ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

27 դեկտեմբերի 2012 թվականի N 1670-Ն

ԹԻԿՆԱՊԱՀՆԵՐԻ ԵՎ ՊԱՀՆՈՐԴՆԵՐԻ ՊԱՐՏԱԴԻՐ ՎԵՐԱՊԱՏՐԱՍՏՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

«Մասնավոր պահնորդական գործունեության մասին» Հայաստանի Հանրապետության օրենքի 22-րդ հոդվածի առաջին և երրորդ մասերին համապատասխան՝ Հայաստանի Հանրապետության կառավարությունը որոշում է.

1. Սահմանել՝

1) թիկնապահների և պահնորդների պարտադիր վերապատրաստման կարգը՝ համաձայն N 1 հավելվածի.

2) վերապատրաստման ենթակա թիկնապահների և պահնորդների մասին հայտի ձևը` համաձայն N 2 հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը։

Կ Ա Ր Գ

ԹԻԿՆԱՊԱՀՆԵՐԻ ԵՎ ՊԱՀՆՈՐԴՆԵՐԻ ՊԱՐՏԱԴԻՐ ՎԵՐԱՊԱՏՐԱՍՏՄԱՆ

1. Սույն կարգով կարգավորվում են թիկնապահների և պահնորդների պարտադիր վերապատրաստում (այսուհետ` վերապատրաստում) անցնելու հետ կապված հարաբերությունները։

2. Մասնագիտական գիտելիքների հետևողական կատարելագործման, աշխատանքի առաջավոր փորձի ուսումնասիրման, ինչպես նաև գործնական հմտությունների, ունակությունների ձեռքբերման և դրանք ամենօրյա պրակտիկ գործունեության ընթացքում կիրառելու նպատակով թիկնապահները և պահնորդներն անցնում են վերապատրաստում:

3. Սույն կարգի համաձայն վերապատրաստումն անցկացվում է տեսական դասընթացների, փորձի փոխանակման, սեմինար պարապմունքների, այդ թվում` մասնագիտական հմտությունների գործնական ցուցադրման ձևերով:

4. Թիկնապահները և պահնորդները վերապատրաստում անցնում են առնվազն յուրաքանչյուր երեք տարին մեկ անգամ:

5. Վերապատրաստումն իրականացնում են իրավաբանական անձ հանդիսացող և համապատասխան կրթական գործունեության լիցենզիա ունեցող հաստատությունները (այսուհետ` վերապատրաստում իրականացնող հաստատություն):

6. Վերապատրաստումն անցկացվում է վերապատրաստում իրականացնող հաստատության և «Մասնավոր պահնորդական գործունեության մասին» Հայաստանի Հանրապետության օրենքով (այսուհետ` օրենք) նախատեսված` թիկնապահական և պահնորդական գործունեություն իրականացնելու թույլտվություն (լիցենզիա) ունեցող կազմակերպության (այսուհետ` կազմակերպություն) միջև կնքվող պայմանագրի հիման վրա:

7. Վերապատրաստման ծրագիրը կազմվում է՝ ելնելով օրենքով սահմանված` թիկնապահական և պահնորդական գործունեության խնդիրներից: Վերապատրաստման ծրագիրը հաստատում է վերապատրաստում իրականացնող հաստատության ղեկավարը:

8. Վերապատրաստման խմբերը ձևավորվում են օրենքով նախատեսված` թիկնապահական և պահնորդական գործունեություն իրականացնելու թույլտվություն (լիցենզիա) ունեցող կազմակերպությունների կողմից ներկայացված հայտերի հիման վրա: Վերապատրաստման դասընթացի ժամանակացույցը հաստատում է վերապատրաստում իրականացնող հաստատության ղեկավարը` համաձայնեցնելով տվյալ կազմակերպության հետ:

9. Վերապատրաստում իրականացնող հաստատությունում վարվում են ուսումնական մատյաններ, որոնցում յուրաքանչյուր օրվա համար կատարվում են նշումներ վերապատրաստվող անձանց ներկա կամ բացակա լինելու վերաբերյալ։

10. Վերապատրաստվող անձի` վերապատրաստման դասընթացների ավելի քան մեկ երրորդից անհարգելի բացակայության դեպքում վերապատրաստում անցած լինելը հավաստող վկայական չի տրվում։

11. Վերապատրաստման դասընթացներից վերապատրաստվող անձի հարգելի բացակայության դեպքում նրան հնարավորություն է ընձեռվում մասնակցելու ծրագրի` նույն թեմայով անցկացվող հաջորդ դասընթացներից որևէ մեկին:

12. Վերապատրաստման արդյունքում վերապատրաստում իրականացնող հաստատության կողմից անձին տրվում է վերապատրաստում անցած լինելը հավաստող վկայական, որի պատճենը պահվում է վերապատրաստում անցած անձի գործատու կազմակերպությունում և կցվում նրա անձնական գործին:

13. Վերապատրաստում անցած լինելը հավաստող վկայականի ձևը հաստատում է վերապատրաստում իրականացնող հաստատության ղեկավարը:

Հ Ա Յ Տ

Վերապատրաստման ենթակա թիկնապահների ԵՎ պահնորդների մասին 

___________________________________________________ գործունեություն իրականացնող

(թիկնապահական, պահնորդական (նշել գործունեության տեսակը)                                                               

______________________________________________________________ կազմակերպության

(կազմակերպության անվանումը)