ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

9 ապրիլի 2009 թվականի N 370-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2002 ԹՎԱԿԱՆԻ ՓԵՏՐՎԱՐԻ 2-Ի N 91 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Հիմք ընդունելով «Քաղաքաշինության մասին» Հայաստանի Հանրապետության օրենքի 23-րդ հոդվածը` Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2002 թվականի փետրվարի 2-ի «Հայաստանի Հանրապետությունում շինարարության թույլտվության և քանդման թույլտվության կարգը հաստատելու մասին» N 91 որոշմամբ հաստատված կարգում կատարել հետևյալ փոփոխությունները`

1) 7-րդ կետը շարադրել հետևյալ խմբագրությամբ.

«7. Համայնքի վարչական սահմաններում շինարարության (քանդման) թույլտվությունը կառուցապատողին (սեփականատիրոջը կամ նրա կողմից սահմանված կարգով լիազորված անձին) տալիս է համայնքի ղեկավարը, համայնքի վարչական սահմաններից դուրս գտնվող տարածքներում` մարզպետը, եթե օրենքով այլ բան նախատեսված չէ:».

2) ուժը կորցրած ճանաչել կարգի 8-րդ և 9-րդ կետերը.

3) 10-րդ կետի առաջին նախադասությունում «7-րդ և 8-րդ կետերով» բառերը փոխարինել «7-րդ կետով» բառերով.

4) 10-րդ կետի երկրորդ և երրորդ նախադասությունները շարադրել հետևյալ խմբագրությամբ.

«Համայնքների ղեկավարները տրամադրած թույլտվության մասին նույն ժամկետում իրազեկում են նաև Հայաստանի Հանրապետության համապատասխան մարզպետներին: Երևանում սույն կետով սահմանված փոխհարաբերություններն իրականացվում են «Երևան քաղաքում տեղական ինքնակառավարման մասին» Հայաստանի Հանրապետության օրենքի պահանջներին համապատասխան:».

5) N 1 ձևում «Հայաստանի Հանրապետության մարզպետ, Երևանի քաղաքապետ, համայնքի ղեկավար» բառերը փոխարինել «Հայաստանի Հանրապետության մարզպետ, համայնքի ղեկավար» բառերով.

6) N 2 ձևում «Հայաստանի Հանրապետության մարզպետ, Երևանի քաղաքապետ, համայնքի ղեկավար» բառերը փոխարինել «Հայաստանի Հանրապետության մարզպետ, համայնքի ղեկավար» բառերով.

7) N 3 ձևում «ՀՀ մարզ (Երևան), համայնք» բառերը փոխարինել «ՀՀ մարզ, համայնք» բառերով.

8) N 4 ձևում «ՀՀ մարզ (Երևան), համայնք» բառերը փոխարինել «ՀՀ մարզ, համայնք» բառերով.

9) N 5 ձևում «Հայաստանի Հանրապետության մարզպետ, Երևանի քաղաքապետ, համայնքի ղեկավար» բառերը փոխարինել «Հայաստանի Հանրապետության մարզպետ, համայնքի ղեկավար» բառերով:

2. Սույն որոշումն ուժի մեջ է մտնում Երևանի ավագանու առաջին ընտրությունների արդյունքով Երևանի ավագանու անդամների ընտրվելու մասին որոշման պաշտոնական հրապարակումից հետո` հաջորդ երկուշաբթի օրը: