«Վավերացնում եմ»
Հայաստանի Հանրապետության
Նախագահ Ռ. Քոչարյան
14 մայիսի 2003 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
3 ապրիլի 2003 թվականի N 499-Ն
ՋՐԵՐԻ ՀԱՇՎԱՌՄԱՆ ԱՅԼԸՆՏՐԱՆՔԱՅԻՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Հայաստանի Հանրապետության ջրային օրենսգրքի 19-րդ հոդվածին և 121-րդ հոդվածի 5-րդ մասի 38-րդ կետին համապատասխան՝ Հայաստանի Հանրապետության կառավարությունը որոշում է.
1. Հաստատել ջրերի հաշվառման այլընտրանքային կարգը` համաձայն հավելվածի:
2. Սույն որոշումն ուժի մեջ է մտնում 2003 թվականի հոկտեմբերի 1-ից:
|
Հայաստանի Հանրապետության վարչապետ |
Ա. Մարգարյան |
|
2003 թ. մայիսի 8 Երևան |
|
|
Հավելված ՀՀ կառավարության 2003 թվականիապրիլի 3-ի N 499-Ն որոշման |
Կ Ա Ր Գ
ՋՐԵՐԻ ԱՅԼԸՆՏՐԱՆՔԱՅԻՆ ՀԱՇՎԱՌՄԱՆ
1. Սույն կարգով կանոնակարգվում է Հայաստանի Հանրապետության տարածքում ջրային ռեսուրսներից ջրառի ծավալների այլընտրանքային հաշվառումը (այսուհետ՝ հաշվառում) հաշվարկային եղանակով՝ ջրաչափերի և (կամ) ջրաչափական դիտակետերի բացակայության, ինչպես նաև այն դեպքում, երբ դրանք չեն համապատասխանում սահմանված տեխնիկական ու շահագործման պայմաններին կամ գտնվում են անսարք վիճակում:
2. Հաշվառումն իրականացվում է Հայաստանի Հանրապետության բնապահպանության նախարարության ջրային ռեսուրսների կառավարման գործակալության (այսուհետ` գործակալություն) ներկայացուցչի կողմից` ջրօգտագործողի անմիջական մասնակցությամբ, որի մասին կազմվում է համապատասխան արձանագրություն:
3. Արձանագրության մեջ ներկայացված հաշվառման արդյունքները հիմք են հանդիսանում ջրօգտագործողի կողմից վարչական վիճակագրական հաշվետվությունը («Ջրօգտագործման մասին» N 2-տա ձև (ջրտնտ) (տարեկան) լրացնելու համար և համարվում են ջրօգտագործման փաստացի ծավալներ` ջրօգտագործման վճարի հաշվարկման համար:
4. Հաշվառման արդյունքներն ուժի մեջ են մինչև ջրօգտագործողի կողմից ջրաչափերի և (կամ) ջրաչափական դիտակետերի տեղադրումը, որի մասին կազմվում է երկկողմանի ակտ` գործակալության և ջրօգտագործողի միջև:
5. Սույն կարգի համաձայն՝ ջրային ռեսուրսից իրականացված ջրօգտագործման ծավալը հաշվարկվում է ստորև նշված ելակետային տվյալների արտադրյալի հիման վրա՝
ա) ջրահոսքի արագություն, որի մեծությունը հաշվարկների համար ընդունվում է`
ինքնահոս խողովակների համար՝ 1.5 մ/վրկ,
ճնշումային խողովակների համար՝ 2.0 մ/վրկ,
բաց հունով ջրանցքների համար՝ 1.2 մ/վրկ.
բ) ջրահոսքի գործող կտրվածք, որի մեծությունը հաշվարկների համար ընդունվում է՝
խողովակների համար` դրանց կտրվածքի մակերեսը,
բաց հունով ջրանցքի համար` ջրահոսքի հունի միջինացված բարձրության և լայնության արտադրյալը.
գ) ջրօգտագործման տևողություն (օր, ամիս, տարի):
5.1. Ջրառի կետում կամ ջրամատակարարման համակարգում պոմպի կամ հիդրոտուրբինի տեղադրված լինելու և այդ սարքավորումները շրջանցող ջրամատակարարման համակարգի բացակայության դեպքում` ստորև նշված ելակետային տվյալների արտադրյալով`
1) պոմպի կամ հիդրոտուրբինի հզորություն (մ3/վրկ, մ3/ժամ, կՎտ/ժամ).
2) պոմպի կամ հիդրոտուրբինի շահագործման հաշվարկային ժամանակահատված (ժամ, օր, ամիս, տարի):
(5.1-ին կետը լրաց. 27.06.13 N 671-Ն)
6. Ջրօգտագործողի և գործակալության միջև ծագած տարաձայնությունները, կապված ջրերի այլընտրանքային հաշվառման կարգի կիրարկման հետ, քննարկվում են Հայաստանի Հանրապետության օրենքով սահմանված կարգով:
(հավելվածը լրաց. 27.06.13 N 671-Ն)
| Հայաստանի Հանրապետության կառավարության աշխատակազմի ղեկավար-նախարար |
Մ. Թոփուզյան |
