Հ Ա Մ Ա Ձ Ա Յ Ն Ա Գ Ի Ր
Հայաստանի Հանրապետության գյուղատնտեսության նախարարության ԵՎ Բելառուսի Հանրապետության գյուղատնտեսության ԵՎ պարենի նախարարության միջԵՎ ագրոարդյունաբերական համալիրի բնագավառում տնտեսական ԵՎ գիտատեխնիկական համագործակցության մասին
Հայաստանի Հանրապետության գյուղատնտեսության նախարարությունը և Բելառուսի Հանրապետության գյուղատնտեսության և պարենի նախարարությունը, այսուհետ՝ Կողմեր,
ղեկավարվելով ագրոպարենային համալիրի տնտեսական և գիտատեխնիկական զարգացման ձգտումով, հավասարության և փոխադարձ շահավետության սկզբունքներով,
հաշվի առնելով Հայաստանի Հանրապետության և Բելառուսի Հանրապետության միջև պատմականորեն ձևավորված տնտեսական և գիտատեխնիկական կապերը,
համաձայնեցին ներքոհիշյալի մասին.
Հոդված 1
Տնտեսական և գիտատեխնիկական համագործակցությունը Կողմերի միջև կիրականացվի Կողմերի պետությունների տարածքում գործող օրենսդրությունների հիման վրա:
Հոդված 2
Համագործակցությունը կիրականացվի հետևյալ ուղղություններով.
1) բուսաբուծություն, այդ թվում՝ գյուղատնտեսական մշակաբույսերի սերմնաբուծություն,
2) անասնապահություն, այդ թվում՝ տոհմային գործ,
3) ավտոմատացում և գյուղատնտեսական արտադրության մեքենայացում, այդ թվում` երկու երկրների ագրոարդյունաբերական համալիրի համար գյուղատնտեսական մեքենաների և սարքավորումների նոր տեսակների մշակում, յուրացում և ներդրում, տեխնիկական սպասարկումների կատարելագործում և գյուղատնտեսական տեխնիկայի վերանորոգման բազաների զարգացում,
4) սննդի և վերամշակման ճյուղում, այդ թվում՝ սննդամթերքի արտադրության և վերամշակման ձեռնարկությունների արդիականացում,
5) ագրոպարենային համալիրում տնտեսավարման նոր ձևերի զարգացում և կատարելագործում,
6) տնտեսություն և ագրարային քաղաքականություն. գյուղատնտեսության և վերամշակող արդյունաբերության բնագավառներում առևտրային գործողությունների իրականացմանն առնչվող հաշվարկների ընթացքում տնտեսապես փոխշահավետ հարաբերություններ,
7) համագործակցություն ագրարային կրթության, ագրոարդյունաբերական համալիրի ձեռնարկությունների և կազմակերպությունների մասնագետների և ղեկավարների պատրաստման և վերապատրաստման բնագավառներում:
Համաձայնագրում կարող են ընդգրկվել համագործակցության այլ ուղղություններ՝ սույն Համաձայնագրի 9-րդ հոդվածով նախատեսված կարգով:
Հոդված 3
Կողմերը, իրենց իրավասության սահմանններում, Կողմերի պետությունների տարածքներում գործող օրենսդրություններին համապատասխան, աջակցություն և օգնություն կցուցաբերեն տնտեսական և գիտատեխնիկական համագործակցության յուրաքանչյուր Կողմի անմիջական մասնակիցներին, կապահովեն փոխշահավետ համագործակցություն ագրոպարենային համալիրի բնագավառում՝ Կողմերի պետություններում իրականացվող տնտեսական բարեփոխումների և շուկայական հարաբերությունների պայմաններում:
Կողմերը կաջակցեն գյուղատնտեսական արտադրանքի, նյութերի, սարքավորումների, էներգակիրների և գյուղատնտեսական արտադրանքի վերամշակման և փաթեթավորման համար տեխնոլոգիական գծերի փոխշահավետ առևտրի իրականացմանն ու ընդլայնմանը:
Հոդված 4
Համագործակցությունը սույն Համաձայնագրի շրջանակներում կարող է իրականացվել հետևյալ ձևերով.
1) գիտատեխնիկական և տնտեսական տեղեկության, գիտական հետազոտությունների արդյունքների փոխանակում, գիտաժողովների, սեմինարների և ցուցահանդեսների անցկացում,
2) սերմերի նմուշների, գյուղատնտեսական կենդանիների, տնկանյութի, մեքենաների և սարքավորումների փոխանակում՝ փորձարկումներ իրականացնելու համար,
3) գիտատեխնիկական և արտադրական կոոպերացում, համատեղ կազմակերպությունների, ձեռնարկությունների, բաժնետիրական ընկերությունների ստեղծում,
4) մասնագետների, ստաժավորվողների փոխանակում:
Համաձայնագրում կարող են ընդգրկվել համագործակցության այլ ուղղություններ՝ սույն Համաձայնագրի 9-րդ հոդվածով նախատեսված կարգով:
Հոդված 5
Կողմերը հաստատում են կենդանիների և կենդանական ծագում ունեցող արտադրանքի արտահանման և ներկրման նկատմամբ անասնաբուժական պահանջների մասին միջազգային կոնվենցիաներից և համաձայնագրերից բխող իրենց պարտավորությունները:
Հոդված 6
Կողմերը, հետևելով բույսերի կարանտինի և պաշտպանության հարցերով գործող միջազգային կոնվենցիաներից և համաձայնագրերից, որոնց մասնակիցներ են նրանք հանդիսանում, բխող իրենց պարտավորություններին, կհամագործակցեն մշակովի բույսերի հիվանդությունների և մոլախոտերի դեմ պայքարի մեթոդների մշակման և կիրառման բնագավառում:
Հոդված 7
Սույն Համաձայնագրի իրականացման աշխատանքները համակարգելու նպատակով Կողմերը կստեղծեն համատեղ աշխատանքային խումբ, որը կուսումնասիրի կոնկրետ համագործակցության նախագծեր և ծրագրեր, կնախապատրաստի առաջարկություններ՝ շահագրգիռ կառավարական մարմիններին` դրանց իրականացման կարգի վերաբերյալ, ինչպես նաև կհամաձայնեցնի սույն Համաձայնագրին համապատասխան իրականացվող համագործակցության համատեղ միջոցառումների մշակումն ու իրականացումը:
Համատեղ աշխատանքային խմբի նիստերը, փոխադարձ համաձայնության հիման վրա, տարին մեկ անգամ հաջորդաբար կգումարվեն Հայաստանի Հանրապետությունում և Բելառուսի Հանրապետությունում: Համատեղ աշխատանքային խմբի նիստերը ձևակերպվում են արձանագրություններով:
Հոդված 8
Սույն Համաձայնագիրը ուժի մեջ է մտնում սույն Համաձայնագրի ուժի մեջ մտնելու համար անհրաժեշտ ներպետական ընթացակարգերի կատարման մասին Կողմերի կողմից վերջին ծանուցումն ստանալու օրվանից և կգործի հինգ տարի ժամկետով: Նրա գործողությունը ինքնաբերաբար կերկարաձգվի հաջորդ հինգ տարիների համար, եթե Կողմերից որևէ մեկը սույն Համաձայնագրի հերթական 5 տարվա ժամկետը լրանալուց առնվազն վեց ամիս առաջ մյուս Կողմին գրավոր չհայտնի սույն Հանաձայնագրի գործողությունը դադարեցնելու իր մտադրության մասին:
Հոդված 9
Կողմերի փոխադարձ համաձայնությամբ Համաձայնագիրը կարող է փոփոխվել և լրացվել: Փոփոխությունների և լրացումների կատարումը ձևակերպվում են երկու Կողմերի կողմից ստորագրվող և սույն Համաձայնագրի անբաժանելի մասը հանդիսացող Արձանագրությամբ:
Կատարված է Մինսկ քաղաքում 2000 թվականի հուլիսի 19-ին, երկու բնօրինակով, յուրաքանչյուրը` հայերեն և ռուսերեն, ընդ որում բոլոր տեքստերն էլ հավասարազոր են:
Համաձայնագիրն ուժի մեջ է մտել 2001 թվականի հունվարի 22-ից:
