● գիտական և տեխնիկական տեղեկատվության փոխանակումը:

Համագործակցությունը կարող է իրականացվել նաև Կողմերի միջև համաձայնեցված այլ միջոցներով, որոնք կապահովեն սույն Հուշագրի իրականացումը:

Համագործակցության ձևերն ընտրելիս և սահմանելիս Կողմերն առաջնորդվում են բացառապես գիտության զարգացման և երկու երկրների տնտեսական ու սոցիալական առաջընթացի շահերով:

ՀՈԴՎԱԾ 5

Սույն Հուշագրի շրջանակներում համագործակցությունը կիրականացվի Առևտրատնտեսական և տեխնիկական համագործակցության համատեղ հանձնաժողովի գործունեության շրջանակներում` հիմք ընդունելով 2002 թվականի ապրիլի 20-ի՝ «Հայաստանի Հանրապետության կառավարության և Արաբական Միացյալ Էմիրությունների կառավարության միջև առևտրատնտեսական և տեխնիկական համագործակցության մասին» Համաձայնագրի 7-րդ հոդվածի դրույթները:

Սույն Հուշագրի շրջանակներում գիտական համագործակցության կազմակերպումը կիրականացնեն Հայաստանի Հանրապետության կողմից` Հայաստանի Հանրապետության կրթության և գիտության նախարարության գիտության պետական կոմիտեն, իսկ Արաբական Միացյալ Էմիրությունների կողմից` կրթության նախարարությունը:

ՀՈԴՎԱԾ 6

Հաշվի առնելով փորձագիտական նախագծման և գիտական հետազոտությունների զարգացումը միջազգային մակարդակի վրա պահելու կարևորությունը` Կողմերը փոխշահավետ պայմաններով կխրախուսեն նոր տեխնոլոգիաների փոխանակումը: Նրանք հատուկ ուշադրություն կդարձնեն գիտնականների համար նոր և եզակի փորձարարական կայանների, սարքերի, սարքավորումի հասանելիությանը և համագործակցության հիմունքներով կմասնակցեն դրանց մշակմանը, արտադրությանն ու ձեռքբերմանը:

ՀՈԴՎԱԾ 7

Հաշվի առնելով հեղինակային և սեփականության իրավունքները` Կողմերը, երկու երկրների ազգային օրենսդրությանը համապատասխան, համաշխարհային գիտական հանրությանը հասանելի կդարձնեն համագործակցության ընթացքում ստացված գիտական և գիտատեխնիկական տեղեկությունները` կիրառելով տեղեկությունների տարածման ընդունված եղանակները:

ՀՈԴՎԱԾ 8

Կողմերը, իրենց ազգային օրենսդրություններին համապատասխան, կապահովեն սույն Հուշագրի շրջանակում իրականացվող համագործակցության արդյունքում ստեղծված մտավոր սեփականության իրավունքների պաշտպանությունը: Մտավոր սեփականության իրավունքների պաշտպանությանն ու կիրառմանն առնչվող հարցերը կարգավորվում են սույն Հուշագրի 3-րդ հոդվածում հիշատակված մարմինների և կազմակերպությունների միջև ստորագրված համաձայնագրերով` հաշվի առնելով յուրաքանչյուր Կողմի ազգային օրենսդրությունը:

ՀՈԴՎԱԾ 9

Սույն Հուշագիրը չի ազդի Կողմերի մասնակցությամբ այլ միջազգային պայմանագրերից բխող Կողմերի իրավունքների և պարտավորությունների վրա: Սույն Հուշագրի դրույթներն իրականացվում են Կողմերի ազգային օրենսդրություններին համապատասխան:

ՀՈԴՎԱԾ 10

Կողմերի համաձայնությամբ սույն Հուշագրում կարող են կատարվել փոփոխություններ և լրացումներ, որոնք կձևակերպվեն գրավոր կերպով` առանձին արձանագրություններով և կկազմեն սույն Հուշագրի անբաժանելի մասը:

ՀՈԴՎԱԾ 11

Սույն Հուշագրի մեկնաբանման և իրականացման ընթացքում առաջացած վեճերը և տարաձայնությունները կկարգավորվեն խորհրդակցությունների և բանակցությունների միջոցով:

ՀՈԴՎԱԾ 12

Սույն Հուշագիրն ուժի մեջ է մտնում վերջին ծանուցումն ստանալու օրվանից, երբ Կողմերից մեկը դիվանագիտական ուղիներով մյուս Կողմին տեղեկացնում է դրա ուժի մեջ մտնելու համար անհրաժեշտ ներքին իրավական ընթացակարգերի ավարտի մասին: Սույն Հուշագիրը գործում է հինգ տարի ժամկետով:

Սույն Հուշագրի գործողության ժամկետն ինքնաբերաբար կերկարաձգվի հաջորդ հնգամյա ժամկետներով, քանի դեռ Կողմերից որևէ մեկը սույն Հուշագրի գործողության ժամկետի ավարտից վեց ամիս առաջ դիվանագիտական ուղիներով մյուս Կողմին չի ծանուցել սույն Հուշագիրը դադարեցնելու իր մտադրության մասին:

Սույն Հուշագրում կատարված փոփոխությունները կամ դրա դադարեցումը չեն ազդի փոփոխություններից և դադարեցումից առաջ Հուշագրի շրջանակում Կողմերի ստանձնած իրավունքների և պարտավորությունների վրա:

Կատարված է Դուբայ քաղաքում, 2016 թվականի նոյեմբերի 10-ին, երկու բնօրինակով` յուրաքանչյուրը հայերեն, արաբերեն և անգլերեն, ընդ որում բոլոր տեքստերն էլ հավասարազոր են: Սույն Հուշագրի մեկնաբանման ընթացքում տարաձայնությունների դեպքում` նախապատվությունը կտրվի անգլերեն տեքստին:

Համաձայնագիրն ուժի մեջ է մտել 2017թ. մայիսի 25-ին