ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Օրինագիծն ընդունված է ՀՀ  Գերագույն խորհրդի կողմից
«21» ապրիլի 1992 թ. Հ.Ն-0603-1

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴԻՎԱՆԱԳԻՏԱԿԱՆ ԱՍՏԻՃԱՆՆԵՐԻ ՄԱՍԻՆ

Հոդված 1. Հայաստանի Հանրապետության դիվանագիտական աստիճաններն են`

- արտակարգ և լիազոր դեսպան,

- արտակարգ դեսպանորդ և լիազոր նախարար,

- խորհրդական,

- առաջին քարտուղար,

- երկրորդ քարտուղար,

- երրորդ քարտուղար,

- կցորդ:

Հոդված 2. Հայաստանի Հանրապետության արտակարգ և լիազոր դեսպանի, արտակարգ դեսպանորդ և լիազոր նախարարի աստիճանները շնորհում է Հայաստանի Հանրապետության նախագահը:

Խորհրդականի, առաջին քարտուղարի, երկրորդ քարտուղարի, երրորդ քարտուղարի և կցորդի աստիճանները շնորհում է Հայաստանի Հանրապետության արտաքին գործերի նախարարը:

Հոդված 3. Հայաստանի Հանրապետության արտակարգ և լիազոր դեսպանի, արտակարգ դեսպանորդ և լիազոր նախարարի աստիճաններ շնորհելու առաջարկը ներկայացնում է Հայաստանի Հանրապետության արտաքին գործերի նախարարը` արտաքին գործերի նախարարության որակավորման հանձնաժողովի եզրակացության հիման վրա:

Խորհրդականի, առաջին քարտուղարի, երկրորդ քարտուղարի, երրորդ քարտուղարի և կցորդի աստիճաններ շնորհելու առաջարկը ներկայացնում է Հայաստանի Հանրապետության արտաքին գործերի նախարարության որակավորման հանձնաժողովը:

Որակավորման հանձնաժողովի կազմը և կանոնակարգը հաստատում է Հայաստանի Հանրապետության արտաքին գործերի նախարարը:

Հոդված 4. Հերթական դիվանագիտական աստիճանը շնորհվում է դիվանագիտական ծառայության այն աշխատողներին, որոնք աշխատել են համապատասխանաբար ավելի ցածր դիվանագիտական աստիճանով հետևյալ ժամկետներում` կցորդ, երրորդ քարտուղար, երկրորդ քարտուղար- առնվազն 3 տարի, առաջին քարտուղար, խորհրդական- առնվազն 4 տարի:

Դիվանագիտական ծառայության մեջ նշանակալից արդյունքների հասած աշխատողին կարող է նշված ժամկետից շուտ շնորհվել ավելի բարձր դիվանագիտական աստիճան:

Հոդված 5. Հայաստանի Հանրապետության արտակարգ և լիազոր դեսպանի, արտակարգ դեսպանորդ և լիազոր նախարարի աստիճանները շնորհվում են ցմահ:

Դիվանագիտական մյուս աստիճաններն ունեցող անձինք պահպանում են իրենց աստիճանները միայն այն դեպքում, եթե նրանք կենսաթոշակի են անցնում Հայաստանի Հանրապետության արտաքին գործերի նախարարության համակարգից:

Հոդված 6. Հայաստանի Հանրապետության նախագահը կարող է զրկել արտակարգ և լիազոր դեսպանի, արտակարգ դեսպանորդ և լիազոր նախարարի աստիճաններից:

Հայաստանի Հանրապետության արտաքին գործերի նախարարը կարող է զրկել խորհրդականի, առաջին քարտուղարի, երկրորդ քարտուղարի, երրորդ քարտուղարի և կցորդի աստիճաններից: