«Գրանցված է»
ՀՀ արդարադատության
նախարարության կողմից
17 մայիսի 2004 թ.
Պետական գրանցման թիվ 60604115

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ

Ո Ր Ո Շ ՈՒ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎՈՒՄ ԵՎ ՀԱՆՁՆԱԺՈՂՈՎԻ ԱՇԽԱՏԱԿԱԶՄՈՒՄ ԳՈՐԾԱՎԱՐՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2002 թվականի հունիսի 20-ի «Հայաստանի Հանրապետության կառավարության գործավարության կարգը հաստատելու մասին» թիվ 890-Ն որոշումը և ղեկավարվելով Հայաստանի Հանրապետության ընտրական օրենսգրքի 41-րդ հոդվածի 1-ին կետի 7-րդ ենթակետով, Հայաստանի Հանրապետության կենտրոնական ընտրական հանձնաժողովը որոշում է.

Հաստատել Հայաստանի Հանրապետության կենտրոնական ընտրական հանձնաժողովում և հանձնաժողովի աշխատակազմում գործավարության կարգը՝ համաձայն հավելվածի (կցվում է):

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎՈՒՄ ԵՎ ՀԱՆՁՆԱԺՈՂՈՎԻ ԱՇԽԱՏԱԿԱԶՄՈՒՄ ԳՈՐԾԱՎԱՐՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետության կենտրոնական ընտրական հանձնաժողովում (այսուհետ՝ հանձնաժողով) և հանձնաժողովի աշխատակազմում (այսուհետ՝ աշխատակազմ) գործավարության և փաստաթղթաշրջանառության կազմակերպման կարգը:

2. Հանձնաժողովի և աշխատակազմի գործավարությունն իրականացնում է աշխատակազմի իրավաբանական վարչության դիմումների, փաստաթղթերի հաշվառման բաժինը (այսուհետ՝ բաժին) սույն կարգին համապատասխան:

(2-րդ կետը փոփ. 20.10.09 N 88-Ն)

3. Գործավարության միասնական կարգի ապահովման վերահսկողությունն իրականացնում է աշխատակազմի ղեկավարը:

4. Աշխատակազմի ստորաբաժանումների ղեկավարները պատասխանատու են սույն կարգով նախատեսված գործավարության կանոնների պահպանման համար:

5. Գաղտնի գործավարությունն իրականացնում է աշխատակազմի ղեկավարը «Պետական և ծառայողական գաղտնիքի մասին» Հայաստանի Հանրապետության օրենքի և Հայաստանի Հանրապետության կառավարության 1997 թվականի դեկտեմբերի 30-ի N 626 որոշմամբ հաստատված հրահանգի պահանջներին համապատասխան:

II. ՍՏԱՑՎԱԾ ԹՂԹԱԿՑՈՒԹՅԱՆ ԸՆԴՈՒՆՈՒՄԸ, ԳՐԱՆՑՈՒՄՆ ՈՒ ՇԱՐԺԸ

6. Հանձնաժողովում և աշխատակազմում ստացված ամբողջ պաշտոնական և ոչ պաշտոնական թղթակցությունն ընդունվում է բաժնում և գրանցվում ապարատածրագրային միջոցներով, զուգահեռ՝ նաև մատյանների օգնությամբ, որտեղ արտացոլվում են ստացված փաստաթղթի համառոտ բովանդակությունը, շարժը և կատարման ընթացքը:

6.1. Հանձնաժողովում կամ աշխատակազմում դիմումները, փաստաթղթերը կարող են ստացվել նաև հանձնաժողովի վարչական շենքում տեղադրված դիմումների արկղի միջոցով` ոչ աշխատանքային օրերին, իսկ աշխատանքային օրերին` ժամը 18.00-ից հետո: Դիմումների արկղի միջոցով ստացված թղթակցությունը գրանցվում է դրան հաջորդող աշխատանքային oրը:

(6.1-ին կետը լրաց. 20.10.09 N 88-Ն)

7. Բաժնում բացվում են ստացված բոլոր ծրարները (նաև էլեկտրոնային), բացառությամբ «Անձամբ» մակագրությամբ ծրարներից և անձնական էլեկտրոնային ստորագրությամբ փակված փաստաթղթերի էլեկտրոնային օրինակներից (ֆայլերից):

8. Մտից փաստաթղթերը գրանցվում են ստանալու օրը, ելից և ներքին փաստաթղթերը՝ ստորագրման օրը:

9. Ստացվող փաստաթղթի առաջին էջի ներքևի աջ անկյունում դրվում է մուտքագրման դրոշմակնիքը, որի վրա նշվում են մտից գրանցման համարը և ամսաթիվը:

«Անձամբ» մակագրությամբ ծրարները կամ ֆայլերը չեն գրանցվում և փակ վիճակում հանձնվում են հասցեատիրոջը:

10. Սույն կարգի թիվ 1 հավելվածում նշված չգրանցվող փաստաթղթերի (բացառությամբ՝ բացիկների, թերթերի) կամ դրանց ֆայլերի վրա դրվում է դրոշմակնիք՝ նշելով միայն մուտքի ամսաթիվը, որից հետո դրանք հանձնվում են հասցեատերերին:

11. Բաժնի աշխատողները պարտավոր են ստուգել ծրարների ամբողջականությունը և դրանցում ներդրված փաստաթղթերի, կից ուղարկված հավելվածների առկայությունը, համեմատել փաստաթղթերի համարները ծրարի վրա նշվածների հետ:

Փաստաթղթերի կամ ֆայլերի բացակայության կամ վնասված լինելու դեպքում կազմվում է արձանագրություն համաձայն թիվ 2 հավելվածի՝ 2 օրինակից, որոնցից մեկը կցվում է փաստաթղթին, մյուսը՝ ուղարկվում փաստաթուղթն առաքող կազմակերպությանը:

Եթե ծրարում կամ ֆայլում հայտնաբերվում է սխալմամբ դրված փաստաթուղթ, այն նոր ծրարով կամ համակարգչային ցանցով ուղարկվում է ըստ պատկանելության՝ փաստաթղթին կցելով այն ծրարը (նաև՝ էլեկտրոնային), որով դա ստացվել է՝ անհրաժեշտության դեպքում տեղյակ պահելով ուղարկող կազմակերպությանը:

12. Ծրարները (նաև՝ էլեկտրոնային), որոնցով ստացվել է թղթակցությունը, պահպանվում և փաստաթղթերին են կցվում այն դեպքում, երբ միայն ծրարի միջոցով կարելի է պարզել ուղարկողի հասցեն կամ ծրարի վրայի փոստային դրոշմակնիքի ամսաթիվը նշանակություն ունի տվյալ նյութի ուղարկման ու ստացման ժամանակը որոշելու համար: Մյուս բոլոր ծրարները (նաև՝ էլեկտրոնային) ոչնչացվում են:

13. Մտից փաստաթղթերը, որոնք ստացվել են թղթի կրիչի վրա, ֆաքսիմիլային, էլեկտրոնային ձևերով, ապարատածրագրային միջոցների օգնությամբ ենթակա են վերափոխման՝ հետագայում տվյալների շտեմարանում գրանցելու համար:

14. Հայաստանի Հանրապետության Նախագահի աշխատակազմից, Հայաստանի Հանրապետության Ազգային ժողովից, Հայաստանի Հանրապետության կառավարությունից, Հայաստանի Հանրապետության վարչապետից ստացված թղթակցությունը և «Շտապ» մակագրությամբ փաստաթղթերը գրանցվում և ներկայացվում են հանձնաժողովի նախագահին անհապաղ:

Մյուս թղթակցությունը հասցեատերերին է տրվում աշխատանքային մեկ օրվա ընթացքում՝ սույն կարգին համապատասխան:

15. Ամենօրյա փոստը և թղթակցությունները, բացառությամբ սույն կարգի 14-րդ կետում նշված փաստաթղթերի, Աշխատակազմի ղեկավարը հանձնաժողովի նախագահին է զեկուցում ժամը՝ 16.00-ին:

16. Փաստաթղթերին ընթացք տալու համար իրավասու անձը կատարում է մակագրություն:

Եթե փաստաթղթի կատարման հանձնարարությունը տրվում է միաժամանակ մի քանի ստորաբաժանումների, ապա կատարման համար պատասխանատու է այն ստորաբաժանումը, որն առաջինն է նշված մակագրության մեջ:

17. Փաստաթղթերի բնօրինակները հանձնվում են պատասխանատու ստորաբաժանմանը, իսկ մյուսների համար բաժինը բազմացնում և պատճենները նրանց է հանձնում նույն օրը:

18. Համապատասխան մակագրությունից հետո փաստաթղթերը հասցեատերերին է հանձնում բաժնի գլխավոր մասնագետը:

Աշխատակազմի ղեկավարի տեղակալը, կառուցվածքային ստորաբաժանումների ղեկավարները և աշխատողներն իրենց մակագրված փաստաթղթերը ստանում են բաժնից՝ անձամբ:

(18-րդ կետը փոփ. 20.10.09 N 88-Ն)

19. Մակագրված փաստաթղթերի փոխանցումը կառուցվածքային մեկ ստորաբաժանումից մյուսը կատարվում է բաժնի միջոցով՝ աշխատակազմի ղեկավարի կամ նրա տեղակալի համաձայնությամբ:

20. Ստացված փաստաթղթերին ընթացք տալու համար սահմանվում է մինչև 5 օր ժամկետ, եթե այլ ժամկետ սահմանված չէ:

Լրացուցիչ ուսումնասիրություններ, քննարկումներ կամ ստուգումներ պահանջող փաստաթղթերին ընթացք տալու համար սահմանվում է մինչև 15 օր ժամկետ:

Հսկողության վերցված փաստաթղթերի վերին աջ անկյունում նշագրվում է «Հսկողական» բառը և նշվում է կատարման ժամկետը:

21. Փաստաթղթերի հանձնարարականների կատարման համար սահմանված ժամկետները կարող են փոփոխվել հանձնաժողովի նախագահի համաձայնությամբ՝ կառուցվածքային ստորաբաժանման ղեկավարի զեկուցագրի հիման վրա:

22. Ընտրական հանձնաժողովների որոշումների և գործողությունների վերաբերյալ ստացված դիմումներն ու բողոքները քննարկվում և պատասխանվում են Հայաստանի Հանրապետության ընտրական օրենսգրքով սահմանված կարգով և ժամկետներում:

23. Հանձնարարությունը համարվում է կատարված առաջադրված հարցերի լուծումից և շահագրգիռ անձանց ու կազմակերպություններին պատշաճ ձևով պատասխանելուց հետո:

Միջանկյալ պատասխանը, ինչպես նաև կատարման հարցումը հիմք չի հանդիսանում փաստաթղթի հանձնարարականը կատարված համարելու համար:

24. Փաստաթղթի հետ աշխատանքն ավարտելուց հետո բնօրինակը և դրան կից ներկայացված համապատասխան հիմնավորումը, Աշխատակազմի ղեկավարի՝ «Գործին» մակագրությամբ, վերադարձվում է բաժին:

25. Աշխատակազմի աշխատողները պատասխանատու են իրենց մոտ գտնվող փաստաթղթերի պահպանության համար և պարտավոր են խնամքով վերաբերվել դրանց:

Արգելվում է ստացված փաստաթղթի բնօրինակում կամ ֆայլում որևէ նշում կամ փոփոխություն կատարելը:

26. Արձակուրդի, գործուղման կամ այլ պատճառներով բացակայելու դեպքում աշխատողը պարտավոր է իր մոտ գտնվող անավարտ գործերի փաստաթղթերը հանձնել փոխարինողին կամ անմիջական ղեկավարին:

III. ԵԼԻՑ ՓԱՍՏԱԹՂԹԵՐԻ ՁԵՎԱԿԵՐՊՈՒՄԸ

27. Ելից փաստաթղթերն ստորագրվում են հանձնաժողովի նախագահի կամ աշխատակազմի ղեկավարի կողմից՝ ըստ նրանց պաշտոնեական լիազորությունների սահմանազատման, ինչպես նաև հանձնաժողովի քարտուղարի կողմից՝ Հայաստանի Հանրապետության ընտրական օրենսգրքով սահմանված դեպքերում:

Հանձնաժողովի նախագահի, աշխատակազմի ղեկավարի բացակայության դեպքում ելից փաստաթղթերը ստորագրում են համապատասխանաբար նրանց տեղակալները:

28. Հանձնաժողովի նախագահի հանձնարարությամբ ելից փաստաթղթեր կարող են ստորագրել նաև հանձնաժողովի անդամները, աշխատակազմի կառուցվածքային ստորաբաժանումների ղեկավարները և հանձնաժողովի մամուլի քարտուղարը:

(28-րդ կետը փոփ. 20.10.09 N 88-Ն)

29. Առաքվող ելից փաստաթուղթը կազմվում է երեք օրինակից: Առաջինն ուղարկվում է հասցեատիրոջը, երկրորդ օրինակը՝ տվյալ ստորաբաժանման ղեկավարի ստորագրությամբ, կատարման հիմքերով պահվում է բաժնում, երրորդը՝ անմիջական կատարողի ստորագրությամբ մնում է համապատասխան ստորաբաժանումում:

(29-րդ կետը փոփ. 20.10.09 N 88-Ն)

30. Փաստաթղթին լրացուցիչ նյութեր կցելու դեպքում տեքստի տակ նշվում է դրանց անվանումն ու թերթերի քանակը:

31. Բաժնում ստուգվում է փաստաթղթերի ամբողջականությունը և դրանց հավելվածների առկայությունը: Սխալ ձևակերպված փաստաթղթերը վերադարձվում են կատարողներին:

32. Ելից փաստաթղթի վերջին էջի ներքևի ձախ մասում նշվում է ստորաբաժանման անվանումը, կատարողի ազգանունը և հեռախոսի համարը:

Այն դեպքերում, երբ նամակներն ուղարկվում են ստացված գրություններին որպես ի պատասխան, հասցեատիրոջ անվան տակ, վերևի ձախ անկյունում նշվում են այդ գրության ամսաթիվը և համարը:

33. Ինչպես շտապ, այնպես էլ սովորական թղթակցությունը բաժնի կողմից հասցեատերերին է առաքվում սուրհանդակի միջոցով, քաղաքացիների դիմում-բողոքների պատասխանները՝ փոստային ծառայության միջոցով:

(33-րդ կետը փոփ. 20.10.09 N 88-Ն)

34. Հարցի լուծումն արագացնելու անհրաժեշտության դեպքում կազմվում է հեռագիր:

Հեռագրերը կազմվում են՝ թղթի մեջտեղում մեծատառերով գրելով «ՀԵՌԱԳԻՐ» և փոխանցվում են հեռատիպ: Հեռագրի տեքստը պետք է լինի հակիրճ և չգերազանցի 30-35 բառը, պետք է շարադրվի առանց շաղկապների և նախածանցների, եթե դրանով չի աղավաղվում բովանդակությունը, առանց բառերը տողադարձելու:

Պատասխան հեռագրի տեքստը սկսվում է այն փաստաթղթի համարով, որին պատասխանվում է:

35. Հեռագրերը տպագրվում են երկու օրինակից, բնօրինակը պահվում է բաժնում: Հեռագրերը նույնպես գրանցվում և հաշվառվում են, դրանց ելքի համարները դրվում են սույն կարգով սահմանված կարգով:

36. Հրատապ տեղեկատվություն հաղորդելու համար, մի շարք դեպքերում` գրության կամ հեռագրի փոխարեն, կարող են օգտագործվել հեռախոսագրերը: Դրանք պետք է կազմվեն պարզ և համառոտ տեքստով՝ խուսափելով դժվար արտասանվող բառերի և բառակապակցությունների օգտագործումից:

Հեռախոսագրերը ստորագրվում են հանձնաժողովի նախագահի կամ աշխատակազմի ղեկավարի կողմից:

Հեռախոսագրի վրա դրվում է ելքի համարը, նշում են հաղորդող և ընդունող անձանց ազգանունները, հեռախոսների համարները, ինչպես նաև հաղորդման ընդունման ամսաթիվն ու ժամը:

37. Ելից փաստաթղթի համարը կազմված է սույն կարգով սահմանված պայմանանիշից և հերթական ելից համարից:

38. Բաժինը ապահովում է փաստաթղթերի պահպանությունը և ՀՀ օրենսդրությամբ սահմանված կարգով արխիվացումը: Պահպանության համար փաստաթղթերը բաժինն ընդունում է ըստ ցանկի:

IV. ՔԱՂԱՔԱՑԻՆԵՐԻ ԴԻՄՈՒՄՆԵՐԻ, ԲՈՂՈՔՆԵՐԻ ՈՒ ԱՌԱՋԱՐԿՈՒԹՅՈՒՆՆԵՐԻ ԳՐԱՆՑՈՒՄԸ, ՇԱՐԺԸ ԵՎ ԱՌԱՔՈՒՄԸ

39. Քաղաքացիների կողմից ստացված դիմումների, բողոքների ու առաջարկությունների (այսուհետ՝ դիմում) գրանցման և հաշվառման համար վարվում է առանձին մատյան, որտեղ արտացոլվում են մուտքագրման հերթական համարը, ստացման ամսաթիվը, դիմողի տվյալները (անուն, ազգանուն, բնակության հասցեն), ստացված դիմումի համառոտ բովանդակությունը, թերթերի թիվը, շարժը, կատարման ընթացքը և ելից համարը:

Կոլեկտիվ դիմումի ստացման դեպքում գրանցվում է ընդգծված ազգանունը, իսկ դրա բացակայության դեպքում՝ առաջին ազգանունը:

40. Գրավոր դիմումը պետք է լինի ստորագրված դիմողի կողմից, պարունակի նրա անունը, ազգանունը, հայրանունը, բնակության կամ աշխատանքային հասցեն, տրման օրը, ամիսը և տարեթիվը:

41. Դիմումատուի անվան (անուն, ազգանուն) և բնակության կամ աշխատանքային հասցեի մասին տեղեկություններ չպարունակող դիմումը համարվում է անանուն, չի գրանցվում և օրենքով սահմանված կարգով ոչնչացվում է:

42. Դիմումների պատասխանները կազմվում և առաքվում են սույն կարգով և Հայաստանի Հանրապետության ընտրական օրենսգրքով սահմանված ժամկետներում:

43. Դիմումի պատասխանի ելից համարը կազմված է սույն կարգով սահմանված պայմանանիշից և գրանցման հերթական համարից:

V. ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ՂԵԿԱՎԱՐ ԿԱԶՄԻ, ԱՆԴԱՄՆԵՐԻ ԵՎ ԱՇԽԱՏԱԿԱԶՄԻ ԹՂԹԱԿՑԱԿԱՆ ՊԱՅՄԱՆԱՆԻՇԵՐԸ

Ց Ա Ն Կ

Հայաստանի Հանրապետության կենտրոնական ընտրական հանձնաժողովի աշխատակազմի իրավաբանական վարչության դիմումների, փաստաթղթերի հաշվառման բաժնում չգրանցվող փաստաթղթերի

(վերնագիրը փոփ. 20.10.09 N 88-Ն)

1. Նիստերի, խորհրդակցությունների և օրակարգերի ծանուցումներ

2. Գովազդային ծանուցումներ, ազդագրեր, խորհրդակցությունների, համաժողովների ծրագրեր

3. Շնորհավորական բացիկներ և հրավերներ

4. Տպագիր հրատարակություններ (գրքեր, ամսագրեր, տեղեկագրեր, թերթեր):

(հավելվածը փոփ. 20.10.09 N 88-Ն)