«Վավերացնում եմ»
Հայաստանի Հանրապետության
Նախագահ Ռ. Քոչարյան
 9 հունիսի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

17 մարտի 2005 թվականի N 658-Ն

ԵՐԵՎԱՆԻ «ՋՐՄՈՒՂ-ԿՈՅՈՒՂԻ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ԿՈՂՄԻՑ ՇԱՀԱԳՈՐԾՎՈՂ ՈՒ ՊԱՀՊԱՆՎՈՂ ՋՐԱՅԻՆ ՀԱՄԱԿԱՐԳԵՐԸ ԵՎ ԱՅԼ ԳՈՒՅՔ ՎԱՐՁԱԿԱԼՈՒԹՅԱՄԲ ՓՈԽԱՆՑԵԼՈՒ ՄԻՋՈՑԱՌՈՒՄՆԵՐԻ ՈՒ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2003 ԹՎԱԿԱՆԻ ՀՈՒՆՎԱՐԻ 30-Ի N 243-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

Երևանի «Ջրմուղ-կոյուղի» փակ բաժնետիրական ընկերության կողմից շահագործվող ու պահպանվող ջրային համակարգերը և այլ գույք մրցույթով վարձակալությամբ փոխանցելու գործընթացները կազմակերպելու և կանոնակարգելու նպատակով Հայաստանի Հանրապետության կառավարությունը որոշում է.

1. Հաստատել Երևանի «Ջրմուղ-կոյուղի» փակ բաժնետիրական ընկերության կողմից շահագործվող ու պահպանվող ջրային համակարգերի և այլ գույքի օգտագործման իրավունքը վարձակալությամբ փոխանցելու մրցույթի կազմակերպման առաջարկ ներկայացնելու հրավերի փաթեթը, որը բաղկացած է «Ցուցումներ հայտատուներին» մասից և վարձակալության պայմանագրի նախագծից:

Ընդունել ի գիտություն, որ սույն որոշման 1-ին կետում նշված առաջարկ ներկայացնելու հրավերի փաթեթի բաղկացուցիչ մաս են հանդիսանում ջրային համակարգի օգտագործման թույլտվության պայմանները, որոնք փաթեթում կներառվեն Հայաստանի Հանրապետության հանրային ծառայությունները կարգավորող հանձնաժողովի կողմից հաստատվելուց հետո:

3. Սահմանել, որ`

ա) Երևանի «Ջրմուղ-կոյուղի» փակ բաժնետիրական ընկերության կողմից շահագործվող ու պահպանվող ջրային համակարգերի և այլ գույքի վարձակալությամբ փոխանցման ժամկետը 10 տարի է.

բ) վարձակալությամբ հանձնված` Երևանի «Ջրմուղ-կոյուղի» փակ բաժնետիրական ընկերության կողմից շահագործվող ու պահպանվող ջրային համակարգերի և այլ գույքի վարձակալության դիմաց վարձակալի կողմից վճարվող վարձավճարը կազմելու է Երևան քաղաքի ջրամատակարարման ու ջրահեռացման ոլորտի զարգացման համար Համաշխարհային բանկի կողմից տրված 1-ին և 2-րդ վարկերի սպասարկման գումարը (Համայնքային զարգացման ծրագրի վարկի սպասարկման գումար (տոկոսների և հիմնական գումարի վճարում) և Երևանի ջրամատակարարման և ջրահեռացման ծրագրի վարկի տոկոսների վճարում), իսկ վարձավճարի հաշվարկումը կատարվելու է վարկի հիմնական գումարի և տոկոսների հետվերադարձման համար վարկային համաձայնագրերում վարկառուի համար սահմանված հաշվարկման կարգի համաձայն:

4. Հայաստանի Հանրապետության կառավարության 2003 թվականի հունվարի 30-ի «Պետական սեփականություն հանդիսացող ջրային համակարգերի օգտագործման իրավունքի վարձակալությամբ փոխանցման կարգը հաստատելու մասին» N 243-Ն որոշման մեջ կատարել հետևյալ լրացումը`

որոշումը 1-ին կետից հետո լրացնել հետևյալ բովանդակությամբ նոր` 1¹-ին կետով.

«1¹. Պետական սեփականություն հանդիսացող ջրային համակարգերը վարձակալությամբ փոխանցելու առանձին դեպքերում Հայաստանի Հանրապետության կառավարությունը կարող է սահմանել ջրային համակարգերը վարձակալությամբ փոխանցելու այլ կարգ»:

5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից: