602.0004.24.01.02

ՀՀ արդարադատության

նախարարության կողմից

31 հունվարի 2002 թ.

Պետական գրանցման թիվ 60202020

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ԱԶԳԱՅԻՆ ՀԱՆՁՆԱԺՈՂՈՎ

Ո Ր Ո Շ ՈՒ Մ

ՀԵՌՈՒՍՏԱՌԱԴԻՈՀԱՂՈՐԴՈՒՄՆԵՐԻ ՀԵՌԱՐՁԱԿՄԱՆ ԼԻՑԵՆԶԱՎՈՐՄԱՆ ՄՐՑՈՒՅԹԻ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Հեռուստատեսության և ռադիոյի մասին» ՀՀ օրենքի 47-րդ հոդվածի դրույթներով՝ Հեռուստատեսության և ռադիոյի ազգային հանձնաժողովը որոշում է.

Հաստատել հեռուստառադիոհաղորդումների հեռարձակման լիցենզավորման մրցույթի կարգը (կցվում է):

ՀԵՌՈՒՍՏԱՌԱԴԻՈՀԱՂՈՐԴՈՒՄՆԵՐԻ ՀԵՌԱՐՁԱԿՄԱՆ ԼԻՑԵՆԶԱՎՈՐՄԱՆ ՄՐՑՈՒՅԹԻ

Կ Ա Ր Գ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույնով կանոնակարգվում է հեռուստառադիոհաղորդումների (հեռուստահաղորդումների կամ ռադիոհաղորդումների) հեռարձակման, ինչպես նաև օտարերկրյա հեռուստառադիոընկերությունների հաղորդումների ամբողջական վերահեռարձակման մրցույթով լիցենզավորումը:

2. Մրցույթն անցկացնում է Հեռուստատեսության և ռադիոյի ազգային հանձնաժողովը (այսուհետ՝ Հանձնաժողով)՝ Հայաստանի Հանրապետության օրենսդրության և սույն կարգի համաձայն:

3. Հեռուստառադիոհաղորդումների հեռարձակման լիցենզիայի գործողության ժամկետը լրանալուց երկու ամիս առաջ Հանձնաժողովը հայտարարում է լիցենզավորման մրցույթ:

Մրցույթ կարող է հայտարարվել նաև ազատ հաճախության (կապուղու, հաճախությունների շերտի) առկայության դեպքում:

4. Մրցույթին մասնակցում են միայն իրավաբանական անձինք:

5. Մրցույթն անցկացվում է հրապարակային կարգով:

II. ՄՐՑՈՒՅԹԻ ՄԱՍԻՆ ՏԵՂԵԿԱՏՎՈՒԹՅԱՆ ՀՐԱՊԱՐԱԿՈՒՄԸ

6. Հանձնաժողովը զանգվածային լրատվության միջոցներով հայտարարում է մրցույթ՝ հրապարակելով հետևյալ տեղեկատվությունը`

ա) լիցենզավորման ենթակա գործունեությունը.

բ) լիցենզիայով հատկացվող հաճախության նոմինալը.

գ) հաճախության բնութագիրը.

դ) հաղորդումների սփռման տարածքը (գոտին).

ե) մրցույթի պայմանները.

զ) մրցույթի անցկացման օրը, ժամը, վայրը.

է) դիմումի ձևը և օրենքով սահմանված անհրաժեշտ փաստաթղթերի ցանկը.

ը) դիմումի, անհրաժեշտ փաստաթղթերի և մրցութային առաջարկի ընդունման ժամկետը և վայրը.

թ) լիցենզային վճարի չափը և մուծման ձևը.

ժ) լրացուցիչ տեղեկություններ ստանալու աղբյուրը (հեռախոսահամար, ֆաքս, էլ. փոստ):

III. ՄՐՑՈՒՅԹԻ ՊԱՅՄԱՆՆԵՐԸ ԵՎ ՄՐՑՈՒԹԱՅԻՆ ԱՌԱՋԱՐԿԸ

7. Մրցույթի պայմանները այն նվազագույն պահանջներն են, որոնք Հանձնաժողովը առաջադրում է մասնակիցներին տվյալ հաճախությամբ հեռուստառադիոհաղորդումների հեռարձակման լիցենզիա ստանալու համար:

8. Մրցույթի պայմանները սահմանելիս Հանձնաժողովը հաշվի է առնում.

ա) տվյալ սփռման տարածքում հեռուստառադիոծրագրերի միջոցով լսարանի հասարակական-քաղաքական, սոցիալ-տնտեսական, մշակութային, գիտալուսավորչական, կրթական, մարզական, ժամանցի և հանրության համար կարևոր այլ տեղեկատվությամբ ապահովվածությունը, իսկ օտարերկրյա հեռուստառադիոհաղորդումների ամբողջական վերահեռարձակման լիցենզիա տալու համար՝ նաև դրանց արտադրության անհնարինությունը.

բ) տվյալ սփռման տարածքում հեռուստատեսության և ռադիոյի բնագավառում տնտեսվարման յուրահատկությունները.

Մրցույթի պայմանները կարող են պարունակել պահանջներ հեռուստառադիոծրագրերի թեմատիկայի և ուղղվածության, հեռուստառադիոծրագրերի արտադրության և հեռարձակման տեխնիկական չափանիշների ու ստանդարտների, ներդրումային և զարգացման ծրագրերի մասին:

9. Մրցութային առաջարկում դիմողը առաջարկություններ է ներկայացնում մրցույթի պայմաններում նշված պահանջներից յուրաքանչյուրի վերաբերյալ: Մրցութային առաջարկը կարող է պարունակել լրացուցիչ առաջարկություններ:

IV. ՄՐՑՈՒՅԹԻ ԸՆԹԱՑԱԿԱՐԳԸ

10. Հանձնաժողովը մրցույթին մասնակցելու դիմումը, անհրաժեշտ փաստաթղթերը և մրցութային առաջարկը ընդունում է մրցույթի մասին տեղեկատվությունը հրապարակելու օրվանից սկսած 25 օրվա ընթացքում, առձեռն՝ ստացականով: Մրցութային առաջարկը ներկայացվում է կարված, դիմողի կնիքով կնքված, երկու օրինակից: Մրցութային առաջարկի օրինակները դիմողի ներկայությամբ ծրարվում են Հանձնաժողովի քարտուղարության աշխատակցի կողմից և կնքվում դիմողի և Հանձնաժողովի կնիքներով: Մրցութային առաջարկը ծրարելիս արգելվում է ծանոթանալ նրա բովանդակությանը:

Դիմումը և անհրաժեշտ փաստաթղթերն ընդունելիս դրանցում առկա թերությունների մասին Հանձնաժողովը հայտնում է դիմողին՝ այդ մասին նշում կատարելով ստացականում:

11. Մրցույթի մասնակից է համարվում այն իրավաբանական անձը, որը ժամանակին և սահմանված կարգով Հանձնաժողովի քարտուղարություն է ներկայացրել դիմում, անհրաժեշտ փաստաթղթեր և մրցութային առաջարկ: Դիմողը մրցույթի մասնակից չի համարվում, եթե փաստաթղթերում առկա թերությունները չեն շտկվել ստացականը ստանալու օրվան հաջորդող տասնօրյա ժամկետում:

12. Հանձնաժողովը դռնբաց նիստում հայտերը քննարկում է ըստ գրանցման հերթականության:

13. Մրցութային առաջարկը ներկայացնելու համար Հանձնաժողովը մասնակցին է տրամադրում կնքված փակ ծրարը: Մասնակիցն իրավունք չունի հանդես գալ ծրարում ներկայացվածից տարբերվող առաջարկով:

Մրցույթի մասնակիցն իրավունք ունի մրցութային առաջարկի ներկայացմանը ներգրավել մասնագետի և թարգմանչի: Մասնակիցը կամ նրա շահերի պաշտպանը մրցութային առաջարկը ներկայացնելու համար իրավունք ունի ելույթ ունենալ 30 րոպե տևողությամբ, պատասխանել Հանձնաժողովի անդամների հարցերին, հարուցել միջնորդություններ: Հարուցված միջնորդության կապակցությամբ Հանձնաժողովի որոշումը վերջնական է:

Հարց ու պատասխանի համար տրամադրվում է 15 րոպե ժամանակ:

Նիստին չներկայացած մասնակցի հայտը քննության չի առնվում:

14. Նիստում մասնակիցների մրցութային առաջարկների հրապարակումից հետո Հանձնաժողովը կարող է ընդհատել նիստը՝ մրցութային առաջարկների ուսումնասիրման, անհրաժեշտ մասնագիտական խորհրդատվություն, փորձագիտական եզրակացություն ստանալու համար:

15. Լավագույն կազմակերպության ընտրությունը Հանձնաժողովը կատարում է մրցույթի մասին տեղեկատվությունը հրապարակելու օրվանից սկսած 40-րդ օրը:

16. Հեռարձակման լիցենզիա տալու համար մասնակիցների միջև ընտրությունը կատարվում է, հաշվի առնելով՝

ա) սեփական արտադրության հաղորդումների գերակայությունը.

բ) հայրենական արտադրության հաղորդումների գերակայությունը.

գ) մասնակցի տեխնիկական և ֆինանսական հնարավորությունները.

դ) աշխատակազմի մասնագիտական պատրաստվածությունը:

Ազատվող հաճախությամբ հեռարձակման լիցենզիա տալու համար այլ հավասար պայմանների առկայության դեպքում նախապատվությունը տրվում է այն հեռուստառադիոընկերությանը, որը՝

ա) գործունեության ընթացքում հեռուստատեսության և ռադիոյի մասին օրենսդրության խախտումներ թույլ չի տվել.

բ) հեռուստառադիոհաղորդումների արտադրության և հեռարձակման բնագավառում ունի առնվազն 3 տարվա փորձ:

17. Տվյալ ընդգրկույթի (դիապազոնի) համար հաճախությունների 1/5-ը զբաղված չլինելու դեպքում Հանձնաժողովը նախապատվությունը կարող է տալ օտարերկրյա հեռուստառադիոհաղորդումների ամբողջական վերահեռարձակողին:

18. Ըստ մրցույթի հայտերը քննարկելու հերթականության Հանձնաժողովը անցկացնում է բաց վարկանիշային քվեարկություն: Վարկանիշային քվեարկության արդյունքներով ընտրվում է լավագույն կազմակերպությունը:

V. ՄՐՑՈՒՅԹՈՒՄ ՀԱՂԹՈՂ ՃԱՆԱՉԵԼԸ

19. Հանձնաժողովը որոշում է ընդունում լավագույն կազմակերպությանը հաղթող ճանաչելու և հեռուստառադիոհաղորդումների հեռարձակման լիցենզիա տալու մասին:

20. Հանձնաժողովը որոշումը հրապարակում է այն ընդունելուց անմիջապես հետո:

21. Որոշումն ընդունելու հաջորդ օրը մրցույթի արդյունքների մասին կազմվում է արձանագրություն՝ երկու օրինակից: Արձանագրությունում նշվում են՝

ա) լիցենզավորման ենթակա գործունեությունը.

բ) լիցենզիայով հատկացվող հաճախության նոմինալը.

գ) հաճախության բնութագիրը.

դ) հեռուստառադիոհաղորդումների սփռման տարածքը.

ե) հաղթող ճանաչված կազմակերպության մրցութային առաջարկը.

զ) լիցենզային վճարի չափը և մուծման ձևը.

է) մրցույթի անցկացման վայրը և ժամանակը.

ը) տեղեկություններ հաղթողի և մրցույթի մյուս մասնակիցների մասին:

Հաղթող ճանաչված կազմակերպության մրցութային առաջարկը համարվում է լիցենզիայի պայման:

Արձանագրությունը ստորագրում են նիստը նախագահողը և մրցույթի հաղթողը: Արձանագրության մեկ օրինակը հանձնվում է մրցույթի հաղթողին:

22. Հանձնաժողովի որոշման պատճենը այն ընդունելուց հետո տասնօրյա ժամկետում պատշաճ ձևով ուղարկում է մրցույթի մասնակիցներին:

23. Մրցույթի արդյունքները տասնհինգօրյա ժամկետում հրապարակվում են զանգվածային լրատվության միջոցներով:

VI. ՄՐՑՈՒՅԹԸ ՉԿԱՅԱՑԱԾ ՀԱՅՏԱՐԱՐԵԼԸ

24. Հանձնաժողովն իր որոշմամբ մրցույթը հայտարարում է չկայացած, եթե՝

ա) սահմանված ժամկետում ոչ մի դիմում չի տրվել.

բ) մասնակիցներից ոչ մեկը չի բավարարել մրցույթի պայմանները.

գ) սույն կարգի 21-րդ կետով սահմանված ժամկետում մրցույթի արդյունքների մասին արձանագրությունը հաղթողի կողմից չի ստորագրվել կամ լիցենզային վճարը չի մուծվել: