Մաքսային միության տեխնիկական կանոնակարգը (այսուհետ՝ Տեխնիկական կանոնակարգ) ուժի մեջ է մտնում 2012 թվականի հուլիսի 1-ից.

3.2. Մաքսային միության նորմատիվ իրավական ակտերով կամ Մաքսային միության անդամ պետության օրենսդրությամբ սահմանված պարտադիր պահանջներին համապատասխանության գնահատման (հավաստման) մասին փաստաթղթերը, որոնք տրամադրվել կամ ընդունվել են Տեխնիկական կանոնակարգի տեխնիկական կանոնակարգման օբյեկտ հանդիսացող արտադրանքի (այսուհետ՝ արտադրանք) առնչությամբ մինչև Տեխնիկական կանոնակարգն ուժի մտնելու օրը, վավեր են մինչև դրանց գործողության ժամկետի ավարտը, սակայն 2014 թվականի փետրվարի 15-ից ոչ ուշ։ Նշված փաստաթղթերը, որոնք տրամադրվել կամ ընդունվել են մինչև սույն որոշման պաշտոնական հրապարակման օրը, վավերական են մինչև դրանց գործողության ժամկետի ավարտը։

Տեխնիկական կանոնակարգն ուժի մեջ մտնելու օրվանից Մաքսային միության նորմատիվ իրավական ակտերով կամ Մաքսային միության անդամ պետության օրենսդրությամբ ավելի վաղ սահմանված պարտադիր պահանջներին արտադրանքի համապատասխանության գնահատման (հավաստման) մասին փաստաթղթերի տրամադրում կամ ընդունում չի թույլատրվում։

3.3. Մինչև 2014 թվականի փետրվարի 15-ը թույլատրվում են Մաքսային միության նորմատիվ իրավական ակտերով կամ Մաքսային միության անդամ պետության օրենսդրությամբ ավելի վաղ սահմանված պարտադիր պահանջներին համապատասխան՝ արտադրանքի արտադրությունը և շրջանառության մեջ դնելը նշված պարտադիր պահանջներին արտադրանքի համապատասխանության գնահատման (հավաստման) մասին այն փաստաթղթերի առկայության դեպքում, որոնք տրամադրվել կամ ընդունվել են մինչև Տեխնիկական կանոնակարգն ուժի մեջ մտնելու օրը։

Նշված արտադրանքը մակնշվում է համապատասխանության ազգային նշանով (շուկայում շրջանառության նշանով)՝ Հանձնաժողովի 2010 թվականի սեպտեմբերի 20-ի N 386 որոշմանը կամ Մաքսային միության անդամ պետության օրենսդրությանը համապատասխան։

Այդ արտադրանքի մակնշումը Մաքսային միության անդամ պետությունների շուկայում արտադրանքի շրջանառության միասնական նշանով չի թույլատրվում.

3.4. սույն որոշման 3.2 ենթակետում նշված համապատասխանության գնահատման (հավաստման) մասին փաստաթղթերի գործողության ժամանակահատվածում շրջանառության մեջ դրված արտադրանքի շրջանառությունը թույլատրվում է արտադրանքի՝ Մաքսային միության անդամ պետության օրենսդրությանը համապատասխան սահմանված պիտանիության ժամկետի (ծառայության ժամկետի) ընթացքում։

4. Հանձնաժողովի քարտուղարությանը՝ Կողմերի հետ համատեղ նախապատրաստել Տեխնիկական կանոնակարգի իրականացման համար անհրաժեշտ միջոցառումների ծրագրի նախագիծ և սույն որոշումն ուժի մեջ մտնելու օրվանից՝ եռամսյա ժամկետում սահմանված կարգով այն ներկայացնել Հանձնաժողովի հաստատմանը։

5. Բելառուսական կողմին՝ Կողմերի մասնակցությամբ ստանդարտների կիրառման արդյունքների դիտանցման հիման վրա ապահովել սույն որոշման 2-րդ կետում նշված ստանդարտների ցանկերի արդիականացման վերաբերյալ առաջարկությունների նախապատրաստումը և Տեխնիկական կանոնակարգն ուժի մեջ մտնելու օրվանից սկսած տարեկան առնվազն մեկ անգամ դրանք Հանձնաժողովի քարտուղարություն ներկայացնելը՝ սահմանված կարգով Հանձնաժողովի կողմից հաստատելու համար։

Մաքսային միության հանձնաժողովի անդամներ՝

Նախաբան

1. Մաքսային միության սույն տեխնիկական կանոնակարգը մշակվել է «Բելառուսի Հանրապետությունում, Ղազախստանի Հանրապետությունում և Ռուսաստանի Դաշնությունում տեխնիկական կանոնակարգման միասնական սկզբունքների և կանոնների մասին» 2010 թվականի նոյեմբերի 18-ի համաձայնագրին համապատասխան:

2. Մաքսային միության սույն տեխնիկական կանոնակարգը մշակվել է Մաքսային միության միասնական մաքսային տարածքում խաղալիքների նկատմամբ կիրառման և կատարման համար պարտադիր միասնական պահանջներ սահմանելու, Մաքսային միության միասնական մաքսային տարածքում շրջանառության մեջ դրվող խաղալիքների ազատ տեղաշարժն ապահովելու նպատակով։

3. Եթե խաղալիքների նկատմամբ ընդունվեն Մաքսային միության, Եվրասիական տնտեսական համայնքի (այսուհետ՝ ԵվրԱզԷՍ)՝ խաղալիքների վերաբերյալ պահանջներ սահմանող այլ տեխնիկական կանոնակարգեր, ապա խաղալիքները պետք է համապատասխանեն Մաքսային միության, ԵվրԱզԷՍ-ի այդ տեխնիկական կանոնակարգերի պահանջներին, որոնց գործողությունը տարածվում է դրանց վրա։

Հոդված 1. Կիրառության ոլորտը

1. Մաքսային միության սույն տեխնիկական կանոնակարգը տարածվում է Մաքսային միության միասնական մաքսային տարածքում շրջանառության մեջ դրվող, նախկինում չշահագործված խաղալիքների վրա։

2. Մաքսային միության սույն տեխնիկական կանոնակարգը չի տարածվում Մաքսային միության սույն տեխնիկական կանոնակարգի 1-ին հավելվածում նշված այն արտադրատեսակների վրա, որոնք չեն դիտվում որպես խաղալիք, ինչպես նաև անհատական պատվերով պատրաստված, ցուցադրանմուշ հանդիսացող խաղալիքների վրա։

3. Մաքսային միության սույն տեխնիկական կանոնակարգը սահմանում է պահանջներ խաղալիքների նկատմամբ՝ երեխաների և նրանց հսկող անձանց կյանքի և առողջության պաշտպանության, ինչպես նաև դրանց նշանակության և անվտանգության վերաբերյալ խաղալիքներ ձեռքբերողներին (սպառողներին) մոլորեցնող գործողությունները կանխելու նպատակով։

Հոդված 2. Սահմանումները

Մաքսային միության սույն տեխնիկական կանոնակարգում կիրառվում են հետևյալ եզրույթները և դրանց սահմանումները՝

բոցավառում՝ վառքի աղբյուրի ազդեցության տակ՝ բոցով ուղեկցվող այրման առաջացում.

բոցավառելիություն՝ նյութերի և նյութեղենի՝ բոցավառվելու ունակություն.

քիմիական նյութեր ներառող խաղային լրակազմ (քիմիական փորձերի համար նախատեսված լրակազմերին չվերաբերող)՝ գիպսե ծեփապատճեն արտադրելու համար նախատեսված հավաքակազմ, գեղարվեստական փոքր արհեստանոցները սարքավորելու համար նախատեսված հավաքակազմերում մատակարարվող՝ ապակիացման համար նախատեսված կերամիկական նյութեր և էմալներ, պլաստիկացված պոլիվինիլքլորիդի հիմքով կազմավորվող զանգվածներ ներառող հավաքակազմեր (վառարանում հետագա թրծմամբ), գեղարվեստական ձուլման համար նախատեսված հավաքակազմեր, լցման համար նախատեսված հավաքակազմեր, լուսանկարների երևակման համար նախատեսված հավաքակազմեր, կոնստրուկտորական հավաքակազմերում մատակարարվող սոսնձող նյութ, ներկեր, լաքեր, նոսրացուցիչներ և մաքրիչներ (լուծիչներ).

խաղային հավաքակազմ՝ մանկական ստեղծագործության և ձեռքի աշխատանքի հմտությունների զարգացման համար նախատեսված տարբեր առարկաներից, նյութեղենից, նյութերից կազմված խաղալիք.

խաղալիք՝ մինչև 14 տարեկան երեխայի (երեխաների) խաղալու համար նախատեսված արտադրատեսակ կամ նյութ.

ջրի վրա խաղալու համար նախատեսված խաղալիք՝ լողալիս երեխայի մարմնի զանգվածի ծանրությունը տանող և (կամ) ծանծաղուտներում խաղալու համար նախատեսված խաղալիք (փչովի կամ ոչ փչովի).

սեղանի տպագիր խաղալիք՝ պոլիգրաֆիական եղանակով կատարված խաղալիք՝ լրացուցիչ խաղային տարրերի օգտագործմամբ կամ առանց դրանց օգտագործման.

մագնիսե խաղալիք՝ իր կառուցվածքում 1 կամ ավելի մագնիսներ և (կամ) մագնիսային տարրեր ունեցող խաղալիք.

(պարբերությունն ավելացվել է Եվրասիական տնտեսական հանձնաժողովի խորհրդի 2017 թվականի մարտի 17-ի N 12 որոշմամբ)

փափուկ լցվածքով խաղալիք՝ հիմնակմախքով կամ առանց հիմնակմախքի, փափուկ մակերեսով և լցուկով խաղալիք.

խաղալիք մոդել - կրկնօրինակ՝ խաղալիք, որի չափսերը որոշվում են փոքրացման մասշտաբով՝ նախատիպի իրական չափսերի համեմատությամբ.

պատրաստող՝ որպես անհատ ձեռներեց հանդես եկող իրավաբանական կամ ֆիզիկական անձ, որն իր անունից իրականացնում է խաղալիքների արտադրությունն ու իրացումը և պատասխանատվություն է կրում Մաքսային միության սույն տեխնիկական կանոնակարգի անվտանգության պահանջներին դրանց համապատասխանության համար.

ներմուծող՝ Մաքսային միության անդամ պետության ռեզիդենտ, որը Մաքսային միության անդամ պետության ոչ ռեզիդենտի հետ կնքել է խաղալիքների փոխանցման արտաքին առևտրային պայմանագիր, իրականացնում է այդ խաղալիքների իրացումը և պատասխանատվություն է կրում Մաքսային միության սույն տեխնիկական կանոնակարգի անվտանգության պահանջներին դրանց համապատասխանության համար.

կոնստրուկտորական հավաքակազմ՝ մեխանիկական և (կամ) էլեկտրական (էլեկտրոնային) բաղկացուցիչ մասերի հավաքակազմ՝ նախատեսված դրանից տարբեր խաղալիքներ հավաքելու համար.

խաղալիքի մագնիսական տարր՝ խաղալիքի մաս, որը ներառում է ամրացված մագնիս կամ ամբողջությամբ կամ մասնակի տեղադրված մագնիս.

(պարբերությունն ավելացվել է Եվրասիական տնտեսական հանձնաժողովի խորհրդի 2017 թվականի մարտի 17-ի N 12 որոշմամբ)

խաղալիքի նյութ՝ խաղալիքի բաղադրության մեջ մտնող բոլոր նյութերը.

խաղալիքի շրջանառությունը շուկայում՝ Մաքսային միության միասնական մաքսային տարածքում խաղալիքի՝ պատրաստողից օգտագործողին (ձեռքբերողին) անցնելու գործընթացները, որոնք խաղալիքն անցնում է դրա արտադրությունից հետո.

օպտիկական խաղալիք՝ խաղալիք, որի գործողության սկզբունքը հիմնված է երկրաչափական օպտիկայի սկզբունքների կիրառման վրա.

օգտագործող՝ խաղալիքն ըստ նշանակության օգտագործող երեխա կամ նրան հսկող անձ.

ձեռքբերող (սպառող)՝ խաղալիքը ձեռք բերելու մտադրություն ունեցող կամ այն ձեռք բերող ֆիզիկական կամ իրավաբանական անձ.

ըստ նշանակության կիրառում՝ խաղալիքի օգտագործում խաղալիքի վրա և (կամ) շահագործման փաստաթղթերում պատրաստողի կողմից նշված դրա նշանակությանը համապատասխան.

երեխա՝ մինչև 14 տարեկան անձ.

ռիսկ՝ երեխայի և նրան հսկող անձի կյանքին և առողջությանը վնաս պատճառելու և այդ վնասի հետևանքների հավանականության զուգակցումը.

խաղալիքի տիպային նմուշ՝ նույն տարիքային խմբին ուղղված համանման խաղալիքների խմբից ընտրված խաղալիք (մինչև 3 տարեկան, 3 տարեկան և բարձր տարիքի երեխաների համար)՝ պատրաստված ըստ նույն տեխնիկական փաստաթղթի, տեխնոլոգիական գործընթացի, միևնույն նյութերից, և որի նկատմամբ ներկայացվում են անվտանգության նույն պահանջները.

պատրաստողի կողմից լիազորված անձ՝ Մաքսային միության անդամ պետության կողմից սահմանված կարգով գրանցված ֆիզիկական կամ իրավաբանական անձ, որը սահմանված է պատրաստողի կողմից նրա հետ կնքած պայմանագրի հիման վրա՝ համապատասխանության հավաստման և արտադրանքը Մաքսային միության միասնական մաքսային տարածքում տեղաբաշխելիս իր անունից գործողություններ իրականացնելու համար, ինչպես նաև խաղալիքի՝ Մաքսային միության տեխնիկական կանոնակարգի պահանջներին չհամապատասխանելու դեպքում պատասխանատվություն դնելու համար.

ֆունկցիոնալ խաղալիք՝ խաղալիք, որը հանդիսանում է մեծահասակների կողմից օգտագործվող արտադրատեսակի կամ սարքավորանքի մոդել, որը նմանակում է դրա նշանակությունը և ֆունկցիաների կատարումը.

ֆունկցիոնալ մագնիս՝ խաղալիքների շարժիչների, ռելեների, բարձրախոսների և այլ էլեկտրական կամ էլեկտրոնային դետալների աշխատանքի համար նախատեսված մագնիս (այն դեպքում, երբ խաղալիքի մագնիսական հատկությունները չեն դասվում դրա խաղային բնութագրերի շարքին).

(պարբերությունն ավելացվել է Եվրասիական տնտեսական հանձնաժողովի խորհրդի 2017 թվականի մարտի 17-ի N 12 որոշմամբ)

քիմիական խաղալիք՝ սարքավորման հետ միասին կամ առանց դրա մատակարարվող՝ մեկ կամ մի քանի քիմիական նյութերից և (կամ) ռեակտիվներից բաղկացած՝ երեխաների կողմից քիմիական փորձերի անցկացման համար նախատեսված հավաքակազմ.

էլեկտրական խաղալիք՝ խաղալիք, որի առնվազն մեկ ֆունկցիան իրականացվում է էլեկտրական էներգիայի հաշվին։

Հոդված 3. Շուկայում շրջանառության կանոնները

1. Խաղալիքները շուկայում շրջանառության մեջ են դրվում Մաքսային միության սույն տեխնիկական կանոնակարգին, ինչպես նաև Մաքսային միության, ԵվրԱզԷՍ-ի այլ տեխնիկական կանոնակարգերին համապատասխանելու դեպքում, որոնց գործողությունը տարածվում է դրանց վրա, և պայմանով, որ դրանք անցել են համապատասխանության հավաստում Մաքսային միության սույն տեխնիկական կանոնակարգի 6-րդ հոդվածի, ինչպես նաև Մաքսային միության, ԵվրԱզԷՍ-ի այլ տեխնիկական կանոնակարգերի համաձայն, որոնց գործողությունը տարածվում է դրանց վրա։

2. Այն խաղալիքները, որոնց համապատասխանությունը Մաքսային միության սույն տեխնիկական կանոնակարգի պահանջներին հավաստված չէ, չպետք է մակնշված լինեն Մաքսային միության անդամ պետությունների շուկայում արտադրանքի շրջանառության միասնական նշանով, և չի թույլատրվում դրանք շուկայում շրջանառության մեջ դնել:

3. Մաքսային միության անդամ պետությունների շուկայում շրջանառության միասնական նշանով չմակնշված խաղալիքները շուկայում շրջանառության մեջ դնել չի թույլատրվում։

Հոդված 4. Անվտանգության պահանջները

1. Խաղալիքը պետք է մշակված և պատրաստված լինի այնպես, որ այն ըստ նշանակության կիրառելիս վտանգ չներկայացնի երեխաների և նրանց հսկող անձանց կյանքին և առողջությանը և ապահովի ռիսկի բացակայությունը՝

պայմանավորված խաղալիքի կառուցվածքով

պայմանավորված կիրառվող նյութերով

կապված խաղալիքի օգտագործման հետ, որը հնարավոր չէ բացառել խաղալիքի կառուցվածքի փոփոխության և նյութի փոխարինման դեպքում դեպքում՝ չփոփոխելով դրա ֆունկցիան և հիմնական բնութագրերերը։

Խաղալիքներն օգտագործելիս առաջացող ռիսկը պետք է հարաբերակցվի երեխաների տարիքային առանձնահատկությունների հետ։

2. Նյութեր

Այն նյութերը, որոնցից պատրաստված են խաղալիքները, պետք է լինեն մաքուր (առանց աղտոտումների), վարակազերծ և համապատասխանեն սույն տեխնիկական կանոնակարգի պահանջներին և Մաքսային միության սույն տեխնիկական կանոնակարգի 5-րդ հոդվածի 1.2 ենթակետում նշված ստանդարտներին։

Մինչև 3 տարեկան երեխաների համար նախատեսված խաղալիքներում չի թույլատրվում բնական մորթու, բնական կաշվի, ապակու, ճենապակու, խավավորված նյութերի (ռետինի, ստվարաթղթի և թղթի), առանց ներքին ծածկոցի 3 մմ և պակաս չափսի խծուծման հատիկների և չխկչխկան խաղալիքներին նման խաղալիքների այնպիսի լցանյութերի կիրառումը, որոնց չափսը խոնավ միջավայրում ավելանում է ավելի քան 5 %-ով։

Մինչև 3 տարեկան երեխաների համար նախատեսված խաղալիքներում չի թույլատրվում 1-ին դասի վտանգավորության քիմիական նյութերի միգրացիան։

Խաղալիքներում չի թույլատրվում գործածության մեջ եղած նյութերի կրկնակի վերամշակման արդյունքում ստացված երկրորդային հումքի կիրառումը։ Խաղալիքների արտադրության համար թույլատրվում է սեփական արտադրության թափոնների կիրառումը։

Խաղալիքների պաշտպանիչ-դեկորատիվ ծածկույթը պետք է լինի կայուն՝ խոնավ մշակման, թքի և քրտինքի ազդեցության նկատմամբ։

3. Խաղալիքները պետք է նախագծված և պատրաստված լինեն այնպես, որ ըստ նշանակության կիրառելիս դրանք վտանգ չներկայացնեն երեխաների և նրանց հսկող անձանց կյանքին և առողջությանը։

3.1. Զգայորոշման ցուցանիշները

Խաղալիքներն՝ ըստ հիգիենիկ անվտանգության զգայորոշման ցուցանիշների, պետք է համապատասխանեն Մաքսային միության սույն տեխնիկական կանոնակարգի 2-րդ հավելվածում սահմանված պահանջներին։

3.2. Ֆիզիկական և մեխանիկական հատկությունները

Խաղալիքը և դրա բաղադրիչ մասերը, ներառյալ ամրակման դետալները, պետք է դիմակայեն խաղալիքն ըստ նշանակության օգտագործելիս առաջացող մեխանիկական բեռնվածքների ազդեցությանը, ընդ որում այն չպետք է քանդվի և պետք է պահպանի իր սպառողական հատկությունները։

Խաղալիքների հասանելի եզրերը, սուր ծայրերը, կոշտ դետալները, պարույրները, ամրակման դետալները, արանքները, անկյունները, ելուստները, քուղերը, պարանները և ամրակապերը պետք է բացառեն երեխային վնասվածքներ պատճառելու ռիսկը։

Չի թույլատրվում խաղալիքներում հեղուկ լցանյութի արտահոսքը։

Խաղալիքի շարժվող բաղադրիչ մասերը պետք է բացառեն երեխային վնասվածքներ պատճառելու ռիսկը։ Շարժաբեր մեխանիզմները պետք է անհասանելի լինեն երեխայի համար։

Մինչև 3 տարեկան երեխաների համար նախատեսված խաղալիքը և խաղալիքի հանովի դետալները, ինչպես նաև սննդամթերքին անմիջականորեն ամրացվող խաղալիքները պետք է ունենան այնպիսի չափսեր, որ հնարավոր լինի խուսափել վերին շնչուղիներ ընկնելուց։

Փափուկ լցվածքով խաղալիքը չպետք է պարունակի լցանյութում պինդ կամ սուր օտար առարկաներ։ Փափուկ լցվածքով խաղալիքների կարերը պետք է լինեն ամուր։

Սննդամթերքում գտնվող և (կամ) սննդամթերքի հետ մանրածախ վաճառքի ընդունվող խաղալիքը պետք է ունենա սեփական փաթեթվածք։ Այդ փաթեթվածքի չափսերը չպետք է առաջացնեն երեխայի խեղդվելու ռիսկ: Թույլատրվում է պլաստմասսայից, առանց փաթեթվածքի խաղալիքի արտաքին տեղադրումը սննդամթերքի փաթեթվածքի վրա։

Խաղալիքը և դրա բաղադրիչ մասերը պետք է բացառեն երեխայի խեղդվելու հետ կապված ռիսկը:

Խաղի համար նախատեսված՝ ոչ օդաթափանցիկ նյութից պատրաստված դիմակները և սաղավարտները, որոնք ամբողջությամբ ծածկում են երեխայի գլուխը, պետք է մշակված և պատրաստված լինեն այնպես, որ բացառվի խեղդվելու ռիսկը ոչ բավարար օդափոխության հետևանքով։

Ջրի մակերևույթին երեխայի մարմինը պահելու համար նախատեսված խաղալիքը պետք է մշակվի և պատրաստվի այնպես, որ լինի հերմետիկ, ամուր:

Այն խաղալիքը, որի ներսում երեխան կարող է տեղավորվել, և նրա համար փակ տարածություն է ներկայացնում, պետք է ունենա ներսից հեշտությամբ բացվող ելքի անցք, ինչպես նաև օդափոխիչ անցքերով մակերես։

Երեխայի զանգվածը տանող և երթևեկության համար նախատեսված խաղալիքը պետք է լինի ամուր և կայուն (բացի երկանիվ հեծանիվներից)։ Ազատ ընթացքի մեխանիզմ կամ փոխանցման տուփի չեզոք դիրք ունեցող՝ մեխանիկական կամ էլեկտրական շարժաբերով խաղալիքները պետք է ունենան արգելակման սարքավորանք։ Երեխայի մարմնի զանգվածը իր վրա տանող և երթևեկության համար նախատեսված խաղալիքները, որոնցում անիվին շարժումը հաղորդվում է անմիջականորեն երեխայի ձեռքով կամ ոտքով կամ մեխանիկական փոխանցման միջոցով և էլեկտրական շարժաբերով խաղալիքները թույլատրվում է պատրաստել առանց արգելակման սարքավորանքների։ Շղթայական փոխանցմամբ խաղալիքները պետք է սարքավորված լինեն պաշտպանիչ վահանակներով։ Հենարանային մակերևույթները պետք է ունենան վայրասահումը կանխարգելող տարրեր։

Երեխայի զանգվածն իր վրա տանող և երթևեկության համար չնախատեսված խաղալիքը պետք է լինի ամուր և շրջվելու նկատմամբ կայուն։ Կախովի ճոճանակները պետք է ամուր լինեն, մինչև 3 տարեկան երեխաների համար նախատեսված ճոճանակների նստատեղերը պետք է ունենան երեխայի ընկնելուն խոչընդոտող կառուցվածք։

Արձակման մեխանիզմի օգնությամբ արտանետվող սարքով խաղալիքը, ինչպես նաև կինետիկական էներգիա ունեցող սարքը պետք է նվազագույնի հասցնեն երեխային և (կամ) նրան հսկող անձին վնասվածքներ պատճառելու ռիսկը:

Մինչև 10 տարեկան երեխաների համար նախատեսված կոնստրուկտորներում և հավաքովի մոդելներում զոդվածք չի թույլատրվում։

Տաքացնող տարրեր պարունակող խաղալիքը պետք է պատրաստված լինի այնպես, որ ապահովվեն հետևյալ պայմանները՝

շփման համար մատչելի բոլոր մակերևույթների ջերմաստիճանը դիպչելիս չպետք է հանգեցնի այրվածքների.

ինֆրակարմիր ճառագայթման ինտեգրալ հոսքի ուժգնության մակարդակը պետք է համապատասխանի Մաքսային միության սույն տեխնիկական կանոնակարգի 2-րդ հավելվածում սահմանված՝ հիգիենիկ անվտանգության պահանջներին,

խաղալիքում պարունակվող հեղուկները, գոլորշիները կամ գազերը, որոնք հեռացնելիս (եթե տվյալ հեռացումը անհրաժեշտ է խաղալիքը գործարկելու համար) կարող են առաջացնել այրվածքներ կամ այլ վնասվածքներ, չպետք է ունենան ջերմաստիճանի կամ ճնշման բարձր արժեքներ:

Թրթռման աղբյուր ունեցող խաղալիքներում տեղային թրթռման մակարդակը, հնչյունավորված խաղալիքներում ձայնի մակարդակը պետք է համապատասխանեն Մաքսային միության սույն տեխնիկական կանոնակարգի 2-րդ հավելվածում սահմանված՝ հիգիենիկ անվտանգության պահանջներին:

Չի թույլատրվում չխկչխկան-խաղալիքների և երեխայի բերանի հետ շփվող խաղալիքների մակերեսային գունավորումը և նախշազարդումը։

Սեղանի տպագիր խաղալիքներում տեքստը և նկարները պետք է լինեն հստակ և հակադիր հիմնական ֆոնի նկատմամբ։ Չի թույլատրվում թղթի և ստվարաթղթի վրա ներկերի մրոտումը։

Օպտիկական խաղալիքը պետք է մշակված և պատրաստված լինի այնպես, որ նվազագույնի հասցվի երեխայի տեսողության շտկման հետ կապված ռիսկը։

Լուսադիոդների օգտագործմամբ խաղալիքները չպետք է բացասական ազդեցություն ունենան երեխայի տեսողական օրգանների վրա, ստեղծեն վնասակար ճառագայթումներ։

Խաղալիքներում արգելվում է բոլոր տեսակի լազերային ճառագայթման համակարգերի օգտագործումը։

3.3. Բոցավառելիություն

Փափուկ լցվածքով խաղալիքները, կառնավալային կոստյումները և կառնավալային խաղալիքային արտադրատեսակները (օրինակ՝ մորուքները, բեղերը, կեղծամները, դիմակները, թագերը), ինչպես նաև այն խաղալիքները, որոնցում կարող է տեղավորվել երեխան, պետք է լինեն հրդեհաանվտանգ։

Քիմիական նյութեր ներառող և քիմիական փորձերի համար նախատեսված լրակազմերին չվերաբերող խաղային լրակազմը չպետք է պարունակի նյութեր կամ ռեակտիվներ, որոնք խառնման դեպքում կարող են բոցավառվել, ինչպես նաև առաջացնել վնասակար գոլորշիներ կամ գազեր։

Խաղալիքը չպետք է լինի պայթյունավտանգ կամ պարունակի բաղադրիչ մասեր (նյութեր, նյութեղեն), որոնք խաղալիքն օգտագործելիս դառնում են պայթյունավտանգ:

Խաղալիքը, ներառյալ քիմիական խաղալիքները, չպետք է պարունակի նյութեր կամ ռեակտիվներ, որոնք՝

կարող են առաջացնել պայթուցիկ խառնուրդներ տաքացման, ինչպես նաև օքսիդացնող նյութերի հետ միացնելու դեպքում առաջացող ռեակցիայի հետևանքով,

կարող են առաջացնել օդի հետ գոլորշիների բոցավառվող կամ պայթունավտանգ խառնուրդներ։

3.4. Քիմիական հատկությունները

Խաղալիքն օգտագործելիս անհրաժեշտ է նվազագույնի հասցնել առողջությանը վնաս հասցնելու ռիսկը քիմիական նյութերի՝ շնչուղիներ, մաշկի, լորձաթաղանթի, աչքերի կամ ստամոքսի մեջ ընկնելու հետևանքով:

Խաղալիքներից քիմիական նյութերի միգրացիայի մակարդակը և անջատումը պետք է համապատասխանեն Մաքսային միության սույն տեխնիկական կանոնակարգի 2-րդ հավելվածում սահմանված հիգիենիկ անվտանգության պահանջներին։

Քիմիական խաղալիքներում և քիմիական նյութեր ներառող և քիմիական փորձերի համար նախատեսված լրակազմերին չվերաբերող խաղային լրակազմերում թույլատրվում է նյութերի կամ ռեակտիվների որոշակի քանակության կիրառումը, եթե դրանց պարունակությունը չի գերազանցում յուրաքանչյուր նյութի համար սահմանված առավելագույն թույլատրելի քանակությունը։

3.5. Թունաբանահիգիենիկ ցուցանիշները

Խաղալիքների հիգիենիկ անվտանգության թունաբանահիգիենիկ ցուցանիշները պետք է համապատասխանեն Մաքսային միության սույն տեխնիկական կանոնակարգի 2-րդ հավելվածում սահմանված պահանջներին։

3.6. Էլեկտրական հատկությունները

Էլեկտրական խաղալիքում, ինչպես նաև դրա բաղադրիչ մասերից ոչ մեկի վրա անվանական լարումը չպետք է գերազանցի 24 Վ։

Էլեկտրական էներգիայի աղբյուրի հետ շփվող կամ շփվելու կարողություն ունեցող խաղալիքների դետալները, ինչպես նաև մալուխները, հաղորդալարերը պետք է լինեն մեկուսացված և մեխանիկորեն պաշտպանված էլեկտրական հոսանքից վնասվելու ռիսկը բացառելու նպատակով։

Ռադիոկառավարվող, էլեկտրոնային և էլեկտրատեխնիկական խաղալիքների էլեկտրաստատիկ, էլեկտրամագնիսական և էլեկտրական դաշտերի լարման մակարդակները պետք է համապատասխանեն Մաքսային միության սույն տեխնիկական կանոնակարգի 2-րդ հավելվածում սահմանված հիգիենիկ անվտանգության պահանջներին։

Թռչող խաղալիքների համար նախատեսված լարերը պետք է լինեն ոչ մետաղական և ունենան դիէլեկտրիկ հատկություններ:

3.7. Ճառագայթային անվտանգություն

Բնական մետաղներից պատրաստված խաղալիքների ճառագայթային անվտանգության ցուցանիշները (բնական ռադիոնուկլիդների տեսակարար արդյունավետ ակտիվություն) պետք է համապատասխանեն Մաքսային միության սույն տեխնիկական կանոնակարգի 2-րդ հավելվածում սահմանված հիգիենիկ անվտանգության պահանջներին։

3.8. Միկրոկենսաբանական ցուցանիշները

Խաղալիքների հիգիենիկ անվտանգության միկրոկենսաբանական ցուցանիշները պետք է համապատասխանեն Մաքսային միության սույն տեխնիկական կանոնակարգի 2-րդ հավելվածում սահմանված պահանջներին։

3.9. Մագնիսական հատկությունները

Խաղալիքների չամրացված մագնիսները և մագնիսային տարրերը պետք է ունենան 0,5 Տլ2 մմ2-ից ոչ ավել մագնիսական հոսքի հաշվարկային ցուցանիշ կամ այնպիսի չափսեր, որոնց դեպքում բացառվում է շնչառական ուղիներում դրանց հայտնվելը և դրանք կուլ տալը։

4. Փաթեթվածքը

Փաթեթվածքը պետք է լինի անվտանգ և բացառի երեխայի խեղդվելու հետ կապված ռիսկը։

Խաղալիքը պետք է ունենա սպառողական և (կամ) խմբային փաթեթվածք։

(Եվրասիական տնտեսական հանձնաժողովի խորհրդի 2017 թվականի մարտի 17-ի N 12 որոշման խմբագրությամբ)

Եթե այն փաթեթվածքը, որով խաղալիքն իրացվում է, նույնպես նախատեսված է օգտագործման համար, ապա այն դիտվում է որպես խաղալիքի բաղադրիչ մաս։ Փաթեթվածքի կիրառման ոլորտը որոշում է պատրաստողը։

5. Մակնշումը

5.1. Խաղալիքների մականշվածքը պետք է լինի հավաստի, ստուգելի, հստակ, դյուրընթեռնելի, մատչելի ինչպես զննման, այնպես էլ նույնականացման համար։

5.2. Մակնշումը կատարվում է պատրաստողի (պատրաստողի կողմից լիազորված անձի) և ներմուծողի կողմից։

Մակնշման կատարման տեղը և եղանակը որոշվում են պատրաստողի (պատրաստողի կողմից լիազորված անձի) և ներմուծողի կողմից։

5.3. Մականշվածքը պետք է պարունակի հետևյալ տեղեկությունները՝

- խաղալիքի անվանումը,

- երկրի անվանումը, որտեղ պատրաստվել է խաղալիքը,

- պատրաստողի (պատրաստողի կողմից լիազորված անձի), ներմուծողի անվանումը և գտնվելու վայրը, տեղեկություններ նրանց հետ կապ հաստատելու համար,

- պատրաստողի ապրանքային նշանը (առկայության դեպքում),

- երեխայի նվազագույն տարիքը, որի համար նախատեսված է խաղալիքը կամ երեխայի տարիքը նշող պատկերագիր,

- հիմնական կառուցվածքային նյութը (մինչև 3 տարեկան երեխաների համար) (անհրաժեշտության դեպքում),

- խաղալիքի խնամքի եղանակները (անհրաժեշտության դեպքում),

- պատրաստման ամսաթիվը (ամիս, տարի),

- ծառայության կամ պիտանելիության ժամկետը (դրանք որոշելու դեպքում)

- պահպանման պայմանները (անհրաժեշտության դեպքում)։

5.4. Կախված խաղալիքի տեսակից՝ մականշվածքի բովանդակությունը ներառում է՝ լրակազմությունը (հավաքակազմերի համար), խաղալիքի շահագործման կանոնները, հիգիենիկ մշակման եղանակները, խաղալիքի հետ վարվելիս անվտանգության միջոցները, նախազգուշացնող գրությունները, հավաքման մասին հրահանգը։

Նախազգուշացնող տեղեկատվությունը պետք է պարունակի ցուցում Մաքսային միության սույն տեխնիկական կանոնակարգի 3-րդ հավելվածին համապատասխան օգտագործելիս հատուկ նախազգուշական միջոցների վերաբերյալ։

6. Մաքսային միության անդամ պետության (պետությունների) օրենսդրությունում (օրենսդրություններում) համապատասխան պահանջների առկայության դեպքում խաղալիքի հետ լրակազմով մատակարարվող մականշվածքը և տեխնիկական փաստաթղթերը կազմվում են ռուսերենով և Մաքսային միության անդամ պետության պետական լեզվով (լեզուներով)։

Հոդված 5. Անվտանգության պահանջներին համապատասխանության ապահովումը

1. Խաղալիքների՝ Մաքսային միության սույն տեխնիկական կանոնակարգին համապատասխանությունն ապահովվում է կատարելով՝

1.1. Մաքսային միության սույն տեխնիկական կանոնակարգի 2-րդ հավելվածում նշված՝ Մաքսային միության սույն տեխնիկական կանոնակարգի հիգիենիկ անվտանգության պահանջները․

1.2. անմիջականորեն՝ Մաքսային միության սույն տեխնիկական կանոնակարգի անվտանգության պահանջները (բացառությամբ սույն կետի 1․1 ենթակետում նշված պահանջների) կամ Ստանդարտների ցանկում ներառված ստանդարտների պահանջները, որոնց կամավոր հիմունքներով կիրառման արդյունքում ապահովվում է Մաքսային միության տեխնիկական կանոնակարգի պահանջների կատարումը:

2. Խաղալիքների հետազոտությունների (փորձարկումների) մեթոդները սահմանվում են Ստանդարտների ցանկում ներառված ստանդարտներում, որոնք պարունակում են հետազոտությունների (փորձարկումների) և չափումների կանոնները և մեթոդները, այդ թվում՝ նմուշառման կանոնները, որոնք անհրաժեշտ են Մաքսային միության տեխնիկական կանոնակարգի պահանջները կիրառելու և կատարելու ու արտադրանքի համապատասխանության գնահատումն (հավաստումն) իրականացնելու համար։

Հոդված 6. Համապատասխանության հավաստումը

1. Մինչ շուկայում շրջանառության մեջ դնելը խաղալիքները պետք է անցնեն Մաքսային միության սույն տեխնիկական կանոնակարգի անվտանգության պահանջների համապատասխանության հավաստումը։

2. Խաղալիքների համապատասխանության հավաստումն իրականացվում է սերտիֆիկացման ձևով։

Սերտիֆիկացումն անցկացվում է Մաքսային միության՝ սերտիֆիկացման մարմինների և փորձարկման լաբորատորիաների (կենտրոնների) միասնական ռեեստրում ընդգրկված սերտիֆիկացման (համապատասխանության գնահատման (հավաստման)) մարմնի (այսուհետ՝ սերտիֆիկացման մարմին) կողմից՝ ըստ սերտիֆիկացման 1ս, 2ս, 3ս ընթացակարգերի, Մաքսային միության Հանձնաժողովի (այսուհետ՝ Հանձնաժողով) կողմից հաստատված՝ Մաքսային միության տեխնիկական կանոնակարգերում համապատասխանության գնահատման (հավաստման) տիպային ընթացակարգերի կիրառման կարգի մասին հիմնադրույթին համապատասխան։

Սերտիֆիկացման նպատակով փորձարկումներն անց է կացնում Մաքսային միության՝ սերտիֆիկացման մարմինների և փորձարկման լաբորատորիաների (կենտրոնների) միասնական ռեեստրում ընդգրկված՝ փորձարկման հավատարմագրված լաբորատորիան (կենտրոնը) (այսուհետ՝ փորձարկման հավատարմագրված լաբորատորիա (կենտրոն))։

Մաքսային միության սույն տեխնիկական կանոնակարգի 5-րդ հոդվածի 1.2 ենթակետում նշված ստանդարտները չկիրառելու կամ դրանց բացակայության դեպքում խաղալիքների համապատասխանության հավաստումն իրականացվում է սերտիֆիկացման ձևով (1ս, 2ս, 3ս ընթացակարգեր)՝ սույն հոդվածի 5-րդ կետին համապատասխան։

3. Սերիական արտադրության խաղալիքների սերտիֆիկացումն իրականացվում է 1ս, 2ս ընթացակարգերով։ Սերտիֆիկացման անցկացման համար խաղալիքների նմուշառումն իրականացնում է սերտիֆիկացման մարմինը կամ նրա կողմից լիազորված անձինք։

Խաղալիքների խմբաքանակի սերտիֆիկացումն իրականացվում է 3ս ընթացակարգով։ Մաքսային միության միասնական մաքսային տարածքում պատրաստված խաղալիքների խմբաքանակը ներկայացնում է պատրաստողը, Մաքսային միության միասնական մաքսային տարածք ներմուծվող խաղալիքների խմբաքանակը՝ ներմուծողը կամ պատրաստողի կողմից լիազորված անձը։ Սերտիֆիկացման անցկացման համար խաղալիքների նմուշառումն իրականացնում է սերտիֆիկացման մարմինը կամ նրա կողմից լիազորված անձը։

4. Խաղալիքների սերտիֆիկացում անցկացնելիս (ընթացակարգեր 1ս, 2ս, 3ս)՝

4.1. պատրաստողը (պատրաստողի կողմից լիազորված անձը), ներմուծողը սերտիֆիկացման մարմնին են տրամադրում խաղալիքների՝ Մաքսային միության սույն տեխնիկական կանոնակարգի անվտանգության պահանջներին համապատասխանությունը հավաստող փաստաթղթերի լրակազմ, որը ներառում է՝

փաստաթուղթ, ըստ որի պատրաստվել է խաղալիքը (ընթացակարգեր 1ս, 2ս),

խաղալիքի տիպային նմուշի (նմուշների) գունավոր պատկերը,

խաղալիքի կոնստրուկտորական փաստաթղթերի պատճենները կամ տիպային նմուշի (նմուշների) տեխնիկական նկարագիրը,

հումքի, նյութերի և լրակազմող արտադրատեսակների մասին տեղեկություններ, դրանք պատրաստողների և ներմուծողների մասին տեղեկություններ (ընթացակարգեր 1ս, 2ս),

շահագործման փաստաթղթեր (առկայության դեպքում),

ստանդարտների ցանկ, որոնց պահանջներին պետք է համապատասխանեն Մաքսային միության սույն տեխնիկական կանոնակարգի 5-րդ հոդվածի 1.2 ենթակետում նշված Ստանդարտների ցանկից խաղալիքները (պատրաստողի կողմից դրանց կիրառման դեպքում),

խաղալիքների արտադրության կառավարման համակարգման մասով համապատասխանության սերտիֆիկատ (ընթացակարգ 2ս),

պայմանագիր (մատակարարման պայմանագիր) կամ ապրանքն ուղեկցող փաստաթղթեր (խաղալիքների խմբաքանակի համար) (ընթացակարգ 3ս)։

4.2. Սերտիֆիկացման մարմինը՝

4.2.1. անցկացնում է խաղալիքների նույնականացում․

4.2.2. կազմակերպում է խաղալիքի նմուշի (նմուշների) փորձարկումների անցկացումը Մաքսային միության սույն տեխնիկական կանոնակարգի 5-րդ հոդվածի 1-ին կետում նշված պահանջներին համապատասխանության մասով և անցկացնում է փորձարկումների արձանագրության (արձանագրությունների) վերլուծություն.

4.2.3. անցկացնում է արտադրության վիճակի վերլուծություն (ընթացակարգ 1ս).

4.2.4. տալիս է միասնական ձևով համապատասխանության սերտիֆիկատ՝ հաստատված Հանձնաժողովի կողմից։

Սերիական արտադրության խաղալիքների համար համապատասխանության սերտիֆիկատի գործողության ժամկետը 5 տարուց ոչ ավելի է, խաղալիքների խմբաքանակի համար համապատասխանության սերտիֆիկատի գործողության ժամկետ չի սահմանվում,

4.3. պատրաստողը (պատրաստողի կողմից լիազորված անձը), ներմուծողը՝

4.3.1. դնում են Մաքսային միության անդամ պետությունների շուկայում արտադրանքի շրջանառության միասնական նշանը,

4.3.2. համապատասխանության հավաստումն ավարտելուց հետո ձևավորում են խաղալիքների մասով փաստաթղթերի լրակազմը, որը ներառում է՝

սույն կետի 4.1 ենթակետով նախատեսված փաստաթղթերը,

փորձարկումների արձանագրությունը (արձանագրությունները),

արտադրության վիճակի վերլուծության արդյունքները (ընթացակարգ 1ս),

համապատասխանության սերտիֆիկատը:

4.4. Սերտիֆիկացման մարմինը՝

անցկացնում է տեսչական հսկողություն սերտիֆիկացված խաղալիքների նկատմամբ՝

փորձարկման հավատարմագրված լաբորատորիայում (կենտրոնում) նմուշների փորձարկումներ անցկացնելու և (կամ) արտադրության վիճակը վերլուծելու միջոցով (ընթացակարգ 1ս),

փորձարկման հավատարմագրված լաբորատորիայում (կենտրոնում) նմուշների փորձարկումներ անցկացնելու և կառավարման համակարգերի սերտիֆիկացման հարցերով մարմնի կողմից խաղալիքների արտադրության կառավարման սերտիֆիկացված համակարգի տեսչական հսկողության արդյունքների վերլուծություն անցկացնելու միջոցով (ընթացակարգ 2ս)։

5. Խաղալիքների սերտիֆիկացումն անցկացնելիս Մաքսային միության սույն տեխնիկական կանոնակարգի 5-րդ հոդվածի 1.2 ենթակետում նշված Ստանդարտների ցանկից ստանդարտները չկիրառելու կամ դրանց բացակայության դեպքում (ընթացակարգեր 1ս, 2ս, 3ս)՝

5.1. պատրաստողը (պատրաստողի կողմից լիազորված անձը), ներմուծողը սերտիֆիկացման մարմնին են տրամադրում Մաքսային միության սույն տեխնիկական կանոնակարգի անվտանգության պահանջներին խաղալիքների համապատասխանությունը հավաստող՝ խաղալիքների մասով փաստաթղթերի լրակազմը, որը ներառում է՝

փաստաթուղթը, ըստ որի հիման վրա պատրաստված է խաղալիքը (ընթացակարգեր 1ս, 2ս)

խաղալիքի տիպային նմուշի (նմուշների) գունավոր պատկերը,

կոնստրուկտորական փաստաթղթերի պատճենները կամ խաղալիքի տիպային նմուշի (նմուշների) տեխնիկական նկարագրությունը,

շահագործման փաստաթղթերը (առկայության դեպքում),

հումքի, նյութերի և լրակազմող արտադրատեսակների մասին տեղեկությունները, դրանք պատրաստողների և ներմուծողների մասին տեղեկություններ (ընթացակարգեր 1ս, 2ս),

Մաքսային միության սույն տեխնիկական կանոնակարգի անվտանգության պահանջների կատարումը հավաստող՝ ընդունված տեխնիկական լուծումների նկարագրությունը և ռիսկերի գնահատումը

խաղալիքների արտադրության կառավարման համակարգման մասով համապատասխանության սերտիֆիկատ (ընթացակարգ 2ս),

պայմանագիր (մատակարարման պայմանագիր) կամ ապրանքն ուղեկցող փաստաթղթեր (խաղալիքների խմբաքանակի համար) (ընթացակարգ 3ս)։

5.2. Սերտիֆիկացման մարմինը՝

5.2.1. անցկացնում է խաղալիքների նույնականացում,

5.2.2. անցկացնում է խաղալիքների սերտիֆիկացում՝ անմիջականորեն Մաքսային միության սույն տեխնիկական կանոնակարգի անվտանգության պահանջներին:

Ընդ որում, Սերտիֆիկացման մարմինը՝

որոշում է Մաքսային միության սույն տեխնիկական կանոնակարգի անվտանգության պահանջների հիման վրա անվտանգության կոնկրետ պահանջները սերտիֆիկացվող խաղալիքների համար

անցկացնում է պատրաստողի կողմից ընդունված՝ Մաքսային միության սույն տեխնիկական կանոնակարգի անվտանգության պահանջների կատարումը հաստատող տեխնիկական լուծումների վերլուծություն և ռիսկերի գնահատում

որոշում է Մաքսային միության սույն տեխնիկական կանոնակարգի 5-րդ հոդվածի 2-րդ կետում նշված Ստանդարտների ցանկից հետազոտությունների (փորձարկումների) մեթոդներ սահմանող ստանդարտները կամ դրանց բացակայության դեպքում որոշում է հսկողության, չափումների և փորձարկումների մեթոդիկաները՝ անվտանգության կոնկրետ պահանջներին խաղալիքների համապատասխանությունը հավաստելու համար,

կազմակերպում է խաղալիքների փորձարկումների անցկացումը և անցկացնում է փորձարկումների արձանագրության (արձանագրությունների) վերլուծություն

5.2.3. անցկացնում է արտադրության վիճակի վերլուծություն (ընթացակարգ 1ս)․

5.2.4. տալիս է Հանձնաժողովի կողմից հաստատված միասնական ձևով համապատասխանության սերտիֆիկատ։

Սերիական արտադրության խաղալիքների համար համապատասխանության սերտիֆիկատի գործողության ժամկետը 5 տարուց ոչ ավելի է, խաղալիքների խմբաքանակի համար համապատասխանության սերտիֆիկատի գործողության ժամկետ չի սահմանվում,

5.3. պատրաստողը (պատրաստողի կողմից լիազորված անձը), ներմուծողը՝

5.3.1. դնում են Մաքսային միության անդամ պետությունների շուկայում շրջանառության միասնական նշանը,

5.3.2. համապատասխանության հավաստումը ավարտելուց հետո ձևավորում են խաղալիքների մասով փաստաթղթերի լրակազմը, որում ներառում են՝

սույն կետի 5.1 ենթակետով նախատեսված փաստաթղթերը,

փորձարկումների արձանագրությունը (արձանագրությունները),

արտադրության վիճակի վերլուծության արդյունքները (ընթացակարգ 1ս),

համապատասխանության սերտիֆիկատը։

5.4. Սերտիֆիկացման մարմինն անցկացնում է սերտիֆիկացված խաղալիքների տեսչական հսկողություն ՝

փորձարկման հավատարմագրված լաբորատորիայում (կենտրոնում) նմուշների փորձարկում անցկացնելու և (կամ) արտադրության վիճակը վերլուծելու միջոցով (ընթացակարգ 1ս),

փորձարկման հավատարմագրված լաբորատորիայում (կենտրոնում) նմուշների փորձարկումներ անցկացնելու և կառավարման համակարգերի սերտիֆիկացման հարցերով մարմնի կողմից խաղալիքների արտադրության կառավարման սերտիֆիկացված համակարգի տեսչական հսկողության արդյունքների վերլուծություն անցկացնելու միջոցով (ընթացակարգ 2ս)։

6. Խաղալիքների մասով փաստաթղթերի լրակազմը պետք է պահվի Մաքսային միության անդամ պետությունների տարածքում՝

խաղալիքների մասով՝ պատրաստողի մոտ (պատրաստողի կողմից լիազորված անձի մոտ)՝ այդ խաղալիքները արտադրությունից հանելու (դադարեցնելու) օրվանից առնվազն 10 տարվա ընթացքում,

խաղալիքների խմբաքանակի մասով՝ ներմուծողի մոտ խմբաքանակից վերջին արտադրատեսակի իրացման օրվանից առնվազն 10 տարվա ընթացքում։

Հոդված 7. Մաքսային միության անդամ պետությունների շուկայում արտադրանքի շրջանառության միասնական նշանով մակնշումը

1. Մաքսային միության սույն տեխնիկական կանոնակարգի անվտանգության պահանջները բավարարող և Մաքսային միության սույն տեխնիկական կանոնակարգի 6-րդ հոդվածի համաձայն համապատասխանության հավաստում անցած խաղալիքները պետք է ունենան Մաքսային միության անդամ պետությունների շուկայում արտադրանքի շրջանառության միասնական նշանով մականշվածք։

2. Մաքսային միության անդամ պետությունների շուկայում արտադրանքի շրջանառության միասնական նշանով մակնշումն իրականացվում է շուկայում խաղալիքները շրջանառության մեջ դնելուց առաջ:

3. Մաքսային միության անդամ պետությունների շուկայում արտադրանքի շրջանառության միասնական նշանը դրվում է անմիջականորեն խաղալիքի և (կամ) խաղալիքի փաթեթվածքի (սպառողական, խմբային, տրանսպորտային) և (կամ) պիտակի, մեդալիոնի, պիտականվան (այդ թվում՝ ներկարովի պիտականվան), թերթիկ-ներդիրի վրա, ինչպես նաև բերվում է դրան կից ներկայացվող շահագործման փաստաթղթերում։

Մաքսային միության անդամ պետությունների շուկայում արտադրանքի շրջանառության միասնական նշանը դրվում է խաղալիքի ծառայության ամբողջ ժամկետի ընթացքում հստակ և պարզ պատկերում ապահովող ցանկացած եղանակով։

Մի քանի մասերից բաղկացած խաղալիքների համար Մաքսային միության անդամ պետությունների շուկայում արտադրանքի շրջանառության միասնական նշանը դրվում է այն մասերի վրա, որոնք կարող են առանձին տեղադրվել շուկայում։

4. Խաղալիքները մակնշվում են Մաքսային միության անդամ պետությունների շուկայում արտադրանքի շրջանառության միասնական նշանով Մաքսային միության, ԵվրԱզԷՍ-ի այն բոլոր տեխնիկական կանոնակարգերի պահանջներին համապատասխանելու դեպքում, որոնց գործողությունը տարածվում է դրանց վրա և որոնցով նախատեսվում է տվյալ նշանը դնելը։

Հոդված 8. Պաշտպանության մասով վերապահում

Մաքսային միության անդամ պետությունները պարտավոր են ձեռնարկել բոլոր միջոցները Մաքսային միության սույն տեխնիկական կանոնակարգի՝ անվտանգության պահանջներին չհամապատասխանող խաղալիքները Մաքսային միության միասնական մաքսային տարածքում շրջանառության մեջ դնելը արգելելու և շուկայից դուրս բերելու համար։

1. Տոնածառի զարդարանքներ, արհեստական տոնածառներ և դրանց պարագաները, էլեկտրական դրասանգներ։

2. Մինչև 14 տարեկան երեխաների համար չնախատեսված՝ հավաքածու կազմելու համար մասշտաբային մոդելներ։

3. Մանկական խաղահրապարակների սարքավորումներ։

4. Մարզական գույք, այդ թվում՝ ստորջրյա։

5. Մինչև 14 տարեկան երեխաների համար չնախատեսվող ազգագրական (ֆոլկլորային) և դեկորատիվ տիկնիկներ։

6. «Մասնագիտական» խաղալիքներ` տեղադրված հանրային վայրերում՝ համընդհանուր օգտագործման համար։

7. Խաղային ավտոմատներ։

8. Ավելի քան 500 մանրակներից բաղկացած գլուխկոտրուկներ։

9. Օդաճնշական զենք։

10. Ինքնանետիչ և նետելու համար սարքավորանքներ։

11. Մետաղական ծայրակալներով նետման համար սարքեր։

12. Ցանցից սնվող խաղալիքների համար տրանսֆորմատորներ, լիցքավորման սարքավորանքներ կուտակիչ մարտկոցների համար, այդ թվում՝ խաղալիքի հետ մատակարարվող։

13. Տաքացնող տարրեր պարունակող և մեծահասակների հսկողության տակ՝ ուսումնական գործընթացում օգտագործման համար նախատեսված արտադրատեսակներ։

14. Ներքին այրման շարժիչներով՝ մինչև 14 տարեկան երեխաների համար նախատեսվող տրանսպորտային միջոցներ։

15. Շոգեշարժիչներով խաղալիք մեքենաներ։

16. Ընդհանուր օգտագործման ճանապարհներով երթևեկելու համար նախատեսված հեծանիվներ։

17. 24 Վ-ից բարձր անվանական լարումով աշխատող խաղեր և խաղալիքներ։

18. Հրազենի ճշգրիտ կրկնօրինակներ։

19. Երեխաների համար նախատեսված բիժուտերիա։

20. Լողի հարմարանքներ (օրինակ՝ ձեռքերին հագցվող փչովի մանժետներ)։

21. Պաշտպանիչ միջոցներ (լողի ակնոցներ, արևապաշտպան ակնոցներ, հեծանվային սաղավարտներ, սաղավարտներ սքեյթբորդի համար)։

22. Թռչող խաղալիքներ, որոնք երեխայի կողմից բաց են թողնվում ռետինե լարի օգնությամբ։

23. Աղեղներ` հրաձգության համար, որոնց երկարությունը չձգված վիճակում գերազանցում է 1200 մմ։

24. Երեխաների համար նախատեսված սանիտարահիգիենիկ արտադրատեսակներ լատեքսից, ռետինից և սիլիկոնային էլաստոմերներից։

1. Խաղալիքների հիգիենիկ անվտանգության պահանջները ներառում են՝

զգայորոշման ցուցանիշները (հոտ, համ)

ֆիզիկական գործոնները (ձայնի մակարդակը, էլեկտրաստատիկ դաշտի լարվածության մակարդակը, ռադիոհաճախականության տիրույթի էլեկտրամագնիսական դաշտի լարվածության մակարդակը, էլեկտրական դաշտի լարվածության մակարդակը, ինֆրակարմիր ճառագայթման ինտեգրալ հոսքի ուժգնության մակարդակը, տեղային թրթռման մակարդակը, բնական ռադիոնուկլիդների տեսակարար արդյունավետ ակտիվությունը)

սանիտարաքիմիական ցուցանիշները (վնասակար քիմիական նյութերի դեպի մոդելային միջավայրեր միգրացիա, որոնց ցանկը որոշվում է կախված նյութի քիմիական բաղադրությունից և խաղալիքներից վնասակար քիմիական նյութերի արտազատման նորմայից)

թունաբանահիգիենիկ ցուցանիշներ (գրգռիչ ազդեցություն լորձաթաղանթի վրա, թունավորության ինդեքս),

միկրոկենսաբանական ցուցանիշներ։

Եթե հիգիենիկ անվտանգությունը հաստատելիս բացահայտվում է խաղալիքի անհամապատասխանությունը վերահսկվող ցանկացած ցուցանիշներից որևէ մեկին, այն ճանաչվում է չհամապատասխանող, և հետագա հետազոտությունները դադարեցվում են։

2. Զգայորոշման ցուցանիշները

2.1. Բնական պայմաններում և ջրային լուծամզուքում խաղալիքի հոտի ուժգնությունը չպետք է գերազանցի 1 բալը մինչև 1 տարեկան երեխաների, 2 բալը՝ 1 տարեկանից բարձր տարիքի երեխաների համար նախատեսված խաղալիքներում։

3 տարեկանից բարձր տարիքի երեխաների համար խաղալիքների նմուշի և ջրային լուծամզուքի հոտի ուժգնությունը չպետք է գերազանցի 2 բալը։

2.2. Մինչև 3 տարեկան երեխաների համար նախատեսված խաղալիքները և բերանի խոռոչի հետ շփվող խաղալիքները չպետք է ունենան 1 բալից բարձր ուժգնության համ։

3. Ֆիզիկական գործոնները

3.1. Հնչյունավորված խաղալիքները պետք է համապատասխանեն հետևյալ պահանջներին՝

Խաղալիքների, բացառությամբ սպորտային խաղերի համար նախատեսված խաղալիք մոդելների, ձայնի համարժեք մակարդակը պետք է լինի՝

մինչև 3 տարեկան երեխաների համար՝ 60 դԲԱ-ից ոչ ավելի․

3-ից 6 տարեկան երեխաների համար՝ 65 դԲԱ-ից ոչ ավելի

6 տարեկանից բարձր տարիքի երեխաների համար՝ 70 դԲԱ-ից ոչ ավելի։

Բացօթյա խաղերի համար նախատեսված խաղալիքների, բացառությամբ իմպուլսային ձայն արտաբերող խաղալիքների, ձայնի համարժեք մակարդակը պետք է լինի 75 բԲԱ-ից ոչ ավելի։

Խաղալիքների ձայնի առավելագույն մակարդակը պետք է լինի՝

մինչև 3 տարեկան երեխաների համար՝ 70 դԲԱ-ից ոչ ավելի

3-ից 6 տարեկան երեխաների համար՝ 75 դԲԱ-ից ոչ ավելի

6 տարեկանից բարձր տարիքի երեխաների համար՝ 80 դԲԱ-ից ոչ ավելի։

Բացօթյա խաղերի համար նախատեսված խաղալիքների ձայնի առավելագույն մակարդակը պետք է լինի 85 դԲԱ-ից ոչ ավելի։

Իմպուլսային ձայն արտաբերող խաղալիքների ձայնի առավելագույն մակարդակը պետք է լինի 90 դԲԱ-ից ոչ ավելի։

3.2. Խաղալիքների մակերևույթի վրա էլեկտրաստատիկ դաշտի լարման մակարդակը չպետք է գերազանցի 15 կՎ/մ։

3.3. Ռադիոկառավարվող, էլեկտրոնային և էլեկտրատեխնիկական խաղալիքներից ճառագայթվող էլեկտրամագնիսական դաշտի լարման մակարդակը չպետք է գերազանցի 25 Վ/մ 0,3 - 300 կՀց հաճախականությունների տիրույթում, 15 Վ/մ՝ 0,3-3 ՄՀց հաճախականությունների տիրույթում, 10 Վ/մ՝ 3-30 ՄՀց հաճախականությունների տիրույթում, 3 Վ/մ՝ 30-300 ՄՀց հաճախականությունների տիրույթում, 10 մկՎտ/սմ2՝ 0,3-300 ԳՀց հաճախականությունների տիրույթում։

3.4. Խաղալիքի առաջացրած արդյունաբերական հաճախականության հոսանքի էլեկտրական դաշտի լարման մակարդակը (50 Հց) չպետք է գերազանցի 0,5 կՎ/մ։

3.5. Ինֆրակարմիր ճառագայթման ինտեգրալ հոսքի ուժգնության մակարդակը չպետք է գերազանցի 100 Վտ/մ2։

3.6. Թրթռման աղբյուր ունեցող խաղալիքներում տեղային թրթռման մակարդակները չպետք է գերազանցեն 63 դԲ-ը՝ 8 Հց և 16 Հց օկտավային շերտերի միջին երկրաչափական հաճախականության դեպքում, 69 դԲ-ը՝ 31,5 Հց դեպքում, 75 դԲ-ը՝ 63 Հց դեպքում, 81 դԲ-ը՝ 125 Հց դեպքում, 87 դԲ-ը՝ 250 Հց դեպքում, 93 դԲ-ը՝ 500 Հց դեպքում, 99 բԴ-ը՝ 1000 Հց դեպքում։ Թրթռման արագացման ճշգրտված մակարդակը չպետք է գերազանցի 66 դԲ։

3.7. Խաղերի համար նախատեսված հավաքածուների, մանկական ստեղծագործության համար նախատեսված հավաքածուների կազմի մեջ մտնող բնական նյութերում և դրանցից բաղկացած արտադրատեսակներում բնական ռադիոնուկլիդների տեսակարար արդյունավետ ակտիվությունը չպետք է գերազանցի 370 Բկ/կգ։

4. Սանիտարաքիմիական ցուցանիշներ

4.1. Խաղալիքներից վնասակար քիմիական նյութերի՝ դեպի մոդելային միջավայր (ջրային, օդային) միգրացիայի մակարդակը չպետք է գերազանցի 1-ին աղյուսակում նշված նորմերը։

Աղյուսակ 1

Խաղալիքներին ներկայացվող սանիտարաքիմիական ցուցանիշները

4.2. Մոդելային միջավայր (աղաթթու) խաղալիքի ցանկացած նյութի 1 կգ-ում պարունակվող վնասակար նյութերի անջատումը, բացի ձևավորվող զանգվածներից և ներկերից, որոնք նախատեսված են մատներով քսելու համար, չպետք է գերազանցի հետևյալ նորմերը՝

4.3. Մատներով քսելու համար նախատեսված՝ ձևավորվող զանգվածների և ներկերի 1 կգ-ում պարունակվող վնասակար նյութերի՝ մոդելային միջավայր (աղաթթու) անջատումը չպետք է գերազանցի հետևյալ նորմերը՝

5. Թունաբանահիգիենիկ ցուցանիշները

5.1. Մինչև 3 տարեկան երեխաների համար նախատեսված խաղալիքները, ինչպես նաև ֆունկցիոնալ ձևով երեխայի բերանի խոռոչի հետ շփվող խաղալիքները չպետք է գրգռիչ ազդեցություն ունենան լորձաթաղանթի վրա։

5.2. Խաղալիքները չպետք է առաջացնեն տեղային՝ մաշկը գրգռող ազդեցություն կամ ջրային միջավայրում (թորած միջավայրում) որոշվող՝ խաղալիքների թունավորության ինդեքսը պետք է լինի 70-ից 120 % ներառյալ, իսկ օդային միջավայրում՝ 80-ից 120 % ներառյալ։

6. Միկրոկենսաբանական ցուցանիշները

6.1. Խաղալիքների միկրոկենսաբանական ցուցանիշները պետք է համապատասխանեն 2-րդ աղյուսակում նշված ցուցաշներին:

Աղյուսակ 2

Խաղալիքների միկրոկենսաբանական ցուցանիշները

Երեխաների և (կամ) նրանց հսկող անձանց համար առավել վտանգ ներկայացնող խաղալիքը, վտանգների հետ կապված, պետք է ուղեկցվի վտանգների և խաղալիքն օգտագործելիս ձեռնարկվող միջոցների մասին տեղեկություններով:

1. Մինչև 3 տարեկան երեխաների համար չնախատեսված խաղալիքների վրա պետք է դրվի տարիքային խմբի նախազգուշացնող նշմամբ պայմանական գրաֆիկական նշան։ Պայմանական գրաֆիկական նշանը բերված է 1-ին նկարում։

Նկար 1

Պայմանական գրաֆիկական նշանների տարրերը պետք է կատարվեն՝

- շրջանագիծը և հատվող գիծը՝ կարմիր կամ սև գույներով․

- շրջանի ֆոնը՝ սպիտակ գույնով․

- տարիքային խումբը, որի համար խաղալիքը նախատեսված չէ, և դեմքի ուրվագծերը՝ սև գույնով։

Պայմանական գրաֆիկական նշանի նվազագույն տրամագիծը պետք է լինի 10 մմ-ից ոչ պակաս։

2. Կախովի ճոճանակների, սահելու համար բլուրների, օղակների, սեղանների, համանման նշանակության՝ վերադրակներ ունեցող ճոպանների և խաղալիքների մասով շահագործման փաստաթղթերը պետք է պարունակեն մոնտաժման վերաբերյալ պահանջներ՝ նշելով բաղադրիչ մասերը, որոնք կարող են վտանգ ներկայացնել սխալ հավաքելու և տեխնիկական սպասարկման դեպքում։

3. Ֆունկցիոնալ խաղալիքի կամ դրա փաթեթվածքի վրա պետք է տեղադրվի «Ուշադրություն. Օգտագործել բացառապես մեծահասակների անմիջական հսկողության ներքո» նախազգուշացնող գրառումը։

Շահագործման փաստաթղթերում պետք է բերված լինեն նախազգուշական միջոցներ և նշումներ այն մասին, որ դրանք չկատարելու դեպքում խաղալիքն օգտագործողները ենթարկվում են վտանգի։

Շահագործման փաստաթղթերում պետք է բերված լինեն երեխաների համար անհասանելի վայրում խաղալիքները պահելու մասին ցուցումներ։

4. Քիմիական խաղալիքը պետք է ունենա շահագործման փաստաթղթեր, որոնցում բերված են վնասակար նյութերը և ռեակտիվները, դրանք օգտագործելիս առաջացող վտանգի և օգտագործողների կողմից նախազգուշական միջոցներ ձեռնարկելու անհրաժեշտությանը վերաբերող ցուցումներ։ Շահագործման փաստաթղթերում պետք է բերված լինեն առաջին բուժօգնության տրամադրման վերաբերյալ տեղեկություններ, ինչպես նաև պետք է բերված լինի տարիքային հասցեագրվածության մասին նշում։

Քիմիական խաղալիքի փաթեթվածքի վրա դրվում է «Ուշադրություն․ Բացառապես ․․․-ից բարձր տարիքի երեխաների համար։ Օգտագործել բացառապես մեծահասակների անմիջական հսկողության ներքո»։ Տարիքը նշում է պատրաստողը։

5. Խաղալիք պարունակող սննդամթերքի փաթեթվածքի վրա պետք է դրված լինի «Պարունակում է խաղալիք» նախազգուշացնող գրառումը։

6. Անվավոր չմուշկները և սքեյթբորդերը, դրանք որպես խաղալիք իրացնելու դեպքում, պետք է ուղեկցվեն «Ուշադրություն. Խորհուրդ է տրվում կրել պաշտպանիչ միջոցներ» նախազգուշացնող գրառումը։

Տվյալ խաղալիքները կիրառելիս պահանջվում է որոշակի հմտությունների առկայություն։ Շահագործման փաստաթղթում հարկավոր է բերել խաղալիքի օգտագործման զգուշության մասին ցուցումները՝ խուսափելու համար անկումից կամ բախումից վնասվածքներ ստանալուց, ինչպես նաև պաշտպանիչ միջոցներ (պաշտպանիչ սաղավարտներ, ձեռնոցներ, ծնկակալներ, արմունկները պաշտպանելու համար վահանակներ և այլն) կիրառելու մասին ցուցումներ։

7. Ջրի վրա խաղերի համար նախատեսված խաղալիքները պետք է ուղեկցվեն «Ուշադրություն. Ծանծաղուտներում օգտագործել բացառապես մեծահասակների հսկողության ներքո» գրառմամբ։

8. Մագնիսային խաղալիքների, բացառությամբ խաղալիքների էլեկտրական կամ էլեկտրոնային դետալներում գտնվող ֆունկցիոնալ մագնիսներով խաղալիքների, սպառողական փաթեթվածքի վրա և (կամ) դրանց շահագործման վերաբերյալ հրահանգներում պետք է նշված լինի հետևյալ բովանդակությամբ նախազգուշացնող գրառումը՝

«Ուշադրություն. Պարունակում է չամրացված մագնիսներ և մագնիսային տարրեր։ Օգտագործել բացառապես մեծահասակների անմիջական հսկողության ներքո: Եթե մագնիսները և մագնիսային տարրերը կուլ են տրվել, անհրաժեշտ է դիմել բժշկական օգնության»։

<*> Կիրառվում է մինչև համապատասխան միջպետական ստանդարտի մշակումը