«Վավերացնում եմ»
Հայաստանի Հանրապետության
Նախագահ Ռ. Քոչարյան
27 ապրիլի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

27 ապրիլի 2002 թվականի N 471
քաղ. Երևան

ՀԱՅԿԱԿԱՆ ԳՅՈՒՂԱՏՆՏԵՍԱԿԱՆ ԱԿԱԴԵՄԻԱՆ ՎԵՐԱԿԱԶՄԱԿԵՐՊԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հայկական գյուղատնտեսական ակադեմիան վերակազմավորման ձևով վերակազմակերպել «Հայաստանի պետական ագրարային համալսարան» պետական ոչ առևտրային կազմակերպության` պետական կառավարման լիազորված մարմին ճանաչելով Հայաստանի Հանրապետության կրթության և գիտության նախարարությունը:

(1-ին կետը փոփ. 15.09.05 N 1567-Ն)

2. «Հայաստանի պետական ագրարային համալսարան» պետական ոչ առևտրային կազմակերպության կառավարման, ինչպես նաև «Պետական ոչ առևտրային կազմակերպությունների մասին» Հայաստանի Հանրապետության օրենքի 13-րդ հոդվածի 2-րդ կետի «գ», «ե» և «է» ենթակետերով նախատեսված լիազորությունները վերապահել Հայաստանի Հանրապետության կրթության և գիտության նախարարությանը:

(2-րդ կետը փոփ. 15.09.05 N 1567-Ն)

3. Սահմանել, որ «Հայաստանի պետական ագրարային համալսարան» պետական ոչ առևտրային կազմակերպության գործունեության առարկան և նպատակը կրթական, գիտական, փորձագիտական, խորհրդատվական, ուսումնագիտաարտադրական, հրատարակչական գործունեության իրականացումն է:

(3-րդ կետը փոփ. 15.09.05 N 1567-Ն)

4. Թույլատրել «Հայաստանի պետական ագրարային համալսարան» պետական ոչ առևտրային կազմակերպությանը իրականացնել ձեռնարկատիրական գործունեության հետևյալ տեսակները`

ա) գյուղատնտեսական բարձրագույն, միջին և հետբուհական մասնագիտական կրթության կազմակերպում.

բ) արտասահմանցի դիմորդների նախապատրաստական կրթության կազմակերպում.

գ) գիտամանկավարժական կադրերի պատրաստում, վերապատրաստում, մասնագիտական որակավորման բարձրացում.

դ) գիտահետազոտական աշխատանքների իրականացում.

ե) անասնաբուժական օգնության կազմակերպում.

զ) փորձագիտական գործունեության կազմակերպում.

է) խորհրդատվական ծառայության կազմակերպում.

ը) ուսումնագիտաարտադրական գործունեության ծավալում և արտադրանքի իրացում.

թ) հրատարակչական գործունեության ծավալում և արտադրանքի իրացում.

ժ) սովորողների սննդի կազմակերպում.

ժա) համակարգչային ծրագրերի և լեզուների ուսուցման կազմակերպում.

ժբ) հանրակացարանաբնակ ուսանողների կենցաղի կազմակերպում և սպասարկում.

ժգ) սովորողների և աշխատողների հանգստի կազմակերպում:

(4-րդ կետը փոփ. 15.09.05 N 1567-Ն)

5. Հայաստանի Հանրապետության կրթության և գիտության նախարարությանը` 2-ամսյա ժամկետում Հայաստանի Հանրապետության գյուղատնտեսության նախարարության հետ համատեղ` սահմանված կարգով Հայաստանի Հանրապետության կառավարության հաստատմանը ներկայացնել «Հայաստանի պետական ագրարային համալսարան» պետական ոչ առևտրային կազմակերպության կանոնադրությունը` նախատեսելով, որ Հայաստանի Հանրապետության գյուղատնտեսության նախարարությունը`

ա) շարունակում է աջակցել «Հայաստանի պետական ագրարային համալսարան» պետական ոչ առևտրային կազմակերպության նյութատեխնիկական և լաբորատոր բազաների ամրապնդմանը և համալրմանը, ուսումնաարտադրական պրակտիկաների կազմակերպմանը.

բ) համաձայնություն է տալիս «Հայաստանի պետական ագրարային համալսարան» պետական ոչ առևտրային կազմակերպության կողմից միջազգային խորհրդատվական և գիտական ծրագրերի իրականացմանը.

գ) սահմանված կարգով ներկայացնում է առաջարկություն ընդունելության մասնագիտությունների ցանկի, տեղերի թվի, պետական որակավորման հանձնաժողովների նախագահների թեկնածությունների վերաբերյալ:

(5-րդ կետը փոփ. 15.09.05 N 1567-Ն)

6. «Հայաստանի պետական ագրարային համալսարան» պետական ոչ առևտրային կազմակերպությանը սեփականության իրավունքով հանձնել Հայկական գյուղատնտեսական ակադեմիայի տնօրինության գույքը` բացառությամբ շենքերի, շինությունների, «Ոսկեհատ» և «Բալահովիտ» ուսումնափորձնական տնտեսությունների հողատարածքների (ցանկը կցվում է), թանկարժեք մետաղների, թանկարժեք քարերի և դրանցից պատրաստված իրերի, ինչպես նաև նվազագույն աշխատավարձի 10000-ապատիկից ավելի արժողությամբ գույքի:

(6-րդ կետը փոփ. 15.09.05 N 1567-Ն, լրաց. 13.05.10 N 650-Ն)

7. Սահմանել, որ`

ա) Հայկական գյուղատնտեսական ակադեմիայի տնօրինության շենքերը, շինությունները Հայաստանի Հանրապետության հողային օրենսգրքով սահմանված կարգով իրենց սպասարկման հողատարածքներով, «Ոսկեհատ» և «Բալահովիտ» ուսումնափորձնական տնտեսությունների հողատարածքները (ցանկը կցվում է), ինչպես նաև թանկարժեք մետաղները, թանկարժեք քարերը և դրանցից պատրաստված իրերը և նվազագույն աշխատավարձի 10000-ապատիկից ավելի արժողությամբ գույքն անհատույց օգտագործման իրավունքով ամրացվում է «Հայաստանի պետական ագրարային համալսարան» պետական ոչ առևտրային կազմակերպությանը.

բ) մինչև վերակազմակերպումը Հայկական գյուղատնտեսական ակադեմիային «Հայաստանի Հանրապետության 2002 թվականի պետական բյուջեի մասին» Հայաստանի Հանրապետության օրենքով նախատեսված հատկացումները տրամադրվում են Հայաստանի Հանրապետության գյուղատնտեսության նախարարության կողմից Հայաստանի Հանրապետության ֆինանսների և էկոնոմիկայի նախարարության տեղական գանձապետական բաժանմունք ներկայացված բյուջետային ծախսերի նախահաշիվների հիման վրա` ըստ բյուջետային ծախսերի տնտեսագիտական դասակարգման հոդվածների:

Նշված հատկացումները ներառվում են վերակազմակերպումից հետո իրավաբանական անձի հետ Հայաստանի Հանրապետության օրենսդրությամբ սահմանված կարգով կնքվելիք Հայաստանի Հանրապետության պետական բյուջեից կատարվող ֆինանսավորումը կանոնակարգող պայմանագրերում:

(7-րդ կետը լրաց. 09.06.05 N 888-Ն, փոփ. 15.09.05 N 1567-Ն, լրաց. 13.05.10 N 650-Ն)

8. Հայաստանի Հանրապետության ֆինանսների նախարարությանը` սույն որոշման երկրորդ կետի պահանջների կատարումն ապահովելու նպատակով Հայաստանի Հանրապետության կառավարություն ներկայացնել առաջարկություն Հայաստանի Հանրապետության 2002 թվականի պետական բյուջեում և Հայաստանի Հանրապետության կառավարության 2002 թվականի փետրվարի 25-ի «Հայաստանի Հանրապետության 2002 թվականի պետական բյուջեի կատարումն ապահովող միջոցառումների մասին» N 172 որոշման մեջ համապատասխան փոփոխություններ կատարելու վերաբերյալ:

(8-րդ կետը փոփ. 13.05.10 N 650-Ն)

9. Սույն որոշումն ուժի մեջ է մտնում 2002 թվականի ապրիլի 27-ից:

Ց Ա Ն Կ

ՀԱՅԿԱԿԱՆ ԳՅՈՒՂԱՏՆՏԵՍԱԿԱՆ ԱԿԱԴԵՄԻԱՅԻ ՏՆՕՐԻՆՈՒԹՅԱՆ ՇԵՆՔԵՐԻ, ՇԻՆՈՒԹՅՈՒՆՆԵՐԻ ԵՎ ՀՈՂԱՏԱՐԱԾՔՆԵՐԻ

(Ցանկը փոփ. 07.07.05 N 984-Ն, 18.09.08 N 1124-Ն)