ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

27 դեկտեմբերի 2007 թվականի N 1565-Ն

ՕԶՈՆԱՅԻՆ ՇԵՐՏԸ ՔԱՅՔԱՅՈՂ ՆՅՈՒԹԵՐԻ ՀԱՇՎԱՌՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Օզոնային շերտը քայքայող նյութերի մասին» Հայաստանի Հանրապետության օրենքի 10-րդ հոդվածի 2-րդ մասի` Հայաստանի Հանրապետության կառավարությունը որոշում է.

1. Հաստատել օզոնային շերտը քայքայող նյութերի հաշվառման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Կ Ա Ր Գ

ՕԶՈՆԱՅԻՆ ՇԵՐՏԸ ՔԱՅՔԱՅՈՂ ՆՅՈՒԹԵՐԻ ՀԱՇՎԱՌՄԱՆ

1. Սույն կարգով կանոնակարգվում են օզոնային շերտը քայքայող նյութերի հաշվառման հետ կապված հարաբերությունները:

2. Օզոնային շերտը քայքայող նյութերի հաշվառումն օզոնային շերտը քայքայող նյութերի քանակական և որակական ցուցանիշների, ինչպես նաև դրանց ներմուծման, արտահանման և տարանցիկ փոխադրման հետ կապված գործարքների մասին տեղեկատվության անընդհատ փաստաթղթային արտացոլման համակարգ է, որը ներառում է դրանց` սույն կարգի 5-րդ կետով սահմանված տվյաների գրանցումն օզոնային շերտը քայքայող նյութերի հաշվառման գրքում (այսուհետ` հաշվառման գիրք) և փաստաթղթերի պահումը` դրանց համար առանձնացված թղթապանակում:

3. Օզոնային շերտը քայքայող նյութերի հաշվառումը (այսուհետ` հաշվառում) իրականացնում են`

1) Հայաստանի Հանրապետության բնապահպանության նախարարությունը (այսուհետ` լիազոր պետական մարմին)` սույն կարգի 5-րդ կետով սահմանված տվյալներն ու փաստաթղթերը հաշվառման գրքում գրառելու միջոցով, որի ձևը հաստատում է լիազոր պետական մարմնի ղեկավարը.

2) Հայաստանի Հանրապետության կառավարությանն առընթեր մաքսային պետական կոմիտեի տարածքային մարմինները (այսուհետ` մաքսային մարմիններ)` սույն կարգի 5-րդ կետի 4-րդ ենթակետով սահմանված տվյալներն ու փաստաթղթերը հաշվառման գրքում գրառելու միջոցով, որի ձևը հաստատում է Հայաստանի Հանրապետության կառավարությանն առընթեր մաքսային պետական կոմիտեի ղեկավարը:

4. Հաշվառման գրքերը համապատասխանաբար պետք է պարունակեն սույն կարգի 5-րդ կետով սահմանված տվյալները, և մինչև գրառումներ կատարելը դրանց էջերը պետք է լինեն համարակալված ու կարված, ինչպես նաև հաշվառման գիրքը պետք է ստորագրված ու կնքված լինի` սույն կարգի 3-րդ կետով սահմանված համապատասխան ղեկավար անձի կողմից: Հաշվառման գրքերն ու համապատասխան փաստաթղթերը պահվում են 5 տարի ժամկետով:

5. Լիազոր պետական մարմինը հաշվառում է օզոնային շերտը քայքայող նյութերի`

1) ներմուծման համար Հայաստանի Հանրապետության կառավարության համապատասխան որոշմամբ տվյալ տարվա համար ըստ առանձին նյութերի սահմանված ընդհանուր չափաքանակները, տվյալ նյութի միջազգային տեխնիկական անվանումը, նյութի քիմիական անվանումն ու խումբը, նյութի քիմիական բանաձևը, արտաքին տնտեսական գործունեության ապրանքային անվանացանկի (ԱՏԳ ԱԱ) ծածկագիրը, ինչպես նաև Հայաստանի Հանրապետության կառավարության համապատասխան որոշումը.

2) ներմուծման կամ արտահանման, կամ տարանցիկ փոխադրման թույլտվություն ստանալու մասին հայտը, հայտատուի տվյալները, խնդրարկվող օզոնային շերտը քայքայող նյութի (նյութերի) անվանումն ու քանակությունը.

3) ներմուծման անհատական չափաքանակ ստացողի տվյալները, սահմանված անհատական չափաքանակները և դրանց մնացորդային քանակությունները` ըստ առանձին նյութերի անվանումների ու խմբերի, դրանց ներմուծման համար սահմանված ժամանակահատվածը, ինչպես նաև Հայաստանի Հանրապետության կառավարության 2007 թվականի մայիսի 17-ի N 591-Ն որոշման համաձայն ընդունված` օզոնային շերտը քայքայող նյութերի` Հայաստանի Հանրապետություն ներմուծման անհատական չափաքանակի մասին որոշումները.

4) օզոնային շերտը քայքայող նյութերի առաքման` ներմուծման կամ արտահանման, կամ տարանցիկ փոխադրման թույլտվությունը, թույլտվության համարը, թույլտվություն ստացող իրավաբանական կամ ֆիզիկական անձի տվյալները, թույլատրված` օզոնային շերտը քայքայող նյութի (նյութերի) անվանումն ու քանակությունը, ներմուծման դեպքում` արտահանող երկրի և ներմուծման մաքսային ձևակերպումներն իրականացրած մաքսային մարմնի անվանումներն ու ներմուծման ամսաթիվը, արտահանման դեպքում` ներմուծող երկրի և արտահանման մաքսային ձևակերպումներն իրականացրած մաքսային մարմնի անվանումներն ու ամսաթիվը, տարանցիկ փոխադրման դեպքում` մուտքի և ելքի մաքսային մարմինների անվանումներն ու ամսաթվերը.

5) «Օզոնային շերտը քայքայող նյութերի մասին» Հայաստանի Հանրապետության օրենքի 8-րդ հոդվածի 4-րդ մասի համաձայն ներկայացված ներմուծման անհատական չափաքանակի օգտագործման մասին տարեկան հաշվետվությունը (այսուհետ` հաշվետվություն), հաշվետվություն ներկայացնողի տվյալները և հաշվետվության ստացման ամսաթիվը, ինչպես նաև հաշվետվությունում ներառված տվյալները` ըստ նյութերի անվանումների, օգտագործման տեսակի ու քանակության` ներառյալ մնացորդային քանակության և օգտագործման ժամանակահատվածը կամ ամսաթիվը:

6. Մաքսային մարմինները սույն կարգի 5-րդ կետի 4-րդ ենթակետով սահմանված` օզոնային շերտը քայքայող նյութերի ներմուծման կամ արտահանման, կամ տարանցիկ փոխադրման մասին տեղեկությունները լիազոր պետական մարմին են ներկայացնում մաքսային ձևակերպումների ավարտից հետո` մինչև հաջորդ ամսվա 25-ը: